1, 2. Mangitukulu mbi Petelo ayi Yoane bavanga va ntuala muelu wu tempelo?

 MUINYA wunteba, basi Yuda bakuikama ayi minlandikini mi Klistu bankota ku tempelo. Bosi “bankuiza sambila.” a (Mava. 2:46; 3:1) Petelo ayi Yoane baba va khati dingumba diabe kuenda ku muelu wu tempelo baba tedilanga Muelu Wumboti. Bayuwa mbembu yibasika va khati dingumba di batu ayi mutu wunkokumuna malu. Bamona dibakala dimueka wubutuka na malu mabela waba dindanga zimbongo va muelu mi tempelo.—Mava. 3:2; 4:22.

² Bo Petelo ayi Yoane bafikama, bamona dibakala beni dibela kudinda zimbongo. Bapostolo batelama ayi dibakala wuyituka ayi wuyindula ti bawu bankuiza kumvana kioso kiuma. Petelo wutuba: “Yisi ko palata voti wola,” vayi bio bidi yami biawu yikuvana: Mu dizina di Yesu Klistu musi Nazaleti, diata!” Petelo wusimba dibakala beni mu koku ayi wuntelimisa. Yindula buidi batu babela mu kumona dibakala beni kutelama ayi kudiata khumbu yiteti mu luzingu luandi. (Mava. 3:6, 7) Wulenda yindula dibakala beni kukuituka mu kutala malu mandi ayi kutona kudiata? Tulendi kuituka ko kuzaba ti dibakala adiodio wutona kulobuka ayi kuzitisa Nzambi mu mbembu yinangama.

3. What surpassing gift could the formerly crippled man and the crowd receive?

³ Dingumba di batu bayituka ayi baduma nati va dikunzi diba ku tempelo vo Petelo ayi Yoane baba. Yesu waba banga va kibuangu akiokio khumbu ziwombu muingi kulonga. Petelo wusudikisa tsundu yi mambu mamonika. (Yoa. 10:23) Nandi wuvana nkangu wu batu ayi dibakala kabelusa, nkhailu wulutidi ke na palata ayi wola. Nkhailu awowo wisi ko to kubaka buvinya bumboti. Vayi luidi luaku lu kunyongina masumu, kubaka nlemvu wu masumu mawu ayi kuba minlandikini mi Yesu Klistu “tho yi luzingu” no Yave kasola.—Mava. 3:15.

4. (a) Mangitukulu mbi minlandikini bavanga ayi buidi maba kubikila? (b) Biuvu mbi tunkuiza baka mimvutu?

 ⁴ Kiba kilumbu ki kukuitukila! Dibakala wubela malu wubelusu ayi wutona kudiata. Bivevi na bivevi bi batu bankaka, babaka luaku lu kunyongina masumu mawu ayi kudiatila mu phila yinkuangidika Nzambi. (Kolo. 1:9, 10) Mvandi mambu mamonika mu kilumbu beni, masadisa minlandikini mi Yesu kukubama mu zikhuamusu ziyiza monika, bo zimfumu zi luyalu batona kutula nkaku kisalu ki kusamuna zitsangu zi Kintinu. (Mava. 1:8) Mbi tulenda longuka mu ziphila Petelo ayi Yoane basadila muingi kuvana kimbangi? b (Mava. 4:13) Ayi buidi tulenda landikinina kifuani kiawu mu matedi kununga zikhuamusu?

5. Mbi tulenda longuka mu phila Petelo kayolukila na dingumba di batu?

⁵ Petelo ayi Yoane batelama va khati dingumba beni, kheti ti bankaka baba vana bakindisa muingi bavonda Yesu. (Malako 15:8-15; Mava. 3:13-15) Yindula kibakala Petelo kamonisa, bo katuba ti dibakala beni babelusa wubelukila mu dizina di Yesu. Bukiedika Petelo kasa lenza ko kiedika. Vayi mu kibakala wutuba ti batu beni baba fotu mu lufua lu Yesu. Vayi kheti bobo Petelo kasa balundila ko ngazi, kibila wuzaba ti ‘bavangila mawu mu khambu zaba.’ (Mava. 3:17) Nandi wunyikuna mintima miawu mu kuba tedila zikhomba ayi kutsikika mayindu mu zitsangu zi Kintinu kaba kuba longa. Ayi boti bawu banyongina masumu mawu ayi bakuna kiminu mu Yesu, buna bankuiza baka “lubaka luvovomu” lumfuminanga kuidi Yave. (Mava. 3:19) Bobuawu mvandi, befu tufueti monisa kibakala ayi kutuba mu lufiatu matedi zitsangu zi lufundusu lu Nzambi lunkuiza kuntuala. Vayi tulendi kolukila ko yawu mu makhema voti kuba fundisa, vayi tufueti tadila batu tunsamuna buka zikhomba zitu. Ayi dedi Petelo, tufueti tsikika mayindu mitu mu zitsangu zimboti zi Kintinu.

6. Buidi Petelo ayi Yoane bamonisina ti bazaba ndilu’awu ayi babe kukikululanga?

⁶ Bapostolo bazaba ndilu’awu. Dedi, bawu basa tomba ko kutambula nzitusu mu mangitukulu bavanga. Tuzabidi mawu kibila Petelo wukamba kuidi nkangu wu batu: “Kibila mbi lunkuitukila mu mawu ayi kibila mbi mu tutadila mu phila ayoyo, buka ti mu mangolo mitu tube vangila mawu voti mu kifuza kitu mu Nzambi?” (Mavanga 3:12) Petelo ayi bapostolo bankaka bazaba ti, mambu moso balenda vanga mu kisalu ki kusamuna madi to mu lulendu lu Nzambi, kubika ti mu lulendu luawu veka. Diawu bawu bavana nzitusu woso kuidi Yave ayi Yesu mu mamoso bavanga.

7, 8. (a) Nkhailu mbi tulenda vana kuidi batu? (b) Buidi lukanu lu Nzambi lu “bue vutula mambu moso,” mansalimina bubu?

 ⁷ Befu mvitu tufueti zaba ndiluitu bo tunsamuna zitsangu zi Kintinu. Dedi tuzebi ti bubu, Phevi Yinlongo yi Nzambi yivanganga ko baklistu bavanga mangitukulu. Vayi kheti bobo, tulenda sadisa batu kukuna kiminu mu Nzambi, mu Yesu ayi kutambula wowawu nkhailu Petelo kavana kuidi batu bawombo—luaku lu kutambula nlemvu wu masumu ayi khindusulu kuidi Yave. Kadika mvu, bivevi na bivevi bi batu bankikininanga thumusunu ayoyo ayi bankuiza banga minlandikini mibotama mi Yesu Klistu.

⁸ Bukiedika, bubu tuidi mu kuzingila mu bilumbu Petelo katedila, “thangu Nzambi kala bue vutula mambu moso.” Mawu masalimina dedi bo Nzambi “katubila mu nzila mimbikudi miandi minlongo mu thangu yikhulu” bo batsikika Kintinu ku diyilu mu mvu 1914. (Mava. 3:21 Minku. 110:1-3; Dani. 4:16, 17) Bo vavioka to mua thangu, Klistu wutona kukengidila kisalu va ntoto. Mu kibila akiokio, bivevi na bivevi bi batu bankotanga mu paladizu yi kiphevi muingi kuba bisadi mu Kintinu ki Nzambi. Bawu bavula kimutu kikhulu ayi “bavuata kimutu kimona kidi kithuadi na luzolo lu Nzambi.” (Efe. 4:22-24) Dedi bo bumonikina kuidi dibakala dibela malu, mambu moso amomo mamonikinanga ko mu mangolo mitu, vayi mu phevi yinlongo yi Nzambi. Dedi Petelo, tufueti sadila Diambu di Nzambi mu kibakala ayi mu phila yimboti muingi kulonga batu. Diawu, yoso kuandi ndandu tulenda baka mu kusadisa mutu kuba nlandikini wu Yesu, masi ko mu mangolo mitu veka, vayi mu lulendu lu Nzambi.

9-11. (a) Buidi zimfumu zi luyalu zi basi Yuda batadila tsangu Petelo ayi Yoane baba longa? (b) Ayi makani mbi bapostolo babaka?

⁹ Dilongi Petelo kavanga ayi kamona dibakala wuba kikata kulobuka ayi kutenduka mu mayangi, kuvanga batu kuba nyikuka nyikuka. Mu kibila akiokio, nkengididi wu tempelo, wuba kiyeku ki—kutadila nsiku ku tempelo ayi zinganga Nzambi mu nsualu, bayenda kuetala mambu maba monika. Ḿba bawu baba Basadusi, baba zimbongo ziwombo, baba kotanga mu mambu ma pulitika ayi babe vanganga mangolo ma kuba mu ndembama na basi Loma. Mvandi babasa kinzikanga ko nsiku Bafalisi baba kinzikanga ayi babasa kikininanga ko mu luvulubukusu. c Yindula buidi bawu babela mu nganzi bo badengana Petelo ayi Yoane ku nzo yinlongo, banlonga mu kibakala matedi luvulubukusu lu Yesu!

 ¹⁰ Mu nganzi, bawu banata Petelo ayi Yoane mu buloku, ayi mu kilumbu kilanda baba nata mu lukuiku ku nzo lufundusu yi basi Yuda. Mu mbuenu’awu, Petelo ayi Yoane “basa ba ko nsua” muingi kulonga ku tempelo, kibila basa ba ko balonguka. Bawu basa longuka ko mu bikola biawu biba bizabakana, vayi phila baba longila yivanga batu kukuituka ku nzo yi lufundusu. Kibila mbi Petelo ayi Yoane banungina kukolukila mu phila yi kukuitukila? Kibila bawu “badiata va kimueka na Yesu” (Mava. 4:13) Mfumu’awu wuba longila mu lutumu loso, kubika kuandi mu phila ziescriba baba longilanga.—Matai 7:28, 29.

¹¹ Nzo yi lufundusu yibaka makani ti, bapostolo bafueti bika kubue samuna. Ayi mu thangu ayoyo, baba kinzikanga beni nsua wumbasika ku nzo yi lufundusu. Mua zisabala kumbusa, bo Yesu kamonikina kuidi dingumba di batu baba ku nzo lufundusu, dibaka makani ti Yesu “kafueti vondu” (Matai 26:59-66) Kheti bobo, Petelo ayi Yoane basa mona ko boma mu mambu beni. Ayi vantuala, bisina biwombo, batu balonguka beni, Petelo ayi Yoane bamonisa kibakala bo batuba: “Tubanu theti benu veka zimfumu, boti didi diambu dimboti va mesu ma Nzambi kumu tumukina, vayi kubika kuandi Nzambi. Befu tulendi bika ko kutuba matedi mambu tumona ayi tuyuwa.”—Mava. 4:19, 20.

12. Mbi binkuiza tusadisa kumonisa kibakala ayi lufiatu?

¹² Ngie mvaku wummonisanga phila kibakala akiokio? Buidi wummuenanga bo widi luaku lu kuvana kimbangi kuidi bisina, batu balonguka ayi batu bazabakana bankalanga va kibuangu widi? Ayi buidi wummuenanga bo basi dikanda, bansalanga yaku, bakundi ba kikola bamvueza mambu wunkikininanga? Ngiewu wumbanga mu boma? Boti ngete, zaba ti wulenda nunga mabanza mamomo. Bo Yesu kaba va ntoto, nandi wulonga bapostolo bandi muingi bakakidila kiedika mu lufiatu ayi mu lukinzu. (Matai 10:11-18) Bo Yesu kavulubuka, nandi wukanikisa kuidi minlandikini miandi “ti minu yidi yinu bilumbu bioso nati kuna tsukulu yi nza” (Matai 28:20) Mu thuadusulu yi Yesu, “nnanga wukuikama” wutusadisanga muingi tukakidila mambu tunkikininanga. (Matai 24:45-47; 1 Pete. 3:15) Mawu mamvangiminanga mu nzila zithuadusulu tuntambulanga mu zikhutukunu, dedi Nzingulu ayi Kisalu Kitu ki Buklistu, bilongulu binkaka bibongulu mu Kibibila, dedi Mimvutu Mi Biuvu Bi Kibibila mu jw.org. Bukiedika ti widi mu kusadila buboti zithuadusulu aziozio? Ngie kuvanga mawu, kibakala kiaku ayi lufiatu luaku lunkuiza buelama. Ayi dedi bapostolo, walasa bika ko ni kiuma kikuvanga muingi kubika zabikisa zitsangu zimboti wumona ayi wuyuwa.

13, 14. Mbi tulenda vanga bo zimbeni zitu ba tukhuamisa, ayi kibila mbi?

¹³ Bo babasika ku buloku, Petelo ayi Yoane bakutakana na zikhomba zinkaka mu kimvuka. Ayi muna thangu beni, “basambila . . . Kuidi Nzambi” muingi kudinda kibakala mo batatamana kusamuna. (Mava. 4:24) Petelo wuzaba ti disa ba ko diambu dimboti, kufiatila mu mangolo mandi veka muingi kuvanga luzolo lu Nzambi. Kibila mua zisabala kumbusa, Petelo mu kuyifiatila wukamba Yesu: “A mfumu, kheti baboso bankuiza kuyekula mu kibila ki mambu mankuiza kumonikina, minu yisinkuiza kuyekula ko!” Vayi dedi bo Yesu katubila, Petelo mu kibila ki boma, wumanga nkundi’andi ayi nlongisi’andi. Vayi Petelo wulonguka mu nzimbala kavanga.—Matai 26:33, 34, 69-75.

¹⁴ Muingi wununga kiyeku ki kuba nlandikini wu Klistu, vasintombulu ko to kumonisa lukuikumunu. Bo zimbeni zitu bantomba kutulula kiminu kiaku ayi kutula nkaku muingi wubika kusamuna, landakana kifuani ki Petelo ayi Yoane. Dinda mangolo kuidi Yave mu nzila nsambu. Dinda lusadusu mu kimvuka. Kamba kuidi bakulutu ba kimvuka ayi baklistu bankaka bayonzuka mu kiphevi mambu widi mu kuviokila. Minsambu mi zikhomba zitu, milenda kutuvana mangolo muingi tukindama.—Efe. 6:18; Yako. 5:16.

15. Kibila mbi batu babika kusamuna mu mua thangu, balendi bela ko mu kiunda?

¹⁵ Boti vadi thangu mana bika theti kusamuna, bika kuba mu kiunda. Tebuka monyo ti bapostolo mvandi, babika kusamuna bo Yesu kafua, vayi mu thinu bawu bavutula kifuza baba. (Matai 26:56; 28:10, 16-20) Kawubika zinzimbala wuvanga kumbusa zikuvongisa. Ngie wulenda longuka mu zinzimbala ziaku ayi kusadila ziawu muingi wukindisa bankaka.

16, 17. Mbi tulenda longuka mu nsambu minlandikini mi Klistu bavanga ku Yelusalemi?

 ¹⁶ Mambu mbi tufueti dinganga mu minsambu bo mintinu ba tutula nkaku? Minlandikini mi Yesu basa dinda ko muingi babika kuviokila mu zikhuamusu. Bawu baba tebukanga monyo mambu Yesu kaba kamba: “Boti bandenda, benu mvinu bala kululenda.” (Yoa. 15:20) Vayi bawu badinda kuidi Yave muingi “katebuka monyo” mambu baba viokila. (Mava. 4:29) Mawu mammonisa ti minlandikini, basa tsikika ko mayindu mawu mu mambu baba viokila, vayi bawu bazaba ti mawu maba tsundukulu yi zimbikudulu. Bawu bazaba ti dedi bo Yesu kaba longila mu nsambu, luzolo lu Nzambi luala ‘vangama va ntoto,’ kheti mu zikhuamusu zioso zimfumu zi luyalu bantula.—Matai 6:9, 10.

¹⁷ Muingi kuvanga luzolo lu Nzambi, minlandikini badinda mu nsambu kuidi Yave: “sadisa bisadi biaku batatamana kulonga diambu diaku mu kibakala kioso.” Bukiedika ti Yave wutambudila nsambu awowo? “Muna thangu beni, kibuangu baba kinyikuka, phevi yinlongo yituadisa baboso ayi batona kulonga diambu di Nzambi mu kibakala.” (Mava. 4:29-31) Vasi ko kiuma kilenda tula nkaku muingi luzolo lu Nzambi luvangama. (Yesa. 55:11) Kheti mu bikaku bioso tulenda viokila, voti mu lulendu loso mbeni kalenda ba, befu kusambila kuidi Nzambi, tulenda ba lufiatu ti Nandi wala tuvana mangolo mantombolu muingi tutatamana kutubila Diambu diandi mu kibakala.

18. Mbi zikhomba mu kimvuka ku Yelusalemi baba vanganga?

¹⁸ Kimvuka batsikika ku Yelusalemi kiyiza ba kuvioka 5.000 di batu. d Kheti bawu baba ndionzukulu yiviakana, vayi minlandikini baba “nguizani mu phila yi kuyindudila.” (Mava. 4:32; 1 Koli. 1:10) Minlandikini basa dindanga  ko to muingi Yave kasakumuna mangolo mawu. Vayi baba kukisadisanga bawu na bawu mu kiphevi ayi mu kinsuni. (1 Yoa. 3:16-18) Tulenda mona mawu mu kifuani ki Yosefi, no bapostolo batedila Balinabasi, nandi wusumbisa mua kitini ki ntoto ayi wuvana zimbongo mu ntim’andi woso muingi kusadisa zikhomba bafumina ku zitsi zi kinanu. Mu phila ayoyo, bawu baluta kala ku Yeslusalemi muingi kubuela kindisa kiminu kiawu.

19. Kibila mbi Yave kavondila Anania ayi Safila?

¹⁹ Anania ayi nkazi’andi Safila, mvawu basumbisa kitini ki ntoto ayi bavana zimbongo muingi kusadisa bankaka. Bawu batuba ti bavana zimbongo zioso, vayi masa ba ko makiedika, kibila “babonga zimbongo zinkaka.” (Mava. 5:2) Yave wuba vonda, bakana ko mu kibila ki thalu yi zimbongo bavana, vayi kibila bawu basa vangila ko mawu mu ntima woso ayi bavuna. Bawu basa “vuna ko batu, vayi Nzambi.” (Mava. 5:4) Dedi batu Yesu kafundisa, Anania ayi Safila baba tatubuka beni kubaka nzitusu yi batu kubika kuandi yi Nzambi.—Matai 6:1-3.

20. Mbi tulenda longuka mu matedi minkhailu tumvananga kuidi Yave?

²⁰ Bubu, bivevi na bivevi bi Zimbangi zi Yave, bambuelanga mioku kisalu ki kusamuna mu nza yimvimba mu minkhayilu miawu. Ayi mu kuvanga mawu, bawu banlandakananga yoyawu phevi yi kukaba minlandikini mikuikama mu sekulu yitheti bamonisa. (2 Koli. 9:7) Befu tuisi ko mu lukuiku lu kubuela mioko kisalu akiokio, mu kuvana zimbongo zitu, voti thangu’itu. Kibila Yave wuntomba tunsadila mu luzolo. Yave kavuanga ko nkinza thalu yi biuma tukumvana, vayi kibila tumvanina biawu. (Malako 12:41-44) Tusintomba ko kulandakana kifuani ki Anania ayi Safila mu kutomba nzitusu yi batu, vayi yi Nzambi. Vayi dedi Petelo, Yoane ayi Balinabasi, tuntomba luzolo luitu mu Yave ayi mu batu lutuadisa kisalu kitu kuidi Yave.—Matai 22:37-40.