Bo bamana kutunga nzaza, Nowa, dikanda dyandi, ayi bibulu bakota mu nzaza. Yave wuzibika mwelo, bosi mvula yitona kunoka. Mvula yinoka beni ayi nlangu wuwala muma moso ayi nzaza yitona kulalama. Nlangu wuyiza wala va ntoto woso. Batu boso baba mavanga mambi bamana kufwa. Vayi Nowa ayi dikanda dyandi bavuka. Ngye wulenda yindula mayangi bamona bo batumamana Yave?

Mvula beni yinokina 40 di bilumbu mwinya ayi bwilu. Bosi Nzaza yi sikama va mbata mongo. Vayi bo nlangu wuwadila ngolo ntoto woso, diawu Nowa ayi dikanda dyandi bamanga fika basikila mu nzaza.

Buvyokila thangu, nlangu wuyiza kuma. Vayi Nowa ayi dikanda dyandi bakala mu nzaza mvu wumweka. Bosi Yave wuvana nswa wu kubasika mu nzaza. Bukyedika yiba mbandu yimona kibila batu boso baba vanganga mambi va meso ma Yave bamana kufwa. Nowa ayi dikanda dyandi baba beni mayangi kibila Nzambi wubavukisa mu khuka beni. Diawu bavanina khayilu kwidi Yave buka yivana Abeli.

Yave wuyangalala mu khayilu beni. Diawu Yave kakanikisila ti kalendi ko bwe bunga batu mu khuka yi nlangu. Mwingi Nowa ayi dikanda dyandi babika kuzimbakana lukanu beni, Yave wubamonisa nkyama ku diyilu, mwingi batebukanga moyo. Ngye wumana mona nkyama? Bo wummona nkyama ku diyilu fweti tebukanga moyo mambu Yave kakanikisa.

Yave wukamba Nowa ayi dikanda dyandi babuta bana ayi bawesa batu va ntoto.