YINDULA ti lulombo wundyata, ngye wuntomba kutuka ku bwala bunkaka. Bo wunnanguna thalu kuyilu, matuti moso manomba, zinzazi, zitsyemu, phemu ayi bidumi binkwizila mo muawu. Bosi mvula yingolo yitonini kunoka. Wuntala kumbusa, wuntala ku khonzo wisimmona ko vama vadi nsika mwingi kuswamina mvula beni. Vayi bo wundyata nkadu, mamona vama vadi nsika mwingi kuswamina. Bwidi wulenda mwena ngye kutuka vana? Bukyedika ti wulenda mona luvovomu.

1, 2. Kwidi tulenda bakila luvovomu thangu ayiyi?

² Moyo’itu mvandi widi va kingela mu mambu mambi matukwizilanga. Mambu beni kubwelama na kubwelama. Mu kutala phila mambu beni mambwelimina tulenda kuyikuvula: ‘Kwidi tulenda bakila lusalusu?’ Wumweka mu Minsoniki yi Minkunga wutubila matedi Yave, “Niandi suamunu kiama ayi suamunu kiama kingolo Nzambi ama, mu niandi ndintula diana.” (Minkunga 91:2) Bukyedika, Yave kalenda kutuvana luvovomu ayi dyana mu mambu tummonanga thangu ayiyi ayi mu bilumbu binkwiza kuntwala.

3. Bwidi tulenda sila Yave kiswamunu kitu?

³ Bwidi Yave kalenda kutukyebila? Nandi kalenda tusadisa kununga mu dyosokwa dyambu twidi. Ayi vasi ko mutu wulenda nunga mu kutuvanga bubi kibila Yave nkwa ngolo zyoso ayi kalendi bikila ko. Kheti dyambu dimbi tummonokono thangu ayiyi, tulenda ba lufyatu ti kuntwala Yave wala ludika mambu moso ma tuvanganga phasi. Kibibila kintuba: “Lukikeba mu luzolo lu Nzambi.” (Yuda 21) Tufweti fikama kwidi Yave mwingi tubaka lusalusu  lwandi mu thangu yi ziphasi. Angi bwidi tulenda vangila mawu?

4, 5. Bwidi Yave kammonisinanga luzolo lwandi mu befu?

⁴ Mwingi tufikama Yave, tufweti yindula luzolo lu kadi mu befu. Dedi mamboti katuvangilanga lumbu ka lumbu. Nsitu katuvana widi na bibulu, bidya bimboti, nlangu tunnwanga ayi mankaka. Yave wunsadilanga mvandi Kibibila mwingi katuzabikisa dizina ayi zikhadulu zyandi. Nandi wuluta monisa luzolo lwandi bo kafila mwan’andi va ntoto mwingi kafwila mu kibila ki masumu mitu. (Yoane 3:16) Mu kibila ki khudulu beni, twididi dyana di kuzinga mvu ka mvu.

⁵ Yave wukubika Kintinu ki diyilu kyambelama kumanisa ziphasi ayi kintwala Paladizu va ntoto. Batu bala zingila mu ndembama ayi mu mayangi thangu zyoso. (Minkunga 37:29) Phila yinkaka Yave kammonisinanga luzolo lwandi, bu katulongisanga phila yifweni yi kuzingila. Nandi mvandi wututumisanga tumfikama mu lusambulu ayi wukubama kadi mu kukuwa minsambu mitu. Bukyedika Yave wummonisanga luzolo lwandi mu kadika mutu.

6. Bwidi wulenda vutudila matondo mu luzolo Yave kammonisanga mu ngyewu?

⁶ Bwidi wulenda vutudila matondo mu luzolo Yave kammonisanga mu ngyewu? Bawombo batondanga ko Nzambi. Mawu mamonikina Yesu va ntoto bo kabuka kumi di batu baba buazi. Angi wumweka to mu bawu wuvutudila Yesu matondo. (Luka 17:12-17) Befu tutidi kuba banga dibakala wuvutudila Yesu matondo. Ayi tutidi mvandi kutondanga Yave mu mamoso katuvangilanga.

7. Bwidi tufweti zodila Yave?

⁷ Befu tufweti monisa mvandi luzolo lwitu twidi kwidi  Yave. Diawu Yesu kakambila minlandikini myandi basambilanga Yave mu ntim’awu woso, mu mwel’awu woso ayi mu mabanza mawu moso. (Tanga Matai 22:37.) Mbi mawu mansundula?

8, 9. Bwidi tulenda monisina Yave ti tukunzolanga?

⁸ Kutubila to va munu ti ngyewu wunzolanga Yave mawu to mantombulu? Mve. Ti befu tunzolanga Yave mu ntim’itu woso, mu mwel’itu woso ayi mu mabanza mitu moso, mavanga mitu mvandi mafweti monisa ti tukunzolanga beni. (Matai 7:16-20) Boti befu tunzolanga Yave, muna tufweti tumamana zithumu zyandi. Phasi kutumamana ziawu? Mve, Kibila “zinthumu ziandi zisi phasi ko.”—Tanga 1 Yoane 5:3.

⁹ Befu kutumamana Yave, tulenda baka luzingu lumboti ayi lu mayangi. (Yesaya 48:17, 18) Angi mbi bilenda kutusadisa kuzingila mu luzolo lu Yave? Mawu twanzaba.

10. Kibila mbi ngyewu fweti tatamana kulonguka matedi Yave?

¹⁰ Bwidi wuyiza bela bukundi na Yave? Mu ndongukulu’aku yi Kibibila muawu wutonina kuvangila ayi konzudila luzolo lwaku mu Yave. Banga mbazu bankutikisanga biswadi mwingi yi kadidila, ngyewu fweti tatamana kulonguka Kibibila thangu ka thangu mu dyambu kinthwadi kyaku na Yave kikinda ayi ki kadidila.—Zingana 2:1-5.

11. Bwidi malongi ma Kibibila malenda kutusadisila?

¹¹ Bo wuntatimina kulonguka Kibibila buawu, wunkwiza zabila mambu malenda kunyikuna mabanza mantima. Tala bwidi minlandikini myodi mi Yesu bamwena mu muntima bo Yesu kabasudikila zimbikudulu zi Kibibila zitedi mu Nandi. Bawu batuba: “Kheti mintima mieto misi ko banga mu khini mu thangu kalembu kutuyolukilanga mu nzila, bu katuzingubudidi masonuku e?”—Luka 24:32.

12, 13. (a) Mbi bilenda monika befu kukhambu kindisa luzolo lwitu na Yave? (b) Bwidi tulenda kindisila luzolo lwitu mu Yave?

 ¹² Dedi bubela mabanza ma mintima mi minlandikini mi Yesu, buawu wumwena mvaku bo wutona kuvisikisa malongi ma Kibibila. Mawu mala kusadisa kuzaba Yave ayi kunzola. Bukyedika, ngyewu mengi kufubisa luzolo lwaku na Yave.—Matai 24:12.

¹³ Bo mavanga kikundi na Yave, fweti vanga mangolo mwingi kukonzula ayi kukindisa kiawu. Buawu fweti tatamana kulonguka matedi Yave ayi mwan’andi Yesu. Fweti botulanga mvandi thangu mwingi kufyongunina mambu wunlonguka mu dyambu wuzaba bwidi bukusadila mawu mu luzingu lwaku. (Yoane 17:3) Bo wuntanga voti wunlonguka Kibibila, wukiyuvusanga: ‘Malongi amama, mbi mandonga mu matedi Yave Nzambi? Kibila mbi yifweti kunzodila mu ntima ayi mu mwel’ami woso?’—1 Timoteo 4:15.

14. Bwidi lusambulu lulenda kutusadisila kukindisa kikundi kitu na Yave?

 ¹⁴ Ngye kubaka nkundi wukyedika, wulenda kolukanga yandi thangu zyoso mwingi kukindisa kikundi kinu. Bo buawu mvandi, mwingi kikundi kitu na Yave kikinda, tufweti kolukanga yandi thangu zyoso. (Tanga 1 Tesalonika 5:17.) Nsambu, khayilu yi lutidi tutambula kwidi Tat’itu yi diyilu. Diawu tufweti kunkambilanga mabanza mitu mantima. (Minkunga 62:8) Tubika vutukilanga minsambu. Vayi tufweti zibudilanga Yave mintima mitu mu mambu tuntomba. Buawu kutatamana kulonguka Kibibila ayi kuzibudila mintima mitu kwidi Yave mu lusambulu, phila yi kindisila kikundi kitu kwidi Nandi.

15, 16. Bwidi wummwenanga kisalu ki kusamuna?

¹⁵ Ti tuntomba kutatamana kuba kithwadi na Yave, tufweti kamba bankaka matedi kiminu kitu. Kulongisa batu matedi Yave lwaku lunneni. (Luka 1:74) Kiyeku kinneni Yesu kavana kwidi baklisto bakyedika. Befu kaboso tufweti samuna zitsangu zimboti zitedi Kintinu. Ngye wunsamunanga?—Matai 24:14; 28:19, 20.

¹⁶ Mvwala Polo wummona beni luvalu kisalu ki kusamuna, diawu kadedikisila kiawu banga “kiuka.” (2 Kolinto 4:7) Kusadila Yave mu kuzabikisa bankaka matedi Nandi ayi zikhanu zyandi, kiawu kisalu kilutidi nkinza wulenda vanga. Ayi zaba kwaku ti Yave luvalu luwombo kamvananga kisalu kyaku. (Ebeleo 6:10) Kisalu ki kusamuna mvandi kilenda vukisa moyo’aku ayi moyo wu batu wunlonga. Kibila malongi beni, malenda sadisa ngye feka ayi bankaka kufikama Yave mwingi babaka luzingu lu mvu ka mvu. (Tanga 1 Kolinto  15:58.) Vadi kisalu kinkaka kilenda kuvana mayangi malutididi mu luzingu?

17. Kibila mbi kisalu ki kusamuna kifweti vangulu mu nswalu?

¹⁷ Thangu’itu kisalu ki kusamuna kifweti vangulu mu nswalu. Diawu tufweti “longa mambu ma Nzambi . . . mu bufula mu zithangu zyoso.” (2 Timoteo 4:2) Batu bafweti kuwa matedi Kintinu ki Nzambi. Kibibila kintuba ti, ‘Kilumbu ki Yave kimafikama kyeka lukufi, . . . kinkwiza nswalu beni.’ (Sefania 1:14; Habakuki 2:3) Thangu yilwelu yisyedi mwingi Yave katulula nza yidi mu lutumu lu Satana. Ava ma monika, tufweti lubula batu mwingi bavanga luzolo lu Yave ayi bansadila.

18. Kibila mbi tufweti bwongiminanga Yave va kimweka ayi baklisto bankaka bakyedika?

¹⁸ Yave tidi tumbwongimina na baklisto bankaka ba kyedika. Kibibila kintuba: “Tusungasananga beto na beto mu diambu disalasananga beto na beto muingi tumonikisa luzolo ayi vanga mavanga mamboti. Tubikeno tina [kimvuka] banga bueti vangila batu bankaka; Vayi bika tukikindisanga beto na beto bu lumueni ti lumbu ki Mfumu kieka nduka.” (Ebeleo 10:24, 25) Tufweti vanganga mangolo mwingi kukutakana na zikhomba. Kibila mu zikhutukunu twididi lwaku lu kukindasananga ayi kubwela mangolo bankaka.

19. Mbi bilenda kutusadisa kuzolanga zikhomba zi kimvuka?

¹⁹ Mu zikhutukunu, muawu wala vangila kikundi na batu bala kusadisa kubwongimina Yave. Ngye wala zaba zikhomba zi babakala ayi zi bakyeto bamvanganga mangolo mwingi kuvanga luzolo lu Yave. Zaba ti bawu mvawu bansumukanga dedi ngyewu. Diawu ba kusumuka mu ngyewu, fweti ba wukubama mwingi wubalemvukila. (Tanga Kolosai 3:13.) Buawu tadilanga zikhomba zi kimvuka mu zikhadulu ziawu  zimboti kibila mawu mala kusadisa kubwela fikama Yave.

20, 21. “Luzingu lukyedika” muna mbi?

²⁰ Yave wuntomba bakundi bandi boso bazingila mu mayangi. Kibibila kintuba ti luzingu lwitu mu bilumbu binkwiza, lwala ba to lu mayangi na mayangi thangu zyoso.

²¹ Mu bilumbu binkwiza kuntwala, twala zingila mu mayangi mvu ka mvu. Twisinkwiza bwe zinga ko to 70 voti 80 di mimvu tunzinganga thangu ayiyi. Vayi twala zingila mu mayangi ku paladizu va ntoto mu buvinya ayi mu ndembama. Ntindu luzingu beni, luawu Kibibila kantedila “luzingu lukyedika.” Yave wunkanikisa kutuvana luzingu beni. Angi tufweti vanga mangolo bubu mu “simbidila luzingu lukalumani” mu dyambu tubika kuluzimbisa.—1 Timoteo 6:12, 19.

22. (a) Bwidi tulenda “simbidila luzingu lukalumani”? (b) Kibila mbi tulendi bakila ko luzingu lu mvu ka mvu mu mangolo mitu?

²² Bwidi tulenda “simbidila luzingu lukalumani”? Tufweti ba ‘mavanga mamboti’, ayi ba “zimvuama mu mavanga mamboti.” (1 Timoteo 6:18) Mawu mansundula ti tufweti zingila mambu tunlongukanga mu Kibibila. Angi bakana ko mu mangolo mitu twala bakila luzingu lukyedika. Kibila mu befuveka, tulendi baka ko luzingu lu mvu ka mvu. Vayi mu nlemvu wu Yave kadi mu bisadi byandi, buawu twala bakila luawu. (Loma 5:15) Bukyedika Tat’itu ku diyilu, phwila beni kadi mu kutuvana khayilu beni.

23. Kibila mbi fweti sodila buboti nzingulu wunnata thangu ayiyi?

²³ Wu yiyuvusa, ‘Minu yimbwongiminanga Yave mu phila Nandi kantombila?’ Ngye kubakula ti mu phil’aku wukumbwongimina, muna fweti landakana mbwongimini yi kyedika mu thinu. Befu kuvanga mangolo mwingi kutumamana Yave, Nandi wala ba kiswamunu kitu mu thangu ziphasi. Yave wala vukisa bisadi byandi mu bilumbu bitsuka bi lutumu lu Satana. Bosi wala dukisa lukanu  lwandi mu batu, lu kuzinga mvu ka mvu ku paladizu va ntoto dedi bo kakanikisila. Ngye kusola kutumamana Yave thangu ayiyi, wala zinga luzingu lukyedika lunkwiza kuntwala.