DILONGI 17
Zingudi—Longukanu mu Kifuani ki Ewunise
“Bika kubangusa malongi ma mam’aku. Kibila madi kolowa yi biteka bimboti mu ntu’aku ayi midi minsanga mimboti va kidongo kiaku.”—ZINGA. 1:8, 9.
NKUNGA 137 Bakietu Bakuikama
MAMBU TUALONGUKA *
Loyisi khaya yi Timoteo ayi Ewunise ngudi’andi banseva mu mayangi bo bammona Timoteo kubotama (Tala lutangu 1)
1-2. (a) Nani wuba Ewunise ayi mu kuba ngudi bikaku mbi kaviokila? (b) Tubila foto yidi va thonono levista.
KHETI Kibibila kisintubila ko kilumbu Timoteo kabotama, vayi tulenda yindula mayangi mam’andi Ewunise kaba mu kilumbu beni. (Zinga. 23:25) Yindulabu buidi nandi kabela mu mayangi bo babuika Timoteo mu nlangu. Nandi wunseva ayi mam’andi Loyisi widi va khonzu’andi. Ewunise widi beni mu mayangi bo bambuika muan’andi mu nlangu ayi Timoteo wunseva bo kambasika mu nlangu. Bo Ewunise kammona mawu, mu mayangi nandi wumbasisa masuela. Kibila wubaka ndandu mu mangolo moso kavanga muingi kusadisa muan’andi kuzaba Yave ayi Yesu. Bikaku mbi Ewunise kaviokila muingi kununga kusadisa muan’andi?
2 Matata ma Timoteo baba binganga biviakana. Tat’andi wuba musi Ngelego vayi mam’andi ayi khay’andi baba basi Yuda. (Mava. 16:1) Timoteo wuba muana ditoko bo mam’andi ayi khay’andi babaka makani ma kuba baklisto. Vayi kheti bobo—matata mandi batatamana kuba binganga biviakana. Mu thangu ayoyo ḿba Timoteo wuba phunga yi kubaka makani mandi veka. Vayi makani mbi nandi kabaka? Bukiedika ti nandi wunkuiza landakana kinganga ki tat’andi? Wunkuiza tatamana kulandangana kikhulu ki basi Yuda banlongisa tona mu bumuana buandi? Voti wunkuiza kikinina mambu ngudi’andi kaba longuka matedi Yesu?
3. Dedi bummonisina Zingana 1:8, 9, buidi Yave kantadilanga mangolo moso zingudi bamvanga ma kusadisa bana bawu kuba bakundi bandi?
3 Zingudi ziwombo basadilanga Yave bubu, banzolanga makanda mawu. Bawu bantomba kusadisa bana bawu kukuna kikundi kifikama na Yave. Ayi Nzambi wumvuanga nkinza mangolo moso bamvanga. (Tanga Zingana 1:8, 9.) Yave wunsadisanga zingudi ziwombo kununga kusadisa bana bawu kuvitika kiedika.
4. Mambu mbi maphasi zingudi ziwombo bamviokilanga bubu?
4 Matata bazebi mambu bana bawu bamviokila mu nza ayiyi yi Satana. Diawu khumbu zinkaka, bakikuvusanga boti bawu bankuiza sola kusadila Yave dedi Timoteo. (1 Pete. 5:8) Mvandi zingudi ziwombo bankozulanga bana bawu baveka ayi bankaka banuni bawu basadilanga ko Yave. Dedi, tala kifuani ki yaya Christine. * Nandi wutuba: “Nnuni’ama wuba tata wumboti ayi waba kiebanga zitsatu zi dikanda, vayi waba tulanga nkaku muingi yibika longa bana bitu matedi Yave. Minu yaba dilanga mu mimvu miwombo mu khambu zaba boti bana bama bankuiza buongimina Yave.”
5. Mbi tuenlonguka mu dilongi adidi?
5 Boti ngie widi ngudi wunsadilanga Yave, wulenda baka ndandu dedi Ewunise. Mu dilongi adidi, tuentubila buidi ngie wulenda landikinina kifuani kiandi mu kulongisa bana baku mu mambu wuntuba ayi wumvanga. Mvandi tuemmona buidi Yave kalenda kusadisila.
LONGA BANA BAKU MU MAMBU WUNTUBA
6. Dedi bummonisina 2 Timoteo 3:14, 15, buidi Timoteo kayiza bela kisadi ki Nzambi?
6 Bo Timoteo kaba muana kilezi, mam’andi wuvanga mamoso kalenda nunga muingi kunlonga “mosonoko manlongo.” Mu kuba muana kilezi, nandi kasazaba ko mawombo matedi Yesu. Vayi kheti bobo, mambu kalonguka mansadisa kuba kiminu kikinda. Vayi bukiedika ti nandi wusadila mambu kalonguka? Mu kuba ditoko nandi wuba luaku lu kusola boti wunkuiza sadila Nzambi voti ndamba. Tuisi ko divuda ti Timoteo “wukikinina mambu kalonguka” matedi Yesu, ḿba mu kibila ki mangolo mam’andi kavanga. (Tanga 2 Timoteo 3:14, 15.) Ewunise wuvutula matondo mu kununga bikaku muingi kusadisa muan’andi kuzaba Yave. Dizina Ewunise, dinsundula “kununga”. Ayi nandi wununga kuzingila mu tsundu dizina diandi, kibila wununga kusadisa muan’andi kuzaba ayi kuzola Yave.”
7. Buidi Ewunise katatiminina kusadisa Timoteo kukonzuka mu kiphevi kheti bo kabotama?
7 Kubotama diba diambu dinkinza Timoteo kavanga, vayi kheti bobo Ewunise wutatamana kukuazuka. Ḿba nandi waba kuyikuvusanga: Buidi Timoteo kankuiza sadila luzingu luandi? Nandi wunkuiza ba minkangulu mimbi? Wunkuiza kota kikola kinangama ku Atena ayi kukikinina malongi ma luvunu banlonganga kuna? Wunkuiza sadila mangolo mandi ma butoko muingi kuba mvika wu zimbongo? Ewunise kasa ba ko nsua wu kubakila Timoteo makani, vayi nandi wuba luaku lu kunsadisa. Buidi? Mu kutatamana kusadisa muan’andi kukuna luzolo mu Yave ayi kutondanga mu khudulu yi Yesu. Vayi bakana ko to matata badi binganga biviakana, bamviokilanga mu mambu amomo. Kheti matata bansadilanga Yave, balenda mona phasi kunyikuna mintima mi bana bawu muingi basadila Yave. Mbi matata balenda longuka mu kifuani ki Ewunise?
8. Buidi ngudi kalenda sadisila nnuni’andi kukieba zitsatu zi kiphevi zi bana?
8 Longuka Kibibila na bana baku. Zikhomba zi bakieto, boti banuni binu bansadilanga Yave, zabanu ti nandi wuntomba muingi lubasadisa kukieba zitsatu zi kiphevi zi bana binu. Phila yimueka mulenda vangila mawu, yidi mu kubuela mioko thuadusulu yi mbuongimini yi dikanda. Tubila buboti mbuongimini yi dikanda ayi vanga mamoso wulenda nunga muingi yawu yivangimina mu phila yinkuiza yangidika baboso. Ḿba ngie wulenda sadisa nnuni’aku kusikika thuadusulu yinkuiza sadisa baboso kubaka ndandu. Mvandi boti wumueka mu bana binu widi mu kulonguka mu buku Baka Mayangi ma mvu ka mvu, khumbu zinkaka ngie wulenda tuama ntuala muingi kutuadisa ndongukulu beni.
9. Kuidi nkazi widi nnuni wukhambu sadilanga Yave, kalenda bakila lusalusu muingi kusadisa bana?
9 Zingudi zinkaka bantuamanga ntuala muingi kutuadisa ndongukulu yi Kibibila kuidi bana bawu, ḿba kibila basi ko bakuela voti banuni bawu basadilanga ko Yave. Boti mawu widi mu kuviokila, bika kukuazuka. Kibila Yave wala kusadisa. Sadila bilongulu tuntambulanga mu kimvuka kiandi muingi kulonga bana baku. Mvandi mulenda kuvula matata bapisuka muingi ba musadisa kuzaba mambu mulenda longuka mu mbuongimin’inu yi dikanda. * (Zinga. 11:14) Yave mvandi kalenda musadisa kuzaba mambu ma bakuazula. (Zinga. 20:5) Dedi wulenda kuba kuvula, ‘mambu mbi maphasi mumviokila mu kikola?’ Kiuvu akiokio kilenda kusadisa kubaka masolo mamboti na bana baku.
10. Ziphila mbi zinkaka ngie wulenda sadisila bana baku kulonguka matedi Yave?
10 Sadila luaku loso muingi kulonga bana baka matedi Yave. Tubila matedi Yave ayi mambu moso mamboti kakuvangilanga. (Deute. 6:6, 7; Yesa. 63:7) Fueti vanga mawu, bulutidi boti wulongukanga ko beni na bana baku ku nzo. Christine tube tubila wutuba: “Minu yisa ba ko luaku luwombo muingi kulogukanga na bana bama ku nzo, diawu yaba sadilanga loso kua luaku muingi kuba longa. Befu tuaba basikanga mu miatu muingi kutala bivangu ayi yaba sadilanga luaku alolo muingi kutubila biawu ayi mambu mankaka ma kiphevi. Ayi bo bana bama bayonzuka, minu yiba kindisa bavanganga ndongukulu’awu yi Kibibila.” Matata, tubilanganu buboti kimvuka ki Yave ayi zikhomba. Lubika kifu ki kutubilanga bubi bakulutu ba kimvuka, kibila mawu malenda tula bana binu nkaku kutomba lusadulu luawu.
11. Dedi bummonisina Yakobi 3:18, kibila mbi didi diambu dinkinza kutuadisa ndembama va dikanda?
11 Tuadisa ndembama ku nzo. Tubilanga luzolo widi mu nnuni’aku ayi mu bana baku. Bo wuntubila matedi nnuni’aku, vangila mawu mu lukinzu ayi sadisa bana baku mvawu bavanga mawu. Ngie kuvanga mawu, wunkuiza sadisa bana baku kulonguka matedi Yave. (Tanga Yakobi 3:18.) Tala kifuani ki yaya Jozsef, widi ntuami ntula wufilu ku Romênia. Bo kaba konzuka tat’awu waba kuba tulanga nkaku muingi kulonguka matedi Yave. Nandi wutuba: “Mam’ami waba vanganga mangolo muingi kutuadisa ndembama ku nzo. Bo tat’itu kaba luta monisa makhemi, yawu thangu mam’itu kaba luta monisanga mamboti. Ayi bo kaba monanga ti befu tuaba monanga phasi kukinzika ayi kutumokina tat’itu, nandi waba sadilanga matangu madi Efeso 6:1-3 muingi kukoluka yitu. Nandi waba tubilanga zikhadulu zimboti tat’itu kaba ayi wu tusadisa kuvisa kibila mbi tufueti kunkizikila. Mu phila ayoyo nandi wutuadisa ndembama va dikanda.”
LONGA BANA BAKU MU MAMBU WUMVANGA
12. Dedi bummonisina 2 Timoteo 1:5, buidi kifuani ki Ewunise kisadisila Timoteo?
12 Tanga 2 Timoteo 1:5. Ewunise wuvana kifuani kimboti kuidi Timoteo. Nandi wunlonga ti kiminu ki kiedika kintombuluanga mavanga. (Yako. 2:26) Tuisi ko divuda ti Timoteo wuzaba ti mambu moso mam’andi kaba vanganga, waba vangilanga mawu mu luzolo kaba mu Yave. Timoteo wumona ti kusadila Yave kutuadisa mayangi kuidi mam’andi. Buidi kifuani ki ngudi’andi kinsadisila? Dedi bo mvuala Polo katubila, Timoteo wumonisa kiokiawu kiminu ngudi’andi kamonisa. Mawu masa monikina ko mu kinzimbukila. Vayi Timoteo wumona kifuani ki mam’andi ayi wulandakana kiawu. Bobuawu mvandi, zingudi ziwombo bannunganga kunyikuna mabanza ma bana bawu, mu kibila ki “mavanga mawu.” (1 Pete. 3:1, 2) Ngie mvaku wulenda vanga mawu. Buidi?
13. Kibila mbi ngudi kafueti tudila kikundi kiandi na Yave va theti mu luzingu luandi?
13 Tula kikundi kiaku na Yave va theti. (Deute. 6:5, 6) Zingudi ziwombo bamvanganga mangolo muingi kukieba zitsatu zi kinsuni zi baba bawu. Vayi wulendi bika ko mambu amomo ma kutula nkaku muingi kukieba kikundi kiaku na Yave. Botulanga thangu muingi kusambila, kuvanga ndongukulu’aku yi Kibibila ayi kulandakananga zikhutukunu. Ngie kuvanga mawu, wala kindisa kiphevi kiaku, wala vana kifuani kimboti va dikanda ayi kuidi bankaka.
14-15. Mbi belonguka mu bifuani bi matoko amomo?
14 Tala bifuani bi matoko mankaka balonguka kuzola ayi kufiatila Yave mu bifuani bi zingudi ziawu. Muana Christine bantedilanga Leanne wutuba: “Tuabasa longukanga ko Kibibila bo tat’itu kaba banga ku nzo, vayi mam’itu waba landakananga zikhutukunu zioso. Kheti tusa zaba ko mawombo matedi Kibibila, vayi kifuani kiandi ki tusadisa kuba kiminu kingolo. Kheti ava kutona kulandakananga zikhutukunu, befu tuvisa ti akiokio kiawu kinganga ki kiedika.”
15 Maria widi tata waba kuba tulanga nkaku muingi kulandakana zikhutukunu wutuba: “Mam’ami widi kifuani kimboti mu kumonisa kibakala. Bo yiba kimuamuana, khumbu zinkaka yaba monanga phasi kutumukina, kibila yiba boma mambu batu bankaka bankuiza tuba. Vayi bo yimona buidi mam’ami kaba monisinanga kibakala ayi buidi kaba tudilanga Yave va theti mu luzingu luandi, matsadisa kununga boma bu batu.” João, widi mvandi tata waba kandiminanga dikanda kuvanga ndongukulu yi Kibibila wutuba: “Ḿba kiuma kiluta nyikuna mabanza mama kiba, kumona ti mam’itu waba—vanganga mamoso muingi kukuangidika tat’itu, vayi luzolo luandi mu Yave luba—va theti mu luzingu.”
16. Buidi kifuani ki ngudi kilenda sadisila bankaka?
16 Zingudi tebukanu moyo ti bankaka bammonanga bifuani binu. Buidi? Tala buidi kifuani ki Ewunise kisadisila mvuala Polo. Mvuala Polo wuzaba ti kiminu ki kiedika Timoteo kaba, “kiba theti mu ngudi’andi . . . Ewunise.” (2 Timo. 1:5) Thangu mbi mvuala Polo kazabila Ewunise ayi Loyisi? Ḿba mu viagi’andi yitheti yi misioni ku Listra, ayi nandi wuba sadisa kuba Baklisto. (Mava. 14:4-18) Bo mvuala Polo kasonikina nkanda kuidi Timoteo—vavioka 15 di mimvu—vayi kheti bobo nandi waba tatamana kutebuka moyo lukuikumunu lu Ewunise ayi wukindisa bankaka balandakana kifuani kiandi. Bukiedika, kifuani kiandi kikindisa mvuala Polo ayi Baklisto bankaka mu sekulu yitheti. Boti widi mu kukonzula bana ngie veka, voti nnuni’aku kasadilanga ko Yave, ba lufiatu ti kifuani kiaku kinkindisanga bankaka.
Vantombuluanga thangu muingi kusadisa muana kukonzuka mu kiphevi, diawu bika kuvonga! (Tala lutangu 17)
17. Mbi fueti vanga boti wummona ti bana baku basimvua ko nkinza mambu wu kuba longa?
17 Buabu, boti wummona ti muan’aku kasimvua ko nkinza mambu wu kunlonga? Tebuka moyo ti vantombuluanga thangu muingi kukubika muana. Dedi bummonisina fikula, bo ngie wunkuna lutheti, khumbu zinkaka ngie wukikuvusanga boti luawu luala mena ayi kuvana mimbutu. Kheti wisi ko lufiatu ti luawu lunkuiza mena, ngie wuntatamananga kulembila nlangu muingi ku lusadisa kukonzuka. (Malako 4:26-29) Bobuawu mvandi, ngudi khumbu zinkaka kalenda kuyikuvusa boti widi mu kununga kunyikuna mabanza ma bana bandi. Ngie wulendi nunga ko kuzaba boti bawu bankuiza sadila mambu wu kuba longa, vayi kheti bobo ngie fueti tatamana kuba kubika. Mu phila ayoyo ngie widi mu kuba vana luaku muingi bayonzuka mu kiphevi.—Zinga. 22:6.
FIATILA MU LUSALUSU LU YAVE
18. Buidi Yave kalenda sadisila bana baku kukonzuka mu kiphevi?
18 Tona mu thangu yikhulu, Yave wunsadisanga matoko mawombo kuba bakundi bandi. (Minku. 22:9, 10) Mvandi kalenda sadisa bana baku kukonzuka mu kiphevi. (1 Koli. 3:6, 7) Kheti bana baku basimvua ko nkinza mambu banlonguka, Yave wunkuiza tatamana kuba monisa luzolo. (Minku. 11:4) Ayi ba kutona “kuvua nkinza” mambu banlonguka, Yave wunkuiza basadisa. (Mava. 13:48; 2 Lusa. 16:9) Yave kalenda kusadisa kutuba mu thangu yifuana—diambu dilenda sadisa bana baku. (Zinga. 15:23) Voti nandi kalenda sadila khomba mu kimvuka muingi kuvanga yawu kikundi ayi kuba monisa mamboti. Kheti bana baku bama konzuka, Yave kalenda kuba sadisa kutebuka moyo mambu ngie wuba longa. (Yoa. 14:26) Ngie kuvanga mangolo muingi kulonga bana baku mu mambu wuntuba ayi wumvanga, Yave wunkuiza sakumuna mangolo maku.
19. Kibila mbi wulenda bela lufiati ti widi lunungu va meso ma Yave?
19 Luzolo Yave kadi mu ngie, luisinkuiza dekuka ko mu kibila ki makani bana baku bambaka. Nandi wukuzolanga kibila ngie wukunzolanga. Boti ngie widi ngudi wunkonzula bana ngie veka, Yave wunkanikisa ti wunkuiza ba Tata yi bana baku ayi Nkiebi’awu. (Minku. 68:5) Ngie wulendi baka ko makani va mvingi bana baku. Vayi ngie kutatamana kufiatila Yave ayi kuvanga mamoso wulenda nunga, wunkuiza tambula lunungu luandi.
NKUNGA 134 Bana Badi Nkhayilu yi Nzambi
^ Mu dilongi adidi, tuemmona buidi zingudi balenda bakila ndandu mu kifuani ki ngudi Timoteo Ewunise ayi kusadisa bana bawu kuzaba ayi kuzola Yave.
^ Bavingisa mazina mankaka.
^ Tala dilongi 50 di buku Baka Mayangi ma mvu ka mvu voti Kibanga ki Nsungi ki 15 Ngonda Yinana mvu 2011 kidi ntu diambu “Ideias para adoração em família e estudo pessoal” va tsielu 6-7.
