Mu dilongi adiodio, tulonguka ti vadi diambu dilutidi nkinza kuidi zimbasi ayi batu. Dedi kuzitisa dizina di Yave, phila—nandi kanyadilanga ayi lukuikumunu lu batu.

Kibila mbi bubu tunluta tsikikila thala matedi dizina di Yave ayi kuvedisa diawu? Ndoku tufiongunina bibila bitatu.

Theti, Satana wuvueza dizina di Yave ku lumbu lu Edeni, kibila kiuvu Satana kavana Eva, kimmonisa ti Yave kasi ko Nzambi nkua kukaba ayi wunkuiminanga biuma bimboti kuidi bisadi biandi. Mu phila ayoyo Satana wubalula mambu Yave katuba, mu kuntedila nkua luvunu. Bo katuba luvunu matedi dizina di Yave, nandi wuyiza ba “nkadi’ampemba,” mansundula “nkua luvunu.” (Yoa. 8:44) Bo Eva kakikinina luvunu lu Satana, nandi wubayisa Nzambi ayi wubayisa lutumu luandi. (Ngene. 3:1-6) Na ti bubu, Satana wuntiamunanga luvunu matedi dizina di Nzambi. Baboso bankikininanga mu luvunu luandi, bawu banluta bayisanga Yave. Kuidi dikabu di Nzambi, luvunu matedi dizina dinlongu di Yave, diawu diambu ditsuka kala dedikisa. Ayi kiawu kibila tummuenanga beni ziphasi.

Dimuadi, mu kibila ki luzolo Yave kadi mu bivangu bioso, nandi widi wukubama muingi kuvedisa dizina diandi. Mawu madi beni nkinza kuidi Yave. Diawu katubila: “Yidi wukubama muingi kuvedisa dizina diama.” (Yehe. 36:23) Yesu wusudikisa ti mambu amomo, mawu malutidi nkinza tufueti tubanga mu minsambu mitu. Nandi wutuba: “Dizina diaku difueti ba dinlongo.” (Matai 6:9) Kibibila kintubilanga beni matedi nkinza wu kuzitisa dizina di Yave. Ndoku tutala mua bifuani mu mawu: “Vana kuidi Yave nzitusu mu kibila ki dizina diandi.” (1 Lusa. 16:29; Minku. 96:8) ‘Yimbidilanu Yave minkunga mu kibila ki dizina diandi di nzitusu.’ (Minku. 66:2) “Yala zitisa dizina diaku mvu ka mvu.” (Minku. 86:12) Khumbu yimueka Yave kayoluka tona ku diyilu yiba ku tempolo ku Yelusalemi bo Yesu katuba: “Tata zitisa dizina diaku.” Yave wumvutudila: “Minu yimana dizitisa ayi yala bue dizitisa.”—Yoa. 12:28. a

Dintatu, lukanu Yave kakanikisa luidi nkuizani na dizina diandi. Tala mambu amama: Bo luyalu lu kivevi di mimvu luala mana ayi bo tuala viokila mu thotolo yitsuka, mambu mbi mala monika? Mu thangu ayoyo, batu balasa bue thotu ko mu kibila ki lukuikumunu luawu. Kibila bala ba bavedila, balasa bue viokila ko mu zithotolo—ayi bala baka luzingu lu mvu ka mvu. Tuala tatamana kukakidila nsua Yave kadi wu kuyala? Ndamba. Mvandi, valasa bue tombulu ko  kumonisa bivisa ti phila Yave kanyadilanga, yawu yilutidi. Mu thangu ayoyo, baboso ku diyilu ayi va ntoto bala ba mu kithuadi ayi bala kikinina luyalu lu Yave. Buabu mbi tulenda tuba matedi dizina di Yave?

Dizina di Yave diala zitusu mu ziphila zioso ayi dialasa bue vuezu ko. Diawu, dizina di Yave diala tatamana kuba diambu dilutidi nkinza kuidi bisadi biandi bioso ku diyilu ayi va ntoto. Kibila mbi? Kibila Yave wala vanga mambu mawombu mu kibila kiawu. Tala mambu amama: Yesu mu kukikulula, wala vutula luyalu kuidi Yave Nzambi ayi “Nzambi wala ba biuma bioso kuidi batu baso.” (1 Koli. 15:28) Bosi batu boso va ntoto bala mona mayangi mu kiphuanza “ki nkembu wu bana ba Nzambi.” (Loma 8:21) Ayi Yave wala dukisa lukanu luandi, lu kukutikisa batu boso ku diyilu ayi va ntoto muingi baba dikanda di kithuadi.—Efe. 1:10.

Bo mambu moso amomo mala monika, buidi dikabu di Yave ku diyilu ayi va ntoto bala bela? Tuala tatamana kuba phuila—yi kuzitisa dizina di Yave. Mu thuadusulu phevi yinlongo, ntinu Davidi wusonika: “Bika Yave Nzambi kakembusu . . . Bika dizina diandi dinlongo dizitusu mvu ka mvu.” (Minku. 72:18, 19) Mu zithangu zioso, tuala tatamana kuba bibila muingi kukembisa Yave mu mayangi.

Kibila dizina di Yave dimmonisa kimutu kiandi. Bulutidi, dizina diandi di tutebula moyo luzolo luandi. (1 Yoa. 4:8) Tuala tatamana kutebuka moyo ti Yave wu tuvangila mu luzolo, wu tuvana khudulu mu luzolo ayi wu tumonisa mu luzolo ti phil’andi yi kuyadila mu busonga yilutidi. Tuala tatamana kumona buidi Yave kantuadisilanga bivangu biandi mu luzolo. Mu thangu zioso, tuala baka bibila bi kumfikimina dedi Tata ayi kuyola minkunga minzitisa dizina diandi dinlongo.—Minku. 73:28.