1. Mbi Yave Nzambi kantumisa bisadi biandi bavanga? (Tala mvandi foto.)

 KUIDI nani tufueti tombila mbombolo ayi thuadusulu? Kuidi Yave. Tulenda vangila mawu mu nzila nsambu ayi nandi wu tutumisa tuvanga mawu. Nandi wuntomba—“tutatamana kuvanga nsambu.” (1 Tesa. 5:17) Mu mambu mitu moso ma luzingu, tulenda kumfikama mu nzila nsambu muingi kutomba zithuadusulu ziandi. (Zinga. 3:5, 6) Mu kuba Nzambi nkua kukaba, kasa tsikika ko khumbu zikua tulenda kumfikama mu nzila nsambu.

2. Mbi tunkuiza tubila mu dilongi adidi?

² Befu tuntondanga Yave mu kutuvana luaku lu kumfikama mu nzila nsambu. Vayi mu kutadila mambu mawombo tufueti vanga, dilenda ba diambu diphasi kubotula thangu muingi kuvanga nsambu. Ayi khumbu zinkaka tulenda mona ti vantombulu kuludika mua mambu mu phila tumvangilanga nsambu. Tumvutulanga matondo mu kuzaba ti tuntambulanga mbombolo ayi zithuadusulu mu nzila Kibibila. Mu dilongi adidi, tuemmona buidi tulenda landikinina kifuani ki Yesu, mu kubotulanga thangu muingi kuvanga nsambu ayi mvandi tunkuiza mona buidi tulenda ludikila mua mambu mantombulu muingi kuvanga nsambu, mu kusadila mambu matanu mankinza.

3. Mbi Yesu kazaba matedi nsambu?

³ Yesu wuzaba ti Yave wumvuanga nkinza minsambu mitu. Ava kiza va ntoto, Yesu waba monanga buidi Tat’andi kaba tambudilanga minsambu mi bisadi biandi bikuikama. Dedi, Yesu wuba va kimueka bo Yave katambudila minsambu mi bisadi biandi bikuikama, dedi Ana, Davidi, Elia  ayi bisadi binkaka. (1 Samu. 1:10, 11, 20; 1 Minti. 19:4-6; Minku. 32:5) Diawu Yesu Klistu kalongila minlandikini miandi, batatamananga kuvanga minsambu mu lufiatu.—Matai 7:7-11.

4. Mbi tulenda longuka mu minsambu Yesu kavanga?

⁴ Phila Yesu kaba vangilanga minsambu, yivana kifuani kuidi minlandikini miandi. Yesu waba sambilanga khumbu ziwombo bo kaba vanganga kisalu kiandi ki kusamuna. Kheti waba vanganga bisalu biwombo, vayi Yesu waba vanganga mangolo muingi kubotula thangu yi kuvanga nsambu. (Malako 6:31, 45, 46) Khumbu zinkaka, waba kotukanga meni meni muingi kuba va nafeka ayi kuvanga nsambu. (Malako 1:35) Khumbu mueka, nandi wusambila builu boso, muingi kubaka makani mankinza. (Luka 6:12, 13) Va builu buandi butsuka, Yesu wusambila khumbu ziwombo ava kafua, muingi kudukisa kiyeku kiandi kimfunu.—Matai 26:39, 42, 44.

5. Buidi tulenda landikinina kifuani ki Yesu bo tumvanga nsambu?

⁵ Kifuani ki Yesu ki tulonga ti, kheti tuidi bafietakana mu mambu mawombo, vayi tufueti botulanga thangu muingi kuvanga nsambu. Diawu dedi Yesu, tufueti botulanga thangu muingi kusambila—kuba kuandi va meni voti va builu. Kuvanga mawu, yidi mbonosono, ti befu tumvutulanga matondo kuidi Yave mu luaku ka tuvana. Khomba mueka yinkietu bantedilanga Lynne wuntebuka moyo khumbu yitheti kalonguka matedi luaku lu kuvanga nsambu. Nandi wutuba: “Bo yilonguka ti yilenda sambila yoso kua thangu, mawu matsadisa kutadila Yave dedi nkundi’ama wufikama ayi yaba tomba kuludika phil’ama yaba vangilanga minsambu. Bukiedika, befu bawombo tumana yimuena mu phila ayoyo. Diawu, tuemmona mambu matanu mankinza tulenda sadila bo tumvanga minsambu.

6. Dedi bummonisina Nzaikusu 4:10, 11, mbi Yave kafueni tambula?

⁶ Kuzitisa Yave. Mu thuadusulu yi phevi yinlongo, mvuala Yoane mu kimona mesu wumona 24 di bakulutu ku diyilu kubuongimina Yave. Bawu baba buongimina Nzambi  mu kutuba ti “nandi wufueni mu kutambula nkembu, nzitusu ayi lulendu.” (Tanga Nzaikusu 4:10, 11.) Zimbasi zikuikama zidi ku diyilu, mvandi badi bibila biwombo muingi kuzitisa ayi kukembisa Yave. Bawu badi na Yave ku diyilu ayi banzebi buboti. Bawu bammonanga zikhadulu zi Yave mu mambu nandi kamvanganga. Bo bammonanga phila Yave kamvangilanga mambu, bawu ba kunzitisanga beni.—Yobi 38:4-7.

7. Mu mambu mbi tulenda zitisila Yave?

⁷ Befu mvitu, tufueti zitisanga Yave mu minsambu mitu. Tulenda vangila mawu, mu kunkamba luzolo tuidi mu nandi ayi kibila tukunzitisilanga. Bo wuntanga ayi wunlonguka Kibibila, meka kubakula zikhadulu zi Yave zi kuvanganga kukuituka. (Yobi 37:23; Loma 11:33) Bosi kamba Yave mabanza maku matedi zikhadulu aziozio. Mvandi tulenda zitisa Yave, kibila nandi wu tusadisanga ayi wunsadisanga zikhomba zitu mu nza yimvimba. Nandi khumbu zioso, wu tukakidilanga ayi wu tukiebanga.—1 Samu. 1:27; 2:1, 2.

8. Bibila mbi binkinza befu tuidi muingi kutonda Yave? (1 Tesalonika 5:18)

⁸ Tondanga Yave. Tuidi bibila biwombo muingi kutonda Yave mu minsambu mitu. (Tanga 1 Tesalonika 5:18.) Tulenda tonda Yave mu diosokua diambu dimboti ka tuvangila. Bulutidi, minkhailu mimboti befu tuidi. (Yako. 1:17) Dedi, tulenda tonda Yave mu ntoto wumboti ka tuvana, mu biuma bi kukuitukila bidi mu bivangu, mu kutuvana moyo, dikanda, bakundi ayi kivuvu. Mvandi tuntonda Yave mu ku tuvana luaku lu kuba bakundi bandi.

9. Kibila mbi tufueti tondilanga Yave?

⁹ Tufueti vanga mangolo muingi kuyindula bibila binkinza tuidi muingi kutonda Yave. Tunzingilanga mu nza yidi batu bakhambu vutulanga matondo. Batu mu nza ayiyi bantsikikanga thalu mu bawu veka, kubika kuandi mu mambu balenda vanga muingi kuvutula matondo. Befu kutona kuyindula phila batu mu nza ayiyi banyindudilanga, minsambu mitu minkuiza ba to, minsambu mi kudindila. Muingi mambu amomo mabika ku tumonikina, tufueti tatamana kukuna kifu ki kuvutudilanga Yave matondo mu mambu ka tuvangilanga.—Luka 6:45.

10. Buidi kutondanga Yave kusadisila yaya Kyung-sook kukindama? (Tala mvandi foto.)

¹⁰ Kifu ki kutondanga, kilenda kutusadisa kukindama bo tumviokila mu mambu maphasi. Tala kifuani ki yaya Kyung-sook, kidi mu Kibanga ki Nsungi, 15 Ngonda Yitheti, 2015. Bambakula kimbevu kingolo, bantedilanga Câncro do Pulmão. Nandi wutuba: “Kimbevu akiokio, kithuadisa beni kiunda. Minu yikimona buka ti yisa bue ba ko kivuvu ayi yiba beni mu boma.” Mbi binsadisa kukindama mu mambu amomo? Nandi wubue tuba: Kadika builu ava kulala,  yaba kuendanga ku kibanga ki nzo, muingi kuvanga nsambu mu mbembu yinangama ayi yaba tombanga biuma bitanu mu kilumbu muingi kutonda Yave. Mawu mansadisa kabika kukuazuka beni ayi mansadisa kutonda Yave mu luzolo kadi mu nandi. Nandi wutuba phila Yave kansadisilanga bisadi biandi bo bamviokila mu ziphasi ayi wubakula ti, mu luzingu luandi, wunluta tambulanga lusakumunu kena mambu maphasi. Dedi yaya Kyung-sook, tuidi bibila biwombo muingi kutondanga Yave kheti tuidi mu kuviokila mu ziphasi. Kutondanga Yave mu nsambu, kunkuiza tusadisa tutatamana kukindama ayi kuba bavumbama.

11. Kibila mbi minlandikini mi Yesu baba tombila kibakala bo nandi kavutuka ku diyilu?

¹¹ Dinda Yave ka kuvana kibakala bo widi mu kisalu ki Kusamuna. Ava kavutuka ku diyilu, Yesu wutebula moyo minlandikini miandi kiyeku baba ki kuba zimbangi ziandi “ku Yelusalemi, ku Yuda, ku Samalia nati kusukila nza.” (Mava. 1:8; Luka 24:46-48) Bo vavioka mua thangu, zimfumu zi binganga zi basi Yuda bakanga mvuala Petelo ayi Yoane ayi baba tula vantuala zimfumu zi luyalu, muingi babika kubue samuna. (Mava. 4:18, 21) Mbi mvuala Petelo ayi Yoane bavanga?

12. Dedi bummonisina Mavanga 4:29, 31, mbi minlandikini mi Yesu bavanga?

¹² Kheti mu mambu moso maphasi zimfumu zi luyalu baba vangila, Petelo ayi Yoane baba vutudila: “Befu tulendi vonga ko kutubila mambu tuyuwa ayi tumona.” (Mava. 4:19, 20) Bo babasisa mvuala Petelo ayi Yoane mu buloku, bawu bazitisa Yave ayi batsikika thalu’awu mu kuvanga luzolo lu Nzambi. Bawu basambila kuidi Yave: “Vana bisadi biaku kibakala ki kulongila mambu maku.” Yave wutambudila nsambu awowo.—Tanga Mavanga 4:29, 31.

13. Mbi tulenda longuka mu kifuani ki yaya Jin-hyuk?

¹³ Tulenda landakana kifuani ki minlandikini mi Yesu, mu kutatamana kusamuna kheti zimfumu zi luyalu ba tukandimina kuvanga mawu. Tala kifuani ki yaya Jin-hyuk, bantula mu buloku mu kibila ki kukhambu kota mu mambu ma pulitika. Mu buloku, bamvana kiyeku ki kukengidila batu bankaka mu buloku, vayi basa mvana ko nsua muingi kukoluka yawu, bulutidi kutubila matedi Kibibila. Nandi wusambila kuidi Yave muingi kamvana kibakala, muingi kabaka bu kutubila kiedika ki Kibibila na kubaka luaku. (Mava. 5:29) Nandi wutuba: “Yave wutambudila minsambu miama, mu kuphana kibakala ayi nduenga, muingi kutona ndongukulu yi Kibibila mu tanu di minutu va mielo mi bivinga mi buloku. Ayi va builu yaba sonikanga minkanda muingi yibaka bu kuvanina kuidi batu badi yama mu buloku mu kilumbu kinkaka. Dedi yaya Jin-hyuk, befu mvitu tulenda sambila kuidi Yave muingi ka tuvana kibakala ayi nduenga muingi tuba lufiatu ti Yave wunkuiza tusadisa muingi tuvanga kisalu ki kusamuna.

14. Mbi bilenda tusadisa bo tumviokila mu mambu maphasi? (Minkunga 37:3, 5)

¹⁴ Dinda kuidi Yave muingi ka kusadisa kununga ziphasi. Dedi, bawombu mu befu tuidi mu kuviokila mu mambu maphasi, dedi: kubela, kukuazuka, kufuilu mutu tunzolanga, kuviokila mu mambu maphasi va dikanda, zikhuamusu voti mambu mankaka. Mvandi mambu dedi: bivunga ayi mimvita, malenda ku tuvanga tubika kindama bo tumviokila mu mambu maphasi. Zabikisa kuidi Yave mambu widi mu kuviokila mu nsambu dedi bo wumvangilanga bo  wunkoluka na nkundi’aku wufikama. Ba lufiatu ti Yave wunkuiza kusadisa.”—Tanga Minkunga 37:3, 5.

15. Buidi nsambu wu tusadisilanga “kukindama bo tumviokila mu mambu maphasi”? Vana kifuani.

¹⁵ Kutatamana kuvanga nsambu wunkuiza kusadisa bo “wumviokila mu zithotolo.” (Loma 12:12) Yave wummonanga mambu moso maphasi bisadi biandi bikuikama bamviokilanga ayi—“nandi wunkuwanga bo bakundinda lusalusu.” (Minku. 145:18, 19) Ntuami ntuala wumueka widi 29 di mimvu, bantedilanga Kristie wutuba ti mambu amomo madi makiedika. Nandi mu kinzimbukila wuyiza ba kimbevu kingolo. Mu kibila akiokio, wuyiza ba kiunda kingolo. Buviokila thangu nandi wuyiza zaba ti ngudi’andi wunkuiza fua mu kibila ki kimbevu kingolo ngudi’andi kabakana. Yaya Kristie wutuba: “Minu yisambila beni kuidi Yave muingi kaphana mangolo mantombulu muingi kununga mambu beni kadika kilumbu. Ayi yitona kuvanga thuadusulu yi kiphevi muingi kukubikanga zikhutukunu ayi kuvanganga ndongukulu yi Kibibila yi minu veka.” Nandi wubue tuba: “Minsambu mitsadisa muingi yitatamana kukindama mu mambu maphasi, yizaba ti Yave wuba va khonzo’ama ayi nandi wuba tho yi khindusulu. Kheti yizebi ti yisinkuiza beluka ko mu kimbevu kiama, vayi Yave waba kuwanga minsambu miama, waba kutsadisanga kuba wuvumbama ayi mu ndembama.” Yave zebi ayi wumvukisanga bisadi biandi bikuikama mu mambu maphasi.”—2 Pete. 2:9.

16. Kibila mbi tuntombilanga lusalusu lu Yave muingi tubika vanga mambu mambi?

¹⁶ Dinda kuidi Yave muingi ka kusadisa bo wumviokila mu mambu malenda kukubuisa mu kiphevi. Mu kuba batu ba masumu, tunnuananga nzingu wu kubika vanga mambu mambi. Satana wumvanganga mamoso kannunga muingi ku tubuisa mu kiphevi. Phila yimueka nandi kamvangilanga mawu yidi  mu kumonisa bisavu bi kitsuza. Bisavu abiobio, bilenda bivisa kilunzi kitu—muingi ku tunata kuvanga disumu dingolo.—Malako 7:21-23; Yako. 1:14, 15.

17. Befu kumana vanga nsambu, mbi tufueti vanga muingi tubika kubua mu disumu? (Tala mvandi foto.)

¹⁷ Vantombuluanga lusalusu lu Yave boti tuntomba kununga bifu bimbi. Yesu wutuba mua mambu bo kalonga minlandikini miandi phila bafueti vangila nsambu. Nandi wutuba: “Ka wubika tubua mu ziphukumunu, vayi wutu kula mu mioko mi Nkua Mambi.” (Matai 6:13) Yave wuntomba ku tusadisa, vayi tufueti kundinda. Ayi mvandi tufueti vanga mambu madi nguizani na minsambu mitu. Mvandi tufueti vanga mangolo muingi tubika tanga ayi kukuwa mambu makhambu fuana, batu mu nza ayiyi bantubanga ti madi mamboti. (Minku. 97:10) Tulenda wesa kilunzi kitu mu mambu mamboti, mu kutanga ayi kulonguka Kibibila. Kulandakananga zikhutukunu ayi kuvanganga kisalu ki kusamuna, kunkuiza tusadisa muingi tuba mayindu mamboti. Ayi Yave wu tukanikisa ti kalendi bika ko tuviokila mu zithotolo zio tulendi nunga ko.—1 Koli. 10:12, 13.

18. Mu matedi nsambu, mbi befu boso tufueti vanga?

¹⁸ Kadika mutu mu befu, kafueti tatamana kuvanga nsambu muingi tuba bakuikama mu Yave mu bilumbu abibi bitsuka. Botulanga thangu muingi kuvanga nsambu mu ntima woso. Yave kantomba ‘tunzimbudila ntima’ mu nzila nsambu. (Minku. 62:8) Zitisa Yave ayi ntonda mu mambu moso nandi ka kuvangilanga. Ndinda muingi ka kusadisa kuba kibakala mu kisalu ki kusamuna. Dinda kuidi Yave muingi ka kusadisa kununga mambu maphasi ayi ka kusadisa kununga zioso kua zithotolo zilenda kubuisa mu kiphevi. Kawubika kioso kua kiuma voti mutu ka kutula nkaku muingi kusambilanga kuidi Yave. Buidi Yave kantambudilanga minsambu mitu? Tuala longuka kiuvu akiokio mu dilongi dinlanda.