Mu 1 Kolinto 15:8: Polo wutuba: ‘Vayi minu wutsuka kamonikina ayi yiba buka ‘muana wukhambu kuela mu kivumu.’ Kumbusa, tuaba visanga ti Polo waba tubila mu thangu Yesu kammonikina mu kimona mesu mu nkembu’andi ku diyilu. Ayi mvandi tuaba visilanga ti bo katuba mawu, waba kukitadilanga buka mutu wubutuka voti wuvulubuka muingi kutambula nhitu yi kiphevi ava thangu luvuluvukusu lu phila ayoyo. Vayi bo tufiongunini lutangu alolo, tumueni nkinza wu kusudikisa mawu mu phila yinkaka.

Bukiedika, Polo waba tubila thangu kayiza zaba kiedika. Vayi mbi kaba tomba kutuba bo katuba ti wuba buka ‘muana wukhambu kuela mu kivumu’? Vadi ziphila ziwombo zi kusudikisila lutangu alolo.

Polo waba tubila phila yi kukuitukila kayiza zabila kiedika. Vadi bana bawombo bambutukanga mu khambu kuela mu kivumu. Bobuawu mvandi, Sauli (bayiza tedila Polo) bo kaba kuenda ku Damasi muingi keyamisa Baklisto baba kuna, nandi kasa zaba ko ti Yesu wunkuiza mmonikina mu kimona mesu. Ayi bo Yesu kamonikina Polo, nandi wufua mesu mu mua thangu. Phila Polo kazabila kiedika, yiba yi kukuitukila, kubika to kuidi nandi vayi mvandi kuidi Baklisto baba ku divula nandi kaba tomba kukuenda—Mava. 9:1-9, 17-19.

Polo waba tomba kutuba ti wuzabila kiedika mu ‘thangu yikhambu fuana.’ Kikuma ki Kingeleko basadila muingi kutuba ‘kubutuka mu khambu kuela mu kivumu, kilenda sundula mvandi, kubutuka mu thangu yikhambu fuana.’ Mu Kibibila ki Yelusalemi, basekudila lutangu beni mu phila ayiyi: ‘Yiba buka minu yibutuka mu thangu yo ni mutu kabasa yindulanga ko.’ Mu thangu Polo kazaba kiedika, buna Yesu mana vutuka ku diyilu. Polo wutanguna batu bamona Yesu ava kenda ku diyilu kheti nafeka kasa baka ko luaku alolo. Kibila mu thangu kazaba kiedika, buna Yesu mana kuenda ku diyilu. (1 Koli. 15:4-8) Bo Polo kabaka luaku lu kukuenda ku diyilu buna Yesu weka ku diyilu. Ḿba diawu nandi katubila ti wuyiza zabila kiedika mu ‘thangu yikhambu fuana.’

Polo katubila mawu muingi kuyikulula. Batu bawombo balonguka bantubanga ti kikuma Polo kasadila mu matangu beni, mutu kalenda sadila mvandi kiawu muingi kutuba ti kasi ko luvalu. Boti mawu Polo kaba yindula, buna mawu mammonisa ti nandi wukikinina ti kasa ba ko wufuana muingi kutambula luaku Yesu kamvana. Mu 1 Kolinto 15:9, 10 nandi wutuba: ‘Bila minu yilutidi buluelu mu zimvuala zioso ayi yisi ko wufuana mu kutedulu mvuala, kibila yiyamisa kimvuka ki Nzambi. Vayi mu kibila ki mamboti ma Nzambi malutidi, yitambula luaku alolo.’

Mu kutala mambu amomo, tulenda tuba ti Polo wuba buka ‘muana wukhambu kuela mu kivumu.’ Ḿba Polo waba tomba kutubila matedi phila yi kukuitukila Yesu kammonikina, voti bo kazaba kiedika buna Yesu wuyiyendila ku diyilu, ove waba tomba kuyikulula ayi kukikinina ti kasa ba ko wufuana muingi kutambula luaku alolo. Boso kuandi bubela, Polo wuzola kimona mesu beni. Nandi waba tubilanga beni kimona mesu akiokio bo kaba longanga bankaka matedi luvulubukusu lu Yesu.—Mava. 22:6-11; 26:13-18.