Ǹkangu’itu wu lulama wuḿbasisanga voti wuǹkabulanga mu kadi ḿvu, khama di mafunda di Bibibila ayi bilongulu biǹkaka. Tuǹtunganga, tuǹkyebanga Zinzo zi Kiǹtinu ayi zibeteli. Tuǹkyebanga zitsatu zi mafunda ma zibetelita, bamisyoni ayi tuǹsadisanga ba monokono kivuka. Ḿba wu yikuvusanga: kwidi kuḿbanga zimbongo beni?

Tu dindanga ko ḿfutu mu kisalu kitu, tu futisanga ko kitambuku ayi tu vangisanga ko nsinsanu. Tu zebi ti kisalu kitu ki kusamuna kiǹkwendilanga ḿboyo zimbongo, vayi tu dindanga ko ḿfutu. Dedi buḿmonisina levista A Sentinela yi ma dukisa khama di mi ḿvu, twidi lufyatu ti Yave wu tusakumunanga ayi “tulendi dinda ko lusalusu lu mutu katufutila kisalu ki kusamuna”—ayi tumavanganga ko!—Matai 10:8.

Bisalu bitu biḿvangiminanga mu minkayilu. Bawombo baǹkinzikanga kisalu kitu ki kulonga ayi baḿvananga minkayilu mwingi kubwela mangolo kisalu beni. Bafeka Zimbangi zi Yave mu nyenzi baḿvananga thangu, mangolo mawu ayi kyuka kiawu mu dyambu bwela vangisa luzolo lu Nzambi mu ǹtoto woso. (1 Lusansu 29:9) Mu Zinzo zitu zi Kiǹtinu ayi mu zikhutukunu zinneni, mwidi zikasu ba kubika mwingi kusadisa woso wutidi kuvana minkhayilu. Ove tulenda vanina minkhayilu beni mu nzila, jw.org. Miǹsukami buka nkyeto wu fwilu ǹnuni mu bilumbu bi Yesu baḿvananga minkayilu mu bilumbu bitu, miǹsadisanga kisalu kitu ki kusamuna. (Luka 21:1-4) Diawu wosokwa mutu wulenda ba kifu ki kuvana boso bu ka bakidi ayi ka yindudidi mu ǹtim’andi.—1 Kolinto 16:2; 2 Kolinto 9:7.

Tuzebi ti Yave wala bwela vana mangolo kwidi bo ba kuǹzitisa mu kyuka kiawu mu dyambu bwela mangolo kisalu ki Kiǹtinu, mwingi luzolo lwandi lu vangama.—Zingana 3:9.

• Bwidi ǹkangu’itu wu lulama wididi diswasana na binganga biǹkaka?

• Bwidi baǹsadilanga minkayilu miḿvanwanga?