KYUVU 9
Bukyedika ti Byuma Byoso mu Nzimbukulu Bimonikina?
MBI WULENDA VANGA?
Yindula kifwani akiki: Alex divunza kadi. Nandi wunkikininanga ti byuma byoso Nzambi wuvanga biawu. Vayi nlongisi’andi wu kikola wummonisa lufyatu ayi wunkwika baboso baba lufyatu ti byuma byoso, mu nzimbukulu bimonikina. Alex mengi kumonikina banga kivungisi va meso ma batu bawombo. Nandi wunyindula; ‘Boti batu balutidi luzabu mu nza bankikinina phila ayoyo; minu yidi nani mwingi kubayisa mawu?’
Boti ngye Alex, khanu wukikinina matuba nlongisi kibila masonama mu zibuku zi batu balutidi luzabu mu nza?
YINDULA!
Na bankikininanga ti Nzambi wuvanga byuma byoso ayi bantubanga ti mu nzimbukulu bimonikina, bazebi mambu bankikininanga vayi basa zaba ko kibila bankikininanga mawu.
-
Buka bawombo bankikininanga ti byuma byoso Nzambi wuvanga biawu, kibila mawu balonguka mu binganga.
-
Bankaka bankikininanga ti byuma byoso mu nzimbukulu bimonikina, kibila mawu balonguka mu kikola.
BYUVU BI 6 TWANTUBILA
Kibibila kintuba: “Bila kadika nzo yitungu kuidi mutu; vayi Nzambi niandi [wuvanga] bima bioso.” (Ebeleo 3:4) Bukyedika ti buboti kukikinina mu matangu amama?
Kukikinina ti byuma byoso mu nzimbukulu bimonikina, kwidi banga mutu wunkikinina ti nzo ayiyi yisa tungu kwidi mutu ko
BANKIKININANGA TI: Byuma byoso mu nzimbukulu bimonikina.
1. Nani wuvanga byuma byoso?
2. Mbi bilutidi kutula divunza mu batu, kukikinina ti byuma byoso mu nzimbukulu bimonikina voti vadi mvangi?
BANKIKININANGA TI: Batu mu bibulu ba basikila.
3. Boti batu mu bibulu ba basikila, dedi biphenzi, kibila mbi badidi diswasana diwombo na batu, mu matedi ndwenga yi kuvanga byuma?
4. Kibila mbi twididi diswasana diwombo mu nzingulu na biphenzi?
BANKIKININANGA TI: Byuma byoso mu nzimbukulu bimonikina.
5. Bantubanga mambu amomo bukyedika ti badi kivisa mu mawu?
6. Bawu badi kivisa mu malongi beni voti mu kibila ki batu bazabikini ti badi nzayilu yi nza?
“Yindula bo ti nsitu wunkota, ngye kwe denga nzo yimboti, wulenda kikinina ti mu nzimbukulu yimonikina? Kibila mbi kukikinina ti byuma byoso bisa vangu ko vayi mu nzimbukulu bimonikina?”—Júlia.
“Bukyedika kwandi ti malenda ba dicionário kusonimina mu tinta yityamuka mu minkanda bo tsoto yi dumvuka ku fábrica yi tinta?”—Gervásio.
KIBILA MBI KUKIKININA MU NZAMBI?
Kibibila kintuba tusadila mboti ‘mayindu mitu.’ (Loma 12:1) Mansundula ti mambu tunkikinina mu matedi Nzambi mabika ba mayindu ma:
-
NGYEFEKA (Mu phila yimmwena, ḿba vadi mutu wulutidi zingolo)
-
BATU BANKAKA (Yinzinganga na batu bansambilanga beni)
-
BANKAKA BAKHWIKA (Matata mama bankhwika yi tela mana mu Nzambi ayi yisa baka ko thangu yi kusodila)
Tombanga kuvisa buboti mambu wuntelanga mana.
“Bo yimbanga mu kikola, mu thangu nlongis’itu kansudikisa binama bi nyitu, yinlutanga beni kubwela lufyatu ti Nzambi widi. Binama byoso nkinza bidi ayi kadika kinama kidi na kisalu kyandi kamvanganga mu nyitu. Bukyedika, nyitu yi mutu mu phila yivangulu, mangitukulu!”—Teresa
“Minu kumona lupulão, kibanga, bwatu voti dikalu, ndinyindulanda, ‘nani wuvanga byuma abyobyo?’ Nani wuvana dyela mu mutu di kuzabila kuvanga dikalu didi bisengo binsadilanga va kimweka mwingi dikalu di dyata? Banga dikalu, befu mvitu vadi mutu wutuvanga.”—Ricardo
‘‘Mambu yinlongukanga mu kikola, mambwelanga divuda ti byuma byoso mu nzimbukulu bimonikina. Buawu, bafweti kumbonisina bivisa biwombo ayi bisulama mwingi yikikinina mawu.”—António.
YINDULA!
Mimvu miwombo batu bama tombilanga mimvutu mu matedi tho yi byuma byoso. Vayi bafeka divuda badi. Boti bafeka basi ko ngwizani ayi lufyatu mu mambu bantubanga, kuba kwandi befo kukikinina mawu?
