1-2. Mbi bilenda vanga Nzambi kakikinina mbuongimin’itu?

 MBI wunyindulanga bo wunkuwa kikuma “mbuongimini”? Ḿba wunyindulanga khomba widi wufukama va khonzo kika ayi wunzibudila ntim’andi kuidi Yave mu nsambu. Voti wulenda yindula dikanda didi mu mayangi mu thangu bamvanga mbuongimini yi dikanda.

² Bifuani bia bibiodi abiobio, bimmonisa ziphila zi kubuongimina Yave. Vayi bukiedika ti nandi, wunkikininanga ziawu? Ngete, boti tumvangila mawu mu luzolo ayi mu lukinzu. Befu tunzolanga beni Yave ayi tuntomba kubuongimina to nandi mu phila yifuana.

3. Mbi tuenlonguka mu dilongi adidi?

³ Mu dilongi adidi, tuemmona ntindu mbuongimini Yave kaba kikininanga mu thangu yikhulu ayi tuemmona mvandi nana di ziphila tulenda buongimina Yave bubu. Ayi bo tumfiongunina ziawu yindula buidi wulenda buongiminina Yave mu phila kantombila. Mvandi tunkuiza mona kibila mbi mbuongimini yikiedika yi tutuadisilanga mayangi.

4. Buidi bisadi bi Yave mu thangu yikhulu bamonisina lukinzu ayi luzolo mu Yave?

⁴ Mu thangu yikhulu, bisadi bikuikama dedi Abeli, Nowa, Abalahami, ayi Yobi, bamonisa lukinzu ayi luzolo mu Yave. Buidi? Mu kukivana, kuntumukina ayi kumonisa luzolo.  Kibibila kisinsudikisa ko phila baba kumbuongimininanga. Vayi kiawu kimmonisa ti bawu bazitisa Yave ayi nandi waba kikininanga mbuongimi’awu. Yave wuvana nsiku wu Mose kuidi nkunu Abalahami. Mu minsiku beni muba zithuadusulu ziabe sudikisa phila bafueti kumbuongiminina.

5. Mambu mbi mayiza baluka mu mbuongimini yikiedika bo Yesu kafua ayi kavulubuka?

⁵ Bo Yesu kafua ayi kavulubuka, befu tuisi ko mu lukuiku lu kutumukina nsiku wu Mose. (Loma 10:4) Baklisto bafueti tumukina nsiku wumona “nsiku wu Klisto.” (Ngala. 6:2) Ayi muingi kutumukina nsiku beni, vasintombulu ko kulunda “mambu moso” mu ntu. Vayi vantombulu kulandakana kifuani ki Yesu ayi mambu kalonga. Mawu Baklisto bafueti vanga muingi kukuangikidika Yave ayi kubaka mayangi.—Matai 11:29.

6. Buidi tulenda bakila ndandu mu dilongi adidi?

⁶ Bo tuemfiongunina kadika phila yi kubuongimina Yave, wukiyuvusa: ‘Bukiedika ti yima konzuka mu diambu adiodio?’ ‘Yilenda buela kukivana mu mbuongiminanga yi Yave?’ Ḿba ngie widi mu mayangi mu kumona ti makonzuka beni mu kiphevi, vayi kheti bobo mvandi fueti dindanga lusalusu lu Yave muingi ka kusadisa kubuela konzuka mu mambu mankaka mantombulu.

7. Buidi Yave kantadilanga minsambu wumvangilanga mu ntima woso?

⁷ Tumbuongiminanga Yave bo tunsambila. Kibibila kindedikisa minsambu mitu banga malasi baba vanganga ku nzo yinlongo ayi ku tempelo. (Minku. 141:2) Malasi beni maba basisanga mfimbu yimboti yaba kuangidikanga Nzambi. Bobuawu mvandi minsambu mitu tumvangilanga mu ntima woso, minkuangidikanga Yave kheti bo tunsadila bikuma bikhambulu phasi. (Zinga. 15:8; Deute. 33:10) Diawu tuidi lufiatu ti Yave wunzolanga bo tukunzibudila ntima ayi tukuntonda. Nandi mvandi wuntomba tunzabikisa mambu ma tutatisa ayi biuma tuntomba. Diawu, ava kusambila tufueti botulanga thangu muingi kuyindula mu mambu tunkuiza tuba. Ngie kuvanga mawu, minsambu miaku minkuiza ba buka malasi kuidi Tat’aku yi diyilu.

8. Luaku mbi tuidi muingi kukembisa Nzambi?

⁸ Tumbuongiminanga Yave bo tukunkembisa. (Minku. 34:1) Tunkembisanga Yave bo tunkolukila mu mayangi matedi zikhadulu ziandi ayi biuma kavanga. Diawu befu kubotulanga thangu muingi kuyindula mu mamboti moso Yave kama tuvangila, tunkuiza baka bibila biwombo muingi kuntondanga. Kisalu ki kusamuna ki tuvananga luaku lu “kuvana kuidi Nzambi dikaba ditu di nzitusu voti mbutu wu bididi bitu.” (Ebe. 13:15) Dedi bo tufueti yindudilanga ava kuvanga nsambu kuidi Yave, buboti beni mvandi kukubamanga ava kue samuna. Tuntomba dikaba tumvana Yave, diba dimboti ayi dinzitusu. Diawu tunsamuninanga mu mayangi kuidi bankaka.

9. Dedi ku Isaeli yikhulu, buidi befu mvitu tumbakilanga ndandu mu zikhutukunu? Vana kifuani kitedi buidi zikhutukunu zi kusadisilanga.

⁹ Tumbuongiminanga Yave bo tunlandakana zikhutukunu. Yave wukamba basi Isaeli: Babakala boso bafueti kuendanga vantuala Yave Nzambi’awu, khumbu zitatu mu mvu va kibuangu kankuiza sola.” (Deute. 16:16) Vabe tombulu bawu kubika zinzo ziawu ayi minsitu miawu mu khambulu nkebi. Vayi Yave wuba kanikisa: “Vasi ko mutu wala  zinina ntoto’aku bo wala kuendanga khumbu tatu mu mvu vantuala Yave, Nzambi’aku.” (Esodu 34:24) Basi Isaeli bamonisa kiminu mu Yave mu kutumukina nsiku awowo. Mu kuvanga mawu bawu batambula lusakumunu luwombo. Dedi, babuela visa nsiku wu Nzambi, babaka luaku lu kuyindula mu mamboti ma Nzambi ayi luaku lu kukikindasana bawu na bawu. (Deute. 16:15) Befu mvitu bubu tumbakanga beni ndandu bo tumvanga mangolo ma kulandakana zikhutukunu. Ayi yindula buidi Yave kambelanga mu mayangi bo kammona ti tuidi bakubama muingi kuvana mimvutu mikhindusulu.

10. Kibila mbi kukuimbila yidi phila yinkinza yi kubuongimina Nzambi?

¹⁰ Tumbuongiminanga Yave bo tunkuimbila. (Minku. 28:7) Basi Isaeli baba tadilanga minkunga banga phila yinkiza yi kubuongimina Nzambi. Ntinu Davidi wusola 288 di zilevita muingi baba minyimbidi ku tempelo. (1 Lusa. 25:1, 6-8) Bubu befu mvitu tulenda monisa luzolo luitu mu Nzambi mu kukuimbila minkunga. Kheti tuisi ko beni bapisuka mu kukuimbila, tulendi bika ko mawu ma tuvanga kubika kuimbila. Yindula mu mambu amama, befu boso tumvanganga zinzimbala bo tunkoluka, vayi tubikanga ko kuvana mimvutu mu zikhutukunu ayi kusamuna mu kibila akiokio. (Yako. 3:2) Bobuawu mvandi tulendi bika ko kukuimbila kuidi Yave mu kuyindula ti tusa zaba ko kukuimbila.

11. Dedi bummonisina Minkunga 48:13, kibila mbi tufueti longukilanga Kibibila va kimueka na dikanda ditu?

¹¹ Tumbuongiminanga Yave bo tunlonguka Kibibila ayi bo tunlonga bana bitu matedi nandi. Kilumbu ki kisabala kiaba vananga luaku kuidi basi Isaeli lu kubika kuvanga bisalu biawu binkaka muingi kusikika mayindu mu mbuongimini’awu kuidi Yave. (Esodu 31:16, 17) Basi Isaeli baba bakuikama baba longanga bana bawu matedi Yave ayi mamboti mandi. Bubu mvandi kadika mutu kafueti botulanga thangu muingi kutanganga Kibibla kibila yidi mvandi phila yi kubuongimina Yave ayi matu sadisanga kumfikama. (Minku. 73:28) Ayi bo tunlonguka Kibibila va kimueka na dikanda ditu, mawu mankuiza sadisa bana bitu kukuna kikundi kimboti na Tat’itu yi diyilu.—Tanga Minkunga 48:13.

12. Mbi tulenda longuka mu phila Yave katadila kisalu ki kutunga nzo yinlongo?

¹² Tumbuongiminanga Yave bo tuntunga ayi tunkieba buboti bibuangu bi zikhutukunu. Kibibila kintuba ti kisalu ki kutunga nzo yinlongo ayi kukieba biuma bioso biba kuna kiba, “kisalu kinlongo” (Esodu 36:1, 4) Bubu mvandi Yave wuntadilanga kisalu ki kutunga bibuangu bi zikhutukunu banga kisalu kinlongo. Zikhomba ziwombo bamvananga thangu’awu muingi kuvanga kisalu akiokio. Ayi tuku batonda beni mu kisalu bamvanganga muingi kubuela mioko bisalu bi Kintinu. Bawu mvawu bamvanganga kisalu ki kusamuna ayi bankaka mu bawu bambakanga makani ma kuba mintuami ntuala. Bakulutu ba kimvuka balenda monisa ti bambuelanga mioko kisalu ki kutunga, mu kukhambu tula nkaku mu thangu khomba mu kimvuka kambaka makani amomo. Kheti tuidi bapisuka mu kutunga voti ndamba, befu boso tulenda buela mioko muingi kutunga ayi kukieba bibuangu bi zikhutukunu.

13. Buidi tufueti tadilanga minkhailu tumvananga muingi kubuela mioko bisalu bi Kintinu?

¹³ Tumbuongiminanga Yave bo tumvana minkhayilu muingi kubuela mioko bisalu bi Kintinu. Basi Isaeli baba nsiku waba tubila ti ni mutu kalendi kuenda ko vantuala Yave, mu khambu nata nkhayilu. (Deute. 16:16)  Bawu baba vaninanga minkhailu mu kutadila biuma baba. Mu phila ayoyo, baba monisanga ti bantonda Yave mu mamoso kavanga muingi kuba dikila mu kiphevi mu thangu beni. Buidi tulenda monisina luzolo luitu mu Yave ayi kuntonda mu biuma bioso bi kiphevi tuntambulanga? Phila yimueka tulenda vangila mawu, yidi mu kuvananga minkhailu muingi kubuela mioko kimvuka ayi bisalu bioso bi Kintinu bimvangamanga mu nza yimvimba. Mvuala Polo wutuba: “Boti, mu ntima woso wumvanina, buna Nzambi wunkikinina nkhailu beni mu kutadila biuma widi, kubika kuandi bio wukhambulu.” (2 Koli. 8:4, 12) Yave wumvuanga nkinza minkhailu mioso tumvaninanga mu ntim’itu woso kheti miawu midi miluelu.—Malako 12:42-44; 2 Koli. 9:7.

14. Dedi bummonisina Zingana 19:17, buidi Yave kammuenanga bo tunsadisa zikhomba badi mu tsatu?

¹⁴ Tumbuongiminanga Yave bo tumvana biuma muingi kusadisa zikhomba badi tsatu. Yave wukanikisa kusakumuna basi Isaeli baba vangilanga mamboti kuidi biphumbulu. (Deute. 15:7, 10) Befu mvitu bubu, bo tunsadisa mutu widi tsatu, Yave wuntadilanga mawu banga nkhailu tukumvana. (Tanga Zingana 19:17.) Dedi, bo Baklisto ku Filipi bafidisa minkhailu kuidi mvuala Polo mu buloko, nandi wutedila miawu “nkhailu wufuana, widi mfimbu wumboti, wunzolanga Nzambi.” (Fili. 4:18) Wukiyuvusa, ‘Vadi khomba mu kimvuka yilenda sadisa?’ Yave wunkuangalalanga bo kammona ti tuidi mu kusadila thangu’itu, mangolo mitu, mambu tuzebi kuvanga ayi biuma tuidi muingi kusadisa bankaka. Ayi nandi wuntadilanga mawu banga phila yi kumbuongimina.—Yako. 1:27.

15. Mbuongimini yikiedika yintombuluanga thangu ayi mangolo, vayi kibila mbi disi ko diambu di phasi kuvanga mawu?

¹⁵ Muingi kubuongimina Yave mu phila kantombila, vantombulu thangu ayi mangolo. Ayi disi ko diambu diphasi kuvanga mawu. (1 Yoa. 5:3) Kibila mbi? Kibila tumbuongiminanga Yave mu luzolo. Yindula muana wuntomba kufikula kiuma muingi kuvana kuidi tat’andi banga nkhailu. Kheti kalenda viokisa thangu yiwombo muingi kuvanga mawu, vayi nandi kasinkuiza nyionga ko. Kibila wunzolanga tat’andi ayi wuntomba kumvana nkhailu wunkuiza mbika mu mayangi. Bobuawu mvandi, mu kibila ki luzolo tuidi mu Yave tumbanga mu mayangi mu kuvanga mangolo ayi kubotulanga thangu muingi kulonga kiedika kuidi bankaka.

16. Dedi bummonisina Ebeleo 6:10, buidi Yave kammuenanga mangolo moso tumvanganga muingi kunkuangidika?

¹⁶ Matata banzolanga bana bawu, bavingilanga ko muingi baba vana minkhailu mu phila yimueka. Kibila bazebi ti kadika muana widi disuasana na wunkaka. Bobuawu mvandi, Tat’itu yi diyilu zebi mambu kadika mutu kamviokilanga. Ḿba ngie wulenda luta vanga mambu kena zikhomba zinkaka. Voti ngie wisi bue nunga ko kuvanga mambu zikhomba zinkaka bamvanganga, ḿba mu kibila ki bununu, buvinya voti biyeku binkaka va dikanda. Kheti bobo bika kuba mu kiunda. (Ngala. 6:4) Yave kalendi zimbakana ko kisalu kiaku. Ngie kutatamana kuvanga mamoso wunnunga mu ntim’aku woso, nandi wunkuiza yangalala. (Tanga Ebeleo 6:10.) Yave wunnunganga kuzaba mambu madi ku tsi ntim’aku. Ayi wuntomba wuba mayangi  mu mambu wunnunga kuvanga muingi kumbuongimina.

17. (a) Boti phasi tummonanga kuvanga mambu mankaka muingi kubuongimina Yave mbi tufueti vanga? (b) Buidi ngie wubakila ndandu kheti mu diambu dimueka bantubila mu quadro “ Buela mayangi maku”?

¹⁷ Mbi wunkuiza bakula ngie kuvanga mangolo ma kupisuka mu ziphila zinkaka zi kubuongimina Yave, dedi kuvanga ndongukulu yi ngie veka ayi kisalu ki kusamuna? Ḿba wunkuiza bakula ti ngie kubuela kukivana mu mambu amomo, wala buela baka ndandu mu kuvanga mawu. Tulenda dedikisa mbuongimin’itu na mutu wumvanga bisavu ki kunyikuna binama bi nyitu, voti wunlonguka kusika bisiku. Boti tuisimbotula ko thangu yiwombo muingi kukubamanga, ḿba tuisinkuiza pisuka ko. Vayi befu kubaka makani ma kukubamanga nkadu nkadu, bumviokila thangu tunkuiza pisuka. Ayi bo tummona ndandu tumbaka mu mangolo moso tumvanga, ḿba tuisinkuiza tsikika ko mayindu mu thangu tumviokisanga vayi mu ndandu tumbaka. Ayi mawu mvandi mammonikanga mu mbuongimin’itu kuidi Yave.

18. Kiuma mbi kilutidi nkinza tulenda vanga ayi ndandu mbi tunkuiza baka?

¹⁸ Kuvanga mamoso tunnunga muingi kubuongimina Yave, kiawu kiuma kilutidi tulenda vanga. Befu kuvanga mawu luzingu luitu lunkuiza ba tsundu ayi tunkuiza baka mayangi makiedika mvu ka mvu. (Zinga. 10:22) Bubu befu tuidi ndembama yi ntima mu kuzaba ti Yave wunsadisanga bisadi biandi kheti bo bamviokila mu ziphasi. (Yesa. 41:9, 10) Bukiedika, tuidi bibila biwombo muingi kuba mu mayangi bo tumbuongimina Tat’itu yi luzolo wufueni mu tambula nzitusu ayi nkembo wu bivangu bioso!—Nzai. 4:11.