Nzambi wu ǹtumisanga mintindu myoso mi bantu ba nfikama mu ǹzila yi lusambu. (Minkunga 65:2) Nandi ka kikininanga ko zi nsambudulu zyoso. Buka lusambulu lu dibakala wuntovulanga ǹkyetu’andi mwa mpasi Nzambi ka kikinina lusambulu lwandi. (1 Petelo 3:7) Ntangu bana ba Isaeli ba tatamana mu kuvanga mambi Nzambi kasa be kuwanga ko zi nsambudulu zyawu. Angi Nzambi wunkikininanga zi nsambudulu zi bantu bamfungulanga masumu mawu mangolo. Dyawu lusambudulu lwaku lu luneni lu kufikimina kwidi Nzambi.​—Tanga Yesaia 1:15; 55:7.

Lusambulu ḿvandi mpila tu ǹzitisilanga Nzambi. Dyawu tu fweti sambilanga to Yave Ḿvang’yitu. (Matai 4:10; 6:9) Bo tu keli batu ba masumu, tu fweti sambilanga mu dizina di Yesu kibila nandi wu fwila mu masumu mitu. (Yoane 14:6) Yave ka zolanga ko bo tunsambila vutukilanga mo mawu mambu makangama va ǹtu voti masonama. Nandi kantombanga tunsambidila mu ǹtima wonso.​—Tanga Matai 6:7; Filipi 4:6, 7.

Ḿvang’itu wunkuwanga ayi lusambulu luvangimini ku tsi ǹtima. (1 Samueli 1:12, 13) Nandi wu tu tumisanga mu ntangu zyoso tunsambidila, va ntonono ayi mbanosunu kilumbu, va kudya voti mu ntangu tundengananga mambu.​—Tanga Minkunga 55:22; Matai 15:36.

Kufikama Nzambi mu bilumbu bitu mpasi bene, kibila va ǹseng’itu va tu kala bantu bawombo ba tulanga ko minu kyawu kwidi Nzambi, bamvwezanga lukanu lwandi lu  kutwala ndembama va ǹtoto. (2 Timoteo 3:1, 4; 2 Petelo 3:3, 13) Dyawu tuntombilanga ki kundi ki kyedika ki bakomba mu dyambu tu kindasananga befu na befu.​—Tanga Ebeleo 10:24, 25.

Ku ba bakundi ba ǹzolanga Nzambi, dyawu di tu sadisanga kufikama kwidi Nzambi. Buawu zinkutukunu zi Zimbangi zi Yave zi kala mpwasi yineni yi kukindasana mu minu ayi kubombasananga.​—Tanga Loma 1:11, 12.

Wu lenda fikimina kwidi Nzambi, mu kuyindula bumbote, ma wu ǹlongukanga mu kibibila, mavanga mambote ma Nzambi, mpila ka kudyatisilanga ayi zinkanu zyandi. Kuyindula mambu beni va kymweka ayi lusambulu, lu lenda bwela mu ngyewu lufyatu lu kyedika mu luzolo ayi luzabu lu Nzambi.​—Tanga Yosua 1:8; Minkunga 1:1-3.

Mo wu fikama kwidi Nzambi ngyewu fweti ba mana ayi lufyatu kwidi nandi to. Buka ǹti ba kuna fweti kulembanga ǹlangu ntangu ka ntangu, buawu fweti kutebukilanga ḿvandi moyo mu kutala mu mbi ove kwidi nani wuntulanga mana maku.​—Tanga Matai 4:4; Ebeleo 11:1, 6.

Yave wu ǹkipanga babonso ba kunzolanga ayi wu ba sadisanga mu mambu monso ma lenda bwisa kiminu kyawu mu luzingu lu ka lumana. (Minkunga 91:1, 2, 7-10) Nandi wu tu lubulanga ǹzingulu zi mbi zi ḿvanganga bantu manga zingila mu buvinya ayi manyenze. Angi wu tu monisinanga mpila yimbote yi kunatina luzingu.​—Tanga Minkunga 73:27, 28; Yakobi 4:4, 8.