‘Benu lufweti ba minlongisi.’ (Ebeleo 5:12) Yindul’abu! Yave Nlongisi wulutidi mu nza yimvimba, wutu tumisa mwingi tulonga bankaka matedi nandi! Kyoso kwa kiyeku ki kulonga kyedika kitedi Yave va dikanda, mu kimvuka, voti mu kisalu ki kusamuna, luvalu ayi nkinza beni kidi. Bwidi tulenda nungina kuvanga kiawu?

Mvutu, widi mu mambu mvwala Polo kasonikina Timoteo: ‘Tatamana kutanganga masonoko vantwala baboso, mu lubulanga batu, ayi mu longanga.’ Polo wubwe tuba: ‘Mu kuvanga mawu, buawu wela kuyivukisila ayi wela vukisa batu ba kukuwa.’ (1 Timoteo 4:13, 16) Ngye widi zitsangu zimvukisa myela mi batu mwingi kusamuna. Diawu, nkinza beni kuvanga mangolo mwingi kubwela pisuka mu kutanga ayi kulonga. Mwa buku ayiyi, yivangulu mwingi kusadisa kuvanga mawu. Tala mambu madi mu mwa buku beni:

Yave widi ‘Nlongisi Wulutidi.’ (Yesaya 30:20) Bo mwa buku ayiyi yi kusadisa kubwela pisuka mu kutanga ayi kulonga, bika zimbakana ti Yave, nandi Tho yi zitsangu tunlonganga ayi nandi wuntumisanga batu bamfikama. (Yoane 6:44) Diawu fweti sambilanga mwingi kudinda lusalusu lu pheve yinlongo ayi sadilanga beni Dyambu di Nzambi. Luta tubila matedi Yave, bika ti mambu maku. Vanga mangolo mwingi wusadisa batu ba kukuwa baba luzolo lungolo mu Yave.

Yave wuku tumisa mwingi wulonga zitsangu zilutidi nkinza zima longu va nza yimvimba. Befu twidi lufyatu ti benu fyatila mu “zingolo zimvana Nzambi” lwela nunga.—1 Petelo 4:11.

Zikhomba zinu badi mvandi minlongisi,

Dingumba Dintwadisi di Zimbangi zi Yave