DILONGI 3
Yave Wala Kusadisa Kununga
“Yave kasa kuekula ko Yosefi . . . , waba sakumunanga mamoso kaba vanganga.”—NGENE. 39:2, 3.
NKUNGA 30 Tat’ami, Nzambi’ami ayi Nkundi’ami
MAMBU TUANLONGUKA a
1-2. (a) Kibila mbi tuyitukilanga ko bo tumviokila mu ziphasi? (b) Mambu mbi tunkuiza fiongunina mu dilongi adidi?
MU KUBA dikabu di Yave, tuyitukanga ko bo tumviokila mu ziphazi. Kibila befu tumvisanga mambu Kibibila kintuba: “Tufueti kota mu Kintinu ki Nzambi mu kuviokila mu ziphasi ziwombo.” (Mava. 14:22) Mvandi tuzabizi ti ziphazi zitu zialasa mana ko nati tuala kota mu nza yimona yi Nzambi, ko “kiadi ki lufua kialasa bue ba ko, bidilu ayi ziphasi bialasa bue ba ko.”—Nzai. 21:4.
2 Yave ka tukakidilanga ko muingi tubika viokila mu ziphasi. Vayi nandi wu tusadisanga muingi tukindama. Mona mambu mvuala Polo kakamba kuidi Baklisto baba kalanga ku Loma. Nandi wutubila theti mambu maphasi kaba viokila, bosi wutubila mambu maphasi zikhomba baba viokila. Nandi wusonika: “Tununga mu ziphila zioso, mu kibila ki mutu wu tuzola.” (Loma 8:35-37) Mawu mansundula ti Yave kalenda ku tusadisa kukindama kheti bo tumviokila mu mambu maphasi. Ndoku tumona buidi Yave kasadisila Yosefi kununga ayi buidi nandi kalenda kusadisila.
BO MAMBU MAMMONIKINA MU KINZIMBUKILA
3. Mambu mbi ma kinzimbukula mabaluka mu luzingu lu Yosefi?
3 Yakobi waba luta zolanga beni muan’andi Yosefi. (Ngene. 37:3, 4) Mu kibila akiokio, zikhomba zi bakulutu zi Yosefi bammona nsoki. Bo bawu babaka luaku, basumbisa Yosefi kuidi dingumba dimueka di basi lungosu di basi Midiani. Basi lungosu abobo, banata Yosefi ku Ngipiti kuba khama di zikilometro di kinanu—ayi bansumbisa kuidi Potifali, wuba mfumu masodi ma Falawo. Bukiedika luzingu lu Yosefi lubakila mu kinzimbukila, mu kuba muana wu luzolo lu tat’andi vayi wuyiza ba mvika ku Ngipiti!—Ngene. 39:1.
4. Ziphasi mbi tulenda viokila, dedi zio Yosefi kaviokila?
4 Kibibila kintuba ti “mambu mambi ayi mambu ma kinzimbukulu, mankuizilanga kuidi baboso.” (Mpovi 9:11, Bíblia Sagrada—Verção-facíl-de Ler) Befu khumbu ziwombu tumviokilanga mu zio ziawu zithotolo—“batu bawombu bamviokilanga.” (1 Koli. 10:13) Voti tulenda tovuka mu kuba minlandikini mi Yesu. Dedi, tulenda viokila mu zimvuezolo, zikhuamusu voti zithotolo mu kibila ki kiminu kitu. (2 Timo. 3:12) Boso kua bubela mambu tuidi mu kuviokila, Yave kalenda ku tusadisa. Buidi nandi kasadisila Yosefi?
Yave wusadisa Yosefi kheti mu kuba mvika wu Potifali ku Ngipiti (Tala lutangu 5)
5. Mbi Potifali kavisa matedi lusakumunu Yave kavana Yosefi? (Ngenesi 39:2-6)
5 Tanga Ngenesi 39:2-6. Potifali wumona ti Yosefi wuba kisadi kimboti ayi kipisuka. Nandi wuzaba kibila. Potifali wumona ti “Yave wuba yandi ayi waba sakumuna mamoso kaba vanganga.” b Ayi Potifali wuvana Yosefi kiyeku ki kuba mutu wummuadi wulutidi kimfumu ku nzo’andi. Mambu mbi mamonika? Busina bu Potifali bubuelama.
6. Mbi Yosefi kaba luta tomba mu mambu moso kaba viokila?
6 Yindula buidi Yosefi kabela mu mambu amomo. Mbi nandi kaba luta tomba? Bukiedika ti waba tomba kuba wuzabakana ayi kutambula mfutu kuidi Potifali? Diambu Yosefi kaba luta tomba, diba kuvuka mu buvika ayi kuvutuka kuidi tat’andi. Kheti nandi wuba kiyeku kinkinza ku nzo Potifali, vayi Yosefi wutatamana kuba mvika ayi kutumukina mfumu’andi wukhambu ba kisadi ki Yave. Ayi Yave kasa bika ko Potifali kabika Yosefi kuvutuka kuidi tat’andi ayi mambu mu luzingu lu Yosefi maba luta buelama.
MAMBU MA KUSABA
7. Mu phila mbi ziphasi zi Yosefi ziaba buelimina? (Ngenesi 39:14, 15)
7 Dedi bummonisina Ngenesi 39, nkietu wu Potifali wutona kuzola Yosefi ayi khumbu ziwombu waba kunkambanga kabundana yandi nhitu. Yosefi waba manganga, mu kibila akiokio nandi wudasukila Yosefi ayi wumvunina ti nandi wunkuika muingi kubundana yandi nhitu. (Tanga Ngenesi 39:14, 15.) Bo Potifali kazaba mawu, nandi wuntula mu buloku, ko kaviokisa mimvu miwombu. (Ngene. 39:19, 20) Buidi nandi kabela mu buloku? Kikuma ki Ebeleo Yosefi kasadila muingi kutubila “buloku” kilenda sundula “kisima,” voti “ditanga,” mawu maba sundula ti buka nandi wuba ku kitombi, mu khambu kivuvu ki kuvuka. (Ngene. 40:15, nota.) Mvandi Kibibila kintuba ti vaba thangu bakanga malu ma Yosefi mu kisengu ayi bantula ziphanga mu dinga. (Minku. 105:17, 18) Ziphasi zi Yosefi, kubuelama to ziaba buelama. Va thonono wuba mvika wu lufiatu vayi mu kinzimbukulu wuyiza ba musi buloku.
8. Mu mambu mbi tulenda bela lufiatu kheti bo ziphasi zinsaba?
8 Wumana viokila mu mambu ma kuvanga kukuazuka ayi kumona ti mawu madi mu kue buelamanga kheti mu kuvanga minsambu? Mawu mammonikanga. Yave ka tukakidilanga ko mu mambu moso tummonikinanga mu nza yi Satana. (1 Yoa. 5:19) Vayi kheti bobo, ngie wulenda ba lufiatu mu mambu amama: Yave wu kuvuanga nkinza ayi wala kukieba. (Matai 10:29-31; 1 Pete. 5:6, 7) Ayi mvandi, nandi wu tukanikisa: “Yilendi kubika ko ayi yilendi kukuekula ko.” (Ebe. 13:5) Yave kalenda kusadisa kukindama, kheti bo mambu mammonikina buka ti masi ko kivuvu ki kumana. Ndoku tumona buidi bubela mambu Yosefi kaviokila.
Yave wusadisa Yosefi kheti bo kaba mu buloku ayi wutambula kiyeku ki kukengidila batu baba yandi mu buloku (Tala lutangu 9)
9. Mbi bimmonisa ti Yave wuba na Yosefi bo kaba mu buloku? (Ngenesi 39:21-23)
9 Tanga Ngenesi 39:21-23. Kheti mu thangu Yosefi kaba mu buloku, Yave wunsakumuna. Buidi? Buviokila thangu mfumu yi minkengididi mi buloku, wumfiatila dedi bo Potifali kamviatila. Mfumu ayoyi wuvana Yosefi kiyeku ki kukengidila batu bankaka baba yandi mu buloku. Ayi Kibibila kintuba ti “Mfumu yi minkengididi mi buloku kabasa kuazukanga ko mu mambu moso maba mu lukiebu lu Yosefi.” Mambu amomo, mavana Yosefi luaku—muingi kubaka kisalu ki kuvanga. Bukiedika mambu amomo mamonikina mu kinzimbukulu! Buidi bulenda bela, mutu bavunina mambu ti waba tomba kubundana nhitu na nkazi mfumu’andi, kalenda tambudila kiyeku ki lufiatu? Befu tuzabizi mvutu. Mu Ngenesi 39:23 yintuba, “Yave waba tuadisanga ndandu mu mamoso nandi kaba vanganga.”
10. Sudikisa kibila mbi Yosefi kabasa muenanga ko ti, waba bakanga ndandu mu mamoso kaba vanganga.
10 Buabu, bue yindula buidi Yosefi kabela. Buidi wummuena, bo bamvunina mambu ayi bantula mu buloku, bukiedika ti Yosefi wutatamana kukitadila banga mutu waba baka ndandu mu mamoso kaba vanganga? Mbi Yosefi kaba luta tomba? Bukiedika ti waba tomba kubaka lunungu va mesu ma mfumu yi minkengididi mi buloku? Mambu to Yosefi kaba tomba, bambotula mu kiyeku akiokio ayi kubaka kiphuanza. Tuzabidi mawu, mu kibila ki mambu kadinda kuidi musi buloku yandi muingi kakamba Falawo matedi nandi ayi kambasisa mu buloku. (Ngene. 40:14) Vayi kiadi ayi kiunda kuzaba ti mutu beni wuzimbakana kukamba Falawo. Mu kibila akiokio, Yosefi wubue viokisa mimvu miole mu buloku. (Ngene. 40:23; 41:1, 14) Vayi kheti bobo, Yave wutatamana kusakumuna Yosefi. Buidi?
11. Nkhailu mbi Yave kavana Yosefi ayi buidi kansadila muingi kudukisa lukanu luandi?
11 Bo Yosefi kaba mu buloku, Yave wuvanga muingi ntinu wu Ngipiti kalotu ndosi yi boma. Mu nsualu Falawo waba tomba kuzaba tsundu yi ndosi. Ayi bo kazaba ti Yosefi wuba nzayilu muingi kusudikisa ndosi, nandi wuntela. Mu lusalusu lu Yave, Yosefi wununga kusudikisa ndosi beni ayi Falawo wuyituka mu malongi mamboti kamvana. Falawo bo kamona ti Yave wuba na Yosefi, diawu kamvanina kiyeku ki kuba mfumu yi nkengididi yi bidia bioso ku Ngipiti. (Ngene. 41:38, 41-44) Buviokila thangu, vayiza monika nzala kubika to ku Ngipiti vayi mvandi ku Kanani ko kuaba kalanga dikanda di Yosefi. Alolo luba luaku muingi Yosefi kusadisa dikanda diandi ayi kukakidila nkunu wuyizila Mesia.
12. Mu phila mbi Yave kasakumunina Yosefi?
12 Yindula mambu Yosefi kamonikina mu luzingu. Nani wuvanga muingi Potifali kavua nkinza Yosefi wuba kuandi to mvika? Nani wuvanga muingi mfumu yi minkengididi mi buloku kuvana kiyeku kuidi Yosefi wuba mu buloku? Nani wuvanga muingi Falawo kalotu ndosi ayi Yosefi kusudikisa yawu? Nani wuvanga muingi Yosefi kabieku nkengididi wu bidia bioso ku Ngipiti? (Ngene. 45:5) Bukiedika, Yosefi wununga kuvanga mambu moso amomo, kibila Yave wunsakumuna. Ayi kheti zikhomba zi Yosefi baba tomba kumvonda vayi Yave wusadila Yozefi muingi kudukisa lukanu luandi.
BUIDI YAVE KALENDA KUSAKUMUNINA?
13. Bukiedika ti Yave wu tukakidilanga mu mambu moso malenda ku tumonikina? Sudikisa.
13 Mambu mbi tulenda longuka mu kinongu ki Yosefi? Bukiedika ti Yave wu tukakidilanga mu mambu moso malenda ku tumonikina? Bukiedika ti nandi wumbikanga mambu mambi mamonika muingi kutuba ti vadi kibila muingi mawu mamonika? Ndamba, Kibibila kisinlonga ko mawu. (Mpovi 8:9; 9:11) Vayi befu tuidi lufiatu mu mambu amama: Bo tumviokila mu ziphasi Yave wummonanga ayi wunkuwanga minsambu mitu bo tu kunlinda lusalusu. (Minku. 34:15; 55:22; Yesa. 59:1) Ayi bulutidi, Yave kalenda tusadisa tununga ziphasi zioso mu mayangi. Buidi?
14. Buidi Yave ka tusadisilanga mu thangu ziphasi?
14 Phila yimueka Yave ka tusadisilanga, yidi mu ku tuvana mbombolo ayi khindusulu mu thangu yifuana. (2 Koli. 1:3, 4) Mawu mamonikina yaya Eziz, wunkalanga ku Turquemenistão bo banzengila nkanu wu kukala mu buloku mu mimvu miole mu kibila ki kiminu kiandi. Nandi wutuba: “Va meni mu kilumbu ki lufundusu luama,” khomba mueka “wumbonisina lutangu lu Yesaya 30:15, luntuba: ‘Munkuiza bakila mangolo, benu kutatamana bavumbama ayi kumfiatila.’ Matangu amomo, ma kutsadisanga kuba wuvumbama ayi kufiatila mu Yave mu mamoso. Kuyindula mu lutangu alolo, kutsadisa mu thangu yoso yiviokisa mu buloku.” Wulenda yindula thangu ngie wuviokila mu ziphasi, vayi Yave wu kuvana mbombolo ayi khindusulu mu thangu ngie waba luta tomba?
15-16. Mbi tulenda longuka mu kinongu ki yaya Tori?
15 Khumbu zinkaka tunnunganga to kumona phila Yave kabe tusadisila kununga ziphasi, bo ziawu zimvioka. Ayi khomba mueka bantedilanga Tori wunkikinina mu mawu. Muan’andi wu dibakala Mason, wuyiza bela Câncer mu mimvu mi sambanu bosi wuyiza fua. Bukiedika mambu amomo, matuadisa beni kiunda kuidi yaya Tori. Nandi wutuba “Yisa ta ko mana ti mambu amomo, maluta tuadisa ziphasi kuidi minu ayi mam’ami.” Nandi wubue tuba, “Yidi lufiatu ti matata moso bankuiza kikinina ti bulutidi ngie veka kuviokila mu ziphasi, kena kumona muan’aku kuviokila mu ziphasi beni.”
16 Bukiedika mambu amomo, matuadisa beni ziphasi kuidi yaya Tori, vayi buviokila thangu nandi wuyindula ziphila Yave kansadisila kununga “ziphasi beni”. Mu kuyindula mu mambu mavioka kumbusa, nandi wutuba: “Yinunga kumona koku ku Yave ayi luzolo luandi, bo muan’ama kaba bela. Dedi bo kimbevu ki Mason kiluta ba kingolo, zikhomba baba diatanga bilokula biole mu dikalu muingi kuiza tutala ku nzo mbuku. Ayi kadika thangu vaba banga khomba va khonzo’itu—muingi kudukisa zitsatu zitu zi kinsuni. Ayi kheti mu mambu moso maphasi tuviokila, tuabasa khambuanga ko ni kiuma. Yave wuvana mangolo kuidi yaya Tori ayi muan’andi Mason muingi banunga.—Mona quadro yintuba “ Yave wu Tuvana Biabioso Tuaba Tomba.”
YINDULA MU LUSAKUMUNU MANA TAMBULA
17-18. Mbi binkuiza tusadisa kumona ayi kuvutula matondo phila Yave ka tusadisilanga mu thangu ziphasi? (Minkunga 40:5)
17 Tanga Minkunga 40:5. Makani ma batu bammakanga miongu madi, kutuka nati va mbata mongu. Vayi mu thangu bammaka, bawu balenda botula thangu muingi kutala bivangu. Bobuawu mvandi, botulanga thangu muingi kuyindula phila Yave kakusadisilanga bo wumviokila mu ziphasi. Ayi kutsuka kadika kilumbu wukiyuvusa: ‘Mu phila mbi yima muena lusakumunu lu Yave bubu? Kheti ziphasi zikhidi, buidi Yave ka tusadisilanga kukindama?’ Mona boti wulenda nunga kubakula kheti phila yimueka Yave kamana kusadisila kununga ziphasi.
18 Bukiedika, disi ko diambu dimbi kuvanga minsambu muingi ziphasi zitu zimana. (Fili. 4:6) Vayi tufueti botula thangu muingi kuyindula lusakumunu tuntambulanga bubu. Ayi bulutidi, Yave wu tukanikisa ku tuvana mangolo ayi ku tusadisa muingi tukindama. Diawu vutulanga matondo mu mambu moso Yave ka tuvangilanga. Mu phila ayoyi wunkuiza nunga kumona phila Yave ka kusadisilanga, dedi bo kasadisila Yosefi kununga ziphasi zioso kaviokila.—Ngene. 41:51, 52.
NKUNGA 32 Ba ku Khonzo Yave
a Bo tumviokila mu ziphazi, tulenda yindula ti tuisimbaka ko “lusalusu lu Yave.” Ayi kuyindula ti tumbakanga to lusakumunu bo mambu tumviokila mandedukusu. Vayi mambu Yosefi kamonikina mu luzingu, ma tulonga dilongi dinkinza—ti Yave kalenda ku tusadisa kheti bo mambu mu luzingu luitu mansaba. Ayi dilongi adidi dinkuiza sudikisa buidi.
b Kibibila kintubila to mu bukhufi buvika bu Yosefi, kheti nandi wuviokisa kuna mimvu miwombu.
