Yonatani nandi wuba mwana wutheti wu Sauli, ayi wuba disodi di ngolo dikhambu boma. Diawu Davidi katubila ti Yonatani vyokidi Kibala mu nzaki ayi vyokidi mangolo ke na Khosi. Kilumbu kinkaka bo Yonatani kadengana 20 ma basi Filisteia va mbata mongo nandi wukamba masodi mandi: ‘Tunkwiza nwana yawu, Yave na kutuvana kidimbu mwingi tuvanga ma katidi. Ba kutuba tutombuka mwingi tunwana yawu, bosi ma tutombuka mongo mwingi kuba nwanisa.’ Basi Filisteia bo batenduka: ‘Yizanu tunwana’ bosi bawu batombuka ayi banunga mvita beni.

Bo kaba mwana wutheti mu bana boso ba Sauli, mu nswa khanu nandi wuvinginina tat’andi va luyalu. Vayi Yonatani wuzaba ti Yave Davidi kasola mwingi kuvinginina Sauli va luyalu lu bana ba Isaeli, ayi nandi kasa mona ko Davidi nsoki. Angi nandi wuyiza ba nkundi ngolo wu Davidi.  Bawu bakanikisa kukyebasana ayi kusalasana. Yonatani wuvana Davidi yunga kyandi, mbedi, ḿbasu ayi cinto mwingi kamonisa kikundi ki ngolo kaba mu Davidi.

Bo Davidi kaba tina ntinu Sauli, Yonatani wuyenda mwingi kakindisa Davidi ayi wunkamba: ‘Kindama ayi ba kibakala. Yave ngye kasodidi mwingi wuba ntinu ayi tat’ami zebi mawu buboti.’ Ngye mvaku tidi kuba nkundi wu lufyatu buka Yonatani?

Kilumbu kinkaka, Yonatani wubwe tula luzingu lwandi va kingela bo kabakula ti tat’andi Sauli waba tomba kuvonda Davidi. Nandi wukamba tat’andi: ‘Ngye kuvonda Davidi disumu dibobo wambakana; kibila ni dyambu dimbi kasa kuvanga ko. Yindula phila kama kusadisila.’ Sauli wufwema beni. Vasa vyoka ko bilumbu biwombo, Sauli ayi Yonatani bafwila mu mvita.

Bo Yonatani kafwa, Davidi wutomba Mefiboseti mwana wu Yonatani. Bo kambakula, nandi wunkamba: ‘Mu kibila ki kikundi kimboti tubedi na tat’aku, minu yimtomba ngye wuzinga yama, yinkwiza kusadisa mu zitsatu zyaku zyoso zi luzingu ayi wunkwiza dilanga va mesa mami yindilanga.’ Bukyedika, Davidi kasa zimbakana ko nkundi’andi Yonatani.