Bo ku Isaeli kuyiza ba nzala yiwombo, nkyeto wumweka mwisi Isaeli baba tanguninanga Naomi, bayenda ayi nnuni’andi na bana bawu babwadi kwezingila ku tsi yi Moabi. Vasa vyoka ko bilumbu biwombo, nnuni Naomi wiza fwa. Bana bandi biza kwela bakyeto basi Moabi, mazina mawu: Luti ayi Olopa. Vayi vasa bwe vyoka ko mimvu miwombo, bana bandi ba babakala mvandi biza fwa.

Naomi bo kayuwa ti nzala yimana ku Isaeli, nandi wubaka makani ma kuvutuka ku tsi’andi. Luti ayi Olopa batona kunlandakana. Angi mu nzila, Naomi wubakamba: ‘Benu mubedi bakazi bamboti kwidi bana bami ayi mwidi bakwekizi bamboti kwidi minu. Vayi minu yintomba benu mu bwe kwela. Dyawu vutukanu ku Moabi.’ Bawu bamvutudila: ‘Befu tukuzolanga beni! Tutidi kwenda yaku.’ Angi Naomi wutatamana kubakamba bavutuka ku tsi’awu. Olopa, bo kamona abobo, wiza vutuka kwandi, vayi Luti wumanga. Diawu Naomi kankambila: ‘Tala, Olopa mavutuka kwidi dikanda dyandi ayi zinzambi zyandi, mboti wunlandakana!’ Vayi Luti wumvutudila: ‘Minu yisi kubika ko. Dikanda dyaku, dyala ba dikanda dyami ayi Nzambi’aku yala ba Nzambi’ami.’ Mu mbwenu’aku, bwidi Naomi kamwena mu ntima bo kayuwa mambu ma nkamba Luti?

Luti ayi Naomi batula ku tsi yi Isaeli mu thangu batu bantonanga kuvela mbongo. Kilumbu kimweka, Luti wuyenda mu ndima yi Boazi mwana wu Lahabi mwingi kuvela mbongo. Boazi wuyuwa ti Luti wuba nkyeto mwisi Moabi wuba wukwikama mu kukala na Naomi. Dyawu kakambila bisadi byandi babika mwa nkadu mbongo mwingi Luti kanata ku nzo.

 Bo bwisi buyila, Luti wuvutuka ku nzo. Naomi wunyuvula: ‘Ndima yi nani be sadila mu kilumbu akiki?’ Luti wumvutudila: ‘Mu ndima yi Boazi.’ Naomi wunkamba: ‘Boazi mwisi dikanda di nnuni’ami. Diawu, tatamana kusadila mu ndima yi Boazi na bakyeto bankaka, ngye wala ba nsika.’

Luti wutatamana kusadila mu ndima yi Boazi ti bamana kuvela mbongo. Boazi wumona ti Luti waba tyanga beni kusala ayi zikhadulu zimboti ziba yandi. Mu thangu beni, boti dibakaIa fwidi mu khambu buta mwana na nkazi’andi, muna dibakala dinkaka va dikanda beni wuba nswa mu kukwela nkyeto beni befwulu nnuni. Diawu Boazi kakwedila Luti. Bawu babuta mwana wumweka batedila Obedi, wuyiza ba khaya voti khaka yi ntinu Davidi. Bakundi ba Naomi bayangalala beni ayi bankamba: ‘Yave wukuvana theti Luti wunkwangidikanga beni ntim’aku, nandi ma kuvana mvandi ntekolo. Bika Yave kazitusu.’