DILONGI 16
Yangalala mu Kusadila Yave mu Ntim’aku Woso
“Bika kadika mutu kafiongunina mavanga mandi.”—NGALA. 6:4.
NKUNGA 37 Sadila Yave mu Ntim’aku Woso
MAMBU TUANLONGUKA *
1. Mbi bi tuvananga mayangi?
YAVE wuntomba tubaka mayangi, kibila mawu madi mbutu wu phevi yinlongo. (Ngala. 5:22) Mvandi mayangi malutidi kuidi mutu wumvana kena kuidi mutu wuntambula. Diawu tumbakilanga mayangi bo tukivana mu kisalu ki kusamuna ayi bo tunsadisa zikhomba zitu mu ziphila ziwombo.—Mava. 20:35.
2-3. (a) Dedi bummonisina Ngalatia 6:4, mambu mbi muadi malenda tusadisa kutatamana kuba mu mayangi mu kisalu ki Yave? (b) Mbi tuenlonguka mu dilongi adidi?
2 Dedi bummonisina Ngalatia 6:4, mvuala Polo wutubila mambu muadi malenda ku tusadisa kutatamana kubaka mayangi. (Tanga.) Ditheti, makani mitu mafueti ba ma kuvanga mamoso tulenda nunga mu kisalu ki Yave. Boti tuidi mu kuvanga mawu buna tufueti ba mu mayangi. (Matai 22:36-38) Dimuadi, tufueti bika kifu ki kuyidedikisanga na bankaka. Kheti tuisi ko buvinya bumboti voti tuisi ko beni bapisuka mu kuvanga mambu mankaka, tufueti tondanga Yave mu mamoso tunnunga kuvanga kibila nandi wu tusadisanga. Mvandi, boti tuidi bapisuka mu kisalu ki kusamuna, tufueti sadila nkhailu awowo muingi kuzitisa Yave kubika kuandi kuyinyemisa. Diawu bika kuyidedikisanga na bankaka vayi wufueti longuka mu bifuani biawu.
3 Mu dilongi adidi, tuemmona mbi bilenda ku tusadia kukindama kheti tusiala bue nunga ko kuvanga mo tuaba vanganga mu kisalu ki Yave. Mvandi tunkuiza mona buidi tulenda sadila buboti dikaba voti mambu tuzebi kuvanga Yave ka tuvana ayi mbi tulenda longuka mu bifuani bi bankaka.
BOTI TUSIALA BUE NUNGA KO KUVANGA MAMBU TUABA VANGANGA
Kuvanga mamoso tulenda nunga kheti bo tumviokila mu ziphasi mankuangidikanga Yave (Tala matangu 4-6) *
4. Mambu mbi malenda ku tubika mu kiunda? Vana kifuani.
4 Bawombo mu befu, tumbanga mu kiunda kibila tusiala bue nunga ko kuvanga mamoso tuaba vanganga mu kisalu ki Yave. Ḿba mu kibila ki bununu voti buvinya. Mawu mamonikina yaya Carol. Nandi wuba luaku lu kue sadila kuma kulutidi tsatu. Ayi waba tuadisanga ndongukulu yi Kibibila kuidi 35 di batu. Bawombo mu bawu bakivana kuidi Yave ayi babotama. Yaya Carol waba bakanga beni ndandu mu kisalu ki kusamuna, vayi buviokila thangu wuyiza bakana kimbevu kimvanga kuviokisa thangu yiwombo ku tsi nzo. Nandi wutuba: “Mu kibila ki buvinya buama, yinunganga ko kuvanga mambu bankaka bamvanganga. Diawu yikimuenanga ti yisi ko luvalu. Awowo widi nzingu wunneni yinnuananga ayi didi diambu diphasi kununga wawu.” Yaya Carol wumvanganga mamoso kannunga mu kisalu ki Yave. Tulenda ba lufiatu ti Nzamb’itu yi nkua kiadi wumvuanga nkinza batu badi mayindu amomo.
5. (a) Mbi tufueti tebukanga moyo boti tumbanga mu kiunda kibila tusiala bue nunga ko kuvanga mo tuaba vanganga? (b) Dedi bummonisina foto, buidi khomba kantatiminina kuvanga mo kalenda nunga mu kisalu ki Yave?
5 Boti khumbu zinkaka wumbanga mu kiunda kibila wusiala bue vanga ko mambu waba vanganga, buna wulenda kuyikuvusa: ‘Mbi Yave kantomba yivanga? Nandi wuntomba—wuvanga mamoso wulenda nunga. Tala kifuani akiki: Khomba mueka weka 80 di mimvu wumbanga mu kiunda kibila kasiala bue vanga ko mambu kaba vanganga bo kaba 40 di mimvu. Nandi wunyindulanga ti kheti wumvanga mamoso kannunga, mawu mayangidikanga ko Yave. Vayi bukiedika ti mawu kuandi? Yindula diaka. Boti khomba ayoyo wuvanga mamoso kanunga bo kaba 40 di mimvu ayi wukidi vanga mawu bo keka 80 di mimvu, buna nandi wukidi vanga malutidi. Befu kutona kuyindula ti kisalu kitu kiyangidikanga ko Yave, buna tufueti tebuka moyo ti Yave, nandi wuntsikikanga mambu ma kunkuangidika. Befu kuvanga mamoso tulenda nunga, nandi wunkuiza yangalala ayi wunkuiza tuba: “Kisadi kikuikama!”—Dedikisa mawu na Matai 25:20-23.
6. Mbi tulenda longuka mu kifuani ki yaya Maria?
6 Tunkuiza luta baka mayangi befu kutsikika mayindu mu mambu tulenda nunga kuvanga, kubika kuandi mo tukhambu nunga. Tala kifuani ki yaya Maria widi kimbevu ki kuntulanga nkaku muingi kuluta kukivana mu kisalu ki kusamuna. Va thonono, nandi waba kimuenanga ti kasi ko luvalu ayi waba banga mu kiunda kingolo. Vayi buviokila thangu nandi wuyiza zaba ti khomba mueka mu kimvuka waba bela ayi wuba ku nzo mbuku. Yaya Maria wubaka makani ma kunsadisa. Nandi wutuba: “Yitsikika thuadusulu muingi kusamunanga yandi mu telefoni ayi kusonikanga minkanda. Kadika khumbu tuaba samunanga va kimueka, minu yaba vutukanga ku nzo mu mayangi kibila yibe nunga kusadisa khomb’ami.” Befu mvitu, tulenda buela mayangi mitu mu kutsikika mayindu mu mambu tulenda nunga kuvanga kubika kuandi mo tukhambu nunga. Vayi bo ti tulenda nunga kubuela kukivana, mbi tufueti vanga?
“SADILA”—DIKABA WIDI!
7. Dilongi mbi mvuala Petelo kavana kuidi zikhomba?
7 Mu nkada wutheti wu Petelo, nandi wukindisa zikhomba basadila dioso dikaba batambula muingi kukindisa zikhomba. Mvuala Petelo wutuba: “Bika kadika mutu wutambula dikaba di kiphevi, kasadila diawu muingi kusadisa bankaka dedi nkebi wumboti wu nlemvu wu Nzambi tukhambu fuana kutambula.” (1 Pete. 4:10) Tulendi bika ko kusadila dikaba tutambula ḿba mu kuyindula ti tunkuiza vanga bankaka kuba mu kiunda voti ku tumona nsoki. Kibila mayindu amomo masinkuiza tusadisa ko kuvanga mamoso tulenda nunga mu kisalu ki Yave.
8. Dedi bummonisina 1 Kolinto 4:6, 7, kibila mbi tufueti bika kukinyemisinanga?
8 Tufueti sadila dioso kua dikaba tuidi mu kisalu ki Yave vayi tufueti ba keba keba muingi tubika kuyinyemisa. (Tanga 1 Kolinto 4:6, 7.) Dedi, ḿba ngie wulenda ba tsuakulu yifika tona ndongukulu yi Kibibila. Wulendi bika ko kusadila dikaba adiodio. Vayi vadi disuasana kusadila diawu ayi kuyinyemisa. Yindula boti ngie wunungidi kutona ndongukulu yi Kibibila ayi widi phuila yi kuzabikisa mawu kuidi zikhomba mu dingumba diaku di kusamunina. Bo wuntomba kuvanga mawu, ngie wummona khomba yinkaka wuntubila ndandu kabeki mu kuvana kilongulu. Nandi bevana kilongulu vayi ngie betona ndongulu yi Kibibila! Mbi wunkuiza vanga? Ngie zebi ti zikhomba mu dingumba bankuiza baka khindusulu ngie kuba zabikisa ndandu bebaka. Vayi wulenda baka makani ma kutubila mawu khumbu yinkaka muingi wubika vanga khomba bevana kilongulu kuba mu kiunda. Vayi mawu masinsundula ko ti wufueti bika—kusadila dikaba widi di kufika tonanga ndongukulu yi Kibibila.
9. Buidi tufueti sadila dikaba Yave ka tuvana?
9 Tufueti tebukanga moyo ti dioso kua diambu tuzebi kuvanga didi dikaba Nzambi ka tuvana. Ayi tufueti sadila diawu muingi kukindisa zikhomba, bakana ko muingi kuyinyemisa. (Fili. 2:3) Bo tunsadila mangolo mitu ayi mambu tuzebi kuvanga muingi kusadila Nzambi, tunkuiza baka bibila muingi kukuangalala—bakana ko muingi kuyidedikisa na zikhomba vayi muingi kutuadisa nzitusu kuidi Yave.
10. Kibila mbi didi diambu dimbi kuyidedikisanga na bankaka?
10 Befu kukhambu ba keba keba, tunkuiza bua mu ntambu wu kuyidedikisanga na bankaka. Dedi, yindula khomba wupisuka mu kuvanga malongi. Adiodio didi dikaba diandi. Vayi ḿba nandi kalenda tona kulenza khomba wumvanga mangolo muingi kupisuka mu kuvanganga malongi. Kheti khomba beni kasi ko wupisuka, vayi nandi kalenda ba zikhadulu zinkaka zimboti dedi: Kuyambanga zikhomba, kukubika bana bandi ayi kifuza mu kisalu ki kusamuna. Tunkuangalalanga kubaka zikhomba bazebi kuvanga mambu maviakana ayi bansadilanga mawu muingi kusadisa bankaka!
LONGUKA MU BIFUANI BI BANKAKA
11. Kibila mbi tufueti landikinina kifuani ki Yesu?
11 Tuzebi ti tufueti bika kuyidedikisanga na bankaka vayi tulenda longuka mawombo mu bifuani bi bisadi binkaka bi Yave. Tala kifuani ki Yesu, kheti nandi wuba wuvedila vayi tulenda longuka mawombo mu zikhadulu ziandi zimboti. (1 Pete. 2:21) Befu kuvanga mangolo ma kulandakana kifuani kiandi, tunkuiza ba bisadi bimboti bi Yave ayi tunkuiza pisuka mu kisalu ki kusamuna.
12-13. Mbi tulenda longuka mu kifuani ki Ntinu Davidi?
12 Mu Kibibila, muidi bifuabi biwombo bi bisadi bikuikama bi Yave. Ayi kheti baba batu bamasumu, tulenda landakana bifuani biawu. (Ebe. 6:12) Yindula kifuani ki Ntinu Davidi, no Yave katedila “mutu wunkuangidikanga ntim’ami” voti, dedi buntubila tsekudulu yinkaka yi Kibibila, “ntindu mutu wunluta kuangidika ntim’ami.” (Mava. 13:22) Davidi kasa ba ko wuvedila, nandi wuvanga zinzimbala ziwombo vayi kheti bobo widi kifuani kimboti kuidi befu. Kibila mbi? Kibila bo bansemba, nandi wuvitika malongi, kasa yikakidila ko ayi wunyonginina mu bukiedika mambu kavanga. Mu kibila akiokio, Yave wunlemvukila.—Minku. 51:3, 4, 10-12.
13 Muingi tubaka ndandu mu kifuani ki Davidi, tulenda kuyikuvusa: ‘Buidi yintadilanga malongi? Yinfika kikininanga zinzimbala ziama voti yintombanga kuyikakidila? Yintombanga kuvana fotu bankaka? Yimvutukilanga zioziawu zinzimbala?’ Mvandi bo wuntanga, ngie wulenda yindula mu bifuani bi bakieto ayi babakala bankaka bakuikama bantubila mu Kibibila. Ayi wulenda kuyikuvusa, bawu baviokila mu zioziawu ziphasi yidi mu kuviokila? Zikhadulu mbi zimboti bamonisa? Mu kadika kinongu wulenda kuyikuvusa: ‘Buidi yilenda landikinina kifuani kiandi?’
14. Buidi tulenda bakila ndandu mu kutala bifuani bi zikhomba zitu?
14 Tulenda baka ndandu mu kutala bifuani bi zikhomba zima nuna ayi zi matoko. Ngie wulenda yindula khomba mu kimvuka kinu widi mu kuviokila mu mambu maphasi—dedi zikhuamukusu mu kikola, va dikanda voti wukhambu buvinya bumboti? Ḿba nandi widi zikhadulu zimboti zio ngie wuntomba kukuna. Bo wuntala kifuani kiandi, ngie wulenda longuka ziphila wulenda kindimina mu zithotolo widi mu kuviokila. Tuntondanga beni—kubaka bifuani bi kiminu tulenda landakana bubu.—Ebe. 13:7; Yako. 1:2, 3.
YANGALALA MU MAMBU WULENDA VANGA MU KISALU KI YAVE
15. Dilongi mbi mvuala Polo kavana, dilenda ku tusadisa kutatamana kubaka mayangi mu kisalu ki Yave?
15 Muingi kutuadisa ndembama ayi kithuadi mu kimvuka ki Yave, kadika mutu kafueti vanga mambu kalenda nunga. Tala kifuani ki Baklisto mu sekulu yitheti. Bawu baba makaba maviakana. (1 Koli. 12:4, 7-11) Vayi mawu masa bavanga ko kuyimona nsoki ayi kumanisa kithuadi. Mvuala Polo wukindisa baklisto bavanga “mamoso balenda nunga muingi kukindisa zikhomba.” Nandi wutuba: “Bo kadika kinama kinsala buboti, mawu mansadisanga nyitu yoso yisala buboti ayi yitungu mu luzolo.” (Efe. 4:1-3, 11, 12, 16) Bo bawu basadila dilongi adiodio, batuadisa ndembama ayi kithuadi.—Mawu mvandi tummonanga mu bimvuka bubu.
16. Makani mbi tufueti baka? (Ebeleo 6:10)
16 Baka makani ma kubika kuyidedikisanga na bankaka. Vayi, longuka mu kifuani ki Yesu ayi vanga mangolo ma kulandakana zikhadulu ziandi. Baka ndandu mu bifuani bidi mu Kibibila ayi bi zikhomba zitu bubu. Tatamana kuvanga mamoso wunnunga ayi ba lufiatu ti Yave “kalendi zimbakana ko kisalu kinu lunsala.” (Tanga Ebeleo 6:10.) Tatamana kubaka mayangi mu kisalu ki Yave ayi zaba ti nandi wunkuangalalanga mu mangolo moso wumvanga muingi kunkuangidika.
NKUNGA 65 Tutatamana Kuenda Kuntuala!
^ Befu boso tulenda baka ndandu mu kulandakana bifuani bi zikhomba zinkaka. Vayi vadi mintambu tufueti bela keba keba. Dilongi adidi, dinkuiza tusadisa kutatamana kuba mayangi ayi kubika bua mu ntambu wu kuba lungundayi ayi kuba mu kiunda mu kuyidedikisanga na bankaka.
^ MAMBU MADI MU ZIFOTO: Khomba mueka wusadila ku Beteli bo kaba ditoko. Bosi, wukuela ayi wuyiza ba ntuami ntuala na nkazi’andi. Bo bana bandi baba konzuka, nandi wuba kubika mu kisalu ki kusamuna. Bo keka kiboba, nandi wukhidi vanga mamoso kalenda nunga mu kusamuna mu minkanda.
