Bo Abalami ayi Salai bakwela va vyoka mimvu miwombo, kuntwala bawu ba bika bima byoso dedi nzo yiba kitoko ayi basola kuzingila va divwala diphamba. Salai kabasa nyonginanga ko nzingulu yimona baba nata, vayi nandi wuba lufyatu mu Yave ayi wuzaba ti Nandi wala kubakyeba.

Salai waba tomba beni kuba na mwana, diawu kakambila Abalami: ‘Ngye kubuta mwana na Hangali mwan’ami wu kisalu, mwana kala buta yala kummwena buka wama veka.’ Vasa vyoka ko thangu yiwombo, Hangali wiza buta mwana wu dibakala batedila Isamaeli.

Abalami bo kaba 99 di mimvu ayi Salai 89 di mimvu, bawu batambula babakala batatu ku nzo’awu. Abalami wubatumisa mwingi bavundila ku nzo’andi ayi wubakadisa ku tsi nti mwingi badya. Ngye zebi babakala beni baba banani? Baba zimbasi! Wumweka mu bawu wukamba Abalami: ‘Mvu wunkwiza ngye na nkazi’aku, mwala buta mwana wu dibakala. Salai wuba va divwala, wuyuwa mambu matuba mbasi, wutona kuseva ayi waba yindula: ‘Minu yimanuna. Bwidi yilenda butila mwana?’

Mvu wulandakana, dedi bo mbasi yi Yave katubila, Salai wubuta mwana wu dibakala ayi Abalami wuntedila Isaki, mansundula “Disevu dinneni.”

 Bo Isaki kadukisa mimvu mi 5, Salai wumona ti Isamaeli wutona kusakinina Isaki ayi kumvangila buka kiphala. Vayi Salai waba tomba kukyeba mwan’andi, diawu kakambila Abalami kakukisa Hangali ayi mwan’andi Isamaeli. Va thonono, Abalami kasa zola ko diyindu beni. Vayi Yave wunkamba: ‘Vanga mambu nkazi’aku Salai ka kukamba. Bika kumona boma, minu veka yinkwiza kyeba Isamaeli. Kibila zikhanu zyami yi kukanikisa mu Isaki zyala salimina kubika kwandi mu Isamaeli.’