Bwala bufikama na Babeli baba tedilanga Uli, batu boso baba zingilanga kuna bamanga kubwongimina Yave, vayi zinzambi zi bitumba baba bwongiminanga. Angi vaba dibakala dimweka diba diswasana. Dizina dyandi Abalami. Nandi waba bwongiminanga Yave Nzambi.

Yave wukamba Abalami: ‘Bika nzo’aku ayi dikanda dyaku ayi yenda ku tsi yi kinanu minu feka yala kumonisina kibwangu wala zingila.’ Bosi ko Nzambi wukanikisa Abalami: ‘Nkunu’aku wunkwiza ba wunnene ayi mu kibila kyaku yinkwiza sakumunina batu boso va ntoto.’

Abalami kasa zaba ko kibwangu Yave kaba kumfila, vayi nandi wufyatila mu Yave. Abalami, nkazi’andi Salai, tat’andi Tela ayi mwan’andi khazi Loti, bakanga byuma byawu byoso ayi batona kudyata mwingi kuvitila va kibwangu Yave kabatomba bazingila.

 Abalami bo kaba 75 di mimvu buawu nandi ayi dikanda dyandi bavitila va bwangu Yave kaba tomba bazingila. Divula beni baba tanguninanga diawu Kanana. Kuawu Yave kakanikisila Abalami mambu amama: ‘Ntoto woso awowo wummona, yala vana wawu kwidi bana baku ayi batekulu baku.’ Bo Yave kakanikisa mambu amomo kwidi Abalami ayi Salai, buna bawu bama nuna. Vayi bwidi Yave kadedikisila lukanu lwandi?