Ngyewu malonguka mu mwa buku ayiyi, ti mu Kibibila mwidi miǹswa milenda kusadisa na dikanda dyaku. Bukyedika, Yave wuǹtomba ngye wuzingila mu mayangi. Nandi wukanikisa ti ngye kutula mbwongimini’andi va nteti, nandi wela ‘kulubwedila bima byoso biǹkaka.’ (Matai 6:33) Nandi wuǹtomba beni ngye wuba ǹkundi’andi. Diawu vanga mangolo mwingi wuba kikundi na Yave kibila luawu lwaku lu lutidi wulenda baka.—Matai 22:37, 38.

MBI KIBIBILA KIǸTUBA: ‘‘Minu yela ba Tat’inu, beno lwela ba bana bama’, Yave katuba.’ (2 Kolinto 6:18) Nzambi wuǹtomba ngye wuba ǹkundi’andi wufikama. Lusambulu, lulenda kusadisa kufikama kwidi nandi. Yave wukudinda ‘wusambilanga ntangu zyoso.’ (1 Tesalonika 5:17, NW) Nandi tidi kuzaba mambu makutatisa ayi mabanza ma nsi ǹtim’aku. (Filipi 4:6) Bo wuǹsambila na dikanda dyaku, bawu balenda visa ti Nzambi wumoyo kwidi ngyewu.

Ngyewu mvaku fweti kuwanga Nzambi. Bo wuǹtanga Kibibila ayi bilongulu biǹkaka bi Kibibila, buawu wulenda kuwila Nzambi. (Minkunga 1:1, 2) Botula ntangu mwingi kuyindula ma wuǹlonguka. (Minkunga 77:11, 12) Kukuwa Nzambi kuǹtombila mvandi kukwendanga mu zinkutukunu zi baklisto.—Minkunga 122:1-4.

Kulonga baǹkaka matedi Yave mpila yiǹkaka yiḿfunu yi kukindisila kikundi kyaku na Nzambi. Ngye kumavanganga, kikundi kyaku mu Nzambi kyala bwela ba kikinda.—Matai 28:19, 20.

MBI WULENDA VANGA:

• Botula ntangu kadika kilumbu mwingi kutanga Kibibila ayi kusambila

• Va dikanda, tulanga nteti mambu ma kimpevi va ǹtwala bosi mambu maǹkaka ma kuvuvusila

MBI KIBIBILA KIǸTUBA: ‘Fikamanu Nzambi, nandi mvandi wala kulufikama.’ (Yakobi 4:8, NW) Botula ntangu mwingi kubwongimina Yave va dikanda ayi landakana ma wukubika. (Ngenesi 18:19) Angi, tala dyambu diǹkaka fweti vanga: Tula Nzambi va nteti mu makani moso wuḿbaka lumbu ka lumbu. Ngye kutubilanga matedi nandi bo bevwanda ku nzo’aku, bo wuǹdyata mu nzila, va kulala ayi vakukotuka, wulenda nunga kukindisa kikundi ki dikanda dyaku na Nzambi. (Deutelonomi 6:6, 7) Ba wukindama banga Yosua, wutuba: ‘Minu ayi badi va nzo’ami Yave tusola tuǹsadila.’—Yosua 24:15, Tradução do Novo Mundo com Referências.

MBI WULENDA VANGA:

• Vanga ntwadusulu yimboti yi malongi ma dedikini na zinsatu zi kadika muntu va dikanda ayi vanganganu nkumbu ziǹkaka zimbonosono