DILONGI 41
Buidi Wulenda Sadisila Nlonguki wu Kibibila Kukonzuka mu Kiphevi?—Kitini Kitheti
‘Bukiedika benu luidi buka nkanda wu Klisto, befu bisadi biandi tusonika.’—2 KOLINTO 3:3.
NKUNGA 78 “Kulonganga Diambu di Nzambi”
MAMBU TUANLONGUKA *
Vasi ko diambu dinluta vananga mayangi kuidi zikhomba zioso mu kimvuka, kena kumona nlonguki wu Kibibila kukonzuka mu kiphevi ayi kubotama. (Tala lutangu 1)
1. Dedi bummonisina 2 Kolinto 3:1-3, kiyeku mbi befu tuidi mu matedi minlonguki mitu? (Tala foto yidi va busu bu levista.)
Buidi ngie wummuenanga bo nlonguki widi mu kimvuka kinu kambotama? Bukiedika ti ngie wunkuangalalanga! (Matai 28:19) Vayi boti ngie widi nlongisi’andi, bukiedika ti wala luta ba mu mayangi mu thangu kambotama! (1 Tesalonika 2:19, 20) Batu bama botama mvandi badi ‘buka nkanda wusonama,’ kubika kuandi to kuidi batu banlongukanga yawu, vayi kuidi kimvuka kioso.—Tanga 2 Kolinto 3:1-3.
2. (a) Kiuvu mbi tunkuiza baka mvutu ayi kibila mbi? (b) Mbi binsundula Ndongukulu yi Kibibila? (Tala tsudukusu yi bikuma.)
2 Mayangi beni kuzaba ti mu mimvu minna mima vioka Zimbangi zi Yave mu zingonda zioso, bavana ndongukulu yi Kibibila kuidi 10.000.000 di batu * mu nza yimvimba. Ayi mu mimvu beni kuvioka 280.000 babotama ayi bayiza ba minlonguki mi Yesu. Diawu tunkuiza zaba, buidi tulenda sadisila bivevi binkaka bi minlonguki muingi babotama? Bo Yave kakhidi monisa mvibudulu, tufueti vanga mamoso tunnunga muingi kusadisa batu kukonzuka mu kiphevi ayi kubotama muingi bawu mvawu baba minlonguki mi Yesu. Kibila thangu yeka yikhufi!—1 Kolinto 7:29a; 1 Petelo 4:7.
3. Mu matedi kuvana ndongukulu yi Kibibila mbi tunkuiza longuka mu dilongi adidi?
3 Bo tsukulu yima luta fikama, kisalu ki kuvanga minlonguki kima luta ba nkinza. Diawu Nnanga wukuikama kafiongunini mbi tulenda vanga muingi tuluta sadisa minlonguki mitu mi Kibibila kukonzuka mu kiphevi ayi kubotama. Mu dilongi adidi ayi dinlanda, tunkuiza mona mbi tulenda longuka mu kifuani ki mintuami ntuala mipisuka, bansalanga banga minsioni ayi minsungi mi mavula. * (Zingana 11:14; 15:22) Mvandi, tunkuiza mona mbi minlongisi ayi minlonguki balenda vanga muingi ndongukulu yi Kibibila yivangimina mu phila balenda bakila ndandu. Vayi mu dilongi adidi, tuemmona mambu matanu kadika nlonguki kafueti vanga muingi kayonzuka mu kiphevi ayi kabotama.
LONGUKANGA KADIKA SABALA
Yuvula nlonguki’aku boti vadi kibuangu mulenda kalanga muingi mu tatamana ndongukulu’inu (Tala matangu 4-6)
4. Mambu mbi tufueti visa mu matedi kuvana ndongukulu yi Kibibila va muelu nzo voti mu telefone?
4 Zikhomba ziwombo zi bakieto ayi zi babakala bannunganga kuvana ndongukulu yi Kibibila va muelu nzo yi mutu babe dengana. Kheti yidi phila yimboti yi kutonina ndongukulu yi Kibibila, khumbu ziwombo ndongukulu yi phila ayoyi yikalanga ko nkulu ayi yivangamanga ko kadika sabala. Zikhomba zinkaka, bandindanga thalu yi telefone yi mutu babe dengana muingi khumbu zinkaka bayolukanga voti bafilasananga zimensage mu matedi mambu ma Kibibila. Bawu balenda nunga kukoluka mu zingonda ziwombo vayi masolo beni malasa sukila ko mu ndongukulu yi Kibibila. Vayi bukiedika kuandi ti kuvanga to mambu tuma tubila, kuala sadisa nlonguki wu Kibibila kukonzuka mu kiphevi ayi kubotama? Ḿba ndamba.
5. Dedi bummonisina Luka 14:27-33, bifuani mbi Yesu katubila bilenda ku tusadisa mu kisalu ki kuvanga minlonguki?
5 Yesu khumbu yinkaka wufuanikisa mambu mutu kafueti vanga muingi kaba nlandikini’andi, buka mutu wuntomba kutunga nzo voti buka ntinu wunkubama muingi kue nuana mvita. Yesu wutuba ti mutu wuntomba kutunga nzo, kafueti kala ayi kuyindula boti thalu yi zimbongo yintombulu mu nzo beni katidi kutungisa yidi yandi. Mu matedi ntinu wuntomba kuenuanisa ntinu wunkaka, Yesu wutuba ti kafueti kala ayi kuyindula boti widi masodi mafuana muingi kunuanisa mbeni. (Tanga Luka 14:27-33.) Bobuawu mvandi, Yesu wuzaba ti mutu wuntomba kuba nlandikini’andi, kafueti botula thangu ayi kuyindula mbi mawu mansundula mu nandi. Ayi befu tulenda sadisa minlonguki mitu mi Kibibila muingi babika kuviokisa ni sabala yimueka mu khambu longuka. Buidi tulenda vangila mawu?
6. Mbi tulenda vanga boti mutu beki nzo makolama kulongukanga yitu?
6 Tona kukulisa masolo mavangiminanga va muelu wu nzo. Voti wulenda tubilanga matangu ma Kibibila maviakana kadika khumbu wu kumvutukila. Mutu beki nzo na kukolama kulongukanga yitu, buna wulenda kunkuvula boti vadi kibuangu mulenda kalanga muingi mu tatamana ndongukulu’inu. Mvutu kala vana wala monisa boti wumvuanga nkinza ndongukulu’inu. Muingi kunsadisa kafika konzuka mu kiphevi, wulenda kunkuvula mvandi boti kuba mu kulongukanga khumbu wadi voti zitatu mu sabala.
KUBAMA MU KADIKA NDONGUKULU
Kubama buboti mu kadika ndongukulu, ayi monisa nlonguki’aku phila kalenda kubikila dilongi (Tala matangu 7-9)
7. Buidi nlongisi kalenda kubimina buboti mu kadika ndongukulu kankuiza vana?
7 Bo widi nlongisi, wufueti kubamanga buboti mu kadika ndongukulu. Ngie wulenda tona mu kutanga mambu munkuiza longuka ayi matangu ma Kibibila madi muna. Tomba kuvisa mambu malutidi nkinza. Yindula mu ntu dilongi, mua mintu mi malongi, mu biuvu bi dilongi, mu matangu basonika “tanga”, matangu mankaka madi mu dilongi, mu zifoto, ayi fiongunina boti vadi video yilenda sudikisa buboti mambu munlonguka. Bosi yindula buka ti ngie widi na nlonguki’aku ayi widi mu kumvana ndongukulu yi Kibibila mu phila yi sulama ayi yikhambulu phasi. Mu phila ayoyi nlonguki’aku wala fika visa ayi kusadila mambu kadi mu kulonguka.—Nehemia 8:8; Zingana 15:28a.
8. Mbi buku yi Kolosai 1:9, 10, yi tulonga matedi kunatanga minlonguki mitu mi Kibibila mu nsambu?
8 Bo widi mu kukubika ndongukulu wunkuinza vana, sambila kuidi Yave matedi nlonguki’aku ayi zitsatu ziandi. Lomba kuidi Yave muingi ka kusadisa kulonga mambu madi mu Kibibila malenda nyikuna ntima wu nlonguki’aku. (Tanga Kolosai 1:9, 10.) Yindula mambu kalenda mona phasi kuvisa voti kalenda manga kukikinina. Makani maku mafueti ba, kunsadisa kukonzuka mu kiphevi ayi kubotama.
9. Sudikisa buidi nlongisi kalenda sadisila nlonguki’andi kukubika dilongi?
9 Ndongukulu yi Kibibila yi kadika sabala, yala sadisa nlonguki’aku wu Kibibila kutonda Yave ayi Yesu mu mamboti ba kumvangilanga. Ayi mala kumvana phuila yi kubuela longuka. (Matai 5:3, 6) Muingi kabaka ndandu yi ndongukulu’andi, nlonguki kafueti tsikika mayindu mandi mu mambu kadi mu kulonguka. Nsadisa kuvisa nkinza wu kukubikanga kadika ndongukulu ayi kuyindulanga mu phila kalenda sadila mambu beni mu luzingu luandi. Buidi nlongisi kalenda kunsadisila? Kubika yandi dilongi dimueka, muingi kamona phila bamvangilanga mawu. * Nsadisa kubakula mvutu wu kiuvu kisonama, ayi nsadisa mvandi kutula ndimba mu bikuma kalenda fika tebukila moyo mvutu. Bosi nsadisa kuvutula mvutu mu phila kama visila. Bo kamvanga mawu, ngie wala fika bakula phila nandi kadi mu kuvisila mambu kanlonguka. Vadi mambu mankaka wulenda kindisa nlonguki’aku muingi kavanga.
NLONGA BU KUKOLUKILANGA NA YAVE KADIKA KILUMBU
Longisa nlonguki’aku phila yi kusoludila na Yave (Tala matangu 10-11)
10. Kibila mbi tufueti tangilanga Kibibila kadika kilumbu, ayi buidi tulenda luta bakila ndandu mu mawu?
10 Kubika kuandi to kulongukanga kadika sabala, nlonguki mvandi kafueti vanga mangolo muingi kabaka ndandu mu ndongukulu’andi. Nandi kafueti kolukanga na Yave. Buidi kalenda vangila mawu? Mu kunkuwa mu thangu kantanga Kibibila kadika kilumbu ayi mu kunkamba mabanza mandi bo kansambila. (Yosua 1:8; Minkunga 1:1-3) Nsudikisa buidi kalenda landikinina “Thuadusulu yi Matangu ma Kibibila” yidi mu jw.org. * Muingi kunsadisa kubaka ndandu bo kantanga Kibibila kadika kilumbu, nkindisa kuyindulanga mu mambu kadi mu kunlonguka mu Kibibila mu matedi Yave ayi phila kalenda sadila mawu mu luzingu luandi.—Mavanga 17:11; Yakobi 1:25.
11. Buidi nlonguki kalenda longukila kusambila ayi kibila mbi didi diambu dinkinza kuidi nandi kusambilanga Yave?
11 Kindisa nlonguki wu Kibibila kasolulanga na Yave kadika kilumbu mu nzila nsambu. Buboti kuvanganga nsambu va thononu ayi ku tsuka ndongukulu ayi tangunanga dizina di nlonguki’aku mu minsambu beni. Bo nandi kankuwa minsambu miaku wumvangila mu ntima woso, buawu mvandi kala longukila kuzibudilanga Yave ntim’andi mu nzila muan’andi Yesu Klisto. (Matai 6:9; Yoane 15:16) Yindula buidi kutanganga Kibibila kadika kilumbu (kukuwanga Yave) ayi kusambila (kukolukanga na Yave) kulenda sadisila nlonguki’aku kufikama kuidi Nzambi! (Yakobi 4:8) Na kuvanganga mambu amomo kadika kilumbu, mawu mala kunsadisa kukivana ayi kubotama. Mambu mbi mankaka mala kunsadisa?
NSADISA KUKINDISA KIKUNDI KIANDI NA YAVE
12. Buidi nlongisi kalenda sadisila nlonguki’andi kukindisa kikundi kiandi na Yave?
12 Mambu nlonguki kadi mu kulonguka mu ndongukulu’andi yi Kibibila mafueti nyikuna kubika to mabanza mandi vayi mvandi ntim’andi. Kibila mbi? Kibila bo tuntubila ntima—tuidi mu kutubila mvandi matedi mayindu mitu, mabanza mitu ayi zinzinunu zitu. Yesu wuba nlongisi wumboti, diawu batu baba kunzodilanga. Vayi batu baba kunlandikininanga kibila malongi mandi maba nyikunanga mintima miawu. (Luka 24:15, 27, 32) Nlonguki’aku kafueti tadila Yave banga Mutu wukiedika. Mutu kalenda vanga kikundi kifikama, kalenda tadila banga Tata ayi Nzambi. (Minkunga 25:4, 5) Bo muidi mu kulonguka, tubila beni matedi zikhadulu zimboti Yave kadi. (Esodu 34:5, 6; 1 Petelo 5:6, 7) Diosokua dilongi muidi mu kulonguka, tubila beni matedi Kimutu ki Yave. Sadisa nlonguki’aku kuvua nkinza zikhadulu zimboti Yave kadi—dedi luzolo, mamboti, ayi kiadi. Yesu wutuba ti lutumu lutheti ayi lulutidi luidi ‘kuzola Yave Nzambi’aku.’ (Matai 22:37, 38) Sadisa nlonguki’aku kazola Yave.
13. Buidi wulenda sadisila nlonguki’aku kuzaba zikhadulu zimboti Yave kadi?
13 Bo wunkoluka na nlonguki’aku, nzabikisa bibila wunzodilanga Yave. Nandi wala mona nkinza widi mu kukuna kikundi kiandi naveka na Nzambi. (Minkunga 73:28) Dedi, mu kilongulu wunlongukilanga na nlonguki’aku, vadi mambu mantubila metedi luzolo, nduenga, busonga, voti mangolo ma Yave manyikunanga ntim’aku? Zabikisa mawu kuidi nlonguki’aku ayi ḿbika kazaba ti akiokio kidi kibila kimueka mu bibila widi muingi kuzola Tat’aku yi diyilu. Vayi vadi mambu mankaka wunlonguki’aku kafueti vanga muingi kukonzuka mu kiphevi ayi kubotama.
NKINDISA KALANDAKANANGA ZIKHUTUKUNU ZI KIMVUKA
Kindisa nlonguki’aku kafika tona kulandakananga zikhutukunu! (Tala matangu 14-15)
14. Buidi Ebeleo 10:24, 25, yimmonisina ti kulandakananga zikhutukunu kulenda sadisa nlonguki’aku kukonzuka mu kiphevi?
14 Befu boso tuntombanga minlonguki mitu mi Kibibila miyonzuka mu kiphevi. Kuba kindisa kulandakana zikhutukunu, yawu phila yilutidi balenda fika konzukila mu kiphevi. Ayi minsamuni miwombo bantubanga ti mu thangu minlonguki miawu batona kulandakana zikhutukunu, bafika konzukanga mu kiphevi (Minkunga 111:1) Minlongisi miwombo mipisuka bantubanga mvandi ti, mambu mawombo mansadisanga nlonguki wu Kibibila kukonzuka mu kiphevi, mu zikhutukunu kanlongukilanga mawu. Tanga Ebeleo 10:24, 25 na nlonguki’aku wu Kibibila ayi nsudikisa ndandu kala baka mu kulandakana zikhutukunu mu kimvuka. Monisa kuidi nlonguki’aku video Mambu mbi Mammonikanga ku Nzo yi Kintinu? * Sadisa nlonguki’aku kuvisa nkinza widi mu kulandakana zikhutukunu zioso ayi kubika khambuanga mu ziawu.
15. Mbi wulenda vanga muingi kusadisa nlonguki’aku wu Kibibila kulandakana zikhutukunu?
15 Boti nlonguki’aku yibubu katoniniabu ko kulandakana zithutukunu voti kalandakananga ko zikhutukunu zioso, mbi ngie wulenda vanga? Nkamba mu mayangi moso mambu wulongukizi mu lukutukunu. Na kumona phila wumvuilanga nkinza zikhutukunu ayi ndandu zi kutuadisanga, mawu mala kumvanga kutona kulandakanga zikhutukunu. Mvana Kibanga ki Nsungi voti Thuadusulu yi Lukutukunu muidi mu kulonguka. Mmonisa mambu muala longuka mu lukutukunu ayi nyuvula boti vadi mambu katidi kuzaba. Mambu nandi kala longuka mu lukutukunu lutheti kala landakana, mala ba beni disuasana na mambu kama longuka mu binganga binkaka kayenda. (1 Kolinto 14:24, 25) Nandi wala zaba batu badi bifuani bimboti kalenda landakana ayi balenda kunsadisa kukonzuka mu kiphevi.
16. Mbi nlongisi kalenda vanga muingi kusadisa nlonguki’andi kubaka makani ma kubotama? Ayi mbi tuala longuka mu dilongi dinkuiza?
16 Mbi nlongisi kalenda vanga muingi kusadisa nlonguki’andi kubaka makani ma kubotama?. Mu kunkindisa kulongukanga kadika sabala ayi kukubikanga ndongukulu’andi yi Kibibila. Mvandi kalenda kunkindisa muingi kukolukanga na Yave kadika kilumbu mu nzila nsambu muingi kukuna kinkundi kifikama ayi Nandi. Mvandi kalenda kunkindisa kulandakananga zikhutukunu zioso. (Tala va tsielu 12 vantuba “ Mbi Minlonguki mi Kibibila Bafueti Vanga Muingi Kubotama.”) Vayi dilongi dinkuiza, diala sudikisa mambu matanu mankaka minlongisi mi Kibibila balenda vanga muingi kusadisa minlonguki mi Kibibila kubaka makani ma kubotama.
NKUNGA 76 Yangalala mu Ntim’aku
^ Lut. 5 Kulongisa mutu kunsundula, kunsadisa kayindudila mu phila yimona. Matangu ma mvu awuwu 2020, Matai 28:19, ma tutebudi moyo ti kiyeku kitu kisi ko to kulongisa batu mambu Kibibila kinlonga, vayi kuba sadisa mvawu baba minlonguki mi Yesu mibotama. Mu dilongi adidi ayi dinkuiza, tukuinza mona buidi tulenda buela pisukila mu kisalu akiokio kinkinza.
^ Lut. 2 TSUDUKUSU YI BIKUMA: Boti ngie wunsolulanga na mutu matedi Kibibila mu kusadila bilongukulu bi kulongila, buna ngie widi mu kuvana ndongukulu yi Kibibila. Boti ngie malonguka yandi khumbu wadi ayi widi lufiatu ti nandi wala tatamana kulonguka, buna wulenda sonika nlonguki wumueka mu kipholo kiaku ku tsuka ngonda.
^ Lut. 3 Mu dilongi adidi ayi dinkuinza, muidi mvandi zithuadusulu zidi mu Km yi Ngonda Yisambuadi mvu 2004 ayi Ngonda Yintanu mvu 2005, yidi ntu diambu “Buidi Wulenda Longila Muingi Nlonguki Kayonzuka mu Kiphevi.”
^ Lut. 9 Tala video yidi minutu minna(4) yintuba, Longa Nlonguki’aku Kukubika Ndongukulu. mu JW Library®, kota vantuba MIDIA > ZIKHUTUKUNU AYI KISALU KI KUSAMUNA > BUELA PISUKA MU KUSAMUNA.
^ Lut. 10 Kota vantuba MALONGI MA KIBIBILA > LUSALUSU MUINGI KULONGUKA KIBIBILA.
^ Lut. 14 Mu JW Library®, kota vantuba MIDIA > ZIKHUTUKUNU AYI KISALU KI KUSAMUNA > BILONGULU TUNSADILANGA MUINGI KULONGA.
