Kintinu ki basi Asilia, kiawu kiba yala 10 di mimvila mu kintinu ki Isaeli. Ntinu wu Asilia baba tanguninanga Senakelibi, kaba tomba mimvila mi myoli minkaka mi kintinu ki Yuda miba mvandi mu lutumu lwandi. Mu malembi, nandi wutona kubwila mavula mankaka ma tsi Yuda. Vayi nandi, divula di Yelusalemi kaba tomba beni kukanga. Angi ntinu Senakelibi kasa zaba ko ti Yave nafeka waba kebanga divula di Yelusalemi.

Hizikia ntinu wu Yuda wufuta zimbongo ziwombo mwingi Senakelibi kabika Yelusalemi. Ntinu Asilia kheti bo katambula zimbongo beni, wufila masodi mandi banwanisa Yelusalemi. Babonso baba zingilanga ku Yelusalemi baba beni boma bo masodi ma Asilia baba fikama. Ntinu Hizikia wuba kamba: ‘Bikanu mona boma. Minu yizebi ti basi Asilia mangolo beni bakele, angi Yave Nzambi nandi lutidi mangolo ayi wela ku tukyeba.’

Senakelibi wufila Labasake ayi mimvwala minkaka mwingi basakinina basi Yelusalemi. Bo bavitila mu ndeku divula di Yelusalemi, batona losuka: ‘Tala, Yave Nzamb’inu kalendi musadisa ko, bikanu kuwa mantuba Hizikia. Kibila vasi ko Nzambi yilenda kulukyeba ayi kuluvukisa mu myoko mitu.’

Hizikia wuyuvula Yave: ‘Mbi yilenda vang’e?’ Yave wuntambudila: ‘Bika kumona boma mu mambu Labasake kamatuba, kibila Senakelibi kalendi kota ko ku Yelusalemi’. Buna kamana koluka ayi Yave, wutambula minkanda ntinu Asilia kamveka. Nandi wusonika: ‘Bika kwaku kuvanga mangolo maphamba, Yave kalendi kuvukisa ko mu myoko myami’. Bo katanga nkanda beni, Hizikia wumona boma ayi wusambila: ‘Yave Nzambi, wutu vukisa mu myoko mi ntinu Asilia, mwingi batu boso bazaba ti Ngyewu to Nzambi yi kyedika ayi bazitisa dizina dyaku.’ Yave wuntambudila: ‘Bika mona boma, ntinu Asilia kalendi kota ko ku Yelusalemi. Minu veka yela kyeba tsi’ami.’

Senakelibi kaba mwena ti Yelusalemi mu thangu yi khufi yinkwiza ba yandi. Angi, va bwilu beni, Yave wufila mbasi yimweka va kubimina masodi ma basi  Asilia ayi mbasi beni wuvonda 185,000 di mosodi ma basi Asilia mu bwilu beni. Ntinu Senakelibi kasa bwe zaba ko ma kuvanga. Bo kamona ti masodi moso mamana kufwa, wiza vutuka to ku nzo. Bukyedika, Yave wukyeba Hezekia ayi Yelusalemi dedi bo kakanikisila! Boti ngye mvaku wusutakana ku Yelusalemi mu thangu mambu beni maba monika, khanu wufyatila mu Yave?