1. Mbi Yesu kakamba minlandikini miandi matedi “tsukulu yi nza” ayi ndubu mbi kaba vana?

 MU MUA bilumbu ava Yesu kafua, minlandikini miandi banyuvula: “Thangu mbi mambu beni mala monika . . . ayi tsukulu yi nza?” (Matai 24:3) Ḿba minlandikini baba tomba kuzaba thangu mbi Yelusalemi ayi tempelo yinkuiza tuluka. Mvutu Yesu kaba vana, kasa tubila ko to lutululu lu Yelusalemi ayi tempelo, vayi wutubila mvandi matedi “tsukulu yi bilumbu abibi bi tsuka” tuidi mu kuzingila. Mu kutubila matedi bilumbu bitsuka, Yesu wutuba: “Mu matedi kilumbu ayi thangu ni mutu kasa zaba ko, ni zimbasi, ni Muana, vayi Tata to wuzebi.” Nandi wulubula minlandikini miandi mioso, “batatamana bakotuka” ayi “batatamana bakubama.”—Malako 13:32-37.

2. Kibila mbi dibela diambu dinkinza baboso baba zingilanga ku Yelusalemi kuba bakubama?

² Muingi kuvukisa luzingu luawu; vaba tombulu Baklisto ku Yuda mu sekulu yitheti batatamana kuba bakubama. Yesu wuzabikisa kuidi minlandikini miandi, mambu mala kuba sadisa kuzaba boti tsukulu yi Yelusalemi yima fikama. Nandi wutuba: “Benu kumona masodi mabe zungidila Yelusalemi, buna zabanu ti mbungulu’andi yima fikama.” Mu thangu beni, vaba tombulu bawu kutumukina ndubu yi Yesu ayi “batina ku mongu.” (Luka 21:20, 21) Batu batumukina ndubu ayoyo, bavukisa luzingu luawu bo basi Loma batulula Yelusalemi.

3. Mbi tukuiza longuka mu dilongi adidi?

 ³ Bubu tuidi mu kuzingila mu bilumbu bi tsuka bi nza ayiyi. Diawu befu boso tufueti kindama ayi kuba bakubama. Mu dilongi adidi, tunkuiza tubila buidi tulenda tatiminina kuba bakindama mu kiphevi, bo tuntala mambu madi mu kumonika mu nza ayi buidi tufueti sikikila thalu mu befu veka ayi buidi tulenda sadila buboti thangu’itu.

4. Kibila mbi tufueti vuila nkinza zimbikudulu zi Kibibila, mu matedi mambu madi mu kumonika mu nza?

⁴ Vadi kibila muingi kuvua nkinza zimbikudulu zi Kibibila zintubila matedi mambu madi mu kumonika mu nza. Diawu Yesu wu tumonisa bidimbu bi mambu bi tusadisa kumona ti tsukulu yi nza yi Satana yima fikama. (Matai 24:3-14) Diawu mvuala Petelo ka tukindisila muingi tusikika thalu mu zimbikudulu zi Kibibila, muingi kukindisa kiminu kitu. (2 Pete. 1:19-21) Buku yitsuka yi Kibibila, yintonina kutubila bikuma abibi: ‘Kimona mesu ki Yesu, kio Nzambi kamvana muingi kumonisa kuidi bisadi biandi mambu mankuiza monika mu nsualu.’ (Nzai. 1:1) Diawu tuidi bibila muingi kuvua nkinza mambu madi mu kumonika mu nza ayi kuzaba buidi zimbikudulu zi Kibibila zidi mu kusalimina. Ayi befu tuidi phuila muingi kuzabikisa mawu kuidi bankaka.

5. Mbi tufueti bika kuvanga ayi mbi tufueti vanga? (Tala mvandi foto.)

⁵ Bo tuntubila matedi zimbikudulu zi Kibibila, tufueti ba keba keba, muingi tubika tuba mambu tukhambulu bivisa bioso. Kibila mbi? Kibila befu tuisintomba ko kutuba diambu, dilenda tuadisa kithatu mu kimvuka. Khumbu zinkaka tulenda kuwa zimfumu zi luyalu kutubila buidi bawu bantomba kudedikisila mambu ayi kutuadisa ndembama ayi nsika mu nza. Ma kumonika, tufueti fiongunina phisulu yimona tumana tambula mu bilongulu, kubika kuandi kutubila mambu mu khambu bivisa dedi mbikudulu yidi mu 1 Tesalonika 5:3. Masolo mitu ma kutuadusu mu nzila bilongulu tuntambulanga mu nzila kimvuka ki Yave, mala sadisa kimvuka kutatamana ‘kuba kithuadi ayi mayindu mamueka.’—1 Koli. 1:10; 4:6.

6. Mbi tulenda longuka mu buku yi 2 Petelo 3:11-13?

⁶ Tanga 2 Petelo 3:11-13. Mvuala Petelo wu tusadisa kuba mayindu mafuana bo tumfiongunina zimbikudulu zi Kibibila. Nandi wu tulubula muingi ‘tutatamana kuyindula kilumbu ki Yave.’ Kibila mbi? Bakana ko muingi tuzaba kilumbu ayi thangu Yave kala tuadisa Alimangedoni. Vayi muingi tusadila thangu’itu, ‘tuba mavanga mamboti ayi tuba bakuikama mu Nzambi.’ (Matai 24:36; Luka 12:40) Mu thubulu yinkaka, tufueti ba mavanga mamboti ayi kuba lufiatu ti mangolo tumvanganga mu kisalu ki Yave, mankuiza monisa luzolo tuidi mu nandi. Muingi tutatamana kuvanga mawu, tufueti kukikieba befu veka.

7. Buidi tummonisinanga ti tukikiebanga befu veka? (Luka 21:34)

⁷ Yesu wukamba minlandikini miandi muingi babika kukikieba to mu mambu mammonika va nza, vayi kuidi baveka. Diawu Yesu ka balubudila mu mambu madi mu Luka 21:34. (Tanga.) Tala mambu katuba: “Lukikieba benu veka.” Mutu wu kikiebanga  nandi veka, wumbanga keba keba mu mambu malenda tulula kikundi kiandi na Yave. Mu phila ayoyo, nandi wuntatamananga mu luzolo lu Nzambi.—Zinga. 22:3; Yuda 20, 21.

8. Ndubu mbi mvuala Polo kavana kuidi Baklisto?

⁸ Mvuala Polo wulubula Baklisto muingi ba kikieba. Dedi, nandi wukamba Baklisto ku Efeso: “Luba keba keba muingi lubika diatila banga bivungisi vayi luba batu banduenga.” (Efe. 5:15, 16) Satana khumbu ziwombu wuntombanga kutulula kikundi kitu na Yave. Diawu didi dilongi dimboti “kutatamana kuzaba buboti buidi buididi luzolo lu Yave”, muingi tukikieba mu mintambu mi Satana.—Efe. 5:17.

9. Buidi tulenda visila luzolo lu Yave?

⁹ Kibibila kisintubila ko mintambu mioso milenda tulula kikundi kitu na Yave. Diawu tufueti sadila kilunzi kitu mu mambu Kibibila kinkambu sudikisa. Muingi tubaka makani ma nduenga, tufueti zaba buidi bukalili, “luzolo lu Yave.” Tulenda vanga mawu mu kutanganga Kibibila kadika kilumbu ayi kuyindula mu mawu. Bo tunluta visa luzolo lu Yave ayi kuba “mayindu ma Klisto”, buawu tunkuiza nungina kudiatila banga “batu ba nduenga,” kheti bo vasi ko nsua wummonisa mbi tufueti vanga. (1 Koli. 2:14-16) Mintambu minkaka, tulenda fika mibakula vayi minkaka ndamba.

10. Mintambu mbi tufueti bela keba keba?

¹⁰ Mua mintambu tufueti bela keba keba midi, kubika kusakinin a mabanza ma mutu tukhambulu mayindu ma kukuela, kukolu malavu, phulu yi kudia, bisavu bi buphunha, kumona batu bambundana nhitu, kutuba mafunza ayi tutanga tulembu. (Minku. 101:3) Khumbu ziwombu, mben’itu Satana wumvanganga mangolo muingi kutulula kikundi kitu na Yave. (1 Pete. 5:8) Befu kukhambu ba keba keba, Satana kalenda tula mu kilunzi kitu mayindu ma nsoki, kukhambu ba batu bakiedika, phuila yi kubaka biuma biwombo, kithatu, lunangu ayi kukangila bankaka ngazi. (Ngala. 5:19-21) Va thonono, dilenda ba diambu diphasi kufika mona bifu abiobio. Ayi befu kukhambu vanga ni diambu biawu bilenda konzuka dedi nti wu kiyimbu wulenda tuadisa ziphasi.—Yako. 1:14, 15.

11. Ntambu mbi wusuama tufueti tina ayi kibila mbi?

¹¹ Wumueka mu mintambu tufueti bela keba keba widi minkangulu mimbi. Dedi yindula mu kifuani akiki: Ngie wunsalanga va kimueka na mutu wukhambu kikinina mu mambu ngie wunkikininanga. Vayi ngiewu wuntomba muingi nandi kaba mayindu mamboti matedi Zimbangi zi Yave. Diawu ngie wumvanga mangolo ma kummonisa mamboti muingi kunsadisa. Diawu, ngie wunkuiza kikinina kudianga yandi khumbu zinkaka. Bosi wunkuiza tatamana kudianga yandi. Bumviokila thangu, mutu wunsalanga yaku wuntona kutuba mambu ma kitsuza, vayi va thonono ngie wisinkuiza sikika ko thalu mu mawu. Vayi bumviokila thangu ngie wunkuiza tona kutuba mbambu mo ngie waba lendanga. Bosi kilumbu kimueka, mutu wunsalanga yaku wunkuiza kutumisa muingi mue nua malavu bo kisalu kimmana ayi ngie wumvitika. Buidi wummuena mu mambu amomo, thangu yikua khomba ayoyi kankuiza vanga, muingi kuvanga mambu dedi mutu wunsalanga yandi? (1 Koli. 15:33) Bukiedika, befu kukikieba dedi bo Yesu ka tutumina,  tualasa vuvuka ko mu kuvanga minkangulu na batu bakhambu landakananga zithuadusulu zi Yave. (2 Koli. 6:15) Mu phila ayoyi tuala mona ntambu ayi tuala tina.

12. Kisalu mbi minladikini mi Yesu baba vanga bo baba temina tsukulu yi nza?

¹² Bakana bobo ko minlandikini mi Yesu baba tomba kuzabila tsukulu yi nza ayiyi. Ayi Yesu wuba vana kisalu muingi kuvanga. Ayi nandi wuba tuma muingi kusamuna zitsangu zimbote “ku Yelusalemi, ku Yuda, ku Samalia, nati kusukila nza.” (Mava. 1:6-8) Bukiedika, kisalu kinnene beni minlandikini miandi batambula! Mu kukivana mu kisalu akiokio, bawu basadila buboti thangu’awu.

13. Kibila mbi tufueti sadila buboti thangu’itu? (Kolosai 4:5)

¹³ Tanga Kolosai 4:5. Muingi tukikieba, tufueti fiongunina buidi tuidi mu kusadila thangu’itu. “Mambu ma kinzimbukila” malenda monikina kuidi woso kua mutu. (Mpovi 9:11) Tulenda zimbisa luzingu luitu mu kinzimbukulu.

14-15. Buidi tulenda sadila buboti thangu’itu? (Ebeleo 6:11, 12) (Tala mvandi foto.)

¹⁴ Tulenda sadila buboti thangu’itu mu kuvanga luzolo lu Yave ayi mu kukindisa  kikundi kitu ayi nandi. (Yoa. 14:21) Tufueti ba bakinda, “bakuikama mu kusadila Mfumu.” (1 Koli. 15:58) Bosi bo tsukulu yi nza yala kuiza—voti tsukulu yi luzingu luitu—tualasa nhongina ko mu makani tubaka.—Matai 24:13; Loma 14:8.

¹⁵ Bubu Yesu widi mu kutatamana kutuadisa minlandikini miandi, mu kisalu ki kulonga matedi Kintinu ki Nzambi mu nza yimvimba. Nandi wudukisa mambu kakanikisa. Mu nzila kimvuka ki Yave, Yesu wu tukubikanga buidi bu kusamunina ayi wu tuvananga bisadulu bintombulu muingi kusamuna zitsangu zimboti. (Matai 28:18-20) Befu tumvanganga khonzo’itu mu kisalu ki kusamuna ayi kulonga mu kutatamana bavumbama bo tuntemina kilumbu Yave kala tuala tsukulu yi nza ayiyi. Mu kusadila dilongi didi mu Ebeleo 6:11, 12, tunkuiza tatamana kusimbidila kivuvu kitu “nati kutsuka.”—Tanga.

16. Makani mbi tuidi?

¹⁶ Yave wusikika kilumbu ayi thangu kala manisa tsukulu yi nza ayiyi yi Satana. Bo kilumbu beni kiala fuana, Yave wala dukisa zimbikudulu zioso zidi mu diambu Diandi Kibibila. Ayi bo tukhidi vingila mawu, tulenda tona kuyindula buka ti mawu masinkuiza salama ko. Vayi kilumbu ki Yave “kiala kuiza mu thangu yifuana!” (Haba. 2:3) Bika befu boso “tutatamana kubaka makani ma kuvingila mu Yave muingi  kumona phulusu yi Nzambi.”—Mika 7:7.