DILONGI 44
Tatamana Kukindisa Kivuvu Kiaku
‘Ba Kivuvu mu Yave.”—MINKU. 27:14.
NKUNGA 144 Tadidila mu Mfutu!
MAMBU TUANLONGUKA *
1. Kivuvu mbi Yave ka tuvana?
YAVE wutuvana kivuvu kimboti ki kuzinga mvu ka mvu. Bankaka badi kivuvu ki kuezinga ku diyilu mu khambu bue fua. (1 Koli. 15:50, 53) Vayi nduka batu boso, badi kivuvu ki kuzinga mvu ka mvu ku paladizu va ntoto, mu mayangi ayi na buvinha bumboti. (Nzai. 21:3, 4) Kheti kivuvu kitu kidi ki kuzinga ku diyilu voti va ntoto, befu tumvuanga beni nkinza kiawu.
2. Buidi bunkuizilanga kivuvu kitu?
2 Mu Kibibila, kikuma ‘kivuvu’ kilenda sundula, ‘kutedimina mu lufiatu ti mambu mamboti mala monika.’ Kivuvu tuidi mu bilumbu binkuiza, kidi ki lufiatu, kibila Yave nandi wu tuvana kiawu. (Loma 15:13) Tuzebi mambu mbi nandi kakanikisa ayi tuzebi ti nandi wundukisanga zikhanu ziandi zioso. (Zinta. 23:19) Befu tuidi lufiatu ti Yave widi phuila ayi mangolo ma kuvanga mamoso nandi kakanikisa. Kivuvu kitu kiyizilanga ko mu mayindu mitu voti mu mambu befu tuntomba, vayi kiawu kinkuizilanga mu bivisa bikiedika.
3. Mbi tuenlonguka mu dilongi adidi? (Minkunga 27:14)
3 Tat’itu wu diyilu wu tuzolanga beni ayi nandi kantomba befu tumfiatila. (Tanga Minkunga 27:14.) Boti kivuvu kitu kidi kikinda, buna befu tulenda kindama mu mambu moso maphasi ayi tuala nunga mambu mankuiza kuntuala mu mayangi ayi kibakala. Tuemmona buidi kivuvu kilenda kutu kiebila. Diawu, tuemmona theti buidi kivuvu kilenda bela buka kisengu kinsikiminsanga dikumbi ayi phu yi kisengu. Bosi tunkuiza mona buidi tulenda kindisila kivuvu kitu.
KIVUVU KITU KIDI BUKA KISENGU KINSIKIMISANGA DIKUMBI
4. Buidi kivuvu kididi buka kisengu kinsikiminsanga dikumbi? (Ebeleo 6:19)
4 Mu nkanda kafila kuidi basi Ebeleo, mvuala Polo wudedikisa kivuvu kitu buka kisengu kinsikiminsanga dikumbi. (Tanga Ebeleo 6:19.) Nandi waba vanganga ziviage ziwombo mu ḿbu. Diawu Polo kavisila nkinza wu kisengu kinsikiminsanga dikumbi. Ayi khumbu yimueka, bawu bamonikina kivuka kingolo kunneni ḿbu. Ayi nandi wummona mu thangu batula mu nlangu kisengu kinsikiminsanga dikumbi, muingi diawu dibika kuebunda va mamanha. (Mava. 27:29, 39-41) Dedi kisengu kinsikimikanga dikumbi, kivuvu kitu kitusadisanga kufikama Yave ayi kubika lebakana mu thangu tumviokila mu mambu malenda ba buka kivuka. Kiawu mvandi kitusadisanga kukindama mu zithotolo, kibila befu tuzebi ti mambu mamboti mankuiza kuntuala. Tebuka moyo ti Yesu wu tulubula ti befu tuala viokila mu zikhuamusu. (Yoa. 15:20) Kuyindula mu zikhanu zi Yave, kutusadisanga kutatamana kunsadila.
5. Buidi kivuvu kisadisila Yesu?
5 Kivuvu kisadisa Yesu kuba wuvumbama, kheti nandi wuzaba ti wambelama kufua lufua luphasi. Mu Pentekoti yi mvu 33 T.K, mvuala Petelo wutubila mbikudulu yidi mu minkunga, yaba bikula buidi Yesu kankuiza bela wuvumbama ava kafua. Mbikudulu beni yintuba: ‘Yinzingilanga mu nsika, kibila ngie wulendi kumbika ko ku dibumbi ayi wulendi tala ko mutu’aku wukuikama kabola. . . . Yala baka mayangi mawombo vantual’aku.’ (Mava. 2:25-28; Minku. 16:8-11) Kheti Yesu wuzaba ti wambelama kufua, kivuvu kinsadisa kuba lufiatu ti Nzambi, wala kumvulubusa ayi nandi wala mona mayangi mu kubue ba va kimueka na Tat’andi ku diyilu.—Ebe. 12:2, 3.
6. Mambu mbi ya Leonard katuba matedi kivuvu?
6 Kivuvu tuidi, kimana sadisa zikhomba ziwombo kukindama. Tala kifuani ki yaya Leonard Chinn, wunkalanga ku Inglaterra. Mu Mvita Wutheti Wulutidi mu Nza Yimvimba, bantula mu buloko kibila nandi wumanga kukota mu kisodi. Theti bantula mu buloko kaba naveka mu zingonda ziwadi ayi bankuika kuvanga bisalu bingolo. Kuntuala nandi wutuba: ‘Mambu minu yiviokila, matsadisa kumona ti kivuvu ki tusadisanga kukindama. Tuidi kifuani ki Yesu, ki bapostolo, ki mimbikudi ayi zikhanu zi Yave zidi mu Kibibila. Mambu moso amomo, ma tuvananga kivuvu mu bilumbu binkuiza ayi ma tuvananga mangolo muingi tukindama.’ Kivuvu kisadisa beni ya Leonard, ayi kiawu mvandi kilenda kusadisa.
7. Buidi mambu maphasi mankindisilanga kivuvu kitu? (Loma 5:3-5; Yakobi 1:12)
7 Bo tunkindamanga mu mambu maphasi ayi tummonanga koko ku Yave, tumbanga lufiatu ti tuidi lunungu luandi. (Tanga Loma 5:3-5; Yakobi 1:12.) Mu phila ayoyo, kivuvu kitu kinluta banga kikinda kena mu thangu tuzaba kiedika. Satana kantomba muingi ziphasi zi tubiefikisa, vayi mu lusalusu lu Yave, befu tulenda kindama.
KIVUVU KIDI BUKA PHU YI KISENGU
8. Mu phila mbi kivuvu kidi buka phu yi kisengu? (1 Tesalonika 5:8)
8 Kibibila kindedikisa mvandi kivuvu buka phu yi kisengu. (Tanga 1 Tesalonika 5:8.) Masodi bamvuatanga phu yi kisengu muingi babika vangana phasi mu ntu, bo badi mu mvita. Bobuawu mvandi, mu mvita wu kiphevi tuidi mu kunuana, befu tufueti ba keba keba muingi Satana kabika kubalula mayindu mitu. Nandi wutu thotanga ayi wumvanganga mamoso kannunga muingi kabalula phil’itu yi kuyindudila. Vayi dedi bo phu yi kisengu yinkiebilanga ntu wu disodi, kivuvu kitu kinkiebanga mayindu mitu muingi tutatamana bakuikama kuidi Yave.
9. Mambu mbi mammonikanga boti mutu kasiko kivuvu?
9 Kivuvu kitu ki kuzinga mvu ka mvu, ki tusadisanga kubaka makani mu nduenga. Vayi befu kubika kivuvu kitu kidekuka ayi kuyindulanga to mu zitsatu zitu, befu tulenda zimbisa kivuvu kitu. Dedi, tala kifuani ki Baklisto bankaka baba zingilanga ku Kolinto mu sekulu yitheti. Bawu bazimbisa kivuvu kiawu mu lukanu lumueka lunkinza lu Nzambi—kivuvu ki luvulubukusu. (1 Koli. 15:12) Mvuala Polo wusonika ti batu bakhambulu kivuvu mu zikhanu zi Nzambi, banzingilanga to muingi kudukisa zitsatu ziawu. (1 Koli. 15:32) Bubu, batu bakhambulu kivuvu mu zikhanu zi Nzambi, bamvanganga mamoso balenda nunga muingi babakila mayangi mu phil’awu. Vayi befu tumfiatilanga mu zikhanu zi Nzambi matedi bilumbu binkuiza. Kivuvu kitu kidi buka phu yi kisengu, mu kukieba mayindu mitu ayi ki tusadisanga kubika natina luzingu luitu mu phila yikhambulu yifuana kibila mawu malenda tulula kikundi kitu na Yave.—1 Koli. 15:33, 34.
10. Buidi kivuvu kinkiebilanga mayindu mitu?
10 Kivuvu kilenda ku tusadisa kubika yindula ti kheti mu mangolo moso tumvanga, tulendi kuangidika ko Yave. Dedi, bankaka balenda yindula: ‘Minu yisiko mutu wufuana muingi kutambula luaku lu kuzinga mvu ka mvu. Yilendi nunga ko kuzingila mu zithumu zisonga zi Nzambi.’ Tebuka moyo ti mambu ma phila ayoyo, mawu Elifasi kakamba Yobi. Nandi wutuba: ‘buidi mutu wu kinsuni kalenda bela wuvedila?’ Mvandi wutuba matedi Nzambi: ‘Tala! Nandi kafiatilanga ko zimbasi ziandi. Ayi mu mbuenu’andi, diyilu disiko divedila.’ (Yobi 15:14, 15) Mambu amomo, ma luvunu. Tebuka moyo ti Satana nandi wuntomba muingi ngie wuyindudilanga abobo. Nandi zebi ti ngie kutatamana kuyindulanga mu mambu amomo, kivuvu kiaku kiala mana. Diawu, botula mayindu amomo mu ntu ayi tsikika thalu’aku mu zikhanu zi Yave. Ba lufiatu ti Yave kantomba muingi ngie wuzinga mvu ka mvu ayi nandi wala kusadisa kudukisa makani.—1 Timo. 2:3, 4.
TATAMANA KUKINDISA KIVUVU KIAKU
11. Kibila mbi tufueti bela mvibudulu bo tuntedimina Nzambi kudukisa zikhanu?
11 Khumbu zinkaka dilenda ba diambu diphasi kutatamana kuba kivuvu kikinda, kibila tulenda tona kuyindula ti Nzambi widi mu kukala beni nkulu muingi kudukisa zikhanu ziandi. Vayi tufueti tebuka moyo ti Yave wunzinganga mvu ka mvu. Ayi phila nandi kantadilanga thangu, yidi disuasana na phil’itu. (2 Pete. 3:8, 9) Yave wala vanga mamoso muingi lukanu luandi lusalama. Vayi ḿba kalasa vangila ko mawu mu thangu befu tunyindudilanga. Buabu, mbi bilenda tusadisa kuvibidila bo tuntedimina Nzambi kadukisa zikhanu ziandi?—Yako. 5:7, 8.
12. Dedi bummonisina Ebeleo 11:1, 6, mbi bilenda monika, befu kukindisa kiminu kitu?
12 Befu tuala tatamana kukindisa kivuvu kitu, befu kutatamana bafikama kuidi Yave. Kibila Yave nandi wala dukisa mamoso befu tuntediminanga. Diawu Kibibila kindedikisila kivuvu na kuba kiminu ti Yave widi ayi wunsakumunanga ‘batu boso ba kuntombanga mu bukiedika.’ (Tanga Ebeleo 11:1, 6.) Kadika thangu tunkindisanga kiminu kitu, kivuvu kitu kinkindamanga, kibila tunluta banga lufiatu ti Yave wala dukisa zikhanu ziandi zioso. Buabu, tuammona ziphila tulenda kindisila kikundi kitu na Yave, muingi kutatamana kukindisa kivuvu kitu.
Kusambila ayi kuyindula mambu tuntanga kulenda sadisa kivuvu kitu kitatamana kikinda (Tala matangu 13-15) *
13. Buidi tulenda kolukila na Nzambi ayi kunkuwila?
13 Sambila kuidi Yave ayi tanganga Diambu Diandi. Befu tulenda fikama Yave kheti tulendi kummona ko. Tulenda kolukila yandi mu nsambu, mu lufiatu ti nandi wunkuiza tuyuwila. (Yele. 29:11, 12) Tulenda kuwila Nzambi mu kutanga Kibibila ayi kuyindula mu mambu tuntanga. Bo tuntanga matedi phila Yave kakiebila bisadi biandi mu thangu yikhulu, kivuvu kitu kinluta kindamanga. Mamoso madi masonama mu Diambu di Nzambi ‘masonimina muingi kutulonga ayi mu nzila kukindama kuitu ayi mu mbombolo tuntambulanga mu masonoko tubaka kivuvu.’—Loma 15:4.
14. Kibila mbi tufueti yindudilanga mu mambu Yave kamana vangila batu bankaka?
14 Yindulanga mu phila Yave kamana dukisila zikhanu ziandi. Yindula mu mambu Nzambi kakanikisa kuidi Abalahami ayi Sala. Bawu bavioka phunga yi kubutila bana. Vayi kheti bobo, Nzambi wuba kanikisa ti bankuiza buta muana. (Ngene. 18:10) Buidi Abalahami katadila tsangu ayoyo? Kibibila kintuba: ‘Nandi wuba kiminu ti nandi wunkuiza ba tata yi mimvila miwombo.’ (Loma 4:18) Kheti Abalahami kasa zaba ko buidi Nzambi kankuiza dukisila lukanu alolo, vayi nandi wuba lufiatu ti Nzambi wunkuiza vanga mawu. Abalahami kasa vonga ko. (Loma 4:19-21) Kuyindula mu mambu Yave kamana vangila batu bankaka, kutubuelanga lufiatu ti Yave wala dukisanga zikhanu ziandi thangu zioso, kheti malenda ba mambu maphasi va mesu ma batu.
15. Kibibla mbi tufueti yindudilanga mu mambu Nzambi kamana tuvangila?
15 Yindulanga mu mambu Yave kamana kuvangila. Yindula mu ndandu ngie wumbakanga, bo Nzambi kandukisanga zikhanu ziandi mu luzingu luaku. Dedi, Yesu wukanikisa ti Tat’andi wala dukisanga zitsatu zitu zi kadika kilumbu. (Matai 6:32, 33) Yesu mvandi wukanikisa ti Yave wala vana phevi yinlongo kuidi baboso bandinda yawu. (Luka 11:13) Mvandi, Yave wukanikisa kulemvukila masumu maku, kubomba ayi kudikila mu kiphevi. Ayi nandi wundukisanga zikhanu aziozio. (Matai 6:14; 24:45; 2 Koli. 1:3) Zikhanu mbi zinkaka Yave kamana dukisa mu luzingu luaku? Ngie kuyindulanga mu mambu Nzambi kamana kuvangila, mawu makuiza kubuela kivuvu ti Nzambi wala dukisanga zikhanu ziandi zinkaka mu bilumbu binkuiza.
YANGALALA MU KIVUVU
16. Kibila mbi kivuvu kidi nkhailu wu luvalu?
16 Kivuvu kitu ki kuzingila mvu ka mvu, widi nkhailu wu Nzambi. Befu tuidi phuila yi kumona thangu mambu amomo mala salimina ayi tuidi lufiatu ti mawu mala salama. Kiawu kidi buka kisengu kinsikimisanga dikumbi, kibila ki tusadisanga kuba basikama muingi tukindama mu mambu tumviokila ayi kutatamana bakuikama bo tumviokila mu zikhuamusu, kheti bantomba kutu vonda. Kivuvu kitu kidi mvandi buka phu yi kisengu kibila kinkiebanga mayindu mitu muingi tumanga mambu mambi ayi kuvanga mamboti. Kivuvu kitu ki tusadisanga kufikama Nzambi ayi kimmonisanga luzolo luwombo nandi kadi mu befu. Bukiedika, befu tumbakanga ndandu yiwombo mu kutatamana kukindisa kivuvu kitu.
17. Kibila mbi tulenda kuangalala mu kivuvu kitu?
17 Mu nkanda kasonikina kuidi basi Loma, mvuala Polo wutukindisa: ‘Yangalalanu mu kivuvu.’ (Loma 12:12) Mvuala Polo wuba mu mayangi kibila nandi wuzaba ti na kutatamana wukuikama, wala tambula luzingu lu mvu ka mvu ku diyilu. Befu mvitu tulenda kuangalala mu kivuvu, kibila tuzebi ti Yave wala dukisa zikhanu ziandi. Ayi tuala monikina mambu amama nsoniki wu minkunga katuba: ‘Mayangi kuidi mutu . . . wuntulanga kivuvu kiandi mu Yave Nzambi’andi, . . . kuidi mutu wutatamananga wukuikama.’—Minku. 146:5, 6.
NKUNGA 139 Wu Kiyindula mu Nza Yimona
^ Yave wu tuvana kivuvu kimboti mu bilumbu binkuiza. Kivuvu beni ki tukindisanga ayi ki tusadisanga kukindama mu mambu maphasi tuidi mu kuviokila bubu. Kiawu ki tuvananga mangolo muingi tukindama mu moso kuandi mambu tulenda viokila. Ayi mvandi kilenda tukieba mu mambu malenda balula phil’itu yi kuyindudila. Dedi bo tuammuena mu dilongi adidi, abiobio biawu bibila bilenda kutu nata kukindisa kivuvu kitu.
^ MAMBU MADI MU FIKULA: Phu yi kisengu yinkiebanga ntu wu disodi. Ayi batu bandiatisanga makumbi bansadilanga kisengu muingi kusikimisa diawu. Bobuawu mvandi, kivuvu kinkiebanga mayindu mitu ayi kitusikimisanga bo tumviokila mu ziphasi. Khomba yinkieto wumsambila kuidi Yave mu lufiatu. Komba yi dibakala wunyindula phila Yave kadukisila zikhanu ziandi kuidi Abalahami. Khomba yinkaka wunyindula buidi Yave kamana kunsakumunina.
