Bosi kafwa, Yesu wu yoluka na minlandikini myandi va nkonzo: Petelo, Yakobi, Yoane ayi Andele. Bo ka bavana bidimbu bitedi thononu yi luyalu lwandi ayi bilumbu bitsuka, nandi wuvana kyuvu ki ḿfunu. ‘Nani Ǹnanga wukwikama wu dyela, mfumu’andi ka byeka mu sunga bisadi biǹkaka mwingi kaba vananga bidya mu thangu yi fwana?’ (Matai 24:3, 45; Malako 13:3, 4) Yesu bo kadi “mfumu” minlongisi myandi, wu kanikisa kubyeka ‘Ǹnanga’ mwingi kavananga minlandikini myandi bidya bi kimpevi mu bilumbu bitsuka. Nani Ǹnanga beni?

Mwa dingumba disolwa di minladikini mi Yesu. ‘Ǹnanga’ beni, wuzabikini buka Mwa Dingumba Diǹtwadisi di Zimbangi zi Yave. Wuḿvananga bidya bi kiphevi mu bisadi biǹkaka bi Yave. Befo tu kuǹtediminanga, ‘mwingi ka tuvana bidya mu thangu yi fwana.ʼ—Luka 12:42.

Nandi wuǹkyebanga dikanda di Nzambi. (1 Timoteo 3:15) Yesu wuvana kiyeku kwidi Ǹnanga wukwikama ki kutwadisa kisalu ayi ǹkangu wululama wu Yave va ǹtoto: Mu kukyeba kyuka kyandi, kukengidila kisalu ki kusamuna ayi kutulongila mu nzila yi bimvuka bitu. Mwingi ka tuvana bi tuǹtomba mu thangu yi fwana, “Ǹnanga wukwikama wudyela” wuǹkabulanga bidya bi kiphevi mu bilongulu bi tuǹnatanga mu kisalu kikusamuna ayi ndyatusulu yi zikhutukunu zi divula tuḿbakanga.

Nandi widi wukwikama mu kyedika ki Kibibila ayi mu kukyeba kisalu ki kusamuna tsangu zimona; widi dyela mu phila kaǹkyebilanga kisalu ki Klisto va ǹtoto. (Mavanga 10:42) Yave widi mu kusakumuna kisalu beni mu ndyonzukulu ayi phila ziǹkaka zi zabikisila kyedika.—Yesaya 60:22; 65:13.

• Nani Yesu ka bikila kiyeku ki kudikila miǹlandikini myandi mu kiphevi?

• Bwidi Ǹnanga kadidi wukwikama ayi wudyela?