NANI wulenda sola mwingi kaba nkundi’aku? Kalenda ba mutu ngye wunzolanga ayi nandi mvandi wukuzolanga voti widi zikhadulu ayi mavanga mamboti.

1, 2. Banani baba bakundi ba Yave?

² Yave Nzambi wusola batu va ntoto mwingi baba bakundi bandi. Abalahami wuba wumweka mu bawu. (Yesaya 41:8; Yakobi 2:23) Yave mvandi wuzola Davidi. Ayi wutuba ti Davidi, wuba mutu kazola muntima. (Mavanga 13:22) Mbikudi Danieli wuba mutu wu luvalu va meso ma Yave.—Danieli 9:23.

3. Mbi bivanga Abalahami, Davidi, ayi Danieli kuba bukundi na Yave?

³ Bwidi Abalahami, Davidi, ayi Danieli bayiza bela bakundi ba Yave? Yave wukamba Abalahami: ‘Ngye wunkuwanga ma yintuba.’ (Ngenesi 22:18) Yave wumvanganga kikundi kwidi batu boso bakikululanga mwingi kuntumamana. Nandi katalanga ko kizizi, tsi voti mvila. Yave wukamba dikabu di Isaeli: ‘Wilukilanu mbembo’ami, mwingi minu yiba Nzamb’inu ayi beno muba dikabu dyami.’ (Yelemia 7:23) Ngye kutomba kuba kikundi na Yave, fweti tumamana minsiku myandi.

4, 5. Bwidi Yave kankyebilanga bakundi bandi?

⁴ Kibibila kintuba ti Yave wunsadisanga ayi wunkindisanga baboso  bakwikama mu nandi. (2 Lusansu 16:9) Mu Minkunga 32:8 Yave wukanikisa bakundi bandi: “Ndiela kumonisa ayi kulonga nzila yoyi fueti diatila ndiela kuvana ndongi ayi thalu’ama yela ba vadi ngeyo.”

⁵ Vadi mbeni yingolo wuntomba kuvasa kikundi kitu na Nzambi. Vayi Yave tidi kutukyeba. (Tanga Minkunga 55:22.) Bo twidi bakundi ba Yave, befu tu kunsadilanga mu ntima woso. Buka Davidi, tufweti fyatila Nzambi kheti bo twidi mu ziphasi. Tala ma katuba mu matedi Yave: Nandi “widi ku koko kuama kulubakala ndilendi [ba ko va kingela]”. (Minkunga 16:8; 63:8) Mangolo mbi Satana kamvanganga mwingi kuvasa kikundi kitu na Nzambi?

6. Bwidi Satana kafyesila batu va ntoto?

⁶ Tumalonguka mu Kapu 11 ti Satana wufyesa ayi wuvunina Yave mambu bo katuba ti nandi nkwa luvunu ayi wummanganga mamboti mu bivangu byandi. Nandi mvandi wutuba ti Yave kasa bikila ko Adami ayi Eva basola baveka mamboti ayi mambi. Buku yi Yobi yitumonisa ti Satana mvandi wufyesa batu boso bantombanga kuba kikundi na Nzambi. Diawu katubila ti batu basadilanga ko Nzambi mu luzolo vayi mu kyuka Nzambi kabavananga. Nandi wutuba ti kalenda nunga kuvukumuna batu babika kusadila Nzambi. Twammona mbi tulenda longuka mu mambu mamonikina Yobi ayi bwidi Yave kankyebila.

7, 8. (a) Kibila mbi Yave kaba zodilanga Yobi? (b) Mambu mbi Satana katuba mu matedi Yobi?

⁷ Yobi wuba nani? Nandi wuba dibakala diba mavanga mamboti, tona kafwa, va mavyoka 3.600 di mimvu. Yave wutuba ti, mu ntoto wumvimba vasa bakana ko mutu wuba mavanga mamboti banga Yobi. Nandi wuba  lukinzu luwombo mu Nzambi, ayi waba lendanga mambu mambi. (Yobi 1:8) Bukyedika, Yobi kikundi kingolo kaba na Yave.

⁸ Vayi, Satana wutuba ti Yobi kasa ba ko luzolo lu ntima woso mu Yave. Diawu nandi kakambila Yave: ‘Ngyewu, wisa mvana ko kyuka voti busina ayi byabyoso bidi yandi mwingi ka kusadila? Ngye wusakumuna bisalu byoso bimvangiminanga mu myoko myandi, dedi bibulu byandi bimbutana beni. Bo ti ndamba, muna phana nswa mwingi yinthota khamba kasi kufinga ko’.—Yobi 1:10, 11.

9. Kibila mbi Yave kabikila Satana kathota Yobi?

⁹ Satana wutuba ti Yobi mu kibila ki kyuka kiba yandi diawu kaba sadilanga Yave. Nandi mvandi wutuba ti Yave na kubotula kyuka kamvana, nandi wala bika kunsadila. Yave kasa kikinina ko mambu matuba Satana, diawu nandi kabikila Satana kathota Yobi mwingi kamonisa ti mu luzolo voti ndamba kaba kunsadilanga.

10. Mambu mbi Satana kavangila Yobi? Ayi mvutu mbi Nandi kavana Satana?

¹⁰ Theti, Satana wuvondisa ayi wuyibisa bibulu byoso bi Yobi. Satana mvandi wuvondisa bisadi binkaka bi Yobi. Yobi wuyiza ba buphumbulu. Mu kivuka kimonika, Satana wuvondisa kumi di bana ba Yobi. Angi Yobi kasa tubila ko Yave mbi vayi wukwikama mu nandi. Mu mambu moso amomo Yobi kamonokono, nandi kasa sumuka ko ayi kasa vana ko Yave mbedi.—Yobi 1:12-19, 22.

¹¹ Satana kasa sukila ko vovo. Nandi wufyesa mvandi Nzambi bo katuba: ‘Mbikila thangu mwingi yintula ziphasi mu nyitu’andi, khamba kasi kufwisa ko tsoni va meso maku.’ (Yobi 2:5, 7) Satana wutula Yobi mu kimbevo  kingolo. Bo buawu, Yobi wukwikama mu Yave. Nandi wutuba: ‘Mboti yifwa ke na kubika kuvanga masulama va meso ma Yave.’—Yobi 27:5.

12. Bwidi Yobi kamonisina ti matuba Satana ma luvunu?

¹² Yobi kasazaba ko ti Satana wufyesa Yave mu kibila kyandi. Nandi kasazaba ko mvandi kibila kaba mwena ziphasi. Nandi kabamwena ti Yave waba twadisa ziphasi beni. (Yobi 6:4; 16:11-14) Kheti mu mambu moso kamonokono, Yobi wukwikama mu Yave. Satana kasa bwe tula ko ziphaka mu Yobi. Nandi wuzaba ti Yobi kabasa sadilanga ko Nzambi mu kyuka. Angi waba zolanga Nzambi ayi wuba nkundi’andi. Mambu moso Satana katuba matedi Yobi maba ma luvunu!

13. Bo Yobi kakwikama, bwidi Yave kansakumunina?

¹³ Bo Satana kaba fyesa Yave ku diyilu mu matedi Yobi, nandi kasa zaba ko. Vayi Yobi wukwikama mu Yave ayi wumonisa ti Satana nkwa luvunu. Yave wusakumuna Yobi mu phila kakwikimina.—Yobi 42:12-17.

14, 15. Bwidi Satana kafyesila nkunu wu batu va ntoto?

¹⁴ Malongi mankinza wulenda longuka mu mambu Yobi kamonokono. Satana wuntubanga ti befu tusadilanga ko Yave mu luzolo lu ntima vayi mu kyuka katuvananga. Mu buku yi Yobi 2:4, Satana wutuba: “Nkand’anitu mu nkand’anitu; biabio bivwidi muntu si kavana mu moyo andi.” Satana kasa fyesa ko to Yobi vayi nkunu woso wu batu. Tona Yobi kafwa, va mavyoka mafunda ma mimvu, vayi Satana wukhidi vweza Yave ayi wukhidi fyesa bisadi bi Nzambi. Diawu buku yi Zingana 27:11, yintubila: ‘Ba ndwenga, mwan’ami, ayi yangidika ntim’ami, mwingi yivutudila woso wukumvwezanga.’

¹⁵ Ngye wulenda sola kutumamana Yave ayi kuba nkundi’andi mwingi kumonisa ti Satana nkwa luvunu. Kheti wulenda mona ziphasi mu kubalula nzingulu voti mavanga mwingi kuba nkundi Yave, vayi mawu makani malutidi wulenda baka mu luzingu lwaku! Satana  wuntubanga ti wulendi kwikimina ko Yave ngye kuba mu mambu. Nandi wuntombanga kutuvukumuna mwingi tubika kwikimina Nzambi. Mu phila mbi?

16. (a) Mangolo mbi Satana kamvanganga mwingi kubotula batu mu myoko mi Yave? (b) Bwidi Nkadi’ampemba katuvukumuninanga?

¹⁶ Satana wutuvukumunanga mu ziphila ziwombo mwingi kumanisa kikundi kitu na Nzambi. Nandi “wulembo tufiedi banga khosi [mwingi katumina].” (1 Petelo 5:8) Bika kukwituka ngye kumona bakundi voti badi va dikanda dyaku, bammanga ngye wulonguka kyedika ki Kibibila voti bammanga mambu masulama Nzambi kantomba. Wulenda mona banga ngye bannwanisa. * (Yoane 15:19, 20) Satana mvandi wu yimonisanga banga ‘mbasi yimboti.’ Nandi kalenda kutuvukumuna mwingi tubika kutumamana Yave. (2 Kolinto 11:14) Kuyindula ti twisi ko batu bafwana va meso ma Yave mwingi kuvanga luzolo lwandi, phila yinkaka Satana katuvukumuninanga.—Zingana 24:10.

17. Kibila mbi tuntumiminanga Yave?

¹⁷ Kutumamana Yave, phila yimonisina ti Satana nkwa luvunu. Mbi bilenda kutusadisa kutumamana Nzambi? Kibibila kintuba: ‘Ngyewu fweti zola Yave, Nzambi’aku mu ntim’aku woso ayi mu mwel’aku woso ayi mu ngolo zyaku zyoso.’ (Deutelonomi 6:5) Tuntumiminanga Yave, kibila tukunzolanga. Bo luzolo lwitu mu Yave lumbwelama, buawu twala bwedila kuvanga mamoso kantomba.  Mvwala Yoane wusonika: “Bila zola Nzambi kuawu kuaku: Keba zithumu ziandi. Ayi zithumu ziandi zisi phasi ko.”—1 Yoane 5:3.

18, 19. (a) Mambu mbi Yave kammanganga befu tubika vanga? (b) Bwidi tuzabidi ti Yave katudindanga ko kuvanga mambu ma kazebi ti tulendi nunga ko kumavanga?

¹⁸ Mambu mbi Yave kammanganga befu tubika vanga? Tala tsyelo yisonama “ mambu Yave kammonanga nkenene.” Ḿba wulenda yindula! Yisimmona ko kibila Yave kammangina befu tubika vanga mambu beni. Angi kutanga matanga ma Kibibila madi va tsyelo beni ayi kumafyongunina buboti, vawu wulenda visila ndandu yi kulandakana minsiku ayi minswa mi Kibibila voti kutomba kubalula mavanga. Ḿba wulenda mona phasi kuzingila minsiku ayi minswa beni, vayi ngye kumavanga, wala mona mayangi ayi ndembama yidi mu kuba nkundi Nzambi.  (Yesaya 48:17, 18) Bwidi tuzabidi ti ngye wulenda nunga mu kubalula mavanga?

¹⁹ Yave katudindanga ko kuvanga mambu ma kazebi ti tulendi nunga ko kumavanga. (Deutelonomi 30:11-14) Yave wulutidi kutuzaba ke befuveka. Nandi zebi ti befu twidi batu ba masumu. (Minkunga 103:14) Mvwala Polo wusonika: “Ziphukumunu zioso zibuila batu, ziba ziphukumunu ziozi batu boso balenda nunga. Vayi Nzambi widi wukuikama, kalendi tala ko ti phukumunu yiluviatukila ngolo. Vayi phukumunu bu yizidi, niandi kafueti kuluvana [lwaku] muingi lubaka buvibidila yawu.” (1 Kolinto 10:13) Tulenda ba lufyatu ti Yave wala kutuvana mangolo mwingi kuvanga mambu masonga. Nandi wala kuvana “lulendo lulutidi ngolo” mwingi wukindama mu zithotolo. (2 Kolinto 4:7) Polo bo kasadila malongi beni, wumona lusalusu lu Yave ayi wutuba: “ndilenda vanga  mambu mamo mu diambu di mutu wowo wukukhindisanga.”—Filipi 4:13.

20. Zikhadulu mbi zi Yave ngye fweti landakana, ayi mu kibila mbi?

²⁰ Boti tutidi kuba bukundi na Yave, tufweti bika theti kuvanga mambu nandi kakhambu zolanga. Vayi vadi dyambu dinkaka tufweti vanga. (Loma 12:9) Bakundi ba Nzambi banzolanga mambu nandi kanzolanga. Mambu beni masonama mu buku yi Minkunga 15:1-5. (Tanga.) Bakundi ba Yave banlandakananga zikhadulu zyandi, dedi: “Luzolo, khini ove (mayangi), ndembama, mvibudulu, tsalasani, vanganga mamboti, kikhuikizi, batu banlembama, [ayi] kukiyala.”—Ngalatia 5:22, 23.

21. Bwidi wulenda monisina mu luzingu lwaku zikhadulu Nzambi kanzolanga?

²¹ Bwidi wulenda monisina zikhadulu beni mu luzingu lwaku? Ngyewu fweti zaba mambu Yave kanzolanga mu kutanganga Kibibila lumbu ka lumbu. (Yesaya 30:20, 21) Ngye kumasadila, luzolo lwaku mu Yave lwala bwelama ayi wala kwangalala mu kutumamana minsiku myandi.

22. Mbi wala baka ngye kutumamana Yave?

²² Kubalula mavanga voti nzingulu tulenda kuma fwanikisa banga nyoka yinkubudila nkanda nyitu. Kibibila ‘kintuba ti ngyewu fweti bika mavanga makhulu vayi landakana nzingulu yimona.’ (Kolosai 3:9, 10) Tuzebi ti kulandakana nzingulu yimona ayi kutumamana minsiku mi Yave, malenda monikina banga mambu maphasi vayi befu kumavanga “Yave wukanikisa ti wala tuvana mfutu wunneni.” (Minkunga 19:11) Diawu sola kutumamana Yave ayi monisa ti Satana nkwa luvunu. Sadila Yave mu luzolo lu ntima bika to mu lusakumunu kala kuvana. Mawu mala kusadisa wuba bukundi bukyedika na Nzambi!