1-2. Mambu mbi mammonikanga bo mutu kambotama ayi mbi fueti fiongunina?

 WUMANA mona dingumba di batu bambotama? Ngie wummonanga lufiatu bawu bambanga bo bamvana mimvutu, mi biuvu biodi bantambulanga ava kubotama? Wummonanga makanda mawu, bakundi ayi batu bankaka kubunda makanda ayi kuba mu mayangi bo bawu bambasika mu nlangu? Mu kadika sabala, bivevi bi batu bambakanga makani amomo, ma kubotama ayi kuba Zimbangi zi Yave.

² Abu ngie? Boti widi makani ma kubotama, buna didi diambu dimboti wunkuiza vanga muingi “kusadila Yave” mu nza ayiyi yiwedi mambi. (Minku. 14:1, 2) Dilongi adidi, dikubukulu kuidi baboso kuba kuandi matoko voti biboba. Vayi kheti befu tumana botama, tufueti kindisa lufiatu luitu ayi makani mitu ma kusadila Yave mvu ka mvu. Buabu, ndoku tumona bibila bitatu mu bibila biwombu tuidi muingi kusadila Yave.

3. Kibila mbi bisadi bi Yave banzodilanga kiedika ayi busonga? (Minkunga 119:128, 163)

³ Yave wuntuadisanga dikabu diandi muingi kuzola kiedika. (Zaka. 8:19) Yesu wulubula minlandikini miandi muingi bazola mambu masonga. (Matai 5:6) Mawu mansundula ti, tufueti vanga mangolo ma kuvanga mambu mamboti ayi masulama va mesu ma Nzambi. Ngie wunzonlanga kiedika ayi busonga? Tuidi lufiatu ti ngete. Ngie wunlendanga luvunu ayi mambu mosu mambi. (Tanga Minkunga 119:128, 163.) Luvunu yidi khadulu yi mutu wunkengidilanga nza ayiyi. (Yoa. 8:44; 12:31) Dimueka mu makani ma Satana didi, kuvueza Dizina  Dinlongo di Yave Nzambi. Satana wutona kuvueza Dizina di Nzambi tona ku lumbu lu Edeni. Nandi wumvangilanga mawu mu kuvanga batu kuyindula ti, Yave widi nkua buimi, katubanga ko kiedika ayi katuadisanga ko buboti batu. (Ngene. 3:1, 4, 5) Luvunu lu Satana luidi buka kiyimbu kintembakananga mu kilungi ayi mu mintima mi batu. Bo batu bammanganga kusola “kuzola kiedika”, Satana kalenda  batuadisa muingi kuvanga mambu moso makhambulu masonga ayi makhambu fuana.—Loma 1:25-31.

4. Buidi Yave kammonisinanga ti widi “Nzambi yikiedika”? (Tala mvandi fikula.)

⁴ Yave widi “Nzambi yikiedika” ayi nandi wunlonganga kiedika kuidi baboso ba kunzolanga. (Minku. 31:5) Mu kuvanga mawu, nandi wuba vukisanga mu luvunu lu Satana. Yave mvandi wunlonganga bisadi biandi muingi kutubanga kiedika ayi kuvanga mambu masonga. Kuvanga mawu ma kuba sadisanga kubaka ndembama yi ntima ayi kuyitadila mu phila yifuana. (Zinga. 13:5, 6) Bukiedika ti nandi wuvanga mawu bo wuba nlonguki wu Kibibila? Ngie wulonguka ti phila Yave kantuadisilanga batu yawu yilutidi kuidi batu boso, bulutidi kuidi ngiewu. (Minku. 77:13) Diawu ngie wuntomba kulandakana thuadusulu yi Yave matedi mambu masonga. (Matai 6:33) Ngie wuntomba kukakidila kiedika muingi kusadisa batu bazaba ti mambu Satana katuba matedi Yave, madi ma luvunu. Buidi wulenda vangila mawu?

5. Buidi ngie wulenda buedila mioko kiedika ayi busonga?

⁵ Ngie wulenda sola ntindu luzingu wuntomba kunata, mu kumanga luvunu lu Satana ayi kusimbidila kiedika. Mvandi wulenda tuba: “Minu yintomba Yave kaba Mfumu’ami yilutidi ayi kuvanga mambu kantuba ti madi masonga.” Buidi wulenda vangila mawu? Fikama Yave mu nzila nsambu, mu kukivana ayi kubotama. Luzolo mu kiedika ayi mu mambu masonga, luawu luala kuvana mangolo muingi kubaka makani ma kubotama.

6. Dedi bummonisina Minkunga 45:4 Kibila mbi wufueti zodila Yesu Klisto?

⁶ Kibila mbi ngie wunzodilanga Yesu Klisto? Mona kibila kinkinza mu Minkunga 45:4. (Tanga.) Yesu wuntuadisanga kiedika, busonga ayi wukikululanga. Boti  ngie wunkakidilanga kiedika ayi busonga, buna tuidi lufiatu ti ngie wunzolanga Yesu Klisto. Yindula buidi Yesu kakakidila kiedika mu kibakala ayi mu busonga. (Yoa. 18:37) Buidi Yesu kaba monisinanga khadulu yi kukikulula?

7. Mbi bi kuvanga kulandakana kifuani ki Yesu ki kukikulula?

⁷ Yesu wumonisa khadulu yi kukikulula mu kifuani kiandi. Khumbu zioso nandi waba vananga nzitusu kuidi Tat’andi kubika kuandi kuidi nafeka. (Malako 10:17, 18; Yoa. 5:19) Buidi wumbelanga mu kumona khadulu yi Yesu yi kukikulula? Bukiedika ti mawu masi kukindisa ko kuzola Muana Nzambi ayi kulandakana kifuani kiandi? Kibila mbi Yesu kaba kukikuludilanga? (Minku. 18:35; Ebe. 1:3) Ngie wubanga ko phuila yi kufikama Yesu, wulandakana mu phila yivedila kifuani ki Tat’andi?

8. Kibila mbi tunzodilanga Yesu Klisto?

⁸ Befu tunzolanga Yesu Ntinu’itu kibila nandi widi Ntinu wufuana. Naveka Yave wukubika Muan’andi ayi wumbieka Ntinu. (Yesa. 50:4, 5) Yindula mvandi mu nkhailu wu luzolo Yesu ka tumonisina. (Yoa. 13:1) Mu kuba Ntinu’itu, Yesu bafuana kutambula luzolo luitu. Nandi wusudikisa ti baboso ba kunzolanga mu bukiedika wala ku batedila bakundi bandi kibila bantumukinanga zithumu ziandi. (Yoa. 14:15; 15:14, 15) Luidi luaku lunneni kuba nkundi wu Muana wu Yave.

9. Buidi mbotumunu yi Baklisto yididi mua disuasana na mbotumunu yi Klisto?

⁹ Yimueka mu zithumu Yesu katuma yidi, muingi minlandikini miandi babotama. (Matai 28:19, 20) Nandi wuvana kifuani. Mbotumunu yi Yesu yidi mua disuasana na mbotumunu yi minlandikini miandi, vayi yidi kuandi dedi mueka. (Mona quadro yintuba, “ Disuasana Didi Mbotumunu yi Yesu na Mbotumunu yi Minlandikini Miandi.”) Bo kabotama, Yesu wukivana muingi kuvanga luzolo lu Tat’andi. (Ebe. 10:7) Bobuawu mvandi bo minlandikini miandi bambotama vantuala batu boso, bawu bakivananga muingi kuvanga luzolo lu Yave kubika kuandi luzolo luawu veka. Mu phila ayoyo, bawu banlandakananga kifuani ki Mfumu’awu.

10. Mbi luzolo widi mu Yesu lukukindisa kuvanga?

¹⁰ Ngie wukikinina ti Yesu widi Muana mueka to wu Yave, widi Ntinu Yave kasola muingi ku tuyadila, wukikululanga ayi wulandakana Tat’andi mu phila yivedila. Mvandi ngie wulonguka ti nandi wudikila batu baba mu nzala, wukindisa bo baba bavonga ayi wubelusa zimbevu. (Matai 14:14-21) Ngie mvaku wummonanga buidi nandi kantuadisilanga kimvuka kiandi bubu. (Matai 23:10) Ayi ngie zebi ti nandi wala vanga malutidi mu bilumbu binkuiza kuntuala, mu kuba Ntinu mu Kintinu ki Nzambi. Buabu buidi wulenda monisina ti wunzolanga Yesu? Mu kulandakana kifuani kiandi. (Yoa. 14:21) Ngie wulenda tona kuvanga mawu mu kukivana ayi kubotama.

11. Kibila mbi kikinza tuidi muingi kubotama ayi kibila mbi wufueti vangila mawu?

¹¹ Kibila mbi kinkinza tuidi muingi kubotama? Yesu wumonisa lutumu lulutidi mu zithumu zi Nzambi bo katuba: “Zola Yave Nzambi’aku mu ntim’aku woso, mu muel’aku woso, mu mayindu maku moso ayi mu zingolo ziaku zioso.” (Malako 12:30) Bukiedika ti mambu amomo mammonisa luzolo luaku mu Nzambi?

12. Kibila mbi ngie wunzodilanga Yave? (Tala mvandi foto.)

¹² Vadi bibila biwombo muingi kuzola Yave. Dedi ngie wuvisa ti, nandi widi “tho yi luzingu” ayi “wutuvana nkhailu wumboti ayi wufuana.”  (Minku. 36:9; Yako. 1:17) Biuma bioso bimboti widi, Nzamb’itu yi luzolo, nkua kukaba wu kuvana biawu.

13. Mbi bimvanganga khudulu kuba nkhailu wulutidi?

¹³ Khudulu, wawu nkhailu wulutidi Yave ka tuvana. Kibila mbi tulenda tubila mawu? Tala kithuadi Yave kadi ayi Muan’andi. Yesu wutuba: “Tata wu kuntsolanga” ayi “Minu yinzolanga Tata”. (Yoa. 10:17; 14:31) Bawu badi kithuadi mu mafunda na mafunda di biveve di mimvu. (Zinga. 8:22, 23, 30) Diawu yindula buidi Yave kabela mu kumona Muan’andi kutovuka ayi kufua. Yave wuzola beni batu kubunda mvandi ngiewu, diawu kavanina Muan’andi wu luzolo mu nkhailu muingi ngiewu ayi batu bankaka babaka luaku lu kuzinga mvu ka mvu. (Yoa. 3:16; Ngala. 2:20) Diawu vasi ko kibila kinkaka kilutidi muingi kuzola Nzambi.

14. Makani mbi mankinza ngie wulenda baka?

¹⁴ Luzolo luaku mu Yave lunluta konzukanga bo wuntatamana kulonguka matedi nandi. Bukiedika tuidi lufiatu ti ngie wuntomba kumfikama bubu ayi mvu ka mvu. Ngie wulenda nunga. Nandi wu kukindisa, muingi wuyangidika ntim’andi. (Zinga. 23:15, 16) Ayi ngie wulenda vanga mawu, kubika kuandi to mu thubulu vayi mu mavanga. Phila ngie wunnatinanga luzingu, yala monisa mu bukiedika ti ngie wunzolanga Yave. (1 Yoa. 5:3)  Amomo, mawu makani malutidi ngie wulenda sola mu luzingu luaku.

15. Buidi wulenda monisina luzolo luaku mu Yave?

¹⁵ Buidi ngie wulenda monisina luzolo mu Yave? Theti mu nzila nsambu wukivana kuidi Nzambi yimueka to yikiedika. (Minku. 40:8) Bosi wunkuiza zabikisa mawu kuidi baboso bo wumbotama. Dedi bo tuma muena va thonono dilongi, yimbanga thangu yi mayangi kuidi baboso bambakanga makani amomo. Ayi ayoyo yidi thonono yi luzingu lumona, kubika ti muingi kunatina luzingu mu phil’aku vayi muingi kusadila Yave. (Loma 14:8; 1 Pete. 4:1, 2) Mawu madi makani malutidi nkinza wunkuiza baka, kibila mankuiza zibula nzila muingi wubaka luzingu lulutidi. Buidi?

16. Dedi bummonisina Minkunga 41:12, buidi Yave kala sakumunina baboso bakivananga kuidi nandi muingi kunsadila?

¹⁶ Yave, nandi mutu lutidi kukaba. Kioso kua tukunkabila, nandi wuluta ku tuvananga bilutidi. (Malako 10:29, 30) Kheti mu nza ayiyi yiwedi mambi, Yave wu tuvananga luzingu luidi tsundu ayi lu mayangi. Ayi mbotumunu yidi to thonono, yisi ko tsukulu. Ngie wulenda sadila Tat’aku yi diyilu mvu ka mvu. Luzolo widi mu Tat’aku yi diyilu, luala tatamana kukonzuka ayi ngie wala zinga mvu ka mvu dedi bo nandi kanzingilanga.—Tanga Minkunga 41:12.

17. Mbi ngie wulenda vana kuidi Yave bio nandi ka katambudibu ko?

¹⁷ Ngie kukivana ayi kubotama, wala baka luaku muingi kuvana nkhailu wulutidi kuidi Tat’aku yi diyilu. Kibila nandi mana kuvana biuma bimboti mu luzingu ayi ngie wulenda vana Mvangi yi diyilu ayi ntoto kiuma kio nandi ka katambudiabu ko, kisalu kiaku—kikuikama. Ayoyi, yawu phila yimboti wulenda sadila luzingu luaku. (Yobi 1:8; 41:11; Zinga. 27:11) Bukiedika, luzolo luaku mu Yave, kiawu kibila kinkinza muingi kubotama.

18. Biuvu mbi wulenda kukikuvusa?

¹⁸ Buidi wuntambudilanda mvutu wu kiuvu akiki, Ngie widi wubotama? Ngie to wulenda  vana mvutu. Vayi diambu dilenda ku kusadisa didi, kukivana kiuvu akiki: ‘Mbi yidi mu kutelimina muingi kubotama?’ (Mava. 8:36) Tebuka moyo mambu matatu tuma longuka. Ditheti luzolo mu kiedika ayi mu busonga. Wukiyuvusa, ‘Bukiedika ti minu yintomba kumona kilumbu kio batu boso bela tuba kiedika ayi kuvanga mambu masonga?’ Dimuadi, luzolo luaku mu Yesu Klisto. Wukiyuvusa, ‘Bukiedika ti minu yintomba Muana Nzambi kaba Ntinu’ama mu kulandakana kifuani kiandi?’ Dintatu ayi dilutidi, luzolo luaku mu Yave. Wukiyuvusa, ‘Bukiedika ti minu yintomba kukuangidika ntima wu Yave mu kuba Nzambi’ama?’ Boti mimvutu mi biuvu abiobio midi ngete, buna mbi widi mu kutelimina muingi wubotama?—Mava. 16:33

19. Kibila mbi wulendi muena ko boma muingi kubotama? Vana kifuani. (Yoane 4:34)

¹⁹ Boti ngie boma wummona muingi kubotama, buna fiongunina kifuani akiki Yesu kasadila. (Tanga Yoane 4:34.) Mona ti Yesu wudedikisa kuvanga luzolo lu Tat’andi na bidia. Kibila mbi? Bidia, nkinzi bidi kuidi befu. Yesu wuzaba ti mamoso Yave ka tudindanga muingi kuvanga, ma tutuadisanga ndandu. Yave kasintomba ko muingi tuvanga kiuma kilenda tula luzingu luitu va kingela. Bukiedika ti kuvanga luzolo lu Yave kunsundula kubotama? Ngete. (Mava. 2:38) Diawu wulenda ba lufiatu ti ngie kutumukina lutumu lu kubotama, wunkuiza baka ndandu. Boti ngie wumonanga ko boma muingi kudia bidia bimboti, buna kibila mbi wummuena boma bu kubotama?

20. Mbi tunkuiza longuka mu dilongi dinlanda?

²⁰ Mbi wuntelimina? Bawombu bantubanga, “yisi ko wukubama.” Bukiedika, makani ma kukivana ayi kubotama mawu makani malutidi nkinza ngie wulenda baka. Diawu vantombuluanga kubotula thangu, muingi kufiongunina buboti makani amomo. Boti ngie mu ntima woso wuntomba kubaka makani ma kubotama, buabu mbi wulenda vanga muingi kukubama? Tunkuiza baka mvutu wu kiuvu akiokio mu dilongi dinlanda.