MU ndongukulu’aku yi Kibibila ngye malonguka kyedika kitedi mu bafwa ayi mu luvulubuku lu bafwa. Malonguka mvandi lukanu lu Yave lu kutuvana luzingu lu mvu ka mvu ku paladizu va ntoto. (Mpovi 9:5; Luka 23:43; Yoane 5:28, 29; Nzaikusu 21:3, 4) Ḿba wunlandakananga zikhutukunu zi Zimbangi zi Yave ayi mavisa ti bawu bambwongiminanga Nzambi mu bukyedika. (Yoane 13:35) Ngye weka nkundi wu Yave wuluzolo ayi bukundi beni buma kuvanga kubaka makani  ma kunsadila mu ntima woso. Diawu wulenda ku yikuvusa, ‘Mbi yifweti vanga thangu ayiyi mwingi yisadila Nzambi?’

2. Kibila mbi dibakala di Etiopi katombila kubotama?

² Mawu mayindu dibakala dimweka mwisi Etiopi kaba wuzinga mu bilumbu bi Yesu. Kumbusa luvulubukusu lu Yesu, nlongisi’andi wumweka bantanguninanga Filipi, wulonga dibakala beni. Filipi wunsudikisa matangu maba tubila ti Yesu nandi Mesiya. Dibakala beni bo kavisa mawu buboti, momu thangu beni wukamba Filipi: “Tala nlangu wawu! A mbi bi kukhakidila mu botama e?”—Mavanga 8:26-36.

3. (a) Lutumu mbi Yesu kabikila minlandikini myandi? (b) Bwidi batu bafweti botiminanga?

³ Kibibila kinlonga ti mwingi wusadila Nzambi, ngyewu fweti botama mu nlangu. Diawu Yesu kakambila minlongisi myandi: “Yendanu lukitula batu ba zi tsi zioso minlonguki miama; Lubabotika.” (Matai 28:19) Yesu wumonisa ntungulu bo kabotama. Nandi basa kumbondika ko to ntu, vayi bambwika nandi kawoso mu nlangu. (Matai 3:16) Wawu ntungulu baklisto banlandakananga.

4. Mbi kubotama kulenda zabikisa va meso ma batu bankaka?

⁴ Kubotama, phila yimonisina ti ngyewu tidi kuvanga kikundi na Nzambi ayi kunsadila. (Minkunga 40:7, 8) Diawu wulenda ku yikuvula, ‘mbi yifweti vanga mwingi yibotama?’

5. (a) Mbi wufweti vanga theti ava wubotama? (b) Nkinza mbi widi kulandakananga zikhutukunu zyoso zi baklisto?

⁵ Ava wubotama, ngyewu fweti zaba kyedika kitedi  Yave ayi mwan’andi Yesu. Ngye matona kuzaba mawu mu ndongukulu’aku yi Kibibila. (Tanga Yoane 17:3.) Vayi masi ko mawu to fweti vanga mwingi kufwana kubotama. Kibibila kintuba “luba lufuluka mu nzayilu yi luzolo” lu Yave. (Kolosai 1:9) Zikhutukunu zi Zimbangi zi Yave, zyala kusadisa kukindisa kikundi kyaku na Yave. Diawu nkinza beni kulandakananga zikhutukunu zyoso.—Ebeleo 10:24, 25.

6. Ntindu luzabu mbi Yave kantomba ngye wubaka ava wubotama?

⁶ Bukyedika, Yave kasi kukwika ko wuzaba theti mamoso madi mu Kibibila bosi wubotama. Kibila Nandi kasa tedimina ko theti mwisi Etiopi kazaba mamoso madi mu Kibibila bosi kabotama. (Mavanga 8:30, 31) Malongi ma Nzambi masukanga ko ayi twala malongukanga mvu ka mvu. (Mpovi 3:11) Vayi Nzambi wuntomba ngye wuzaba ayi wukikinina malongi ma theti ma Kibibila.—Ebeleo 5:12.

7. Bwidi ndongukulu yi Kibibila yima kusadisila?

⁷ Kibibila kintuba: “Mutu kambulu minu kalendi monisa Nzambi khini ko.” (Ebeleo 11:6) Diawu ngyewu fweti ba kiminu mu Nzambi ava wubotama mu nlangu. Kibibila kintuba ti batu ku divula di Kolinto bo bayuwa minlandikini mi Yesu baba longa matedi Yesu, bawu “bawilukila ayi babotama.” (Mavanga18:8) Ngye mvaku, ndongukulu’aku yi Kibibila yimakusadisa kuba mana mu lukanu lu Nzambi ayi mu khudulu yi Yesu.—Yosua 23:14; Mavanga 4:12; 2 Timoteo 3:16, 17.

8. Mbi byala kuvanga kukamba bankaka ma wunlongukanga?

⁸ Buna bu wunlongukila Kibibila ayi wumwena ndandu ma kutwadisila mu luzingu lwaku, buawu buna kiminu  kyaku kimbwedila kukinda. Ayi mawu mala kuvanga kukamba bankaka ma wunlongukanga. (Yelemia 20:9; 2 Kolinto 4:13) Banani wulenda kamba mawu?

⁹ Ngye wulenda tona kusamuna mambu malonguka mu Kibibila, kwidi badi yaku va dikanda, bakundi, bansalanga yaku ayi bankotanga yaku mu kikola. Nkinza kuvanga mawu, vayi fweti kubakambila mu dyela ayi mu luzolo. Kuntwala wala kwiza longa va kimweka na zikhomba zi kimvuka. Bo wala baka makani beni, muna kamba nlongisi’aku wu Kibibila ti ngyewu tidi kulonga va kimweka na zikhomba zi kimvuka. Na kumona ti ngye wunzingilanga mambu malonguka ayi mafwana kuba nsamuni, buna bakhulutu bwadi ba kimvuka bala kutakana yinu, ngyewu ayi nlongisi’aku.

9, 10. (a) Banani wulenda tonina kusamuna mambu malonguka mu Kibibila? (b) Mbi wulenda vanga ti wuntomba kusamuna va kimweka na kimvuka?

¹⁰ Nkinza mbi lwidi lukutukunu beni? Nkinza beni lwidi, kibila lunkwiza sadisa bakhulutu ba kimvuka kuzaba ti wuvisa malongi beni ayi wumazingilanga voti ndamba. Ayi mwingi bazaba ti bukyedika tidi kuba wumweka mu Zimbangi zi Yave voti ndamba. Zaba kwaku ti bakhulutu ba kimvuka batidi kukyeba banga bo bankyebilanga baboso mu kimvuka. (Mavanga 20:28; 1 Petelo 5:2, 3) Kutsuka lukutukunu, bala kuzabikisa ti wulenda kwaku kusamuna va kimweka na kimvuka voti ndamba.

11. Kibila mbi fweti baludila mavanga ava wutona kusamuna na kimvuka?

¹¹ Bakhulutu ba kimvuka ba kumona ti vadi mambu makhambu ngwizani na Kibibila wukhidi vanganga,  muna fweti bika mawu ava wutona kusamuna, bawu bala kuvana thangu. Mu kibila mbi fweti bikila mawu ava kutona kusamuna na kimvuka? Kibila bo tunsamuna tsangu zi Nzambi, kimbangi ki Yave tummonisa kwidi bankaka. Diawu nzingulu, ayi mavanga mitu mafweti zitisa dizina di Yave.—1 Kolinto 6: 9, 10; Ngalatia 5:19-21.

12. Kibila mbi befu boso tufweti baludila mavanga?

¹² Vadi mambu mankaka fweti vanga ava wubotama mu nlangu. Mvwala Petolo wusonika: “Lubalula mavanga meno ayi luvutuka kuidi Nzambi muingi masumu meno malemvokolo.” (Mavanga 3:19) Mbi binsudula kubalula mavanga? Mansundula kunyongina masumu mawuvola kumbusa. Dedi ti ngye waba vanganga kitsuza muna fweti bika kuvutukila disumu beni. Kheti mutu wukhambu nata nzingulu yi butsuza voti kasa vanga ko masumu mankaka mangolo, bobuawu fweti balula mavanga mu kudinda nlemvu kibila befu boso twidi batu ba masumu.—Loma 3:23; 5:1.

13. Mbi binsundula “kuvutuka kwidi Nzambi”?

¹³ Bika to kubalula mavanga vayi vadi dinkaka wufweti vanga. Mbi? Mvwala Petolo wusonika binkaka tufweti vanga “luvutuka kuidi Nzambi.” Dinsundula ti ngyewu fweti bika mambu mambi wube vanganga kumbusa ayi kulandakana nzingulu yimona. Tulenda fwanikisa banga mutu kotidi kunsitu kakhambu zaba buboti. Na kutebuka moyo ti kalenda zimbala na kukotila ngolo, muna mbi kafweti vanga? Bukyedika ti kalenda ba mayindu ma kuvutuka. Buawu tulenda dedikisila mvandi mutu malonguka kyedika ki Kibibila, na kubakula ti mambu mankaka kamvanga masiko ngwizani na Kibibila, muna kafweti vilula madyela ayi bika mawu—nandi kumavanga wala ba mayindu mamboti—mu dyambu kavanganga mambu Nzambi kanzolanga.

¹⁴ Dyambu dinkaka dinkinza fweti vanga ava wubotama, kukivana kwidi Yave. Bo wukivana kwidi Yave mu nzila lusambulu, ngye wukunkanikisa ti Nandi to wunkwiza bwongiminanga ayi luzolo lwandi, luawu wunkwiza tula vantwala mu luzingu lwaku.—Deutelonomi 6:15.

15, 16. Mbi bilenda vanga wukivana kwidi Nzambi?

¹⁵ Kukanikisa Yave mu kuvanga luzolo lwandi, kwidi banga kuvitika kuzinga va kimweka na mutu wunzolanga luzingu lwaku loso. Yindula dibakala wuntomba kukwela nkyeto kanzolanga beni. Kheti mu kuzaba kizitu ki luwawunu beni, kalendi bika ko kumavanga mu kibila ki luzolo lu kadi mu nkyeto beni.

¹⁶ Buna bu wumbwedila kulonguka matedi Yave, buawu buna phwila yi kuvanga luzolo lwandi yimbwedimina mu ngyewu. Ayi mawu mala kuvanga wukivana kwidi Nzambi mu nzila yi lusambulu. Kibibila kintuba, enati mutu tidi kundandakana buna “kafweti kukizimbakana.” (Malako 8:34) Mbi mawu mansundula? Mansundula ti ngyewu fweti tula Yave vantwala zitsatu zyaku mwingi kuntumamana. Kibila mambu ma Yave, malutidi nkinza ke na zitsatu zyaku.—Tanga 1 Petelo 4:2.

17. Kibila mbi batu bankaka bammanginanga kukivana kwidi Yave?

¹⁷ Batu bawombo bammonanga boma kukivana kwidi Yave, kibila bammwenanga ti balendi nunga ko mambu bankanikisa Nzambi. Bammanginanga kukivana kwidi  Yave mwingi babika kuntula kyunda ayi kabika kubafundisa mu mambu mambi balenda vutuka kuvanga.

18. Mbi bilenda kusadisa kubika ba boma bu kubotama?

¹⁸ Luzolo lwaku mu Yave, lwala kusadisa wubika ba boma bu kukivana ayi kubotama. Kibila ngye kuzola Yave muntima woso, wulenda vanga mamoso kantomba. (Mpovi 5:4; Kolosai 1:10) Ayi mamoso kantomba, wala ma mwena mambu makhambu phasi mu kusadila. Diawu mvwala Yoane kasonikina: “Zola Nzambi kuawu kuaku: Keba zithumu ziandi. Ayi zithumu ziandi zisi phasi ko.”—1 Yoane 5:3.

19. Kibila mbi fweti manga mwena boma mu kukivana kwidi Yave?

¹⁹ Yave katombanga ko tuba theti balunga mwingi tukivana kwidi Nandi. Diawu kakhambu tukwikilanga mambu kazebi ti tulendi nunga ko. (Minkunga 103:14) Vayi wala kusadisa kuvanga masulama. (Yesaya 41:10) Ba lufyatu kwidi Yave mu ntim’aku woso kibila ‘nandi wunsungika nzil’aku’.—Zingana 3:5, 6.

20. Mbi binkaka wulenda vanga ngye kumana kukivana kwidi Yave?

²⁰ Mu mbwenu’aku, mafwana kukivana kwidi Yave? Ngye kumana kukivana kwidi Yave, bosi wala kubama mwingi wubotama.

21, 22. Bwidi wala monisina kwidi baboso ti ngye wukivana kwidi Yave?

²¹ Kamba ntwadisi mu bakhulutu ba kimvuka ti  ngyewu makivana ayi tidi kubotama. Bosi nandi wala kuvana bakhulutu ba kimvuka mwingi bavutukila yaku malongi ma theti ma Kibibila. Ba kumona ti mafwana kubotama, muna bala kukamba mwingi wubotama mu zikhutukunu zinneni zi Zimbangi zi Yave zifikama mu thangu beni. Mu zikhutukunu beni mwala ba disolo dyala monisa tsundu yi kukivana ayi kubotama.  Ayi mwala vutula mimvutu mu byuvu byala ‘zabikisa baboso’ ti mwidi kiminu ayi mu kivana.—Loma 10:10.

²² Bosi wala botama. Ngye woso bala kubwika mu nlangu. Kubotama kuawu kwala monisa ti wukivana  kwidi Yave ayi weka wumweka mu Zimbangi zi Yave.

23. Mbi binsundula kubotama mu dizina di “Tata, di Muana ayi di Pheve yinlongo”?

²³ Yesu wutuba ti minlandikini myandi bala botama mu dizina di “Tata, di Muana ayi di Pheve yinlongo.” (Tanga Matai 28:19.) Mbi mawu mansundula? Mansundula ti ngyewu kikinini lutumu lu Yave ayi kiyeko Yesu kadi mu zikhanu zi Yave. Mansundula mvandi ti ngyewu kikinini ti Pheve yinlongo, mangolo ma Yave. Nandi wunsadilanga mangolo beni mwingi kuvanga luzolo lwandi.—Minkunga 83:18; Matai 28:18; Ngalatia 5:22, 23; 2 Petelo 1:21.

²⁴ Kubotama mu nlangu nkinza beni kwidi. Kibila kubotama mu nlangu, kunsundula ti bikidi nzingulu’aku yikhulu ayi mavanga mambi. Kubasika mu nlangu, kunsundula ti ngyewu matona nzingulu yimona yitedi mu kuvanga luzolo lu Nzambi. Ayi mammonisa mvandi ti tona mu kilumbu beni ti kuntwala Nzambi to wunkwiza sadila. Diawu fweti zabila ti wisi kivana ko kwidi mutu, dingumba voti kisalu. Vayi ngyewu kwidi Yave wukivana.

24, 25. (a) Kubotama mu nlangu tsundu mbi kwidi? (b) Mbi tunkwiza longuka mu kapu yi tsuka mu buku ayiyi?

²⁵ Kukivana kwidi Nzambi kwala kusadisa kukindisa kikundi kinu. (Minkunga 25:14) Vayi, masinsundula ko ti kubotama, kuawu kumvanga mutu kubaka phulusu. Kibila mvwala Polo wusonika: “Bika lusala ayi luvanga mambu mafueni mu diambu di phulusu eno, mu tsisi ayi mu lukhuku.” (Filipi 2:12) Kubotama, thonono yi kikundi kitu na Nzambi. Diawu tu kukuvudila, bwidi wala kyebila luzolo lwaku na Yave? Kapu yitsuka yi buku ayiyi, yinkwiza vana mvutu mu kyuvu akyokyo.