Bawu Bamona Luzolo lu Zikhomba mu Mavanga
YOMARA ayi zikhomba ziandi—Marcelo ayi Hiver— bankalanga ku buala bumueka ku Guatemala. Yomara wutona kulonguka Kibibila na Zimbangi zi Yave, bosi zikhomba ziandi mvandi batona kulonguka Kibibila. Vayi vaba diambu dimueka diphasi. Bawu batatu, baba ziphofo ayi basa zaba ko kutanga braile. Diawu, nlonguki’awu wu Kibibila waba tanganga binduika ayi matangu moso ma Kibibila mu dilongi dioso.
Vayi diba diambu diphasi muingi kulandakana zikhutukunu. Baveka babasa nunganga ko kudiata 40-di minutu nati kuvitila ku nzo Kintinu yiba yifikama. Vayi zikhomba mu kimvuka bavanga thuadusulu muingi bawu banunga kulandakana zikhutukunu. Ayi bo bawu batona kuvanga biyeku mu zikutukunu zi kimvuka mu khati sabala, zikhomba baba ku basadisanga kulunda mambu bafueti tuba mu kiyeku kiawu.
Mu ngonda Yintanu mvu 2019, kuyiza ba kimvuka va buala buawu. Bosi bakuela bamueka baba mintuami ntuala bayenda kue buela mioko kimvuka beni. Bawu baba makani ma kusadisa zikhomba aziozio baba ziphofo, muingi kutanga ayi kusonika braile, vayi bawu, babasa zabanga ko buidi bu kuvangila mawu. Diawu bayendila ku biblioteca yimueka muingi kulonguka mu zibuku, ziphila banlongilanga braile muingi ku basadisa ayi kusadisa batu badi ziphofo.
Yaya Marcelo widi mu kuvana mvutu mu lukutukunu
Bo vavioka to mua zingonda, zikhomba aziozio baba ziphofo, batona kununga kutanga braile mu khambu phasi ayi mawu maba sadisa muingi kukonzuka bumboti mu kiphevi. a Bubu, yaya Yomara, Marcelo ayi Hiver badi mintuami ntuala. Yaya Marcelo widi nsadisi wu bakulutu ba kimvuka. Bawu bammonisanga kifuza mu kisalu ki kusamuna mu kadika sabala. Ayi kifuza kiawu kintambakananga mvandi zikhomba zinkaka muingi banunga kuvanga momawu mambu.
Zikhomba zitatu aziozio badi ziphofo, bamvutulanga beni matondo mu lusalusu zikhomba mu kimvuka baba vana. Yaya Yomara wutuba: “Kutonina mu kilumbu kitheti Zimbangi zi Yave ba tuvana kimbangi, bawu ba tumonisa luzolo lukiedika lu kikhomba.” Ayi yaya Marcelo wutuba: “Tuidi bakundi bakiedika mu kimvuka ayi befu tuidi mu khati dikanda di kikhomba kitu ki luzolo mu nza yimvimba.” Yaya Yomara ayi zikhomba ziandi, bantemina kilumbu bala nunga kumona bo ntoto wala ba paladisu.—Minku. 37:10, 11; Yesa. 35:5.
a Mua buku yidi ntu diambu Longuka Kutanga Braile babasisa muingi kusadisa ziphofo voti bo ka banunganga ko kumona buboti, muingi kulonguka buidi bu kutangila ayi kusonika braile.
Mba Ngie Wunkuiza Zola Mvandi
BUIDI BANSADILANGA MINKHAILU WUMVANANGA?
Bisono Bimbalulanga Luzingu
Befu tubasisanga ko to bilongulu mu braile vayi mvandi tunsadisanga batu kuzaba kutanga braile.
