Mu Ǹkangu’itu wu lulama mwisi ko mfumu wuǹtambulanga ḿfutu. Kulandakana ǹtungulu wu baklisto batheti, miǹsadisi mi phisuka baǹtambulanga kiyeku ki ‘kusunga kimvuka ki Nzambi.ʼ (Mavanga 20:28) Bakhulutu abobo badi batu ba ndwenga na kinzambi kimboti mu kutwadisa kimvuka ayi mu ‘sunga mamemi, mu khambu kuba tundila, mu khambu kuba kwika, mu khambu tomba ḿfutu,’ vayi mu zola kuba sadisa. (1 Petelo 5:1-3) Mbi baḿvanganga tuḿbakilanga ndandu?

Ba tusadisanga ayi ba tukyebanga. Bakhulutu ba kimvuka, baǹtwadisanga, baǹsadisanga ayi baǹkyebanga kimvuka mu kiphevi. Kuzaba ti Nzambi wu bavana kiyeku beni ki ḿfunu, bawu basi ko zimfumu zi kimvuka vayi baǹsalanga mwingi nzingulu’itu yi ba yimboti ayi mayangi. (2 Kolinto 1:24) Bakhulutu ba kimvuka baǹtombanga zaba kadi mutu widi mu kimvuka buka ǹsungi wu mamemi.—Zingana 27:23.

Ba tulongisanga bu kuvangila luzolo lu Nzambi. Mu kadika lumingu bankulutu ba kimvuka baǹtwadisanga zikhutukunu ziǹkindisanga kiminu kitu. (Mavanga 15:32) Bawu ḿvawu baḿmonisanga ǹtungulu wumboti mu kutwadisa kisalu ki kusamuna, ba tulandakananga mu kisalu beni ayi ba tulongisanga ziphila ziǹkaka zi kusamunina.

Ba tukindisanga. Mwingi tu baka bu kukyebila kinzambi kitu, bakhulutu ba kimvuka ba tubilanga mu zinzo ove ku Nzo yi Kiǹtinu, baǹsadilanga Kibibila mwingi ku tuvana mbombolo.—Yakobi 5:14, 15.

Kubika kwandi lusadusu baḿvananga mu kimvuka, bakhulutu baǹkaka badi na bisalu baǹzingisilanga makanda mawu. Diawu tufweti bakinzikanga.—1 Tesalonika 5:12, 13.

• Kiyeku mbi bakhulutu ba kimvuka badi?

• Bwidi bakhulutu ba kimvuka baḿmonisinanga ǹkinza mu kadika mutu?