KYUVU 6
Bwidi Yilenda Kindimina mu Ziphukumunu?
MBI WULENDA VANGA?
Yindula kifwani akiki: Bo bana bwadi bankotanga kikola na Batolomeu ba fikama va kaba, nandi wumona boma, kibila mu khumbu wadi ba mankwikilanga kunwa tsunga. Ayiyi, yawu khumbu yintatu.
Mu bana beni, wumweka wutuba:
“Kyadi beni, ngye feka widi? Yiza yikumonisina nkundi wufweni mu ngyewu.”
Nandi waba vweza Batolomeu bo kaba tubila matedi “nkundi.” Diawu kantambikila tsunga.
Batolomeu wubwela kumona boma, bo kamona mwana beni, na tsunga ku koko kulubakala vayi ku koko kunkaka wukuntambika mvandi tsunga yinkaka.
Batolomeu wuvutudila. “Minu yimukamba ti yilendi ko kutitika tsunga . . . ”
Mwana wumwadi wu ditoko wukota mu disolo ayi wukamba Batolomeu: “Bika kubanga boma!”
Batolomeu wumonisa kibakala ayi lukwikumu bo katuba. “Minu yisiko boma!”
Mwana wumwadi wu ditoko, wuyalumuna koko kwidi Batolomeu ayi wunkamba mu mbembo yilembama: “tambula to ayiyi.”
Mwana wutheti wu ditoko wukwika Batolomeu kanwa tsunga ayi wunkambila va dikutu “vasi ko mutu wunkwiza zaba mawu.”
Boti ngye Batolomeu, khanu mbi wuvanga?
YINDULA!
Bukyedika ti bana beni baba kwika Batolomeu, bayindula mboti mambu baba vanga? Bukyedika ti bawu makani mamboti babaka? Ndamba. Bawu baba tomba kuvukumuna bankaka mwingi bavanganga mambu mambi bawu bamana khuku kuvanganga.
Ngye kumonikina ziphukumunu zi phila ayoyo, mbi wulenda vanga mwingi kukindama mu ziawu?
-
KUBAMA
Kibibila kintuba: ‘Nkwa ndwenga na kumona mambu mambi wumvutukanga mbusa ayi wunswamanga, vayi wukhambulu ndwenga wunkwendanga ntwala mu mawu.’—Zingana 22:3.
Ngye widi lwaku lu kuyindula ma kuvanga ava mambu ma monika. Yindula boti wummona kuntwal’aku, bana bankaka ba kikola banwa tsunga, kuyindula ma kuvanga, malenda kusadisa kukubama buboti.
-
YINDULA
Kibibila kintuba: “Bika luba mayindu mamboti.”—1 Petelo 3:16.
Wu kiyuvusa; ‘Bwidi yilenda mwena mu ntima mi kuvitika kuvanga mambu mambi bankaka bankhwika?’ Ḿba balenda bika kubwe kutatisa. Vayi, malendi kibisa ko mayindu maku mamboti? Mbi bilutidi, kukinzika luzingu lwaku voti kuvanga mambu mambi baboso bantomba?—Esodu 23:2.
-
BAKA MAKANI
Kibibila Kintuba: ‘Nkwa ndwenga wummonanga boma ayi wuntinanga zi nzila zimbi.’—Zingana 14:16.
Yoso mbongo wuvata yawu wala vela, mansundula, boti makani mambi be baka, mawu wala mwena ziphasi. Kibibila kintuba ti, Zozefi, Yobi ayi Yesu, babaka makani mamboti kubika kwandi Kaini, Esau ayi Yuda babaka makani mambi. Makani mbi ngye wala baka?
Kibibila Kintuba: “Tula diana diaku mu Yave.” (Minkunga 37:3) Ngye kuyindula buboti ziphasi wulenda mona mu mambu wuntomba kuvanga, wulenda bika kuvanga mawu ayi wala baka lusakumunu mu luzingu lwaku.
Boti wisi ko mambu mawombo ma kuba kamba, muna wulenda kuba vutudila, MINU YI MENGI. Voti mo baluta kukikinina ti ngye wumengi, muna wulenda kuba kamba:
-
“Botulanu dyana dinu mu minu!”
-
“Minu yima vanganga ko!”
-
“Beno mu zebi ti minu yilendi ko kuma vanga!”
Mwingi babika kubwe kukwika, fweti fika vana mvutu wummonisa makani maku. Ngye kusadila mawu, wala mona ti bawu bala bika kubwe kukwika
KINDAMA BO BA KUVWEZA
Ngye kubikila ziphukumunu zi bankaka zi kudyatisa, wulenda ba banga loboto
Mbi fweti vanga boti ba kuvweza? Boti bakukembi: “Ngye, boma widi?” Bika kuba kyunda, kibila ziawu zidi ziphukumunu zi batu bakhambu tyanga zikhadulu zyaku. Mbi fweti vanga mu mambu amomo? Mambu mwadi madi va wanda wulenda sola:
-
Ngye wulenda vutudila. (“Bukyedika, minu boma yidi!” Bosi, zabikisa kibila wididi boma.)
-
Wuba longila mu dyela bo wuba sudikisa kibila wummangina, mu kubakamba: (“Minu yimmwenanga ti tsunga yimbwelanga dyela, vayi tala mambu basonika mu masu beni!”)
Bankotanga yaku mu kikola bala tatamana kuvweza, ngye kukhambu tina vama badi! Vayi ngye kubotuka vawu mu thinu, wala monisa ti mengi bankaka babalula mayindu maku mamboti.
Ngye wisi ko ma kuvanga kibila wulendi zinga ko mu khambu vwezu. Vayi nswa widi mu kusola mambu wutidi kuvanga ayi kukikyeba. Kibila makani moso ngyefeka wumbaka mawu!—Yosua 24:15.
