Ngie Zebi?
Ngie zebi ti mu thangu yikhulu baba sadilanga mabubu muingi kuvangila miatu?
Mabubu
TUZEBI buboti ti ku Ngipiti mu thangu yikhulu, baba sadilanga beni minkanda mi mabubu muingi kusonikina. Basi Ngeleku ayi basi Loma mvawu basadila beni minkanda mi mabubu muingi kusonikina. * Vayi batu baluelu bazebi ti, mabubu babasa sadilanga ko to mawu muingi kusonikina, vayi mvandi muingi kuvangila miatu.
Mintindu miole mi miatu mivangulu mu mabubu babakula ku Ngipiti mu bibaka ayi mu mabumbi
Kuvioka 2,500 di mimvu kumbusa, mbikudi Yesaya wusonika ti “dikabu dimueka didi mu ndeku muila ku khonzo Etiópia” diaba filanga mimvuala baba kuendilanga mu miatu mivangulu mu mabubu.” Mbikudi Yelemia mvandi wubikula ti mu thangu basi Medo-Pelesia bala tulula divula di Babilonia bawu bala vika miatu “miawu mivangulu mu mabubu” muingi basi Babilonia babika kubaka bu kutinina.—Yesa. 18:1, 2; Yele. 51:32.
Bo Kibibila kisonimina mu lulendu lu Nzambi, diawu minlonguki mi Kibibila basa kuituka ko mu thangu batu bantombanga biuma bikhulu, babakula bivisa bimmonisa ti mabubu baba sadilanga mawu muingi kuvangila miatu mu thangu yikhulu. (2 Timo. 3:16) Mambu mbi bawu babakula? Batu bantombanga biuma bikhulu, babakula ku Ngipiti bivisa bimmonisa miatu mivangulu mu mabubu.
BUIDI BABA VANGILANGA MIATU MI MABUBU?
Bibuangu biwombo ku Ngipiti dedi mu mabumbi ayi bibaka, bimmonisa zifikula zi batu banzenga mabubu muingi kuvangila miatu. Theti bawu baba zenganga mabubu, bosi baba khupikanga mawu mu minko, ayi baba bundisanga minko mioso va kimueka. Mabubu masi ko mavindubuka vayi madi zikhonzo zitatu. Diawu baba fietikisilanga mawu bumboti mu minsinga. Buku yimueka yintubila matedi kinongu ki basi Ngipiti, yituba ti miatu mi mabubu baba vanganga ku Ngipiti khumbu zinkaka miaba banga kukula (17 m), ayi vabe tombuluanga 10 ove 12 di matsela voti zithombi muingi kuvuidila miatu beni.
Kibaka ku Ngipiti kimonisa zifikula mu phila baba vangilanga miatu mi mabubu
KIBILA MBI BABA SADILANGA BENI MABUBU MUINGI KUVANGILA MIATU?
Kibila kitheti: Ku Ngipiti kuba beni mabubu maba konzukanga mu ndeku muila wu Nilo. Kimuadi, kibila disa ba ko diambu diphasi kuvangila miatu mu mabubu. Kheti mu thangu batona kusadila mabaya muingi kuvangilanga miatu; vayi minlobi miwombo batatama kusadila miatu mi mabubu muingu kuvanga kisalu kiawu.
Batu batatama kusadila miatu mi mabubu mu mimvu miwombo. Diawu nsoniki mueka wu muisi Ngeleko bantedilanga Plutarch, wuzinga thangu yi bapostolo wusonika ti batu mu thangu’andi batatamana kusadila miatu mi mabubu.
^ Lut. 3 Mabubu mankozukilanga beni mu mayanga voti mu ndeku muila wu khambu kumbanga beni. Mabubu malenda dukisa (5 m) mu kukula, mvandi disina diandi dilenda ba (15 cm) mu kutola.
