1-2. Kibila mbi kadika mvu tunlandikininanga Mbambukulu Moyo lufua lu Yesu?

 KUVIOKA 2.000 di mimvu kumbusa, Yesu Klisto wuvana luzingu luandi muingi tubaka luzingu lu mvu ka mvu. Va builu butsuka ava kafua, Yesu wutuma minlandikini miandi muingi bantebukilanga moyo mu phila yikhambulu phasi kasadila dipha ayi vinu mu luzolo kamonisa.—1 Koli. 11:23-26.

² Befu tuntumukinanga thuadusulu yi Yesu kibila tukunzolanga beni. (Yoa. 14:15) Mu kadika mvu mu thangu Mambukulu Moyo, befu tummonisanga ti tumvuanga nkinza mambu Yesu ka tuvangila, mu kubotula thangu muingi kuvanga nsambu ayi kuyindula mu tsundu yi lufua luandi. Mvandi mu mayangi ayi mu kifuza tunsamunanga batu boso tulenda nunga, muingi baba yitu mu nkungi awowo wunkinza. Ayi tuidi makani ma kukhambu bika ni kiuma ki tutula nkaku muingi kulandakana nkungi awowo wunkinza.

3. Mbi tunkuiza longuka mu dilongi adidi?

³ Mu dilongi adidi, tunkuiza longuka ziphila zitatu dikabu di Yave bamvangilanga mangolo muingi kulandakana Mbambukulu Moyo lufua lu Yesu: (1) mu kuvangila mu phila Yesu ka tutumina, (2) mu kutumisa bankaka mu Mbambukulu Moyo ayi (3) Mu kulandakana Mbambukulu Moyo kheti mu mambu maphasi tulenda viokila.

4. Mambu mbi ba tutebulanga moyo mu kadika mvu mu Mbambukulu Moyo ayi kibila mbi tulendi suekila ko kiedika akiokio kuidi befu veka? (Luka 22:19, 20)

⁴ Mu Mbambukulu Moyo yi kadika mvu, tunkuwanga dilongi dibongulu mu Kibibila di tuvananga mimvutu mi biuvu  biwombo tuidi. Befu tunlongukanga kibila mbi vaba tombulu khudulu ayi buidi lufua lu mutu wumueka lulenda ku tukudila. Ba tutebulanga moyo mbi binsundula dipha ayi vinu ayi banani balenda dia ayi kunua vinu. (Tanga Luka 22:19, 20.) Mvandi ba tutebulanga moyo lusakumunu batu boso badi kivuvu ki kuzinga va ntoto bala tambula. (Yesa. 35:5, 6; 65:17, 21-23) Befu tulendi sueka ko kuidi befu veka kiedika akiokio. Kibila bivevi na bivevi bi batu bazabanga ko mbi khudulu yinsundula ayi ndandu mbi balenda baka mu yawu. Ayi bawu babambukilanga ko moyo lufua lu Yesu dedi bo nandi kavangila. Kibila mbi?

5. Bo bapostolo bafua, mambu mbi mamonika mu malongi Yesu kalonga?

⁵ Bo bapostolo ba Yesu ba yiza fua, Baklisto ba luvunu batona kukota mu kimvuka. (Matai 13:24-27, 37-39) Ayi bawu baba “longanga mambu ma luvunu muingi kuvukumuna minlandikini baba ku khonzo’awu.” (Mava. 20:29, 30) Dimueka “mu luvunu” Baklisto ba luvunu batona kulonga maba ti, Yesu “kasa vanina ko nhitu’andi muingi ku tukula mu masumu” dedi buntubila Kibibila, vayi vaba tombulu nandi kukivana khumbu ziwombu. (Ebe. 9:27, 28) Bubu batu bawombu bantomba kuzaba kiedika, bankikininanga mu malongi amomo ma luvunu. Bawu bankutakananga—khumbu ziwombu voti kadika kilumbu—muingi kulandakana “Eucaristia” voti Santa Missa. b Binganga binkaka bantebukilanga moyo lufua lu Yesu, vayi bawombu mu bawu basa zaba ko tsundu yi lufua lu Yesu. Mu kibila akiokio, bawombu balenda kukikuvusa, bukiedika ti lufua lu Yesu lunsundula nlemvu wu masumu mami? Kibila mbi bakikuvusilanga abobo? Kibila bawombu mu bawu bankikininanga mu luvunu ti Yesu kasa fua ko muingi ku tukula mu masumu mitu. Vayi buidi minlandikini mi kiedika mi Yesu bafueti tadila mambu amomo?

6. Mu mvu 1872, mambu mbi minlonguki mi Kibibila bayiza visa?

⁶ Ku tsuka sekulu 19 dingumba dimueka di minlonguki mi Kibibila, diaba tuadusu kuidi yaya Charles Taze Russell, batona kufiongunina Kibibila. Bawu baba tomba kuzaba kiedika matedi khudulu yi Yesu ayi buidi bafueti bambukila moyo lufua luandi. Mu mvu 1872, bawu bavisa ti Yesu wuvana luzingu luandi muingi kukula batu boso. Ayi bawu basa lunda ko kiedika akiokio kuidi bawu veka. Vayi bazabikisa kiawu mu zibuku, zijornal ayi mu bilongulu. Ayi mu kulandakana kifuani ki Baklisto mu sekulu yitheti, bawu batona kukutakana khumbu mueka mu mvu muingi Kubambukila Moyo lufua lu Yesu.

7. Buidi tumbakilanga ndandu mu mambu minlonguki mi Kibibila bafiongunina?

⁷ Bubu tumbakanga beni ndandu mu mambu zikhomba aziozio bafiongunina mu mimvu miwombu kumbusa. Buidi? Mu lusakumunu lu Yave, befu tumvisanga kiedika kitedi khudulu ayi mbi mawu malenda ku tutuadisa. (1 Yoa. 2:1, 2) Ayi mvandi tunlongukanga mu nzila Kibibila mintindu miodi mi kivuvu mi batu bankuangidikanga Yave—luzingu lu mvu ka mvu ku diyilu ayi luzingu lu mvu ka mvu kuidi bivevi na bivevi bi batu va ntoto. Befu tumfikamanga Yave bo tummona luzolo Yave kadi mu befu ayi ndandu kadika mutu mu befu kambakanga mu khudulu yi Yesu. (1 Pete. 3:18; 1 Yoa. 4:9) Ayi  mu kulandakana kifuani ki zikhomba zitu mu thangu yikhulu, mvitu tuntumisanga batu muingi baba yitu mu Mbambukulu Moyo, mu kulandakana mambu Yesu ka tutuma.

8. Mbi dikabu di Yave bama vanga muingi kutumisa batu mu Mbambukulu Moyo? (Tala foto.)

⁸ Mu mimvu miwombo mi mavioka, dikabu di Yave dintumisanga batu mu Mbambukulu Moyo. Va thonono mvu 1881, zikhomba zitu ku Estados Unidos, batumisa batu muingi bakutakana va kimueka ku nzo khomba mueka ku Allegheny, Pensilvânia, mu nkungi awowo wunkinza. Buviokila thangu, bayiza tona kulandakana Mbambukulu Moyo mu kimvuka. Mu Ngonda Yintatu mvu 1940, bavana nsua kuidi zikhomba muingi kutumisa woso kuandi mutu va nsengi muingi balandakana Mbambukulu Moyo. Ayi mu mvu 1960 mu khumbu yitheti, Beteli yitona kubasisa minkanda mi kutumisina batu. Tona mu thangu ayoyo, tu makabula bivevi na bivevi di minkanda mi kutumisina. Kibila mbi tumbotudilanga thangu ayi tumvangilanga mangolo muingi kutumisa bankaka?

9-10. Nani wumbakanga ndandu mu mangolo moso tumvanganga muingi kutumisa batu mu Mbambukulo Moyo? (Yoane 3:16)

⁹ Kibila kinkinza befu tuntumisinanga batu mu Mbambukulu moyo mu khumbu yitheti, kidi muingi bazaba kiedika matedi Yave ayi Yesu ayi mbi bawu ba tuvangila. (Tanga Yoane 3:16.) Befu tuntomba muingi mambu bawu bankuwa ayi bammona mu Mbambukulu Moyo manhikuna mintima miawu ayi basadila Yave dedi bo bawombo bambakilanga yoyawu ndandu.

 ¹⁰ Befu mvitu tuntumisanga bo bavonga mu kiphevi. Tumvangilanga mawu mu kuba tebula moyo ti Yave wukhidi kuba vua nkinza. Bawombo mu bawu bamvitikanga thumusunu ayoyo ayi befu tumbanga beni mu mayangi. Kulandakana Mbambukulu Moyo, yi batebulanga moyo phila bawu baba sadilanga Yave kumbusa. Tala kifuani ki yaya Mónica. c Nandi wuyiza bue ba nsamuni mu thangu kivunga ki COVID-19. Bo kalandakana Mbambukulu Moyo mu mvu 2021, nandi wutuba: “Mbambukulu Moyo ayoyo yiba beni tsundu kuidi minu, kibila mu 20 di mimvu yi khambu sadila Yave ayi bubu yidi luaku lu kuvana kimbangi ayi kutumisa batu mu Mbambukulu Moyo. “Yivangila mawu mu mayangi kibila yimvutula matondo mu mambu Yave ayi Yesu baphangila.” (Minku. 103:1-4) Kheti batu bankuiza vitika voti ndamba thumusunu muingi benda mu Mbambukulu Moyo, vayi Yave wumvuanga beni nkinza mangolo mitu.

11. Buidi Yave kansakumuninanga mangolo mitu muingi kutumisa batu? (Hangai 2:7)

¹¹ Yave wunsakumunanga mangolo tumvanganga muingi kutumisa batu mu Mbambukulu Moyo. Kheti mu bikaku biwombu tuviokila mu mvu 2021, mu kibila ki kivunga ki COVID-19 vayi 21.367.603 di batu balandakana Mbambukulu Moyo kuvioka mimvu mi mavioka. Thalu ayoyo yiba nduka khumbu wadi ayi ndambu di Zimbangi zi Yave mu nza yimvimba! Bukiedika, Yave kayazukanga ko mu thalu ayoyo, kibila nandi wunluta vuanga nkinza kadika mutu. (Luka 15:7; 1 Timo. 2:3, 4) Tulenda ba tufiatu ti kutumisa batu yidi phila Yave ka tusadisilanga muingi kusadisa batu badi mintima mikubama.—Tanga Hangai 2:7.

12. Mambu mbi maphasi malenda ku tutula nkaku muingi tulandakana Mbabukulu Moyo? (Tala foto.)

¹² Yesu wubikula ti mu bilumbu bitsuka, tuala viokila mu mambu mawombu maphasi dedi—zikhuamusu va dikanda, zinzomono, mimvita, bimbevu ayi mambu mankaka. (Matai 10:36; Malako 13:9; Luka 21:10, 11) Ayi bo mambu amomo mammonika, dimbanga diambu diphasi kulandakana Mbambukulu Moyo. Mbi zikhomba zitu bamvanganga muingi kununga bikaku abiobio ayi buidi Yave ka basadisilanga?

13. Buidi Yave kasakumunina kibakala ayi makani yaya Artem kabaka muingi kulandana Mbambukulu Moyo kheti mu kuba mu buloku?

¹³ Buloku. Zikhomba badi mu buloku mu kibila ki kiminu kiawu, bamvanganga mamoso balenda nunga muingi kubambukila moyo lufua lu Yesu. Tala kifuani ki yaya Artem. Mu thangu Mbambukulu Moyo mu mvu 2020, bantula mu buloku buba 17 metro ayi va kibuangu valenda ba mutu mueka vaba banga batu batanu. Ayi kheti mu bikaku bioso abiobio, nandi wununga kukubika biuma kasadila mu Mbambukulu Moyo ayi wubaka makani ma kuvanga dilongi diandi veka mu kilumbu beni. Vayi batu baba yandi mu buloku, baba nuanga beni zitsunga ayi baba tubanga beni mafunza. Mbi nandi kavanga? Nandi wudinda batu baba yandi mu buloku muingi babika kunua zitsunga ayi kutuba mafunza kheti mu kilokula kimueka. Yaya Artem wuyituka beni mu phila batu baba yandi mu buloku bavitikila kubika vola zitsunga ayi kubika tuba mafunza. Ayi kheti bawu babasa tomba ko kulandakana Mbambukulu Moyo, vayi bo bayuwa ayi bamona buidi yawu yimvangiminanga, bawu bandiuvula muingi babuela zaba matedi mambu amomo.

14. Mangolo mbi zikhomba bavanga muingi kulandakana Mbambukulu Moyo kheti mu bikaku bi COVID-19?

 ¹⁴ Kivunga ki COVID-19. Bo kivunga kitona, dikabu di Yave basa ba ko bu kulandikinina Mbambukulu Moyo va kimueka. Vayi mawu, masa kuba tula ko nkaku muingi balandakana Mbambukulu Moyo. d Bimvuka biba luaku lu kubaka internet, balandakana Mbambukulu Moyo mu videoconferência. Vayi mbi bivevi na bivevi bi batu bakhambu baka luaku alolo bavanga? Mu zitsi zinkaka, zikhomba babaka makani ma kuvanga gravação yi Mbambukulu Moyo mu televisão voti mu rádio. Ayi muingi zikhomba zinkalanga mu mala babaka bu kulandikinina yawu, zifiliali zinkaka basueka dilongi kuvioka 500 di zimbembu. Ayi zikhomba bavanga mangolo muingi kuvana zigravações beni kuidi zikhomba zioso.

15. Mbi belonguka mu kifuani ki Sue?

¹⁵ Zikhuamusu va dikanda. Kuidi zikhomba zinkaka, dimbanga diambu diphasi kulandakana Mbambukulu Moyo bo bamviokila mu zikhuamusu va dikanda. Tala kinongu  ki nlonguki wu Kibibila bantedila Sue. Mu mvu 2021, kilumbu kimueka ava Mbambukulu Moyo, nandi wukamba nlongisi’andi wu Kibibila ti mu kibila ki zikhuamusu va dikanda, kasinkuiza nunga ko kulandakana Mbambukulu Moyo. Vayi nlongisi’andi wuntangila matangu ma Luka 22:44. Nandi wunzabikisa ti mu thangu tumviokila mu ziphasi, yidi phila yifuana tulenda landikinina kifuani ki Yesu mu kufikama Yave mu nzila nsambu ayi kumfiatila mu ntima woso. Mu kilumbu ki Mbambukulu Moyo, Sue wukubika vinu ayi dipha ayi wulandakana Mbuongimini va Meni mu jw.org. Ayi mu builu beni nandi wulandakana Mbambukulu Moyo mu telefoni ku kivinga kiandi. Bo lukutukunu lumana, nandi wusonikina nlongisi’andi wu Kibibila mu kutuba: “Ngie wukhindisidi beni kibe yono ayi yivengi mamoso yilenda nunga muingi kulandakana Mbambukulu Moyo ayi Yave wudukisidi mankaka. Yisa zaba ko buidi bu kusudikisila mayangi madi yama!” Buidi wummuena, Yave kalenda kusadisa bo wumviokila mu phila mambu amomo?

16. Kibila mbi tulenda bela lufiatu ti Yave wala sakumuna mangolo mitu ma kulandakana Mbambukulu Moyo? (Loma 8:31, 32)

¹⁶ Yave wumvuanga beni nkinza mangolo moso tumvanganga muingi kulandakana Mbambukulu Moyo lufua lu Yesu. Ayi tulenda ba lufiatu ti nandi wala ku tusakumuna, bo tummonisa ti tumvutula matondo mu mamoso nandi ka tuvangilanga. (Tanga Loma 8:31, 32.) Bika kadika mutu mu befu, kaba wukubama muingi kulandakana Mbambukulu Moyo mu mvu awuwu ayi kabuela kifuza mu kisalu ki kusamuna mu thangu Mbambukulu Moyo.