Kibibila ki tuba ti kumbusa lufwa lu Yesu, mu kimvuka ki baklisto, mwala kota baklisto ba luvunu bala zimbikisa kyedika. (Mavanga 20:29, 30) Buvyokila thangu ma yiza monika. Bawu ba votikisa malongi ma Yesu ayi mayindu ma Bapakanu. Buawu bu yiza basikila baklisto ba luvunu. (2 Timoteo 4:3, 4) Bwidi tulenda bela lufyatu ti twidi nzayilu yi sulama ma Kibibila kaǹlonga mu thangu’itu?

Thangu Yave yi kuzabikisila kyedika. Yave wutuba ti mu ‘bilumbu bi nsuka nzayilu yi kyedika yala ba yiwombo.’ (Danieli 12:4) Mu ḿvu 1870, mwa dingumba di batu baba tomba bakula kyedika, ba mona ti malongi mawombo ma binganga masa ba ko masulama mu malongi ma Kibibila. Diawu, ba tonina tomba mwingi bwe bakula malongi ma kyedika ma Kibibila, ayi Yave wu ba sakumuna.

Babakala ba lufyatu ba bwisa miǹtima mu kulonguka Kibibila. Minlonguki mi theti mi Kibibila ba landakana ndongukulu yi Kibibila tuǹsadilanga ti bubu. Bawu baba longukanga Kibibila mu dyambu ka dyambu. Bo baba dengananga lutangu lwidi phasi mu kuvisa, baba tombanga tsudukusu mu matanga maǹkaka. Ba kumona madi ngwizani baba sonikanga mawu. Mu kubika Kibibila kiawu veka kisudikisa tsundu matanga, diawu ba yiza bakudila kyedika mu matedi dizina di Nzambi, Kiǹtinu kyandi, lukanu lwandi mu batu ayi va ǹtoto, kyedika kitedi bafwa ayi dyana di luvulubukusu lu bafwa. Mu kutomba kyedika, bawu vuka mu malongi ma luvunu ma binganga ayi mu mavanga mambi.—Yoane 8:31, 32.

Mu ḿvu 1879, Minlonguki mi Kibibila ba yiza bakula ti yiba thangu yi kusamuna kyedika mu bufweni. Diawu, ba tonina kusamuna mu ḿvu beni Kibanga ki Nsungi kinsamuna Kintunu ki Yave, levista tuǹyamikisanga mu bilumbu bitu. Mu thangu’itu, tuǹsamunanga kyedika Kibibila mu 240  di zitsi mu kuvyoka 750 di zimbembo. Thangu’itu yima luta nzayilu yi kyedika!

• Bo Klisto ka fwa, mambu mbi ma yiza monika matedi kyedika ki Kibibila?

• Mbi bi tusadisa tu bwe bakula kyedika ki dyambu di Nzambi?