Bo tuaba samunanga beni, tsatu yi bilongulu yiyiza buelama. Zikhomba ku Beteli yi Brooklyn baba basisanga bilongulu. Vayi batatamana kufuta zi empreza muingi kuba sadisa kubasisa zibuku zinkaka. Bo bilongulu biabasa fika basikanga ko mu mua zingonda, diawu yaya Rutherford kayuvudila yaya Robert Martin khomba wutambula kiyeku ki kutadila bilongulu, muingi kuzaba boti tulenda basisanga befu veka zibuku zioso.

Yaya Robert Martin wumona ti “diba diyindu bimboti” kibila mawu mabe sundula ti befu tulenda nunga kuvanga mamoso mantombulu muingi kubasisa bilongulu. Ayi zikhomba baluga kibuangu ku Concord Street ku Brooklyn ayi basumba biuma bioso biaba tombulu.

Vayi bakana ko baboso bazola diyindu adiodio. Mfumu kisalu ko tuaba basisilanga bilongulu, wuyiza tutala ayi wutukamba: “Benu mueka makina yilutidi yi kubasisilanga zibuku, vayi ni mutu mu benu kasa zaba ko phila yi kusadila yawu. Bo vankuiza vioka to zingonda zisambanu, biabioso binkuiza ba tsodo.”

Yaya Martin wutuba: “Ḿba nandi wununga, vayi nandi kasa tsikika ko mayindu mu mambu amomo ayi nandi wutatamana kuba yitu.” Yaya Martin wunnunga. Vayi mua thangu to yivioka, tuaba nunganga kubasisa 2.000 di zibuku mu kadika kilumbu.

Kubika kuandi to kubasisanga bilongulu, tutona kusadilanga mvandi radio muingi kusamuna. Mu kilumbu 26, Ngonda Yimmuadi, mvu 1922, yawu khumbu yitheti yaya Rutherford kavangila dilongi mu radio. Dilongi beni diba ntu diambu: “Bivevi na Bivevi bi Batu Banzinga Bubu Balasa Bue Fua ko” Nandi wuvangila  diawu ku kibuangu ki radio ki KOG Los Angeles, California, Estados Unidos América.

Nduka 25.000 di batu balandakana dilongi beni. Ayi bawombo mu bawu bafila minkanda muingi kuvutudila matondo yaya Rutherford. Ayi mu minkanda beni muba mvandi nkanda wu yaya Willard Ashford, waba kalanga ku Santa Ana, California. Nandi wutuba ti dilongi beni diba “dimboti ayi dikhindusulu.” Nandi wubue tuba: “Ku nzo’itu kuba batu batatu baba bela, diawu kheti dilongi beni divangimina va ndeku nzo’itu khanu tusa nunga ko kulandakana diawu. Vayi bo divangimina mu radio, befu tununga kulandakana diawu.”

Malongi mankaka mavangimina mu zisabala zilanda. Kibanga kimueka ki Nsungi ki mvu awowo kituba ti “nduka 300.000 di batu balonguka matedi tsangu yi Kintinu mu [radio].”

Batu baba kikinina zitsangu zi Kintinu mu phila yimboti, diawu minlonguki mi Kibibila batungila kibuangu ki radio va ndenku Beteli yi Brooklyn. Batedila kibuangu akiokio ki radio WBBR ayi kuntuala bayiza kisadila beni muingi kusamuna zitsangu zi Kintinu.

Kibanga ki Nsungi ki kilumbu 15, Ngonda Yinsambanu, mvu 1922, kizabikisa lukutukunu lu mavula lutonina mu kilumbu 5 nati 13 ki Ngonda Yivua, mvu 1922 luvangimina ku Cedar Point, Ohio. Zikhomba baba beni mayangi bo batuka va kibuangu beni.

Mu dilongi ditheti yaya Rutherford kavanga, nandi wukamba baboso babe landakana: “Yidi lufiatu ti Yave wunkuiza sakumuna lukutukunu alulu . . .  Ayi luawu lunkuiza vana kimbangi mu nza yimvimba dedi bo kabuvangiminiabu ko.” Zikhomba zioso bavanga malongi, bakindisa zikhomba bakivana mu kisalu ki kusamuna.

Mu kintanu, kilumbu 8, ki Ngonda Yivua, 8.000 di batu balandakana dilongi di yaya Rutherford mu mayangi. Bawu baba phuila muingi nandi kasudikisa bikuma “ADV,” biba mu nkanda wu thumusunu. Ayi bo babe kala  mu bibuangu biawu, ḿba bawombo bamona nkanda wufutama wuba kuyilu kikuma. Yaya Arthur Claus, wufumina ku Tulsa, Oklahoma, U.S.A., wutomba kibuangu kimboti muingi kayuwa buboti dilongi. Kibila mu thangu beni, kusa ba ko bisengu bifuana muingi kutiamuna mbembu.

Muingi kubika vunzikisa bankaka, wuntuadisi wu lukutukunu wutuba ti ni mutu kalendi bue kota ko bo yaya Rutherford kankuiza tona kuvanga dilongi. Bo vayiza ba 9h:30 min, yaya Rutherford wutona kutubila matedi mambu Yesu katuba mu Matai 4:17: “Kintinu ki Nzambi Kima Fikama.” (Versão Rei James) Bo katona kusudikisa buidi batu bela zabila Kintinu akiokio, nandi wutuba ti: “Yesu wala kutikisa dikabu muingi kusola bakuikama”

Yaya Claus wutuba: befu tuteka matu “Muingi kukuwa mambu moso kabe tuba.” Vayi nandi wubasika kunganda kibila kabasa bue mona ko buboti nhitu, kheti wuzaba ti kasinkuiza bue vutuka ko mu lukutukunu beni.

Vayi bo vavioka to mua thangu, nandi waba mona buboti, wuvutuka mu lukutukunu ayi batu batona kubunda makanda. Nandi wuyiza ba beni mayangi diawu kabakila makani boti kuba kumaka kuyilu muanzu muingi kanunga kukuwa buboti dilongi beni dimboti. Ayi yaya Claus wuba to 23 ma mimvu, wununga kumaka va yilu kibanga. Ayi bo zinela ziba zimuayi nandi wununga kulandakana buboti dilongi.

Yaya Arthur wuba kuyilu muaza na bakundi bandi. Yaya Frank Johnson, wumfika ayi wunyuvula: “Ngie widi mua mbedi?”

Yaya Arthur wunkamba: “Ngete, yidi.”

Yaya Frank wumvutudila: “Ngie widi mvutu wu minsambu mitu.” Yaya Frank wunkamba: “Wummona nkanda awuwu wuzingama?  Wawu wukangama mu zitsesi azizi. * Teka matu bo wumfundisi kankuiza tuba ‘Yamikisanu, Yamikisanu, bosi ngiewu,’ kieda minsinga amimi.”

Diawu yaya Arthur, waba vingila kidimbu ki kukieda. Bo dilongi di yaya Rutherford diba nduka kumana, nandi wutenduka mu mayangi: “Monisanu lukuikumunu mu kuba zimbangi zikiedika zi Mfumu, tatamananu kunuana nati malongi moso ma Babiloni mala mana. Samunanu muma moso, kibila nza yoso yifueti zaba ti Yave, nandi Nzambi. Ayi Yesu Klisto, nandi Ntinu wu mintinu ayi Mfumu yi zimfumu. Akiki, kiawu kilumbu kilutidi mu biabioso. Talanu, Ntinu widi mu kuyala. Ayi benu muidi Zimbangi ziandi, diawu Yamikisanu, Yamikisanu, Yamikisanu Kintinu ayi Ntinu’andi.”

Yaya Arthur wutuba ti nandi ayi zikhomba zinkaka, bakieda minsinga ayi nkanda beni wuzingubuka. Bisona bi kingelesu “ADV” (Advertise) binsundula: Yamikisa. Ayi mu nkanda beni basonika: “Yamikisanu Ntinu ayi Kintinu Kiandi.”

Lukutukunu lu mavula luvangimina ku Cedar Point, lusadisa zikhomba kutsikika thalu mu kisalu kilutidi mfunu —kusamuna zitsangu zi Kintinu. Ayi bawombo baba bakubama muingi kukivana. Ntuami ntuala wumueka ku Oklahoma, U.S.A., wutuba: “Tusamuna ku kizunga kimueka kiba batu bawombo bakhambulu beni mbakulu ayi baba zingilanga to mu kuvanga makala.” Nandi wubue tuba ti: Khumbu ziwombo bo batu beni babe kuwanga zitsangu ziba mu Despertai! “bawu babe dilanga.” Alolo luba luaku lunneni muingi kuba mbomba.

Minlonguki mi Kibibila, bamona nkinza wu mambu Yesu katuba mu Luka 10:2: ‘Mimbutu miyela mike miwombo vayi bisadi bidi biluelu.’ Kutsuka mvu 1922 bawu baluta ba bakubama muingi kusamuna zitsangu zi Kintinu mu nza yimvimba.