Beteli dizina diǹsundula mu mbembo yi Hebelewu ‘Nzo yi Nzambi.ʼ (Ngenesi 28:17, 19) Dizina beni difwana mu kuzabikisa zinzo zi Zimbangi zi Yave mu nza yimvimba baǹludikilanga ayi baǹtwadisilanga kisalu ki kusamuna. Mwa dingumba diǹtwadisi didi ku Beteli yiǹneni ku divula di Nova York, nsi yi EUA, kuawu baǹkengidilanga zibeteli zidi mu zinsi ziǹkaka. Baǹsadilanga momo, badi buka dikanda. Baǹkalanga ayi baǹsalanga, baǹdilanga ayi baǹlongukanga Kibibila va kimweka. Diawu ba zabikini “dikanda di Beteli.”—Minkunga 133:1.

Kuma ku mboti ku batu ba kivananga. Babakala ayi bankyeto baǹzingilanga mu Zibeteli zyoso, badi batu ba kivana mu vanga luzolo lu Nzambi ayi kubwela myoko kisalu ki Kiǹtinu mu thangu ka thangu. (Matai 6:33) Ba tambulanga ko ḿfutu, vayi badi na bivinga bi kulala, bidya, ayi baḿbakanga mwa lusalusu mwingi kusumbila kyosokwa kima ba tidi. Kadi mutu widi na kisalu kyandi: Baǹsonikanga miǹkanda, baǹlambanga, baǹludikanga bivinga, baǹsekulanga bilongulu, baǹtulanga zifoto mu bilongulu, baḿbasisanga bilongulu, baḿbongisanga bisengu, baǹsukulanga miǹledi ayi tu tanga tu lembu.

Kibwangu ki kisalu kiwombo kiḿbwelanga mangolo kisalu ki kusamuna kiǹtinu. Kibila ki lutidi ǹkinza baǹtungilanga Zibeteli mu zitsi, mu dyambu di kuzabikisa kyedika mu bantu bonso. Mwa buku ayiyi mbonosono kivisa ki mambu. Yawu yi sonimina mu thwadusulu yi mwa dingumba diǹtwadisi, yi filwa kwidi mwa mangumba ma miǹsekudi mu nza yimvimba, bosi baḿbasisanga ayi baǹkabulanga mu kuvyoka 110 di bivevi di bimvuka mu nza yimvimba. Kubika kwandi kisalu ki miǹsekudi mi bilongulu, bawu baḿvananga lusalusu mu kisalu ki lutidi ḿfunu: Ki kusamuna zi tsangu zi mona.—Malako 13:10.

• Nani wuǹsadilanga ku beteli ayi lusalusu mbi baḿbakanga?

• Kisalu mbi kiǹswalu baḿbwelanga myoko ku beteli?