Ti kivuka ki monikini mu yendila nza, zimbangi zi Yave baǹkubikanga lusalusu mu dyambu kubomba zikhomba badi mu kyunda. Mangolo beni tuḿvanganga, mbonosonu yi luzolo lu kyedika lu twidi mu baǹkaka. (Yoane 13:34, 35; 1 Yoane 3:17, 18) Bwidi lusalusu beni luḿvewanga?

Tuḿvananga minkayilu. Bo nzala yi saba ku nsi Yuda, baklisto ku Antiokia ba fila lusalusu kwidi zikhomba ziawu. (Mavanga 11:27-30) Bo buawu, befo kuzaba ti zikhomba zitu, mu yendila nza ba monokono kivuka, tuḿfilanga minkayilu mu nzila yi kimvuka, mwingi kusadisa zitsatu ziawu zi ǹsuni ayi zi kiphevi.—2 Kolinto 8:13-15.

Tuḿvananga lusalusu. Bakhulutu baǹkalanga va zunga di monikini kivuka, baǹtombanga theti zaba ti babonso badi buboti. Dingumba di lusadusu diḿvananga bidya, ǹlangu, miḿvwatu, zinzo ayi baḿbukisanga ba lwedi. Zimbangi zi Yave ziwombo bazebi bisalu, bakivananga mu dyambu di kubwela myoko mu tunga zinzo zi batu, zinzo zi Kiǹtinu zi be tuluka mu kivuka. Kiǹtwadi kidi mu ǹkangu wu lulama ayi luzabu tuḿbakanga mu kusala va kimweka, ma tusadisanga kuba nzaki mu kisalu. Tu zebi ti tuǹkwendilanga mwingi kusadisa badi yitu ‘kiminu kimweka,’ vayi tuǹsadisanga baboso baḿmona ziphasi, na badi mu mabundu maǹkaka.—Ngalatia 6:10.

Tuḿvananga lusalusu lu kiphevi ayi tuǹkindisanga mayindu ma batu. Ba monokono kivuka baǹtombanga mbombolo. Mu thangu beni, bawu balenda kindusu kwidi Yave, ‘Nzambi yimbombolo yoso.ʼ (2 Kolinto 1:3, 4) Mu nyenzi tuǹlongisanga zikhanu zi Kibibila kwidi batu badi mu kyunda, tu bamosinanga ti Kiǹtinu ki Nzambi kyala manisa bivuka byoso biǹtwadisanga ziphasi.—Nzaikusu 21:4.

• Bwidi Zimbangi zi Yave ba fika sadisilanga batu bo kivuka ki be monika?

• Mbombolo mbi yi kiphevi tulenda vana kwidi baḿvuka?