Kibila mbi dibakala bantanguninanga “Kingandi” katubila ti wunkuiza “bungisa” kiuka kiandi na kukuelana na Luti? (Luti 4:1, 6)

Mu thangu yikhulu, boti nnuni fuidi mu khambu bika bana, vaba tombuluanga kuvana mimvutu mi biuvu abibi: Mbi binkuiza monika mu kiuka kiandi? Bukiedika ti dizina diandi dinkuiza zimbala va dikanda diandi? Nsiku wu Mose waba vananga mimvutu mi biuvu abiobio.

Mbi biaba monikanga mu ntoto wu dibakala na kufua, voti no wunkuiza ba kiphumbulu ayi wunsumbisa ntoto’andi? Khomb’andi voti musi dikanda wulutidi kufikama waba sumbanga ntoto beni. Mawu, maba vanganga muingi kiuka kitatamana va dikanda.—Levi. 25:23-28; Zinta. 27:8-11.

Buidi mambu amomo maba vangilanga muingi dizina di mutu fuidi dibika zimbala? Mawu maba monikinanga mu kukula mutu beni voti mu nzila dikuela di kinzadi. Wumueka mu zikhomba zi mutu fuidi, waba kuelanga nzadi’andi muingi dizina ayi kiuka ki khomb’awu kitatamana. Thuadusulu ayoyi yaba kebanga mvandi mfuizi.—Deute. 25:5-7; Matai 22:23-28.

Tala kifuani ki Naomi. Nandi wuba wukuela na dibakala dimueka baba tedilanga Elimeleki. Bo Elimeleki ayi bana bandi buadi bafua, Naomi kasa bue baka ko mutu wu kunkieba. (Luti 1:1-5) Bo bavutuka ku Yuda, Naomi wukamba Luti muingi kadinda Boazi wuluta ba wufikama na dikanda di Elimeleki muingi kasumba ntoto’awu. (Luti 2:1, 19, 20; 3:1-4) Vayi Boazi wuzaba ti vaba mutu wunkaka wuluta ba wufikama va dikanda no Kibibila kantedila, “Kingandi.” Dibakala beni nandi wuba luaku lutheti muingi kasola boti wunkuiza sumba ayi ku bakula.—Luti 3:9, 12, 13.

Va thonono, “Kingandi” waba tomba kusadisa. (Luti 4:1-4) Kheti vaba tombulu kusadila zimbongo, dibakala adiodio wuzaba ti Naomi kasa ba ko bu kubutila muana muingi kutambula ntoto wu Elimeleki. Boti nandi wuvitika kusumba ntoto beni, khanu kiuka kiandi kibuelama.

Vayi Kingandi wubalula mayindu ma kumanga sumba ntoto, bo kazaba ti kafueti kuela mvandi Luti. Nandi wutuba: “Yisinkuiza nunga ko kusumba ntoto beni muingi yibika bungisa kiuka kiama.” (Luti 4:5, 6) Kibila mbi kabaludila mayindu?

Boti Kingandi voti mutu wunkaka va dikanda wukuela na Luti ayi babuta muana, khanu muana beni, nandi wutambula kiuka ki ntoto wu Elimeleki. Buabu khanu buidi mambu amomo mayiza “bungisila” “kiuka” ki Kingandi? Kibibila kisintubila ko mawu, vayi vadi mua bibila tulenda fiongunina.

• Theti, nandi khanu wubungisa zimbongo muingi kusumba ntoto wu Elimeleki, kibila ntoto beni, wisinkuiza ba ko wandi vayi wu muana wu Luti.

• Dimmuadi, nandi khanu wuba kiyeku ki kukieba Naomi ayi Luti.

• Dintatu, boti Luti wubuta muana na Kingandi, khanu bakaba kiuka na muana wu Luti.

• Dinna, boti Kingandi kasa ba ko bana bankaka, khanu muana babuta na Luti wuyiza vua kiuka kiandi na kiuka ki Elimeleki. Ayi khanu bo nandi kafua, muana beni, nandi wutambula dizina di Elimeleki kubika kuandi dizina diandi. Diawu Kingandi kasa bela ko wukubama muingi kusadisa Naomi. Ayi wubikila Bowazi wuba musi dikanda diandi wufikama, muingi katambula kiyeku akiokio. Ayi Bowazi wuvanga mawu, kibila “waba tomba dizina ayi kiuka ki musi dikanda diawu ditatamana.”—Luti 4:10.

Kingandi wuluta vua nkinza dizina diandi ditatamana kena kiuka. Buimi butuadisa mayindu mandi. Vayi Kingandi bo kaluta sikika mayindi muingi kuzitisa dizina diandi, diawu befu bubu tusa zaba ko dizina diandi. Mvandi wuzimbisa luaku lunneni Bowazi katambula, lu kuba wumueka mu bakulu ba Mesia, Yesu Klisto. Kiandi ayi kiunda kuzaba ti Kingandi mu kibila ki buimi, wuzimbisa luaku lu kusadisa mutu waba tomba lusalusu!—Matai 1:5; Luka 3:23, 32.