1. Mbi dingumba di batu mu sekulu yitheti bayuvula muingi bavanga?

DINGUMBA dinneni di batu bafumina mu zitsi ziwombo baba kolukanga zimbembo ziviakana, bayenda mu lukutukunu ku Yelusalemi. Vayi diambu dimueka dimonika mu kilumbu beni, diba di kukuitukila. Bawombo mu minlandikini mi Yesu, baba koluka zimbembo ziviakana zi zinzenza bayiza mu lukutunu beni! Ayi mvandi baluta kuituka beni mu dilongi mvuala Petelo kavanga mu mbembu’awu, kibila diawu diluta nyikuna mintima miawu kubunda mvandi tsangu batambula mu kuzaba ti bawu balenda vuka, ba kukuna kiminu kingolo mu Yesu Klisto. Diawu bayuvudila: Mbi tufueti vanga? Petelo wuba kamba: “Bika kadika mutu mu beno kabotama.”—Mava. 2:37, 38.

2. Mbi tunkuiza mona mu dilongi adidi? (Tala foto yidi va thonono levista.)

² Mambu mamonika ma kukuituka beni, kibila kuvioka 3.000 di batu babotama muna kilumbu beni ayi bayiza ba minlandikini mi Yesu. Ayoyi yiba thonono kisalu kinneni Yesu kavana kuidi minlandikini miandi miungi bavanga ayi kiawu kinsalamanga nati bubu. Mu bilumbu bitu, tulendi sadisa ko nlonguki wu Kibibila kubotama voti kuba nlandikini Yesu mu kilumbu kimueka to. Kibila vantombuluanga zingonda voti mimvu muingi nlonguki kayonzuka mu kiphevi. Kuvanga minlandikini, kidi kisalu kintombulu beni mangolo. Boti ngie widi nlongisi, buna zebi mbi binsundula kuvanga kisalu akiokio. Mu dilongi adidi tunkuiza mona mbi ngie wulenda vanga muingi kusadisa nlonguki’aku wu Kibibila kaba nlandikini wubotama wu Yesu.

3. Dedi bummonisina Matai 28:19, 20, mbi nlonguki wu Kibibila kafueti vanga muingi kabotama?

³ Ava kabotama, nlonguki wu Kibibila kafueti sadila mambu Kibibila kinlonga. (Tanga Matai 28:19, 20.) Bo nlonguki wu Kibibila kansadila mambu kanlonguka, nandi wala ba banga “dibakala di nduenga” bantubila mu kinongu Yesu kata, wutunga nzo va mbata dimanya. (Matai 7:24, 25; Luka 6:47, 48) Buidi tulenda sadisila nlonguki wu Kibibila kusadila mambu kanlonguka? Tuemmona zithuadusulu zitatu zilenda kutusadisa.

4. Buidi tulenda sadisila nlonguki wu Kibibila katatamana kubaka makani ma kubotama? (Tala mvandi dibaya dintuba “ Sadisa Nlonguki’aku Katsikika Makani ayi Kadukisa Mawu.”)

⁴ Sadisa nlonguki kabaka makani ma kiphevi. Kibila mbi fueti vangila mawu? Tala kifuani akiki: Yindilabu boti ngie widi mu kuvanga viage yi kinanu, ḿba ngie sa wevundanga muigi wubika vonga. Bo buawu mvandi bo nlonguki wu Kibibila kambaka makani kalenda dukisa mu mua zingonda voti mu mvu, ḿba nandi kalenda visa ti wala nunga kudukisa makani ma kubotama. Sadila buku Baka Mayangi ma Mvu ka Mvu mu Kulonguka Kibibila! Buku ayoyo yinkuiza sadisa nlonguki’aku wu Kibibila kukonzuka mu kiphevi. Kibila kadika dilongi, dinkuiza monisa buidi makani kabe baka madidi nguizani na mambu kadi mu kulonguka. Boti widi makani mankaka matedi nlonguki’aku, buna wuma sonika va kibuangu kintuba “Mankaka.” Sadila mambu amomo be sonika muingi kufiongunina makani nlonguki’aku kankuiza dukisa mu mua thangu voti mu thangu yiwombo.

5. Dedi bummonisina Malako 10:17-22, mbi Yesu kakamba dibakala diba busina kavanga ayi mu kibila mbi?

⁵ Sadisa nlonguki kubalula nzingulu’andi. (Tanga Malako 10:17-22.) Yesu wuzaba ti diba diambu diphasi kuidi dibakala diba  busina muingi kasumbisa biuma biandi bioso. (Malako 10:23) Vayi kheti bobo, nandi wunkamba muingi kabalula nzingulu’andi. Kibila mbi? Kibila Yesu wuba luzolo mu nandi. Khumbu zinkaka, befu mvitu tulenda mona phasi kukamba nlonguki wu Kibibila kasadila mambu kadi mu kulonguka, kibila tummona ti kakubimini’abu ko muingi kabalula nzingulu’andi. Valenda tombulu thangu yiwombo muingi batu banlonguka yitu Kibibila babalula bifu biawu bimbi ayi bavuata kimutu kimona. (Kolo. 3:9, 10) Vayi befu kuba kamba va thonono mambu bafueti balula mu luzingu luawu, bawu balenda fika vanga mawu. Ayoyo yidi phila tuba monisina ti, tuba vuanga nkinza.—Minku. 141:5; Zinga. 27:17.

6. Kibila mbi tufueti kuvudilanga kiuvu akiki: ‘Buidi wummuena’?

⁶ Bo tunkuvula nlonguki kiuvu akiki: ‘Buidi wummuena’? Buawu tunkuiza zabila mayindu mandi mu diambu beni. Ngie kuvanganga mawu, wisi nkuiza mona ko phasi kulonguka yandi, mambu matedi kubalula nzingulu’andi. Buku Baka Mayangi ma Mvu ka Mvu! Muidi biuvu bi phila ayoyo. Dedi mu dilongi di 04 muidi kiuvu kintuba: “Buidi wummuena, Yave wumvuanga nkinza bo wunsadila dizina diandi?” Dilongi 09 didi kiuvu: “Mambu mbi wulenda dinda mu nsambu?” Va thonono, ḿba nlonguki wunkuiza tomba beni thangu muingi kayindula mu mimvutu mi biuvu abiobi. Vayi ngie wulenda nsadisa kuyindula mu matangu ma Kibibila munkuiza tanga ayi phila kamvisilanga mawu.

7. Buidi tulenda sadila bifuani bi batu banunga kubalula nzingulu’awu mu phila yifuana?

⁷ Bo nlonguki’aku kamvisa mbi kafueti vanga, sadila bifuani bi batu banunga kubalula nzingulu’awu muingi kanunga kuvanga mawu. Dedi boti nlonguki’aku wumvanga mangolo ma kulandakana zikhutukunu, buna ngie wulenda monisa video yidi mu dilongi 14 mu kikhuku ki zi video yintuba Yave wu kukiebanga. Mu malongi mawombo madi mu buku Baka Mayangi ma Mvu ka Mvu! Ngie wala mona bifuani biwombo mu kitini kintuba “Tala Mambu Mankaka.” * Vayi ba keba keba muingi wubika dedikisa nlonguki’aku na mutu wunkaka mu kutuba ti, “boti nandi wununga kuvanga mawu, buna ngie mvaku wulenda nunga.” Bika nlonguki’aku naveka kabaka makani amomo. Diawu, tomba diyindu di mfunu didi mu video muingi kusadisa nlonguki’aku kasadila mambu kama longuka mu Kibibila. Sadila matangu muingi kummonisa buidi Yave kasadisila mutu beni kanunga kubalula nzingulu’andi.

8. Buidi tulenda sadisila nlonguki kazola Yave?

⁸ Sadisa nlongiki kazola Yave. Buidi wulenda vangila mawu? Tubila matedi zikhadulu zi Yave. Sadisa nlonguki’aku kumona ti Yave widi Nzambi yi mayangi ayi wunsadisanga baboso ba kunzolanga. (1 Timo. 1:11; Ebe. 11:6) Mmonisa ti nandi wala baka ndandu yiwombo mu kusadila mambu kadi mu kulonguka ayi nsudikisa ti mambu kadi mu kulonguka, yidi mbonosono yi luzolo Yave kadi mu nandi. (Yesa. 48:17, 18) Nlonguki’aku wala luta ba wukubama muingi kubalula nzingulu’andi bo luzolu’andi mu Yave lumbuelama.—1 Yoa. 5:3.

9. Dedi bummonisina Malako 10:29, 30, mbi bilenda sadisa nlonguki kubika mambu mawombo kumbusa muingi kuba nlandikini wubotama?

⁹ Nlonguki wu Kibibila kafueti vanga mambu mankaka, muingi kabotama. Dedi dibakala diba busina tube tubila kumbusa, minlonguki  miwombo mi Kibibila mintombuluanga kubika kisalu kikhambulu nguizani na minsua mi Kibibila. Bawombo mvandi bala tombulu kubika bakundi bakhambu zolanga Yave ayi bankaka bala kuba kuekula kuidi makanda mawu bakhambu zolanga Zimbangi zi Yave. Yesu wuzaba ti disi ko diambu diluelu muingi minlonguki mi Kibibila kuvanga mawu. Vayi nandi wukanikisa ti baboso ba kunlandakana, balasa fua ko tsoni. Vayi, wala kuba sakumuna mu kubavana dikanda di kiphevi didi luzolo. (Tanga Malako 10:29, 30.) Buidi ngie wulenda sadisila nlonguki’aku kubaka ndandu mu nkhayilu awowo?

10. Mbi ngie be longuka mu kifuani ki Manuel?

¹⁰ Kuna kikundi kifikama na nlonguki’aku. Nkinza beni ngie kumonisa ti wumvuanga nkinza nlonguki’aku. Kibila mbi? Tala mambu Manuel wunkalanga ku México katuba: “Ava kutona ndongukulu’itu yi Kibibila, nlongisi’ama waba kukhuvulanga buidi yididi. Nandi wutsadisa kuba wuvumbama ayi mawu matsadisa kunzibudilanga mabanza mami. Minu yimona ti mu bukiedika nandi waba kuphuanga nkinza.”

11. Buidi minlonguki mitu balenda bakila ndandu befu kuviokisanga yawu thangu?

¹¹ Viokisanga thangu na minlonguki miaku dedi bo Yesu kaba viokisilanga thangu na minlonguki miandi. (Yoa. 3:22) Dedi, tumisa nlonguki’aku ku nzo’aku muingi ludia va kimueka voti lutala video yi Broadcasting. Ayi nlonguki’aku wala luta zola ngie kuvanga mawu bo kadi mu phundulu yi kikola voti yi kisalu. Kazibwe wukala ku Uganda wutuba: “Minu yiluta longuka beni matedi Yave bo yaba viokisanga thangu na nlongisi’ama kena mu thangu tuaba vanganga ndongukulu yi Kibibila. Minu yimona ti Yave wumvuanga nkinza dikabu diandi ayi diawu bawu badidi mayangi. Mvandi mawu minu yaba tombanga mu luzingu luama.”

12. Kibila mbi tufueti tumisinanga minsamuni miviakana bo tukue tuadisa ndongukulu yi Kibibila?

¹² Tumisanga minsamuni miviakana bo  wukue tuadisa ndongukulu yi Kibibila. Khumbu zinkaka, tulenda yindula ti buboti beni kukuendanga befu veka voti kunatanga no nandi nsamuni wunkuendanga yitu. Kheti dilenda monikina diambu dimboti, vayi ḿba nlonguki wela luta baka ndandu, befu kunata minsamuni miviakana. Dmitrii wunkalanga ku Moldávia wutuba: “Kadika nsamuni waba landakananga ndongukulu’ama yi Kibibila, waba sudikisanga mambu mu phila yiviakana. Mawu matsadisa mvandi kuvisa mambu yaba longuka mu ziphila ziviakana. Mvandi matsadisa yibika mona beni zitsonyi bo yiyenda mu khumbu yitheti mu lukutukunu, kibila yizaba zikhomba ziwombo.”

13. Kibila mbi tufueti sadisila nlonguki kalandakananga zikhutukunu?

¹³ Sadisa nlongiki kalandakananga zikhutukunu. Kibila mbi? Kibila luidi lutumu lu Yave ayi yidi phila yi kumbuongimina. (Ebe. 10:24, 25) Mvandi zikhomba, badi dikanda ditu di kiphevi. Bo tuidi mu zikhutukunu tuidi buka dikanda, didi ku nzo ayi bandia va kimueka. Ngie kusadisa nlonguki’aku wu Kibibila kalandakananga zikhutukunu, ngie widi mu kunsadisa kabaka makani ma kubotama. Vayi ḿba dilenda ba diambu diphasi kuidi nandi. Boti buawu, buidi buku Baka Mayangi ma Mvu ka Mvu! yilenda sadisila nlonguki’aku kanunga bioso bikaku kamviokila?

14. Buidi tulenda kindisila nlonguki kalandakananga zikhutukunu?

¹⁴ Sadila dilongi 10 didi mu buku Baka Mayangi ma Mvu ka Mvu! muingi wukindisa nlonguki’aku. Kibila ava kukundula buku beni, batumisa minsamuni mipisuka muingi bameka kutuadisa ndongukulu yi Kibibila mu kusadila dilongi adiodi. Bawu babaka ndandu ayi basadisa minlonguki miawu kulandakana zikhutukunu. Vayi, vasintombulu ko theti wuvitila mu dilongi adiodio, muingi wutumisa minlongiki mi Kibibila balandakana zikhutukunu. Vayi wulenda fika vanga mawu mu kuba tumisa balandakananga zikhutukunu. Minlonguki bamviokilanga mu mambu maviakana. Diawu tomba kuvisa zitsatu zi nlonguki’aku ayi mona buidi wulenda kumvanina lusadusu. Bika kuvonga kheti nandi kasimfika landakana ko zikhukutukunu. Ba mvibudulu ayi tatamana kuvanga mawu.

15. Boma mbi minlonguki mitu balenda ba?

¹⁵ Ngie wuba nkadu boma bo wubaka makani ma kuba Mbangi Yave? Ḿba ngie wumuena ti wulendi nunga ko kusamuna. Voti ngie wuba boma ti ḿba dikanda ayi bukundi balenda kubalukila. Boti buawu, buna ngie wulenda visa mabanza ma nlonguki’aku. Yesu wuzaba ti tulenda ba mu boma. Diawu, nandi kadindila minlandikini miandi muingi babika kubikila boma bu batula nkaku muingi kusadila Yave. (Matai 10:16, 17, 27, 28) Buidi Yesu kasadisila minlandikini miandi kununga boma ayi buidi ngie wulenda landikinina kifuani kiandi?

16. Buidi tulenda kubikila nlonguki muingi kalonga bankaka mambu kama zaba?

¹⁶ Tatamana kukubika nlonguki’aku muigi kalonga bankaka mambu kama zaba. Minlandikini mi Yesu ḿba va thonono, bawu baba boma mu thangu Yesu kaba fila muingi benda basamuna. Vayi Yesu wuba sadisa mu kuba kamba kibuangu ayi tsangu bafueti longa. (Matai 10:5-7) Buidi wulenda landikinina kifuani ki Yesu? Sadisa nlonguki’aku kazaba vama mbi kafueti samunina. Dedi, yuvula nlonguki’aku: Ngie zebi mutu wulenda baka ndandu mu mambu ngie malonguka mu Kibibila? Bosi nkubika muingi kalongila tsangu beni mu phila yikhambulu phasi. Boti  kuba wulenda sadila buku, Baka Mayangi ma Mvu ka Mvu! va kitini kintuba “Batu Bankaka Bantubanga.” Ayi mu thangu wumvanga mawu, fueti tsikika mayindu maku mu kukubika nlonguki kasadila Kibibila muingi kavanina mimvutu mu phila yikhambulu phasi vayi mu lukinzu.  

17. Buidi tulenda sadila mambu madi mu Matai 10:19, 20, 29-31, muingi kusadisa nlonguki kafiatila mu Yave?

¹⁷ Sadisa nlonguki’aku kafiatila mu Yave. Yesu wukindisa minlandikini miandi ti, Yave wunkuiza basadisa kibila wuku bazolanga. (Tanga Matai 10:19, 20, 29-31.) Tebulanga moyo nlonguki’aku ti Yave mvandi wunkuiza nsadisa. Ngie wulenda kunsadisa kafiatila mu Yave, mu kuntangunanga makani mandi mu nsambu. Franciszek wunkalanga ku Polónia wutuba: “Nlongisi’ama khumbu ziwombo waba tangunanga makani mami mu thangu kaba vanganga minsambu. Ayi mu thangu yimona phila Yave kaba tambudilanga minsambu nlongisi’ama kaba vanganga, minu mvami yitona kusambila. Ayi yiluta mona kivisa ti Yave Nzambi wuku tsadisanga, mu thangu yidinda kuidi mfumu’ami wu kisalu muingi kambikila yilandakananga zikhutukunu zi kimvuka ayi zikhutukunu zinneni.”

18. Buidi Yave kammuenanga kisalu minsamuni mioso bamvanganga?

¹⁸ Yave wumvuanga beni nkinza minlonguki mitu mi Kibibila. Nandi mvandi wunzolanga beni kumona kisalu minsamuni bamvanganga muingi kusadisa batu bamfikama ayi Nandi wuba bazolanga beni mu kisalu akiokio bavanganga. (Yesa. 52:7) Boti ngie mu thangu ayiyi wisi ko ni nlonguki wu Kibibila, kheti bobo ngie wulenda buela mioko mu kusadisa minlonguki mi Kibibila badi mu kuvanga mangolo muingi kubotama, mu kubasikanga na zikhomba banlongukanga yawu Kibibila.