Mbutukulu mwana wunsombi yilenda twadisa mayangi ove zimpasi va dikwela. Kuvana ntangu ayi mangolo mu kukyeba mwan’inu, mawu mala mu visikisa mbi biǹsundula kuba matata. Ku nkambu leka buboti va bwilu ayi maǹkaka, malenda twadisa mambu va dikwela. Diawu yindulanu bwidi mu fweti kyebila mwana ayi dikwela dinu. Bwidi malongi ma Kibibila malenda kulusadisila mu dyambu adidi?

MBI KIBIBILA KIǸTUBA: “Luzolo luzebi vibidila, lufulukidi mu mamboti.” Luawu mvandi “lutombanga ko mamboti mandi veka [ayi] lufueminanga bankaka ko.” (1 Kolinto.13:4, 5, NM) Bo weka ngudi disi ko diyindu dimbi kuvana ntangu’aku yoso mu kukyeba mwana. Angi ǹnuni’aku kalenda yindula ti wisi kumvwila ko ǹkinza. Bika zimbakana ti nandi mvandi ntangu kaǹtomba wumvana. Mu mvibudulu ayi mu dyela, zabikisa ǹnuni’aku ti ngye wukumvwilanga ǹkinza ayi ḿfunu kadi dedi bo wummwenanga mwan’inu.

‘Beno babakala, luzinga va kimweka ayi bankyeto binu mu dyela.’ (1 Petolo 3:7, NW) Zaba ti mangolo moso ma ǹkazi’aku mammaninanga mu kukyeba mwana. Kiyeku akyokyo kyeka yandi, kilenda kuǹtula ntangu ziǹkaka mfiti ayi kyunda. Nkumbu ziǹkaka kalenda kufwemina vayi ba malembe. Bukyedika ti ‘muntu wummanga fika fwemanga wulutidi ǹkwa ngolo.’ (Zingana 16:32) Vana lusalusu loso ǹkanzi’aku kaǹtomba.—Zingana 14:29.

MBI WULENDA VANGA:

• Tata: Sadisa ǹkazi’aku mu kukyeba mwana, nketi va bwilu. Tula ndilu mu byuma bi wumvyokisilanga ntangu bi nkembu beni nsalulu, mwingi wubaka ntangu yi kadila va kimweka na ǹkazi ayi mwan’aku

• Ngudi: Vitika bo ti ǹnuni’aku wuǹtomba kusadisa mu kukyeba mwana. Bo ti kasimvanga ko bo wuǹtobila, bika kuǹtundila. Mu malembe monisa bwidi kafweti vangila

MBI KIBIBILA KIǸTUBA: ‘Bawu bala ba ǹsuni wumweka.’ (Ngenesi 2:24, NW) Nketi muntu wuǹkaka mabwelama va dikanda, bambuka moyo ti benu mwidi ǹnuni ayi ǹkazi, mwidi ǹsuni wumweka. Vanga mangolo mwingi mu kindisa kintwadi ki dikwela dinu.

Ngye nkyeto, fweti vutula matondo mu lusalusu voti mu myoko ǹnuni’aku ka kubwela ayi ǹzabikisa mawu. Kuvutula matondo kulenda ba ḿbuku kwidi nandi. (Zangana 12:18) Ngye ǹnuni, kamba nkyeto’aku ti wukunzolanga beni ayi nandi luvalu beni kadi va meso maku. Monisa ti wukunyunganga beni mu mambu kamvanganga mu bantu badi va dikanda.—Zingana 31:10, 28.

‘Bika kutombanga mamboti maku veka to, angi tombanga mboti mu baǹkaka.’ (1 Kolinto 10:24) Vanganga mamboti mu ǹnuni ove ǹkazi’aku. Bo mwidi bakwela botulanganu ntangu mwingi mu solula, kunyunga ayi yuwa wuǹkaka bo kaǹkoluka. Mu matedi mbundasani yi nyitu, bika kutula zinsatu zyaku va nteti, vayi zi ǹnuni ove ǹkazi’aku. Kibibila kiǹtuba: ‘Mu bika tinasananga; Bika dibakala kavanga mu ǹkazi’andi makavwidi ǹkinzi ayi ǹkazi mpe bo buawu mu dibakala dyandi.’ (1 Kolinto 7:3-5, NW) Diawu, mufweti solula matedi mambu amomo. Kuba mvibudulu ayi kuzaba tula zinsatu zi wuǹkaka va nteti, mawu malenda kindisa dikwela dinu.

MBI WULENDA VANGA:

• Botulanganu ntangu mwingi mu solulanga beno babwadi

• Sonika bikuma bi luzolo mu mwa ǹkanda mwingi kuvana ǹnuni ove ǹkazi’aku ayi ntangu ziǹkaka kubikanga mwa nkayilu yimmonisa luzolo lwaku mu nandi

MBI KIBIBILA KIǸTUBA: ‘Tona mu bumwana bwaku, ngyewu zebi masonoko manlongo; mawu malenda kuvana dyela di kyedika mu dyambu wubaka mpulusu.’ (2 Timoteo 3:15, NW) Kubikanga ma wulenda longisa mwan’aku. Mwana wulenda tona longuka bo ka nkidi mu kivumu ki ngudi. Nandi kalenda kuwa mbembo’aku ayi kunyikuka mu mayangi. Tona kutangila mwan’aku matangu ma Kibibila bo ka nkidi mwana kilezi. Nketi kasimvisikisa ko ma wuǹtanga angi malenda kuǹsadisa ka tya kutanganga bo kaǹkozuka.

Buboti kulonga mwana matede Nzambi bo ka nkidi wulwelo. Bika ka yuwanga miǹsambu myaku kwidi Yave. (Deutelonomi 11:19) Bo ti mwaǹsakana yolukila bima bivanga Nzambi. (Minkunga 78:3, 4) Nandi bo kaǹkonzuka, wala zaba ti ngyewu tidi Yave ayi nandi mvandi wala zola Yave.

MBI WULENDA VANGA:

• Dinda ndwenga yi Yave mu kulonga mwan’aku

• Vutukila bikuma ayi mambu maḿfunu mwingi mwan’aku kasimbidila ma kaǹlonguka