Biuvu bi Mintangi
Boti kisadi ki Yave beki makani ma kuvambana na nkazi’andi kheti mu khambu ba mu nsua wu Nzambi ayi kuedidi mutu wunkaka, buidi zikhomba mu kimvuka bafueti tadila dikuela ditheti ayi dimuadi?
Mambu amomo ma kumonika, zikhomba mu kimvuka bafueti kinzika dikuela dimuadi. Muingi tuvisa buboti mawu tuemfiongunina mambu Yesu katuba, matedi kuvambana ayi kubue kuela.
Dedi bummonisina Matai 19:9, Yesu wutuba ti vadi kibila kimueka to Kibibila kimvana muingi kuvambana. Nandi wutuba: “Woso mutu wumvambana ayi nkazi’ndi enati kasa vanga ko kitsuza voti kiphinga ayi kuedidi nkieto wunkaka, buna luzaba ti bafueti kuntedila nkua kitsuza.” Mu kutadila mambu Yesu katuba, tulenda longuka ti (1) kitsuza kiawu to kibila Kibibila kintubila, kilenda tuadisa luvambanu (2) dibakala dimvambana na nkazi’andi bakana ko mu kibila ki kitsuza ayi wunkuela nkieto wunkaka, buna bevanga kitsuza. *
Mambu Yesu katuba, mansundula ti boti nnuni bevanga kitsuza muingi kuvambana na nkazi’andi, buna va meso ma Yave, nandi widi kuandi nsua wu kubue kuela? Ḿba ndamba. Bo nnuni kamvanga kitsuza, nkazi kalenda sola boti wunkuiza nlemvukila voti ndamba. Na kumanga kulemvukila nnuni’andi ayi kubaka makani ma kuvambana, buna baba buadi badi kuawu nsua wu kubue kuela.
Ḿba nkazi kalenda baka makani ma kulemvukila nnuni’andi ayi kutatamana yandi. Vayi, boti nnuni wunkuika nkazi’andi muingi bavambana? Nkazi na kulemvukila nnuni’andi, buna nandi kasi ko nsua wu kubue kuela. Diawu, na kubaka makani ma kubue kuela, mu kubayisa nsua wu Yave, buna nandi wubue vanga kitsuza. Ayi bakulutu ba kimvuka bafueti kubue kala yandi muingi kubue mfundisa.—1 Koli. 5:1, 2; 6:9, 10.
Vayi boti nnuni kuedidi, mu kulevula nsua wu Yave, buidi zikhomba mu kimvuka bafueti tadila dikuela diandi ditheti ayi dimuadi? Bukiedika ti dikuela ditheti, dikhidi luvalu va meso ma Yave? Nkazi, wukhidi kuandi nsua wu kulemvukila nnuni’andi voti ndamba? Tufueti tadila dikuela dimuadi banga dikuela di kitsuza?
Mua mimvu kumbusa, tuaba visanga ti mambu amomo ma kumonika, buna dikuela dimuadi didi dikuela di kitsuza. Kibila no wuba nkazi’andi wukhidi wu moyo, ka kuedidi’abu ko ayi kasa vanga ko kitsuza. Boso kua bubela, Yesu kasa tubila ko matedi mutu wukhambulu fotu. Vayi nandi wutuba ti dibakala dimvambana na nkazi’andi mu khambu kibila kimfunu ayi wunkuela nkieto wunkaka, buna bevanga kitsuza. Mu mambu amomo, Yesu wutuba ti kitsuza kimmanisa dikuela ditheti ayi dikuela dimuadi, diawu dieka luvalu.
“Woso mutu wumvambana na nkazi’andi enati kasa vanga ko kitsuza, voti kiphinga ayi kuedidi nkieto wunkaka buna luzaba ti bafueti kuntedila nkua kitsuza.”—Matai 19:9
Nnuni na kuvambana na nkazi’andi ayi kuedidi mutu wunkaka, buna no wuba nkazi’andi kasiedi ko nsua wu kunlemvukila muingi kuvutula makuela. Mu matedi dikuela diawu, vasi bue tombulu ko nandi kubaka makani maphasi ma kunlemvukila voti ndamba. Mvandi, muingi zikhomba ba kinzika dikuela dimuadi, vasintombulu ko theti no wuba nkazi’andi kufua, kubue kuela na mutu wunkaka voti kuvanga kitsuza. *
Kifuani tuma tubila, kimmonisa ti nnuni bevanga kitsuza, diawu kabe vambinina na nkazi’andi. Angi boti nnuni kasa vanga ko kitsuza vayi kheti bobo be baka makani ma kuvambana na nkazi’andi muingi kabue kuela nkieto wunkaka? Voti wuvanga kitsuza bo bavambasana ayi wubue kuela mutu wunkaka kheti nkazi’andi waba tomba kunlemvukila? Biuvu abiobio, bimmonisa ti kuvambana ayi dikuela dimuadi, biawu bimmanisanga dikuela ditheti ayi dikuela dimuadi diawu dinkuiza ba luvalu. Dedi buntubila Kibanga ki Nsungi ki kilumbu 15 Ngonda Kumi Yimueka, mvu 1979, tsielu 32, “buabu nandi weka mu dikuela dimuadi ayi dikuela ditheti dimana. Diawu kalendi bue vutuka ko mu dikuela ditheti.”
Phila ayoyo yimona yi kuvisila mambu amomo, yisinsundula ko ti dikuela disiedi ko luvalu va meso ma Yave ayi kuidi Baklisto. Mvandi masinsundula ko ti kitsuza disiedi ko disumu dingolo. Bo nnuni kamvambana na nkazi’andi muingi kukuela nkieto wunkaka, buna bakulutu ba kimvuka bafueti bue kala yandi muingi kumfundisa. (Boti nkazi wumona kabe kuela widi mvandi kisadi ki Yave, buna nandi mvandi kafueti fundusu kuidi bakulutu ba kimvuka.) Kheti dikuela dimuadi disi ko di kitsuza, khomba ayoyo kalendi bue tambula ko biyeku mu kimvuka. Mvandi vankuiza tombulu kuzaba buidi no wuba nkazi’andi kadidi, boti nandi wuyekula bana ayi buidi bawu badidi.—Mala. 2:14-16.
Mu kuyindula ziphasi mulenda viokila mu kuvambana na mutu wukuela, Baklisto bafueti tadila dikuela dedi bo Yave kantadilanga.—Mpovi 5:4, 5; Ebe. 13:4.
^ Muingi kusadisa batu kuvisa diyindu, mu dilongi adidi tunkuisa sadila kifuani ki dibakala bebua mu kitsuza. Vayi dilongi didi mu Malako 10:11, 12, dintubila wosokua mutu kuba kuandi dibakala voti nkieto kalenda bua mu kitsuza.
^ Phisulu ayoyo yimona, yi tusadisa kubalula mayindu tuba, ti dikuela dimuadi, dintatamana kuba di kitsuza nati no wuba nkazi’andi kankuiza fua, kubue kuela mutu wunkaka voti kubua mu kitsuza.
