1. Mambu mbi tuzebi ayi lufiatu mbi tulenda ba?

 TUZEBI ti bo tumvanga kisalu ki kusamuna, tuala viokila mu zithotolo ayi ziawu ziala buelama mu bilumbu binkuiza. (Dani. 11:44; 2 Timo. 3:12; Nzai. 16:21) Vayi kheti bobo, tulenda ba lufiatu ti Yave wala tuvana lusalusu luntombulu. Kibila mbi? Kibila Yave wunsadisanga bisadi biandi kudukisa biyeku kaba vananga, kheti biawu phasi bidi. Muingi tuvisa mawu buboti, tuenfiongunina mambu mbikudi Yehezekeli kaviokila bo bamvana kiyeku ki kulonga basi Yuda baba mu buvika ku Babiloni.

2. Ntindu batu mbi baba ku kizunga Yehezekeli kasamunina ayi mbi tunkuiza longuka mu dilongi adidi? (Yehezekeli 2:3-6)

² Ntindu batu mbi baba va kizunga Yehezekeli kaba samuninanga? Yave wutuba ti bawu baba batu ba “kithemu,”ba “ntu ngolo,” ayi “bankua matingu.” Bawu baba mavanga mambi buka zitsendi ayi baba batu ba boma buka khutu voti liziba. Diawu tulendi kuituka ko bo Yave kakamba Yehezekeli khumbu ziwombo ti: “Kabika ba boma”! (Tanga Yehezekeli 2:3-6.) Yehezekeli wununga kuvanga kisalu ki kusamuna kibila (1) Yave wuntuma, (2) wunsadisa mu nzila phevi’andi yinlongo ayi (3) Diambu di Nzambi dikindisa kiminu kiandi. Buidi mambu matatu amomo masadisila Yehezekeli? Ayi buidi malenda tusadisila bubu?

3. Mambu mbi makindisa Yehezekeli ayi buidi Yave kansadisila?

³ Yave wukamba Yehezekeli: “Minu yikutuma.” (Yehe. 2:3, 4) Bikuma abiobio bikindisa Yehezekeli. Kibila mbi? Ḿba nandi wutebuka moyo bo Yave kasadila biobiawu bikuma bo katuma Mose ayi Yesaya. (Esodu 3:10; Yesa. 6:8) Yehezekeli  mvandi wuzaba ti Yave wusadisa mimbikudi amiomio kununga bikaku. Diawu bo Yave kankamba mu khumbu wadi: “Minu yikutuma,” nandi wuba bibila muingi kufiatila mu lusalusu lu Yave. Mvandi, mu buku yi Yehezekeli, bamvutukila beni bikuma abibi: “Yave wukhamba.” (Yehe. 3:16) Ayi bikuma abiobio bimmonikanga khumbu ziwombo. (Yehe. 6:1) Bukiedika, Yehezekeli wuba lufiatu ti Yave wuntuma. Ayi mvandi mu kuba muana wu mbikudi, ḿba tat’andi wunlonga buidi Yave kasadisila bisadi biandi dedi, Isaki, Yakobi ayi Yelemia. Khumbu ziwombo Yave wuba kamba: “Minu yidi yaku.”—Ngene. 26:24; 28:15; Yele. 1:8.

4. Khindusulu mbi Yave kavana kuidi Yehezekeli?

⁴ Buidi basi Isaeli bankaka batadila zitsangu Yehezekeli kaba longa? Yave wunkamba: “Dikabu di Isaeli balasa kukuwa ko, kibila bamengi kukhuwila.” (Yehe. 3:7) Bo bamanga kukuwila Yehezekeli, bawu bamanga kukuwila Yave. Mambu amomo masadisa Yehezekeli kubika yindula ti kasa vanga ko buboti kiyeku kiandi. Yave wubue kindisa Yehezekeli mu kutuba ti bo mambu wumbikula mala salama, bawu bala zaba ti “vaba mbikudi va khati’awu.” (Yehe. 2:5; 33:33) Bukiedika, mambu amomo mabomba Yehezekeli ayi mamvana khindusulu kaba tomba muingi katatamana kuvanga kisalu ki kusamuna.

5. Dedi buntubila Yesaya 44:8 buidi befu tumbakilanga mangolo?

⁵ Befu tumbakilanga mangolo mu kuzaba ti Yave nandi wu tutuma! Nandi wutukinzikanga mu kututedila Zimbangi ziandi. (Yesa. 43:10) Alolo luidi luaku lunneni. Dedi bo Yave kakambila Yehezekeli: “Bika kuba boma,” bubu Yave mvandi wu tukambanga:  “Bikanu kumona boma.” Kibila mbi tulendi muena ko boma bu zimbeni zitu? Dedi Yehezekeli, Yave nandi wututuma ayi wutusadisanga.—Tanga Yesaya 44:8.

6. (a) Diambu mbi Yave ka tutebulanga moyo? (b) Buidi tumbakilanga mbombolo ayi khindusulu?

⁶ Yave wu tutebulanga moyo ti nandi widi wukubama muingi kutusadisa. Dedi, ava Yave katuba: “Benu muidi Zimbangi Ziama,” nandi wutuba theti: “Bo wala viokila mu nlangu minu yala ba yaku, Ayi bo wala sabuka muila, ngie walasa diama ko, bo wala viokila mu mbazu, ngie walasa via ko.” (Yesa. 43:2) Bo tumvanga kisalu ki kusamuna, khumbu zinkaka tundengananga bikaku bimbanga dedi khuka nlangu ayi zithotolo zimbanga buka mbazu. Vayi kheti bobo, mu lusalusu lu Yave befu tuntatamananga kusamuna. (Yesa. 41:13) Dedi mu bilumbu bi Yehezekeli, batu bawombo bubu bammanganga zitsangu zi Yave. Befu tuntebukanga moyo ti ba kumanga, masinsundula ko ti befu tusa vanga ko buboti kiyeku kitu. Befu tumbakanga mbombolo ayi khindusulu mu kuzaba ti Yave wummonanga mayangi mu lukuikumunu luitu bo tuntatamana kusamuna zitsangu zimboti. Mvuala Polo wutuba: “Kadika mutu wala tambula wandi mfutu boso buididi kisalu kiandi.” (1 Koli. 3:8; 4:1, 2) Khomba mueka yinkieto madukisa mimvu miwombo mu kisalu ki ntuami ntuala wutuba: “Yimbanga beni mayangi mu kuzaba ti Yave wunsakumunanga mangolo mitu.”

7. Bo Yehezekeli kaba yindulanga kimona mesu kamona, buidi mawu mansadisila? (Tala fikula yidi va thonono levista.)

⁷ Yehezekeli wumona buidi phevi yinlongo yinsadilanga. Mu kimona mesu, nandi wumona phila phevi yinlongo yaba sadila mu zimbasi ayi mu zipeneu zi dikalu di Yave. (Yehe. 1:20, 21) Mambu mbi nandi kavanga? Nandi wusonika: “Bo yimona mawu, minu yifukama, ayi yiyinika kizizi va tsi.” Muingi kumonisa lukinzu, Yehezekeli wufukama ayi wuyinika kizizi kiandi. (Yehe. 1:28) Kuntuala, bo nandi kaba yindulanga kimona mesu beni, ḿba mawu mankindisa ayi mamvana lufiatu ti mu lusalusu lu phevi yinlongo yi Nzambi, nandi wunkuiza dukisa kiyeku kiandi ki kusamuna.

8-9. (a) Lutumu mbi Yave kavana kuidi Yehezekeli? (b) Buidi Yave kabue kindisila Yehezekeli mu kutala ntindu batu kaba longa?

⁸ Yave wukamba Yehezekeli: “Muana mutu, telama muingi yibaka bu kukolukila yaku.” Mambu amomo Yave kakamba Yehezekeli mankindisa “phevi’andi,” ayi mansadisa kutelama. Yehezekeli wusonika: “Phevi yi Nzambi yiyiza kuidi minu ayi yitsadisa muingi yitelama.” (Yehe. 2:1, 2) Kuntuala, mu kisalu kiandi ki kusamuna Yehezekeli wutuadusu mu “koku” ku Nzambi voti—mu phevi yi Nzambi. (Yehe. 3:22; 8:1; 33:22; 37:1; 40:1) Phevi yi Nzambi yikindisa Yehezekeli mu kiyeku katambula—ki kulonga zitsangu kuidi batu baba “ntu ngolo ayi ntima wumbi”. (Yehe. 3:7) Yave wukamba Yehezekeli: “Minu yala vanga kizizi kiaku kiba kikangama dedi bizizi biawu. Ayi mbulu’aku yiba yikangama dedi zimbulu ziawu. Yala vanga ngie wuba mangolo buka dimanha ayi wuluta ba wungolo kena diamante. Diawu, bika kumona boma ayi bika kususuka mu kutala bizizi biawu.” (Yehe. 3:8, 9) Mawu maba buka Yave waba kamba Yehezekeli: ‘Kawubika batu abobo ba kuvongisa. Minu yala kukindisa.’

⁹ Phevi yi Nzambi yisadisa Yehezekeli mu kiyeku kiandi ki kusamuna. Yehezekeli wutuba:  “Koku ku Yave, kuba yama muingi kukhindisa.” Vaba tombulu sabala mvimba muingi nandi kasueka zitsangu Yave kamvana muingi kezabikisa kuidi dikabu. (Yehe. 3:14, 15) Bosi, Yave wunkamba kenda kumbuinga wumueka ayi kuawu katambudila “phevi yi Nzambi.” (Yehe. 3:23, 24) Mu phila ayoyo, Yehezekeli wuba wukubama muingi kudukisa kiyeku kiandi.

10. Lusalusu mbi luntombulu muingi tudukisa kisalu ki kusamuna ayi kibila mbi?

¹⁰ Lusalusu mbi tuidi bubu muingi tuvanga kisalu ki kusamuna? Muingi tubaka mvutu, yindula mambu mamonikina mbikudi Yehezekeli. Ava katona kisalu ki kusamuna, phevi yi Nzambi yimvana mangolo kaba tomba. Dedi Yehezekeli, bubu tunnunginanga to kuvanga kisalu ki kusamuna mu lusalusu lu phevi yi Nzambi. Kibila mbi? Kibila Satana wu tunuanisanga ayi wuntulanga bikaku biwombo muingi tubika vanga kisalu beni. (Nzai. 12:17) Mu mesu ma batu, tulendi nunga ko Satana, vayi mu nzila kisalu ki kusamuna befu tunnunganga. (Nzai. 12:9-11) Mu phila mbi tunnunginanga Satana? Bo tumbasikanga mu kisalu ki kusamuna, befu tummonisanga ti tuisi ko boma bu Satana. Kadika khumbu tunsamunanga, tunnunganga Satana. Buabu, mbi tulenda tuba mu kumona ti tunnunganga kuvanga kisalu kheti mu zinzomono tumviokilanga? Tulenda tuba ti befu tuntambulanga mangolo mu nzila phevi yinlongo yi Nzambi ayi tulenda tuba mvandi ti befu tuidi lunungu luandi.—Matai 5:10-12; 1 Pete. 4:14.

11. Buidi phevi yinlongo yilenda tusadisila ayi mbi tufueti vanga muingi tutatamana kutambula yawu?

¹¹ Khindusulu mbi tulenda baka mu kuzaba ti Yave wuvana kuidi Yehezekeli mangolo kaba tomba muingi kusamuna? Phevi yi Nzambi yilenda tusadisa kununga bikaku bioso tulenda dengana mu kisalu ki kusamuna. (2 Koli. 4:7-9) Buabu, mbi tufueti  vanga muingi tutatamana kutambula phevi beni? Tufueti sambilanga mu lufiatu ti Yave wunkuiza yuwa minsambu mitu. Yesu wulonga minlandikini miandi: “Tatamananu kudinda, . . . Tatamananu kutomba, . . . Tatamananu kulomba.” Bosi, Yave wala “vana phevi yinlongo kuidi baboso ba kundindanga.”—Luka 11:9, 13; Mava. 1:14; 2:4.

12. Dedi bummonisina Yehezekeli 2:9–3:3, kuidi nkanda wufumina ayi mbi biba bisonama muna?

¹² Yehezekeli kasa kindusu ko to mu nzila phevi yinlongo yi Nzambi vayi mvandi mu kulongukanga Diambu di Nzambi. Mu kimona mesu, Yehezekeli wumona koku kusimba nkanda. (Tanga Yehezekeli 2:9–3:3.) Kuidi nkanda beni wufumina ayi mbi biba bisonama muna? Buidi mawu makindisila kiminu ki Yehezekeli? Nkanda beni wufumina mu kikundu ki kimfumu ki Nzambi. Ḿba Yave wusadila wumueka mu zimbasi zinna Yehezekeli kamona va thonono muingi kuntambika nkanda beni. (Yehe. 1:8; 10:7, 20) Mu nkanda beni muba Diambu di Nzambi—voti zitsangu zi lufundusu muingi Yehezekeli kalonga kuidi basi Yuda baba bankua matingu mu buvika. (Yehe. 2:7) Tsangu beni yiba yisonama mu zikhonzo zia ziwadi zi nkanda.

13. Mambu mbi Yave kakamba Yehezekeli kavanga ayi kibila mbi nkanda beni wubela lueki?

¹³ Yave wukamba mbikudi Yehezekeli kadia nkanda beni ayi “kawesa kivumu [kiandi] mu kudia wawu.” Mu kutumukina, Yehezekeli wudia nkanda woso. Mbi kimona mesu beni kiaba sundula? Kiawu kiaba sundula ti vaba tombulu nandi kavisa mawu buboti ayi kaba phuila yi kulonga mawu. Vayi diambu dimueka di kukuitukila diyiza monika. Yehezekeli wuyiza bakula ti nkanda beni wuba lueki buka “wika voti nhosi.” (Yehe. 3:3) Kibila mbi? Kuidi Yehezekeli, kuba mvuala wu Nzambi luba luaku lunneni beni. (Minku. 19:8-11) Nandi wuvutula matondo kuidi Yave mu kumvana kiyeku ki kuba mbikudi’andi.

14. Mbi bisadisa Yehezekeli kaba wukubama muingi kutona kiyeku kiandi?

¹⁴ Kuntuala, Yave wukamba Yehezekeli: “Yuwa mambu moso yi kukamba ayi sueka mawu mu ntima.” (Yehe. 3:10) Mu kumvana zithuadusulu aziozio, Yave waba tomba kutuba ti kafueti sueka mu ntu, mamoso maba masonama mu nkanda ayi kuyindulanga mawu. Kuvanga mawu kusadisa beni Yehezekeli. Mvandi mawu mansadisa kuzaba zitsangu kankuiza zabikisa kuidi dikabu. (Yehe. 3:11) Bo kayiza zaba ayi kuvisa zitsangu zi Nzambi, Yehezekeli wuba wukubama muingi kudukisa kiyeku kiandi.—Dedikisa mawu na Minkunga 19:14.

15. Muingi tukindama, mbi tufueti “sueka mu ntima”?

¹⁵ Muingi tukindama mu kisalu ki kusamuna, befu mvitu tufueti tatamananga kulonguka Diambu di Nzambi. Tufueti “sueka mu ntima” mamoso Yave ka tulonganga. Bubu, Yave wunkolukanga yitu mu nzila Kibibila. Buidi tulenda bela lufiatu ti mayindu ayi mabanza mitu madi nguizani na Diambu di Nzambi?

16. Mbi tufueti vanga muingi tuvisa buboti Diambu di Nzambi ayi mambu mbi mammonikanga?

¹⁶ Bo tundia buboti ayi tumbotula thangu muingi kuvunda, buvinha buitu bumbanga bumboti. Bobuawu mvandi, bo tunlonguka Kibibila ayi tunyindula mu mambu tunlonguka, kiminu kitu kinluta kindamanga. Adiodio, diawu dilongi Yave kantomba tulonguka mu kimona mesu Yehezekeli kamona. Yave wuntomba “tuwesa kivumu [kitu] mu Diambu  diandi. Mawu mansudula ti tufueti visa buboti Kibibila. Buidi tulenda vangila mawu? Tulenda vangila mawu mu kusambila, kutanga ayi kuyindula mambu tuntanga. Theti, befu tunkubikanga ntim’itu mu nsambu bosi tuntanganga ayi tunyindulanga mu mambu tuntanga. Mambu mbi mammonikanga? Bo tunluta botula thangu muingi kuyindula mu mambu tuntanga mu Kibibila, buawu tunluta visilanga kiawu ayi kukindisa kiminu kitu mu Yave.

17. Kibila mbi didi diambu dinkinza kuyindulanga mu mambu tuntanga mu Kibibila?

¹⁷ Kibila mbi didi diambu dinkinza kutanganga Kibibila ayi kuyindulanga mu mawu? Kibila mawu mala tuvana mangolo muingi kulonga zitsangu zimboti zi Kintinu ayi ḿba kulonga zitsangu zi lufundusu mu kibakala mu bilumbu binkuiza kuntuala. Mvandi, bo tunyindula mu zikhadulu zi Yave, buawu kikundi kitu kinluta bela kingolo. Kuvanga mawu kuala tusadisa kubaka ndembama ayi mayangi.—Minku. 119:103.

18. Mbi batu va kizunga kitu bala kikinina ayi kibila mbi?

¹⁸ Yehezekeli wuba mbikudi, vayi befu tuisi ko mimbikudi. Vayi kheti bobo, tuidi bakubama muingi kutatamana kulonga zitsangu zi Yave zidi mu Kibibila nati naveka kala tuba tubika bue longa. Ayi bo thangu yi lufundusu yala tuka, batu balendi tuba ko ti basa balubula ko voti Nzambi wuba zimbakana. (Yehe. 3:19; 18:23) Ayi bawu bala kikinina ti zitsangu tuaba longanga zidi zi Nzambi.

19. Mbi bi tuvananga mangolo muingi tununga kuvanga kisalu ki kusamuna?

¹⁹ Mbi biala tuvana mangolo muingi tutatamana kuvanga kisalu ki kusamuna? Momawu mambu matatu masadisa Yehezekeli, mawu mvandi mala tusadisa. Dedi, befu tunsamunanga kibila tuidi lufiatu ti Yave nandi wu tutuma, tumbakanga khindusulu mu phevi’andi yinlongo ayi tunlongukanga Diambu di Nzambi. Mu lusalusu lu Yave, tuidi mangolo muingi kutatamana mu kisalu ki kusamuna nati “kutsuka.”—Matai 24:13.