Mo tubaka bu kusamunina mboti zitsangu zimona, mu zitsi ayi mu mimvila myoso, tuǹsekulanga bilongulu mu kuvyoka 750 di zimbembo. (Nzaikusu 14:6) Bwidi tuǹnunginanga mu kuvanga mawu? Mu lusadusu lu batu bansonikanga bilongulu ayi bankaka bansekulanga—baboso, zimbangi zi Yave

Bilongulu biǹsoniminanga mu Kingeleso. Mwa dingumba Diǹtwadisi diǹtwadisanga kisalu ki Dikabu di Miǹsoniki ku beteli yinene. Dikabu beni di miǹsoniki, diǹtwadisanga ayi diḿvananga biyeku kwidi miǹsoniki myoso, tona badi ku beteli yineni ayi zibeteli zi lwelu zidi mu zitsi ziǹkaka. Kubaka dikabu di miǹsoniki mu nza yimvimba, ma tusadisanga kuvana lusadusu mu matedi bikhulu byoso mu nza ayi batu baǹkwangalalanga mu kutanga mawu.

Bilongulu biḿfilwanga kwidi miǹsekudi. Ba kukikinina kilongulu ki ma mana kusonama, baḿfilanga kiawu mu mpila yi eletronika kwidi dikabu di miǹsekudi mu nza yimvimba; Bawu baǹsekulanga ayi baḿfyonguninanga kiawu. Mwingi basekula buboti bilongulu mu mbembo’awu, bawu baḿvanganga mangolo mu kusola bikuma bifwana bi manga vyakana na matanga mabongulu mu Kingeleso.—Mpovi 12:10.

Zi komputador ziḿbwelanga ǹswalu kisalu. Bukyedika ti komputador yilendi vinginina ko miǹsoniki ayi miǹsekudi. Vayi kisalu kilenda kwenda ǹswalu mu kibila ki zi dicionário ayi bisadulu biǹkaka bidi mu zi komputador. Zimbangi zi Yave bavanga kisadulu baǹtanguninanga (MEPS) kyawu kilenda dedikisa matanga mu zimbembo ziwombo. Mu nzila kisadulu beni, tuḿbakanga bu kuludikila matanga na zifoto ayi zi mfikula mwingi kubasisa ziawu mu miǹkanda.

Kibila mbi tuḿvangilanga mangolo amomo, ma kusekulanga bilongulu mu zimbembo ba manga kolukanga mu zi nsi ziwombo? Kibila Yave wuǹtomba ‘ti bantu baboso ba vuluswa ayi ba baka nzayilu yi kyedika.’—1 Timoteo 2:3, 4.

• Bwidi bilongulu bitu biǹsoniminanga?

• Kibila mbi tuǹsekudilanga byawu mu zimbembo ziwombo?