Tala mimvutu Kibibila kimvana mu biuvu abiobio:

Mavanga 24:15 luntuba ti vala ba luvulubukusu lu ‘batu basonga’ ayi lu ‘batu bakhambulu basonga.’ Batu basonga badi bo basadila Yave ava bafua ayi mazina mawu madi masonama mu buku yi luzingu. (Mala. 3:16) Batu bakhambulu basonga badi bo bakhambu baka luaku lu kulonguka matedi Yave ayi mazina mawu masi ko mu buku yi luzingu.

Yoane 5:28, 29 yintubila momawu mangumba bantubila mu Mavanga 24:15. Yesu wutuba ti ‘baboso bavanga mambu mamboti’ bala ‘vulubuka muingi kuzinga vayi ‘bo bavanga mambu mambi’, bala vulubuka muingi kufundusu’. Basonga badi batu bavanga mambu mamboti, voti basadila Yave ava bafua. Bawu bala vulubuka kibila mazina mawu masonama mu buku yi luzingu. Vayi batu bakhambulu basonga, badi batu bavanga mambu mambi ayi bakhambu zaba Yave ava bafua. Bawu bala vulubuka muingi kufundusu. Mazina mawu masi ko masonama mu buku yi luzingu. Diawu vala tombulu kuba vana thangu muingi bafundusu ayi babaka lunungu. Mansundula ti bala baka luaku lu kulonguka matedi Yave ayi ba kuzingila mambu beni, mazina mawu mala sonama mu buku yi luzingu.

Nzaikusu 20:12, 13 yinsudikisa ti baboso bala vulubuka bala tombulu kutumamana mambu mala ba masoma mu buku yimona. Muawu muala ba zithumu zimona ziala tutuadisa mu nza yimona. Bo bala manga kumukina ziawu, bala bungu.—Yesaya 65:20.

Mu Danieli 12:2 mubikulu ti bankaka balala mu lufua bala kotuka ‘muingi kuzinga mvu ka mvu, vayi bankaka bala bungu.’ Lutangu alolo luntubila lufundusu lutsuka luala vangama kuidi batu bala vulubuka. Mawu mala monika kutsuka luyalu lu 1.000 ki mimvu, bo bankaka bala baka luaku lu kuzinga mvu ka mvu vayi bankaka bala bungu.—Nzaikusu 20:15; 21:3, 4.

Tulenda fuanikisa mangumba ma mamuadi amomo, banga zinzenza bantomba kuezingila ku tsi yinkaka. Batu basonga badi buka zinzenza zitambula nsua wu kuzingila mu tsi beni. Vayi batu bakhambulu basonga badi buka zinzenza zitambula nkanda widi zithuadusulu bafueti landakana boti bantomba kukadidila ku tsi beni. Mansundula ti muingi bakadidila ku tsi beni, bafueti monisa ti badi batu ba lufiatu ayi bankinzikanga minsiku mi tsi beni. Bobuawu mvandi, batu bakhambulu basonga, bala tombulu bakikinina minsiku mi Yave ayi kumonisa zikhadulu zimboti muingi batatamana kuzingila ku paladizu. Mu kutadila zikhadulu zi kadika nzenza, zimfumu zi luyalu zi tsi, badi nsua wu kubaka makani matedi nani widi wufuana muingi kutatamana ku tsi’awu. Bobuawu mvandi, vala tombulu muingi batu boso bala vulubuka, bamonisa kiminu ayi zikhadulu zinkaka zimboti muingi batatamana kuzingila ku nza yimona.

Yave kasi ko to Nzambi yi nkua kiadi vayi mvandi, Nzambi yi busonga. (Deute. 32:4; Minku. 33:5) Nandi wala monisa luzolo kuidi baboso bala vulubuka, kuba kuandi basonga voti bakhambulu basonga. Vayi baboso bala kunzola ayi bala zingila mu zithumu ziandi, bawu to bala tatamana kuzinga ku nza yimona.