Bawombo bo bantanga kinongu akiokio mu khambu zaba bivisa bioso ba kivananga kiuvu akiokio. Vayi matangu amomo mantubila babakala buadi baba diodiawu dizina ayi tulenda longuka mawombo mu mambu mamonika.

Sauli ntinu wu Isaeli wuba sambuadi di bana ba babakala ayi bana buadi ba bakieto. Muan’andi wutheti wuba Yonatani. Buviokila thangu ntinu Sauli ayi kimasi kiandi Lisipa babuta muana baba tedilanga Mefibozeti, Yonatani mvandi wubuta muana baba tedilanga Mefibozeti. Mu kibila akiokio, Ntinu Sauli wuba muana ayi ntekulu baba tedilanga Mefibozeti

Ntinu Sauli wubaka makani ma kuvonda basi Ngibioni. Ayi ḿba bawombo baba vonda. Mawu masa ba ko mambu mamboti. Kibila mbi? Kibila mu bilumbu bi Yosua, bakulutu ba basi Isaeli bavanga luwawanu lu ndembama na basi Ngibioni.—Yosua 9:3-27.

Luwawanu alolo lutatamana nati mu bilumbu bi Sauli. Kheti mu kuzaba mawu nandi kasa ma vua ko nkinza ayi waba tomba kuvonda basi Ngibioni. Mu kibila akiokio “Sauli ayi dikanda diandi baba fotu.” (2 Samu. 21:1) Bo Davidi kayiza ba ntinu, basi Ngibioni bavuka bankamba mambu Sauli kavanga. Davidi wuba yuvula, mbi yilenda vanga muingi kudedikisa mambu Sauli kavanga ayi kutuadisa lusakunumu lu Yave. Basi Ngibioni basa dinda ko zimbongu vayi badinda muingi baledika sambuadi di bana ba dibakala wuba tuadisa ziphasi. (Zinta. 35:30, 31) Davidi wukikinina mambu bandinda.—2 Samu. 21:2-6.

Sauli ayi Yonatani bafua mu mvita vayi Mefibozeti muana Yonatani wuba wumoyo. Nandi wuba wubela mu malu ayi kasa buela ko mioko makani ma khay’andi ma kuvonda basi Ngibioni. Davidi wuvanga luwawanu lu bukundi ayi Yonatani. Luawu lutuadisa ndandu kuidi nkunu wu Yonatani kubunda mvandi muan’andi Mefibozeti. (1 Samu. 18:1; 20:42) Kibibila kintuba: “Ntinu wumona kiadi Mefibozeti, muana Yonatani, muana Sauli, mu kibila ki luwawanu Davidi ayi Yonatani, muana Sauli bavanga va ntuala Yave.”—2 Samu. 21:7.

Vayi kheti bobo, Davidi wuvanga mambu basi Ngibioni bandinda. Nandi wuvana bana buadi ba Sauli wumueka mu bawu wuba Mefibozeti ayi mvandi batekulu batanu ba Sauli muingi baba vonda. (2 Samu. 21:8, 9) Mambu Davidi kavanga, mavumbika nganzi yi Yave.

Kinongu akiokio, kimmonisa mambu mawombo. Nsiku wu Nzambi waba tuba: “Bana balendi vondu ko mu kibila ki mavanga ma matata.” (Deute. 24:16) Yave khanu kasa kikinina ko bana buadi ba Sauli ayi batekulu bandi batanu bavondu boti bawu basa ba ko fotu. Nsiku beni wubue tuba: “Kadika mutu kafueti vondu mu kibila ki masumu mandi.” Ḿba sambuadi di batu baba mu nkunu Sauli bafuila kibila babuela mioko makani ma Sauli ma kuvonda basi Ngibioni. Mawu mammonisa ti bawu bafuila mu kibila ki masumu mawu.

Kinongu akikio ki tulonga ti mutu kalendi vanga ko mambu mambi ayi kuyindula ti kasi ko fotu mu mawu kibila babe kuntuma kuvanga mawu. Ngana mueka yi Kibibila yintuba: “Fiongunina nzila malu maku, ayi zinzila ziaku zinkuiza ba nsika.”—Zinga. 4:24-27; Efe. 5:15