KIKHUKU KI 1

Nzambi ka Lenda Kusadisa Wuba Mayangi va Dikwela

TATIKA

‘Va ntonono, Mvang’itu wuvanga dibakala ayi nkyeto.’—Matai 19:4, NW

Yave * Nzambi, nandi wukwedisa dikwela dinteti. Kibibila kiǹtuba ti nandi wuvanga nkyeto wunteti ayi ‘wunnata kwidi dibakala’. Adami wuyangalala ayi wutuba: ‘Nketi nandi mvesi wu mimvesi myami ayi ǹsuni’ami.’ (Ngenesi 2:22, 23, NW) Ti bubu Yave wunkidi tomba bakwela bazingila mu mayangi.

Bo wukwela, ḿba waba yindulanda ti mamoso maǹkwiza ba mamboti na mamboti. Angi nketi dibakala ayi nkyeto banzolasananga beni, balenda bakasana mambu. (1 Kolinto 7:28) Mu mwa buku ayiyi, mwidi malongi ma Kibibila maǹkwiza kusadisa kubwela mayangi va dikwela dyaku ayi va dikanda. —Minkunga 19:8-11.

1 KIKININA KIYEKU YAVE KA KUVANA

MBI KIBIBILA KIǸTUBA: Dibakala nandi mfumu yi dikanda.—Efeso 5:23.

Ti ngyewu ǹnuni, zaba ti Yave wuǹtomba wubekanga mboti nkyeto’aku. (1 Petelo 3:7) Nandi kavangila nkyeto mwingi kaba ǹsadisi’aku, diawu kaǹtombila wuǹkyebanga mu lukinzu ayi mu luzolo. (Ngenesi 2:18) Luzolo mu nkyeto’aku lufweti ba luwombo mwingi wubaka butudila zinsatu zyandi va nteti.—Efeso 5:25-29.

Ti ngyewu ǹkazi, zaba ti Yave wuǹtomba wuba lukinzu lu lutididi mu ǹnuni’aku ayi wuǹsadisa katumamana kiyeku kyandi katambula. (1 Kolinto 11:3; Efeso 5:33) Bwela myoko makani ma kabeki ayi landakana mawu mu ǹtima woso. (Kolosai 3:18) Ngye kuvanga mawu, wala monikina kitoko va meso ma ǹnuni’aku ayi ma Yave. —1 Petelo 3:1-6.

MBI WULENDA VANGA:

Yuvula ǹnuni’aku voti ǹkazi’aku, bwidi wulenda bela ǹnuni voti ǹkazi wu kyedika. Lingama ayi yuwa mboti mvutu’andi ayi vanga bosu bumvimba, mwingi kusadila mawu
Ba mvibudulu. Ntangu yiǹtombulu, mwingi beno babwadi muzingila mamoso mu malonguka mu dyambu kukwangidika wuǹkaka

2 MONISA ǸKINZA MU ǸTIMA WOSO

MBI KIBIBILA KIǸTUBA: Fweti ba wukubama mu zinsatu zi ǹnuni voti zi ǹkazi’aku. (Filipi 2:3, 4) Kyeba mu lukinzu ǹnuni voti nkazi’aku, ayi tebukanga moyo ti Yave wuǹtomba bisadi byandi baba bantu ‘banlembami kwidi baboso.’ (2 Timoteo 2:24) ‘Mambu maǹkaka manlwekanga banga mbeli, angi ludimi lu bantu bandwenga luḿbukanga.’ (Zingana 12:18, NW) Mpevi yi Yave yala kusadisa kukoluka mu malembi ayi mu luzolo.— Ngalatia 5:22, 23; Kolosai 4:6.

MBI WULENDA VANGA:

Ava mu dedikisa dyosokwa dyambu diḿfunu na ǹnuni voti ǹkazi’aku, dinda Nzambi mu lusambulu kakusadisa kubwisa mayindu
Ava wutona koluka, yindula mboti ma wuǹtomba koluka ayi bwidi wuǹkolukila mawu

3 BANU MAYINDU MAMWEKA

MBI KIBIBILA KIǸTUBA: Ngye kukwela, weka ǹsuni wumweka na ǹnuni voti na ǹkazi’aku. (Matai 19:5) Angi bo lwidi bantu bavyakana, vadi na mambu mulenda bela mayindu mavyakana. Diawu mufweti longuka bundisa mayindu ayi mabanza. (Filipi 2:2) Lubundunu lu mayindu ǹkinza beni lwidi mwingi kubaka makani mamboti. Kibibila kiǹtuba: ‘Tomba ndwengoso zimboti, ngyewu wala baka lusalusu.’ (Zingana 20:18, NW) Bika miǹswa mi Kibibila mi kudyatisa bo muḿbaka makani maǹkinza va kimweka.—Zingana 8:32, 33.

MBI WULENDA VANGA:

Kamba ǹnuni voti ǹkazi’aku mabanza ove mayindu maku
Zabikisa ǹnuni voti ǹkazi’aku ava wukikina kuvanga dyosokwa dyambu

^ Kibibila kiǹtuba ti Yave dizina di Nzambi.

DIKANDA DYAKU DILENDA BA MAYANGI