Yosia wutona yala ku Yuda bo kaba 8 di mimvu. Mu thangu beni, batu baba vanganga minkisi na kindoki ayi baba sambilanga bitumba. Bo kadukisa 16 di mimvu, nandi wuba tomba kuzaba bwidi bu kubwomgimina Yave mu bukyedika. Dyawu, bo kaba 20 di mimvu nandi wutona kutulula bitumba ayi zinzo zyoso baba sambidilanga zinzambi zi luvunu. Bo kadukisa 26 di mimvu, wutona bwe ludika nzo yinlongo yi Yave.

Bo baba vanga bisalu ku nzo yinlongo, buawu Nganga Yave yinkulutu baba tedilanga Hilikia kamona nkanda wuba minsiku mi Yave Mose kasonika. Nsoniki Safani wiza nata nkanda beni kwidi Yosia, ayi wutona kutanga wawu mu mbembo yinangama. Thangu Yosia kayuwa matangu beni, wiza zaba ti dikanda di Yuda balembu kulandakana minsiku mi Yave. Dyawu Yosia kakambila Hilikia: ‘Yave nganzi yiwombo kadi kwidi befu. Yenda solula yandi mwingi katukamba mbi tulenda vanga’. Yave wiza fila mvutu kwidi mbikudi wunkyeto baba tedilanga Huluda: ‘Dikanda di Yuda babika kutumamana minsiku myami, minu yela kuba twadisila ziphasi, bika mu bilumbu bi Yosia kibila nandi wuntumamananga minsiku myami.’

Bo ntinu Yosia kayuwa mvutu wu Yave, nandi wuyenda nate ku nzo yinlongo yi Yave ayi wukutikisa dikanda dyoso di Yuda. Bosi wutona kuba tangangila minsiku myoso mi Yave mu mbembo yinangama. Buna bayuwa minsiku beni, Yosia ayi dikanda dyoso di Yuda bakanikisa kulandakana minsiku mi Yave.

 Bo Yosia kabetanga minsiku beni, wumona ti dikanda di Yuda balembu kuvanga Nkungi wu Pasika kwidi Yave. Vayi Yave wubakamba bavanga wawu kadika mvu, dyawu Yosia kabakambila: ‘Befu boso tunkwisa vanga Pasika kwidi Yave’. Yosia wiza kubika nkungi beni ayi wuvana minkhayilu miwombo kwidi Yave. Mvandi wusola batu bakembisa Nzambi mu minkunga ku nzo yinlongo. Buna bamana nkungi wu Pasika, bavanga mvandi Nkungi Mapha Makhambulu Luvi mu sambwadi di bilumbu. Kilumbu kitsuka bawu bavanga Pasika buka yina, yiba mu bilumbu bi Samueli. Yosia wube tyanga kulonguka ayi kulandakana minsiku mi Yave. Abo ngyewu, wuntyanga kulonguka ayi kusadila minsiku mi Yave?