Matata mami batona kulonguka na Zimbangi zi Yave mu mvu 1940. Vayi babika ndongukulu’awu ayi mam’ama waba tambulanga to bilongulu. Bosi mu mvu 1950 batumisa dikanda diama muingi balandakana lukutukunu lu mavalu lu zitsi, luvangama ku divula di Nova Iorque.

Bosi yaya Lawrence Jeffries, wutona kuiza tutalanga ayi wu ndongisa kiedika. Va thonono, Minu yimfuemina bo kanzabikisa matedi luvasanu Zimbangi zi Yave bafueti ba matedi pulitika ayi busodi. Ayi yinkamba ti boti baboso ku America bammanganga kukuenda mu mvita, khanu zimbeni bamana tunuanisa ayi kuvinza ts’itu muingi ku tuyadila. Yaya Jeffries mu mvibudulu wukhamba: “Buidi wumuena, nkhanu mbi Yave kalenda vanga boti baboso ku America ba kumbuongiminanga ayi zimbeni bankuiza banuanisa?” Kiuvu akiokio ayi mambu mankaka matsadisa kumona ti, phil’ama yi kuyindudila yisa ba ko tsundu. Ayi mawu mabuela phuil’ama yi kulonguka kiedika.

Minu yiviokisa bilokola biwombo mu kutanganga malongi maba kuizanga mu Kibanga ki Nsungi ayi Despertai! bio mam’ama kaba tambulanga. Buviokila thangu, minu yivisa ti yaba longuka kiedika. Diawu yikikinina yaya Jeffries kalonguka yama Kibibila. Mvandi yitona kulandakananga zikhutukunu zioso. Kiedika kinhikuna ntim’ama ayi minu yiyiza ba nsamuni wukhambu botama. Makani mama mabaluka bo yivisa ti, “kilumbu ki Yave kidi mu kufikama.” (Sefa. 1:14) Diawu yibakila makani ma kubika tsikika thalu’ama mu kukota kikola kinangama vayi mu kusadisa bankaka kuzaba kiedika.

Yimanisa kikola mu kilumbu 13 Ngonda Yinsambanu, mvu 1956. Bo vavioka bilumbu bitatu, yibotama mu lukutukunu lu divula. Minu yivisa ti tulenda baka mayangi mawombo, befu kukivana muingi kulonguka ayi kulonga bankaka matedi Yave.

Bo vavioka sambanu di zingonda tona yibotama, yiyiza ba ntuami ntuala. Ayi mu Ngonda Kumi Yimuadi, mvu 1956 ba basisa Ministerio do Reino muba ntu diambu: “Ngie Wulenda Buela Mioko ku Kibuangu Kidi Tsatu?” Minu yaba tomba kubuela mioko kibuangu kiba tsatu yi minsamuni.—Matai 24:14.

Diawu yiyendila ku Edgefield ku Sul yi divula di Carolina. Mu kimvuka muba to minsamuni minna. Ayi minu yiyiza ba nsamuni wuntanu. Befu tuaba kutakananga vantuala nzo yi khomba yimueka. Kadika ngonda, yaba vanganga 100 di bilokula mu kisalu ki kusamuna. Minu yiba bisalu biwombo bi kuvanga. Dedi, yaba tuadisanga zikhutukunu zi kisalu ki kusamuna ayi kuvanganga biyeku binkaka mu kimvuka. Bukiedika biyeku abiobio, biphanga kuluta longuka matedi Yave.

Nkieto wumueka waba longukanga yama Kibibila wuba kibuangu kaba sumbisilanga biuma bi mafua ku divula di Johnston, diba difikama na kibuangu tuaba kalanga. Nandi wuphana kisalu yaba salanga nati va khati kilumbu ayi mvandi wu tuvana kibuangu muingi tuvangilanga zikhutukunu.

Muana dibakala wu khomba waba kundongisanga Kibibila, baba tedilanga Jolly Jeffries, bo kafumina ku Brooklyn, Nova Yorque tuyiza ba bukundi ayi va kimueka tuyiza ba kufuza mu kusamuna. Ayi tuaba lalanga mu dikalu khomba mueka ka tubikila.

Ku konzu Sude, babasa futanga ko beni zimbongo zifuana mu bisalu. Dedi, tuaba tambulanga zidolar 2 voti 3 mu kilumbu ki kisalu. Kilumbu kimueka, yimanisa mua nkadu zimbongo yiba muingi kusumbila bidia. Ayi bo yaba vutuka, yidengana dibakala dimueka wundiuvula: “Ngie tidi kusala? Yinkuiza kufutanga dolar 1 mu kilokula.” Ayi nandi wuphana bilumbu bitatu bi kuvangila kisalu ki kudiodisa kibuangu baba tunga. Minu yivisa ti Yave waba kutsadisa ayi waba tomba yitatamana mu kisalu kiama ku Edgefield. Mvandi zimbongo beni zitsadisa kulandakana lukutukunu lu mavula lu zitsi luvangimina ku Nova Yorque, mu mvu 1958.

Mu kilumbu kimuadi ki lukutukunu, kumonika diambu dimueka dinkinza. Yizaba yaya Ruby Wadlington, wuba ntuami ntuala ku kimvuka kiba ku Gallatin ku Tennessee. Befu babuadi tuba makani ma kukota mu kisalu ki misioni. Diawu tulandikinina lukutukunu lu batu bantomba kukota kikola ki Ngiliadi. Mua thangu to yivioka befu tutona kufilasananga minkanda. Ayi bo bathumisa muingi kuevanga disolo ku kimvuka ku Gallatin, yisadila luaku alolo muingi kukuvula Ruby boti tulenda kuelana. Bosi minu yiyenda ku kimvuka Ruby kaba ayi befu tukuelana mu mvu 1959.

Bo yiba 23 di mimvu, batsola muingi yiba (ntuadisi wu bakulutu ba kimvuka) mu kimvuka ki Gallatin. Kimvuka kitu kiawu kitheti khomba Charles Thompson kayiza tala mu kisalu kiandi ki kukengidila bimvuka. Nandi wuba luzabu luwombo mu kisalu akiokio, vayi kheti bobo, wundiuvula zitsatu mbi zikhomba banluta viokila ayi mbi minkengididi  minkaka mi bimvuka bavanga muingi kuba sadisa. Minu yilonguka beni mu kifuani ki khomba ayoyo ayi yimona nkinza wu kuvana biuvu muingi kubaka bivisa bioso mu diambu.

Mu Ngonda Yintanu mu mvu 1964, bathumisa muingi kukota kikola ki Kisalu ki Kintinu, kivangimina ku Sude yi divula di Lansing, ku Nova Yorque. Zikhomba batuadisa kikola beni, bakhindisa muingi kubuela longuka ayi kuba phuila yi kukonzuka mu kiphevi.

Minu ayi Ruby ba tutumisa mu kisalu ki kukengidila bimvuka mu Ngonda Yitheti mu mvu 1965. Batufila muingi kukengidila bimvuka biba ku kibuangu kinneni tona ku divula di Knoxville, ku Tennessee, nati ku divula di Richmond, ku Virginia. Mvandi yaba kengidilanga bimvuka biba ku Norte yi Carolina, Kentucky ayi ku Este yi divula di Virginia. Befu tuaba kengidilanga to bimvuka muba mimfioti, kibila mu thangu beni mimfioti ayi mindela babasa landikininanga ko zithutukunu va kimueka ku khonzu Sude yi Estados Unidos. Mu bimvuka beni, zikhomba basa ba ko mbakulu yiwombo ayi befu tulonguka kukabila mua biuma biba yitu, na zikhomba baba viokila mu tsatu. Nkengididi wumueka wu bimvuka waba vanganga kisalu akiokio mu mimvu miwombo, wu tulonga diambu dinkinza: “Wulendi kuenda ko muingi ba kuyamba banga mfumu. Ngie wulenda sadisa zikhomba ba kutadila ti widi khomb’awu.”

Bo tuyenda kuekengidila mua kimvuka kimueka, Ruby wutona ndongukulu yi Kibibila na nkieto wumueka wuba muana wu nkieto wuba mvu wumueka. Mu kimvuka beni, musa ba ko ni mutu wulenda tuadisa ndongukulu’andi yi Kibibila. Diawu Ruby kaba longukilanga yandi mu telefone. Mu sabala yinkaka yi kinzenza, nandi wutona kulandakananga zikhutukunu zioso. Ayi bo zikhomba wadi zi bakieto baba mintuami ntuala mifilu bayenda mu kimvuka beni, batatamana kulonguka yandi nati kayiza botama. Bo vavioka 30 di mimvu, mu mvu 1995, ku Beteli yi Patterson, khomba yimueka yinkieto wuyiza yoluka na Ruby. Nandi wuba muana wu nkieto waba longuka Kibibila na Ruby. Muana beni ayi nnuni’andi baba minloguki mi turma 100 mi kikola ki Ngiliadi.

Divula di Florida, diawu divula dimmuadi tukengidila. Mu thangu beni, tuaba tomba dikalu ayi tusumba dikalu mu thalu yimboti. Vayi mu sabala yitheti, kisengu kimueka mu dikalu beni kivavuka. Ayi vabe tombulu zimbongo muingi ku divangusu. Diawu tudindila lusalusu kuidi khomba yimueka wuba oficina muingi katusadisa. Ayi nandi wutuma wumueka mu bisadi biandi muingi ka divanga. Vayi bo tubina kumfuta, nandi wumanga ayi wubue tuvana zimbongo! Mambu amomo, mammonisa phila Yave kankiebilanga bisadi biandi. Ayi ma tutebula monho ti tufueti banga kifu ki kukabilanga bankaka.

Bo tuaba kue kengidilanga bimvuka, tuaba kalanga mu zinzo zi zikhomba. Ayi mawu ma tusadisa kuvanga kinkundi na zikhomba ziwombo. Kilumbu kimueka bo yibasika, yizimbakana va maquina bansonikinanga, kipholo yitona kusonika matedi kimvuka. Vayi bo yivutuka, zikhomba bakhamba ti muan’awu wuba mimvu mitatu wumanisa kusonika ayi kuvotikisa kiawu. Mu kibila akiokio vaba tombulu yibue sonika kipholo kioso.

Mu mvu 1971, tutambula kiyeku kimona ki kukindisa minkengididi mi bimvuka ku divula di Nova Yorque. Befu tuyituka! Kibila, Minu yiba to 34 di mimvu. Bo tuvitila kuna, zikhomba ba tuyamba. Ayi yawu khumbu yitheti zikhomba bayamba khomba wumfioti mu kiyeku akiokio.

Bo tuba kiyeku ki kukindisa minkengididi mi bimvuka, yaba kuangalalanga beni kulonga matedi Yave kadika tsuka sabala mu zikhutukunu zi divula. Zikhomba ziwombo baba minkengididi mi bimvuka, baluta ba luzabu ayi phisulu kena minu. Dedi, wumueka mu bawu nandi wuvanga dilongi bo yibotama. Khomba wunkaka, Theodore Jaracz, wuyiza ba wumueka mu Dingumba Dintuasi. Vaba mvandi zikhomba ziwombo bapisuka baba sadilanga ku Beteli yi Brooklyn. Minu yimvutulanga beni mantondo kibila minkengididi amiomio mi bimvuka ayi zikhomba ziwombo baba sadilanga ku Beteli batsadisa beni. Yimona ti bawu baba, minsungi mi mamemi mi luzolo baba fiatilanga mu Diambu di Nzambi ayi baba monisanga lukuikumunu mu kubuela mioko  kimvuka ki Yave. Phila baba kuyikuludilanga, yawu yitsadisa kuvanga kisalu akiokio ki kukindisa minkengididi mi bimvuka.

Mu mvu 1974 Dingumba Dintuadisi disola zikhomba zinkaka muingi kukindisa minkengididi mi bimvuka. Ayi yivutuka mu kisalu ki kukengidila bimvuka. Vayi mu thangu ayoyo bafhila ku Sude yi divula di Carolina. Zikhomba baba beni mu mayangi kibila mu thangu beni, bafioti ayi mindela baba luaku lu kukutakana va kimueka.

Mu mvu 1976, batufila ku divula diba ku Georgia muingi kukengidila bimvuka biba ku Atlanta ayi ku Columbus. Yintebuka monho kuvanga disolo muingi kukindisa dikanda dimueka difuilu bana batanu bo dibakala dimueka kavika nzo’awu. Zikhomba beni baba bafioti. Matata ma bana beni baba nata ku nzo mbuku, kibila bawu mvawu bavangana phasi. Vayi thangu zioso, vaba zikhomba zi mindela ayi mimfioti baba kuendanga kuba kindisanga ayi kuba bombanga ku nzo mbuku. Minu yimona luzolo lukiedika zikhomba bamonisa. Luzolo lu phila ayoyo, lunsadisanga bisadi bi Yave kukindama mu mambu maphasi.

Mu mvu 1977 batutumisa ku Beteli yi Brooklyn mu mua zingonda muingi kukieba kiyeku kimona. Bo tuaba belama kumanisa kiyeku beni, zikhomba wadi baba mu Dingumba di Ntuadisi basolula yitu ayi batudinda muingi tutatamana kusadila ku Beteli. Ayi befu tukikinina.

Mu 24 di mimvu, yisadila mu Dingumba Dintadilanga Matedi Kisalu ayi tuaba kiebanga mambu maphasi bimvuka bamviokilanga ayi kuvana mvutu mu mambu beni. Buviokila thangu, Dingumba Dintuadisi divana zithuadusulu zibongulu mu Kibibila. Muingi kukubika minkengididi mi bimvuka, bakulutu ba kimvuka ayi mintuami ntuala. Bilonguku abiobio bakubika, bisadisa bawombo kukonzuka mu kiphevi. Khubumunu ayoyo, yituadisa lusakumunu luwombo mu kimvuka ki Yave.

Tona mu mvu 1995 nati 2018, Befu tuba zimvuala ku Kikulutu ki Zimbangi zi Yave muingi kukindisa zikhomba badi mu Zibeteli. Befu tuaba kutakananga na Mangumba ma Filiali, Zibetelita ayi zimisioni muingi kuba kindisa ayi kuba sadisa mu dioso kua diambu. Minu ayi Ruby tubaka khindusulu mu kifuani kimboti ki zikhomba. Dedi, befu tukindusu beni bo tuyuwa buidi zikhomba ku Beteli yi Ruanda bakindimina mu mambu mamonika mu mvu 1994 bo batu ba bikhulu biodi bavondasana. Bawombo bafuilu batu banzolanga. Kheti mu mambu moso amomo baviokila, vayi zikhomba batatamana kumonisa kiminu, kivuvu ayi mayangi.

Bubu, tueka kuvioka 80 di mimvu. Mu 20 di mimvu mima vioka, minu yitambula kiyeku ki kuba wumueka mu Dingumba di Filiali yi Estados Unidos. Kheti yisa kota ko kikola kinangama, vayi yitambula ndongukulu yilutidi yifumina kuidi Yave ayi kimvuka kiandi. Mawu makhubika muingi kulonga bankaka kiedika ki Kibibila kiala batuadisa ndandu mvu ka mvu. (2 Koli. 3:5; 2 Timo. 2:2) Minu yimmonanga buidi tsangu yi Kibibila yinsadisilanga batu kubalula zingulu’awu, kimutu kiawu ayi kuba kikundi kifikama na Mvangi’awu. (Yako. 4:8) Minu ayi nkazi’ami Ruby tumvanganga mamoso tunnunga muingi kutatamana kukindisa bankaka ayi kuvua nkinza luaku badi lu kulonguka matedi Yave ayi kulonga kiedika ki Kibibila kuidi bankaka —kibila luidi luaku lulutidi kioso kua kisadi ki Yave kadi!