Mambu amomo mamonika, matsusula ayi mabalula luzingu luami. Kibila tona mu thangu beni, minu yitomba bu kufikimina mvangi biuma bioso. Vayi ava yi luzabikisa mambu mankaka mamonika mu builu beni, yitidi ku luzabikisa mambu mamonika mu bumuana buami ma kubika mayindu mami ayi ntim’ami muingi kutomba Nzambi.

Minu yibutuka mu mvu 1937 ku Guesnain, ku divula dimueka dike ku norte yi França. Kuawu kuidi mamaya mathalu ayi tat’ami wuba mu dingumba di batu baba sikanga mamaya beni. Tat’ami waba zolanga beni kusala ayi minu yilonguka mu kifuani kiandi. Nandi wundongisa kubika vangilanga bankaka mambu makhambulu masonga. Mu kibila ki mambu ma phasi batu baba salanga yandi baba viokila, diawu tat’ami kakotila mu dingumba di kunuanina batu baba tovulanga mu bisalu. Mvandi tat’ami kabasa kuangalalanga ko mu mambu ma luvunu, mimpelu va kizunga kitu baba vanganga. Bawombo mu bawu baba zinganga buboti; vayi baba dindanga bidia ayi zimbongo kuidi batu baba nuana luzingu luawu. Tat’ami wudasuka mu phila mimpelu amiomi baba natina luzingu  luawu, kibila babasa sadilanga ko mambu Kibibila kintuba ayi babasa longanga ko kiedika.

Bo yiyonzuka, minu mvama yitona kulenda mambu makhambulu masonga. Dedi, yabasa kuangalalanga ko kumona batu ba zitsi zinkaka baba zingilanga ku França bo baba kuba vangilanga mambu mambi. Vayi bo yiviokisa thangu mu kuta bola na batu ba zitsi zinkaka, yivisa ti bawu baba zikhadulu zimboti. Ayi yitebuka moyo ti mam’ami kasa ba ko muisi França vayi muisi Polónia. Minu yaba tomba muingi batu ba zitsi zioso baba kithuadi ayi bazingila mu ndembama.

Mu mvu 1957 bambuila muingi yiba disodi. Diawu yiyendila ku miongo mi Argélia. Dedi bo yibe tubila kumbusa, mu builu beni bo yimana kutenduka“ A Nzambi! A Tsadisa!” Bo yisusuka yaba talasana kubika kuandi na disodi diba ku khonzo yi zimbeni, vayi kiba kibulu ki nsitu. Bosi ntim’ami wulembama! Vayi kheti bobo, mambu amomo mandata kuyindula matedi tsundu yi luzingu!—Diawu yikiyuvusila: Kibila mbi tuidi akuku? Nzambi wutuvuanga nkinza? Bukiedika kuandi ti tuala baka ndembama yala kadidila?

Bo yiba mu ziferia, yiyenda ku nzo matata mami. Buawu yizabila Mbangi yimueka yi Yave wuphana Kibibila ayi yitona kutanga kiawu bo yivutuka ku Argélia. Lutangu luphanga kukuituka beni luidi mu Nzaikusu 21:3, 4, luntuba: “Tala nzo yi Nzambi yidi kuidi batu. Nzambi wela fiona matsuela mosu mu mesu mawu ayi lufua lulendi buela ba ko, kiadi ki lufua kilendi buela ba ko, bidilu ayi ziphasi bilendi buela ba ko, bila mambu matheti maviokidi.” * Mambu amomo maphanga beni kukuituka. Vayi minu yikiyuvusa: Bukiedika kuandi ti madi makiedika?’ Mu thangu beni, minu yabasa zabanga ko matedi Nzambi ayi Kibibila.

Bo yimanisa kisalu kiama ki disodi mu mvu 1959, yizaba Mbangi yimueka yi Yave bantanguninanga François, wundongisa kiedika ki Kibibila. Dedi, wumbonisa mu Kibibila ti Yave diawu dizina di Nzambi. (Minku. 83:18) Mvandi wutsudikisa ti Yave wala tuala busonga va ntoto, wala balula ntoto paladizu ayi wala dukisa zikhanu zidi mu Nzaikusu 21:3, 4.

Malongi amomo maba tsundu ayi manyikuna ntim’ami. Vayi yiyiza ba mu zimfiti mu mambu ma luvunu ayi makhambulu mu Kibibila mimpelu baba longanga. Diawu mu kulandakana kifuani ki tat’ami, minu yaba tomba kuvanga diosokua diambu muingi kumanisa mambu beni!

Yaya François ayi bakundi bankaka batsadisa muingi yivumbama. Bawu batsudikisa ti kisalu ki baklisto kisi ko ki kufundisa, vayi ki kuvana kivuvu mu nzila zitsangu zimboti zi Kintinu ki Nzambi. Akioki kiawu kisalu Yesu kavanga ayi kabikila kuidi minlandikini miandi muingi bavanga. (Matai 24:14; Luka 4:43) Yilonguka ti yifueti kolukanga na batu mu lukinzu kheti tuidi binganga biviakana. Kibibila kintuba: “Kisadi ki Mfumu kasa fuana ko kufindananga ziphaka, vayi kafueti ba mutu wulembama kuidi batu boso.”—2 Timo. 2:24.

Minu yibalula nzingulu’ami ayi mu mvu 1959 yibotama mu lukutukunu lu divula. Mu lukutukunu beni, muawu yizabila Angèle, ayi minu yitona kunzola. Mu bilumbu bilanda minu yaba kuendanga  mu kimvuka kio bawu baba landikininanga zikhutukunu. Ayi mu mvu 1960 befu tukuela. Angèle widi nkieto wukiedika, wumboti ayi widi nkhayilu Nzambi kaphana.—Zinga. 19:14.

Buviokila thangu, yilonguka mambu mawombo kuidi zikhomba ziba nduenga yiwombo ayi bapisuka. Diambu dinkinza yilonguka diawu adidi, muingi kununga kioso kua kiyeko kiphasi, tufueti ku kikulula ayi kusadila dilongi di nduenga didi mu Zingana 15:22, luntuba: “Mayindu ma batu bawombo mawu mantuandisanga ndandu.”

Mu mvu 1964, minu yimona kivisa mu mambu masonama mu matangu amomo. Mu mvu beni minu yitona kukengidila bimvuka, muingi kukindisa zikhomba ayi kuba sadisa batatamana kukonzuka mu kiphevi. Vayi bo yiba to 27 di mimvu, yisa ba ko beni wupisuka. Diawu yivangila zinzimbala ziwombo. Vayi minu yilonguka mu zinzimbala beni yivanga. Bulutidi yilonguka malongi mawombo mankinza, kuidi zikhomba baba nduenga ayi mvandi bapisuka.

Dedi, yintebuka moyo mambu mamonika kutsuka sabala yi kinzenza, yiba ku kimvuka kimueka ku Paris ayi khomba mueka wuyonzuka mu kiphevi wuthumisa va khonzo ayi wundiuvula ti kalenda koluka yami. Minu yinkamba: “Vasi diambu ko.”

Bosi nandi wundiuvula: “Louis, mu thangu mfelimi kankuenda kuetala batu,  banani nandi kantombanga?”

Minu yimvutudila: “Zimbevu.”

Bosi khomba beni wukhamba: “Buawu kuandi. Vayi yimmona ti ngie wunluta viokisanga beni thangu na zikhomba badi buboti mu kiphevi. Mu kuba Nkengididi wu bimvuka, khanu bulutidi kuviokisa beni thangu na zikhomba ziwombo mu kimvuka kitu badi bavonga mu kiphevi, bankaka bakhidi bamona ayi bankaka bammonanga zitsonyi mu kukoluka. Bukiedika, bankuiza yangalala beni ngie kuviokisa yawu thangu mu kudia yawu va kimueka.”

Dilongi khomba beni kaphana, bukiedika diba dilongi dimboti ayi yi dizimbakananga ko. Luzolo nandi kaba mu mamemi ma Yave, lunyikuna beni ntim’ami  diawu minu yikikulula ayi yitona kusadila dilongi nandi kaphana. Yimvutudila Yave matondo mu zikhomba zipiIa ayoyi.

Mu mimvu 1969 nate mu mvu 1973, baphana kiyeku ki kukengidila dingumba diaba tadilanga matedi bidia mu zikhutukunu zinneni zisalama ku Colombes, divula dimueka didi ku Paris. Mu lukutukunu  luvangima mu mvu 1973, vaba tombulu kudikila 60.000 di batu bayenda muingi kuelandakana lukutukunu beni mu bilumbu bitanu! Minu yiba beni boma mu kiyeku akiokio. Vayi yibue tebuka moyo dilongi didi mu Zingana 15:22—yidinda lusalusu kuidi zikhomba bayonzuka mu kiphevi, baba luzabu mu matedi kukieba kiyeku beni. Dedi kusumba zimbizi, bidia binkaka biaba tombulu muingi kukubika ayi mvandi kukutikisa zikhomba baba lamba ayi kusumba biuma. Va kimueka befu tununga kukieba buboti kiyeku akiokio kinneni tutambula.

Mu mvu 1973, minu ayi nkazi’ama ba tutumisa muingi tue sadila ku Beteli yi França. Kiyeku kitheti yitambula kiba beni kiyeku kiphasi. Kibila vabe tombulu kunata bilongulu ku Camarões tsi mueka yidi ku África, bakandikila kisalu kitu tona mu mvu 1970 nate 1993. Diawu boma buama bubuelimina mu kiyeku beni. Ayi bo khomba waba kengidilanga kisalu ki kukabula bilongulu ku Beteli yi França kamona mawu, nandi wukhindisa mu kukhamba: “Zikhomba zitu ku Camarões bidia bi kiphevi bantomba, ndoko tuba dikila. Ayi kuba dikila kiawu kiyeku kitu”.

Khumbu ziwombo yaba kuendilanga mu zitsi ziba zifikama na tsi Camarões muingi kuedengana na bakulutu ba bimvuka baba mu zitsi beni. Zikhomba beni baba kibakala ayi mu diela bawu batsadisa muingi yibaka bu kunungina mu kiyeku yiba ki kunatanga bidia bi kiphevi ku Camarões. Yave wusakumuna mangolo mitu. Ayi mu 20 di mimvu, zikhomba zitu ku Camarões basa khambu ko Kibangi Kinsungi ayi mvandi kadika ngonda baba tambulanga Kilongulu baba longukanga mu zikhutukunu va khati sabala.

Tona vana thonono bumasi buitu, minu yimona zikhadulu zimbote zi Angèle. Ayi nandi wuluta zimonisa va dikuela. Dedi mu builu bo tukuela, Angèle wukhamba yidinda kuidi Yave mu nsambu muingi ka tusadisa mu makani befu tuba, ma kubuela kukivana mu kisalu kiandi ayi Yave wutambudila nsambu’itu.

 Angèle mvandi wutsadisa mu kubuela fiatila kuidi Yave. Dedi, mu mvu 1973 mu thangu batutumisa muingi kuesadila ku Beteli, minu yisa zola ko beni diyindu adiodio, kibila yaba zolanga beni kisalu ki kukengidila bimvuka. Vayi Angèle wuthebula moyo ti befu tuvana luzingu luitu muingi kusadila Yave ayi nandi wukhamba ti tufueti ba bakubama muingi tuvanga mambu kimvuka ki Yave ki tudinda. (Ebe. 13:17) Bukiedika, minu yisa ba ko mambu manka ma kutuba! Diawu tuyendila ku Beteli. Mu mimvu mioso amiomio tuma zingila, yimmonanga beni zikhadulu zimboti zi nkazi’ama. Dedi kuba mayindu mansika, nduenga kadi mu mambu ma kiphevi, mansadisanga beni kukindisa dikuela ayi ma tusadisanga kubaka makani mamboti.

Kheti buviola thangu, nkazi’ama Angèle wutatamana kumonisa zikhadulu zimboti va dikuela. Dedi muingi tubaka bu kukotila mu bikola bi Kintinu, bimvangiminanga mu kingelesu, Angèle ayi minu tutona kuvanga mangolo mawombo muingi  kulonguka mbembu beni. Diawu tubakila makani ma kulandakananga zikhutukunu mu kimvuka ki mbembo yi kingelesu-kheti befu tuba kuvioka-70 di mimvu mu thangu beni. Mu kuba wumueka mu bakulutu ba Filiali yi França, kulonguka mbembu yimona disa ba ko diambu diluelu. Vayi Angèle ayi minu tutatamana kuvanasana lusalusu. Buabu mu thangu ayiyi tueka 80 di mimvu, tuidi mu kutatamana kukubika zikhutukunu zitu zi kimvuka mu kingelesu ayi kifalasi. Mvandi tumvanganga mangolo moso muingi kuvutula mimvutu mu zikhutukunu ayi mvandi kuvanga kisalu ki kusamuna. Yave wutusakumuna mu mangolo moso tuvanga mu kulonguka mbembu yi kingelesu.

Mu mvu 2017 tutambula lusakumunu lunneni beni. Angèle ayi minu ba tutumisa muingi kukota kikola kinkubikanga bakulutu ba Filiali ayi bakazi bawu kimvangiminanga ku kibuangu ki bikola bi Torre de Vigia ku Patterson, Nova Iorque.

Yave widi Nlongisi wulutididi. (Yesa. 30:20) Diawu disi ko diambu di kukuitukila mu phila luzabu dikabu diandi didi—kuba kuandi bakulutu ayi matoko bambakanga—ndongusulu yilutidi! (Deute. 4:5-8) Ayi minu yivisa ti matoko banlandakananga zithuaduzulu zi Yave ayi zi zikhomba badi bapisuka, bankonzukanga mu kiphevi ayi bankuiza banga bakulutu ba lufiatu. Zingana 9:9 yi tutebula monyo: ‘Longa mutu nkua nduenga muingi kaluta ba nduenga, longa mutu wusonga muingi kaluta baka nzayilu.’

Khumbu ziwombo,  yintebukanga moyo va builu bunanni tuba va miongo mi Argélia kheti va mavioka 60 di mimvu. Minu yisa zaba ko mambu maba kuphingila kuntuala. Yilonguka beni mu kifuani ki bankaka! Ayi mvandi Yave wutsadisa kubaka nkieto wukiedika.  Angèle ayi minu, tuma viokisa va kimueka mimvu mioso amiomio mu mayangi. Diawu tuidi bakubama muingi kutatamana kulonguka kuidi Tat’itu yi Diyilu Yave ayi mvandi mu zikhomba badi nduenga ayi bapisuka banzolanga Yave.