Bo Salomon kaba bwongiminanga Yave, ndembama yiba yiwombo ku Isaeli. Angi bo katona kukwela bakyeto ba zitsi zinkaka baba sambilanga zinzambi zi bitumba, nandi wutona kubalula mavanga ayi kusambidila zinzambi beni zi bitumba. Yave wufwema beni ayi wunkamba: ‘Kimfumu ki Isaeli kyambotuka va dikanda dyaku ayi yinkwiza kaba kiawu khonzo wadi. Khonzo yilutidi yala vana yawu kwidi wumweka mu bisadi byaku mwingi kayala, angi dikanda dyaku mwa dingumba to bala yala.

Yave mwingi kasudikisa buboti makani maba yandi, wufila ḿbikudi Ahia mwingi kadengana mu nzila Yelobami kisadi ki Salomo waba kwenda ku buala bunkaka. Ḿbikudi Ahia wuzenga dizwela dyandi mu 12 di bitini ayi wukamba Yelobami: ‘Yave wunkwiza botula kimfumu ki Isaeli va dikanda di ntinu Salomo ayi wunkwiza kaba kyawu konzo wadi. Tambula ngyewu kumi di bitendi mu bitini byoso yibe zenga. Mansundula ti ngye wunkwiza yadila kumi di mimvila mi Isaeli. Ntinu Salomo bo kayiza zaba mawu, wutona kukuka Yelobami mwingi kamvonda! Diawu nandi katinina ku Ngipiti. Kuntwala bo Salomo kafwa, mwan’andi Lehabami wiza byala ntinu. Bosi ko Yolobami wisa vutuka ku Isaeli.

Bakhulutu ba Isaeli bakamba Lehabami: ‘Ngye kutwadisa batu buboti, bawu bala kwikama mu ngye ayi bala kutumukina.’ Nandi kasa  bakuwila ko angi wulandakana malongi bakundi bandi ba matoka bankamba: ‘Ngye fweti ba lukasu kwidi batu mwingi ba kumona boma. Wuba sadisa bisalu bi ngolo kuvyoka mavanga tat’aku.’ Kyadi beni ayi kyunda kibila malongi amomo kalandakana, mavanga batu boso bambalukila, bakaba kintinu ayi babyeka Yelobami ntimu wu kumi di mimvila wuyiza zabakana ntinu wu Isaeli. Mimvila mi myodi minkaka mi yiza zabakana kintinu ki Yuda, bawu to baba mu luyalu lu Lehabami. Bukyedika 12 di mimvila mi Isaeli mi yiza kabuka.

Yelobami kabasa bikanga ko batu baba ku khonzo’andi mwingi benda babwongimina Nzambi ku Yelusalemi kuba ntinu Lehabami ayi nzo yinlongo. Zebi mu kibila mbi? Nandi boma kaba, ayi kaba mwenanga ti balenda vutuka ku khonzo yi Lehabami ayi kumbwela myoko. Mambu mbi kavanga? Nandi wuvanga bitumba byodi bi wola ayi wukamba dikabu diandi dyoso: ‘Yelusalemi kinanu wombo, beno mulenda bwongimina kwinu akuku nzambi.’ Diawu batu batona kubwongimina bitumba bi wola, vayi bazimbakana Yave Nzambi yikyedika.