Khomba Zitu zi Luzolo:

Befu boso tumbwongiminanga Yave, tunzolanga kutanga Kibibila Dyambu dyandi. Twidi dyana ayi lufyatu ti binongo bidi mu Kibibila, madi mambu makyedika mamonika ayi mwidi malongi ma lufyatu mammonisa kivisa luzolo luwombo Yave kadi mu befu boso. (Minkunga 119:105; Luka 1:3; 1 Yoane 4:19) Befu tutidi beni kusadisa batu boso bazaba mambu makyedika madi mu Kibibila. Diawu, mu mayangi tukubikidi buku ayiyi “Malongi Wulenda Longuka Matedi Kibibila.” Bika tu luzabikisa nkadu mambu matedi buku beni.

Buku ayiyi tusonikini yawu theti mwingi kusadisa bana balezi. Vayi wulenda ku yisadila mvandi mwingi kusadisa bakhulutu batidi kubwela zaba matedi Kibibila. Kheti befu tuma zaba kyedika mboyo bilumbu, buboti beni kutebukila moyo binongo tutanga mu thama. Kibila Kibibila yidi buku yi batu boso ayi malongi madi muawu malenda kusadisa wuba mayangi makyedika mu luzingu.

Binongo bidi mu buku ayiyi, bibongulu mu matangu ma Kibibila, tona va Nzambi kavangila nza ayi batu. Yawu yinsudikisa binongo bi Kibibila mu phila yikhambulu phasi ayi mu phila bilandisinina voti mambu beni mamonikina.

Buku ayiyi yisi ntubila to binongo bi Kibibila, vayi mwidi mvandi matangu ma Kibibila ayi zifikula bakubika buboti mwingi kusadisa nlonguki voti mutu wuntanga yawu kayindula mambu mamonikina batu beni ayi mabanza maba yawu mu thangu beni.

Buku ayiyi yi tumonisa ti Kibibila yidi buku yi batu boso​—bantumamananga Yave ayi bamanga kuntumamananga. Yawu yinkwiza tusadisa kulonguka mambu ma nkinza matedi batu Kibibila kantubila. (Loma 15:4; 1 Kolinto 10:6) Buku beni yidi na 14 di bikhuku. Va thonono yi kadika kikhuku, vadi mambu ma nkinza tunkwiza longuka.

 Ti widi tata ove ngudi, wufweti tangila mwan’aku binongo bidi amumu ayi mvandi fweti tubana yandi matedi zifikula zidi mu kadika dilongi. Bosi wumweka mu benu kalenda tanga zikapu zi Kibibila zidi va wanda zibongulu dilongi beni. Sadisa mwan’aku kavisa bwidi matangu ma Kibibila madedikini na mambu madi mu dilongi beni munlonguka. Wulenda mvandi kusadila mawu enati nkhulutu wulembo sadisa mwingi kavisa mboti mambu kanlonguka.

Twala yangalala beni mu kuzaba ti buku ayiyi yilembu sadisa batu boso,​—baba kwandi bana balezi voti bakhulutu—​banlonguka Mambu ma Nzambi ayi bansadila mawu mu luzingu luawu. Mawu mala kuba sadisa kuba mimbwongimini mi Yave ayi kuba wumweka mu dikabu dyandi kanzolanga beni va ntoto.